ФК Вардар – Kurir.mk

ФК Вардар доби свој дом во Аеродром, пуштен во употреба новиот фудбалски терен наменет за младинската школа на клубот

Тале Кристо — Thu, 19 Oct 2023 08:49:07 +0000

На свечен настан, вчера во Општина Аеродром официјално беше пуштен во употреба новиот фудбалски терен наменет за младинската школа на фудбалскиот клуб Вардар. На настанот присуствуваше и се обрати градоначалникот на Општина Аеродром, Тимчо Муцунски, како иницијатор на оваа активност за поддршка на фудбалскиот клуб. Тој во своето обраќање потенцираше дека ветувањето за поддршка и враќање на Вардар на старите патеки, стана реалност и со тоа Општина Аеродром стана првата општина во Скопје која дава директна поддршка за „црвено – црниот“ клуб кој е национална гордост на Македонија. „Вардар, Комити и младите фудбалски таленти отсега имаат свој дом во Аеродром и со ова Аеродром е првата општина во Скопје која дава поддршка за црвено – црните, клубот кој е национална и спортска гордост на Македонија“, истакна Муцунски. Станува збор за целосно обновен спортски терен чија реконструкција опфаќа нова тревна подлога, системи за одржување и наводнување, ново осветлување и целосна реконструкција на соблекувалните. Проектот го реализираше Општина Аеродром со поддршка на приватниот сектор. Градоначалникот Муцунски се заблагодари за претседателот на советот Дејан Митески, фудбалскиот клуб Вардар и навивачката група Комити за својот придонес и поддршка за реализација на оваа идеја која е од големо значење за фановите, клубот и генерално за спортот во Македонија. На самиот крај тој нагласи дека вистинско задоволство е во присуство на фановите на Вардар, поранешните и актуелни играчи, како и младите таленти, да се отвори новото спортско игралиште каде ќе продолжи да се испишува на историја на клубот и да се градат идните национални фудбалски таленти.

Гази Баба со директна финансиска поддршка за ФК Вардар

Ивана Ефремовски — Thu, 28 Sep 2023 14:42:04 +0000

Во објава на својата официјална страна на Фејсбук, градоначалникот на општина Гази Баба, Бобан Стефковски информира дека Советот на општина Гази Баба на денешната редовна седница на негов предлог донел одлука за доделување на финансиска поддршка за ФК Вардар. Во објавата градоначалникот Стефковски напиша: „ФИНАНСИСКА ПОДДРШКА ЗА ФК ВАРДАР ОД ОПШТИНА ГАЗИ БАБА. Македонскиот бренд, фудбалскиот клуб Вардар добива директна финансиска поддршка од општина Гази Баба. Со задоволство сакам да објавам во јавноста дека на денешната редовна седница Советот на општина Гази Баба го прифати мојот предлог и одобри финансиска поддршка за функционирањето на ФК Вардар во висина од 250.000 денари. Вардар е срцето на Македонија! Вардар ја заслужува нашата поддршка“! – напиша Стефковски.

ФК Вардар го промовираше Лутфи Билали

Бошко Тасиќ — Sun, 10 Sep 2023 10:48:12 +0000

Фудбалскиот клуб Вардар репрезентативната пауза ја искористи за подигнување на формата на фудбалерите, но и за докомплетирање на својот ростер. Најтрофејниот фудбалски колектив објави ново засилување. Нов член на „црвено-црните“ е Љутфи Билали, поранешен фудбалер на Силекс, Пелитер и Ренова.

Васовски нов тренер на ФК Вардар, во клубот се враќа и голема спортска легенда

Ивона Петрова — Tue, 22 Aug 2023 14:31:57 +0000

ФК Вардар соопштува дека од денес за нов тренер на клубот е назначен Александар Васовски - Тетовче, играчка легенда на клубот и човек под чие водство ФК Вардар ја освои последната шампионска титула во 2019 година. -Покрај него, во клубот се враќа и големата спортска легенда Ѓокица Ѓоко Хаџиевски, најтрофејниот Вардаров тренер и човекот кој со "црвено-црните" има освено вкупно пет шампионски титули и два национални купа. Веруваме дека со неговото богато интернационално тренерско искуство и знаење, ќе биде од огромна помош за тренерот Васовски, но и за целокупниот тим. Особено не радува искрениот пристап на двајцата тренери, кои веднаш и без размислување ја прифатија понудата на клубот. Сметаме дека спојот на професионализам и искуство и на желбата и знаењето, ќе биде темелот врз кој во понатамошниот период ќе се развива клубот, градејќи го постепено потребниот победнички менталитет, соопштија од Вардар. Првиот официјален натпревар за тренерот Васовски, како и за Ѓоко Хаџиевски ќе биде веќе во среда, против екипата на Силекс, кој Вардар ќе го одигра на стадионот "Борис Трајковски" во населбата Маџари, со почеток од 16:30 часот, Вардар ги поканува сите навивачи на клубот да присуствуваат на натпреварот, да ги поздрават Вардарови легенди и да им дадат поддршка на фудбалерите, за да стигнат до првата победа.

Доктор Емил Угриновски и „Неуромедика“ – нов спонзор на ФК Вардар и Комити

Ивана Ефремовски — Thu, 17 Aug 2023 17:57:10 +0000

Во време кога ФК Вардар почнува нова приказна, отвора нова страница од својата богата и долга спортска историја, и тргнува во испишување на резултати што треба да донесат враќање на клубот онаму каде припаѓа, се проширува и зголемува и бројот на клупските поддржувачи, помагатели и пред се спортски и бизнис пријатели. Се потврдува дека ФК Вардар е спортски бренд, и тоа го препознаваат многу компании во Македонија. „Со голема радост и возбуда го најавувам новото спонзорство на Фудбалскиот Клуб Вардар. Во своето своевидно утврдување, ова партнерство има длабоки корени во мојата посветеност кон здравствениот сектор и исто така, во мојата страст кон спортот, особено кон фудбалот. ФК Вардар го симболизира силниот дух на тимската работа, посветеноста и стремежот кон успехот. Ова спонзорство е повеќе од финансиска поддршка – тоа е израз на мојата верба во моќта на заедничката ангажираност за создавање позитивни промени. Верувам дека здравјето и физичката активност се взаимно поврзани. Со гордост стојам зад ФК Вардар и нивната посветеност кон успехот. Со силниот дух на тимска работа и добрите здравствени навики, сме подготвени да го постигнеме најдоброто. Верувам дека ова партнерство ќе им помогне на спортистите и навивачите на ФК Вардар да се движат кон нови висини и да го инспирираат останатите го следат патот кон здравјето и успехот”, изјави доктор Емил Угриновски, директор на приватната болница ”Неуромедика”.

Мицкоски купи 30 сезонски карти за ФК Вардар

Ивона Петрова — Thu, 03 Aug 2023 16:15:45 +0000

Претседателот на ВМРО-ДПМНЕ Христијан Мицкоски објави дека купи сезонски билети за да го помогне фудбалскиот клуб Вардар. -Денес купив 30 сезонски карти за ФК Вардар. Да го помогнеме Вардар, да покажеме дека навивачите се тука за најтрофејниот македонски клуб. Со срце за Вардар, објави Мицкоски.

Бугарска фондација со понуда до ФК Вардар, од клубот порачаа „Вардар не е на продажба“

Ивона Петрова — Mon, 31 Jul 2023 18:10:20 +0000

Фудбалскиот клуб Вардар објави дека до нив пристигнала финансиска понуда од страна на Бугарската Фондација “Македонија”, која што сака да го купи Вардар, а со тоа и да го смени целиот идеолошки наратив, врз кој 76 години, континуирано се развивал клубот, велат од клубот. -Нашиот став е дека воопшто не постои простор за дискусија со луѓе кои што не го признаваат македонскиот идентитет, па затоа одговорот ќе го објавиме вака јавно, нека биде тоа одговор на македонскиот народ, кон нечесната и крајно тенденциозна понуда: ВАРДАР НЕ Е НА ПРОДАЖБА! На ваквите напади ќе продолжиме да одолеваме, само доколку секој од нас ја разбере важноста на купување на членската карта. Секој! Членската карта е наш одговор и најважно оружје при одбраната на ВАРДАР – народниот клуб, највредното кое го поседува Македонија на спортски план и симболот на нашиот вечен непокор! Голем е, затоа сакаат да го уништат – голем е, затоа ќе го заштитиме! Воедно, ги повикуваме сите надлежни институции, особено оние кои подадоа рака. Време е за акција, народот повикува на борба за клубот. Членската карта е обврска за сите. Подадената рака значи одговорност! Биди на стадионот кога ќе грмне “Море сокол пие”. Нека биде тоа нашиот одговор, стои во објавата на ФК Вардар.

Владица Брдаровски повторно фудбалер на ФК Вардар

Ивона Петрова — Sun, 16 Jul 2023 11:07:30 +0000

Владица Брдаровски е новиот фудбалер на ФК Вардар, објави клубот. -Репрезентативецот на Македонија повторно ќе ги брани боите на клубот, за кого во периодот од 2015 - 2020 година, одигра 152 официјални натпревари, освои 4 титули и беше дел од историскиот пласман на Вардар во Лигата на Европа. Време е за нови победи и тутули во дресот на големиот Вардар! Дојбредојде назад Брда, му посакаа од Вардар,

ФК Вардар собра над 500.000 денари од продажбата за членски карти

Ивона Петрова — Thu, 06 Jul 2023 09:26:24 +0000

ФК Вардар денот го започна со одлична вест. За нешто повеќе од 24 часа, собрани се повеќе од 500 000 денари, од акцијата за продажба на членски карти. Радува фактот што, се поголем број на навивачи, ја препознаваат важноста на акцијата и моментот. Купи членска карта, и не дозволувај твоето место на стадионот, да остане празно! На сите продажни места на "МК Тикетс": LITERATURA.MK – EAST GATE MALL LITERATURA.MK – VERO JUMBO LITERATURA.MK – ГТЦ ПРИЗЕМЈЕ LITERATURA.MK – Ул. Македонија LITERATURA.MK – ТЦ БУЊАКОВЕЦ LITERATURA.MK – SKOPJE CITY MALL ЈУГОТОН – ГТЦ 1 кат ЈК Травел, ТЦ Бисер – Аеродром Макпетрол Козле Макпетрол Илинденска Макпетрол Влае Членските карти се достапни и онлајн НАВИВАМЕ ЗА КЛУБОТ НА НАРОДОТ!

Миленковски: Целта ни е да собереме половина милион евра

Ивона Петрова — Wed, 05 Jul 2023 12:11:53 +0000

Новата управа на најтрофејниот македонски фудбалски клуб Вардар на денешната прес-конференција ја презентираше финансиската состојба и целта на акцијата за спас на „црвено-црните“. ФК Вардар се наоѓа во тешка финансиска состојба со блокирана сметка и долгови од околу три милиони евра. Сепак предводникот на новото раководство, Милорад Миленковски од навивачката група Комити, верува дека клубот може да се „дигне“, а како прв чекор е акцијата со продажба на сезонски билети. - Покажавме дека со нашиот ентузијазам, со единство и со нашата љубов кон клубот успеавме да го вратиме клубот во Првата лига. Следно е нашата акција која има за цел да се продадат што е можно повеќе годишни билети за следење на натпреварите на ФК Вардар со што се планира колку толку да се санира финансиската ситуација. Амбицијата ни е да собереме околу 500 илјади евра. Очекуваме поддршка од институциите во државата, навивачите на Вардар. Клубот е на народот, па затоа ги повикуваме сите скопјани и Македонци воопшто да бидат дел од најголемата спортска акција, рече Миленковски. Акцијата на Комити доби поддршка и од фудбалерите кои веруваат дека најпосле ќе го добијат заслуженото за сè што сторија за Вардар кога му беше најтешко на клубот. Преку купување на сезонски билети во акцијата за спас на Вардар веќе се вклучија неколку градоначалници од скопски општини. Ветување за финансиска помош Комити добиле и од Град Скопје. Миленковски им се заблагодари на директорката на Управата за јавни приходи, Сања Лукаревска, како и на Акционерското друштво за изградба и стопанисување со станбен простор и деловен простор (АДСДП) со кои имал конструктивни состаноци на кои добил ветување за бришење на камати на одредени долгови. По отпочнување на акцијата „Купи билет за спас на ФК Вардар. Сега е време, за нешто многу поголемо!“ за неполни 24 часа собрани се околу 300.000 денари. Сезонските билети чинат 1000 денари, и може да се купат онлајн преку страницата на „МК Тикетс“, и во живо.