финансиска измама – Kurir.mk

Нејмар ослободен од обвинението за финансиска измама

Катерина Бојаџиева — Tue, 13 Dec 2022 14:59:25 +0000

Шпанскиот суд во кој кон средината на октомври почна процес против бразилската фудбалска ѕвезда Нејмар за наводни неправилности при неговиот трансфер во Барселона во 2013 година, денеска во целост го отфрли случајот. Покрај Нејмар, на обвинителната клупа во судот во Барселона се најдоа и неговите родители, поранешните претседатели на Барселона, Жозеп Бартомеу и Сандро Росел, како и поранешниот прв човек на Сантос, Одилио Родригез. Случајот произлезе од тужба од бразилската компанија DIS, која поседуваше 40 отсто од правата на Нејмар додека бразилскиот репрезентативец настапуваше во Сантос. Компанијата тврди дека трансферот на Нејмар од Сантос во Барселона бил реализиран по значително пониска цена од реалната пазарна вредност на фудбалерот. Бразилската компанија за сите обвинети бараше затворски казни до шест години и парична казна до 195 милиони евра. Судот одлучи да го „ослободи Нејмар“ и другите вкупно осум обвинети, истакнувајќи оти не се пронајдени докази за вина, а со тоа ниту „штета за обвинителите“. Судењето, кое се однесуваше на делата корупција и измама, го одбележа вистински пресврт кога Обвинителството, кое првично бараше казна затвор од две години и глоба од десет милиони евра за Нејмар, го повлече обвинението за сите обвинети, и наведе дека тврдењата на бразилската компанија „не се темелат на докази“, туку на „претпоставки“.

Поранешен претседател на Мексико е обвинет за учство во шема за финансиска измама од милиони долари

Тале Кристо — Thu, 07 Jul 2022 19:42:35 +0000

Мексиканската агенција за борба против перење пари денеска објави дека го обвинила поранешниот претседател Енрике Пења Нието за неговата вмешаност во мултимилионска шема за финансиска измама. Ова е прво формално обвинение против Пења Нието и покрај широко распространето сомневање за корупција за време на неговиот претседателски мандат од 2012 до 2018 година. Актуелниот претседател на Мексико, Андрес Мануел Лопез Обрадор, вети дека ќе ја искорени корупцијата, но досега не презел акција против неговиот претходник. Обвинението на мексиканската служба за финансиско разузнавање сe уште не значи дека обвинителите веќе одлучиле да поднесат какви било формални обвиненија против поранешниот шеф на државата. Директорот на финансиското разузнавање Пабло Гомез рече дека федералните обвинители добиле информации за нелегалните средства и дека истражуваат. Според Гомез, две компании управувани од роднините на Пења Нието добиле владини договори во вредност од половина милијарда долари додека тој бил шеф на државата. Гомез не прецизираше за кои компании станува збор, но рече дека Пења Нието има удел во нив. По напуштањето на претседателската функција, Енрике Пења Нието се пресели во Шпанија и оттогаш не дава никакви јавни коментари за обвинувањата против него.

Италијанската полиција и Интерпол открија голема финансиска измама

Тале Кристо — Mon, 21 Dec 2020 10:50:53 +0000

Италијанската финансиска полиција го откри авторот на досега најголемиот грабеж во сферата на кибер финансиите, односно берзата на која се разменува криптовалутата Биткон. Станува збор за 34-годишен жител на Фиренца, кој како сопственик на овластена компанија за менување на криптовалута во други валути, оштетил штедачи од целиот свет за 120 милиони евра. Исто така, тој им овозможил на други хакери да ги пренасочат или присвојат парите на штедачите на сопствените сметки преку информатичката платформа „Битгрејл“, а со тоа да оштетат вкупно 230.000 сопственици на криптовалути од целиот свет. Акцијата беше успешно завршена благодарение на соработката на италијанската полиција и Интерпол.