Флорентино Перез – Kurir.mk

Перез ќе го тужи поранешниот плициски комесар на Шпанија кој го обвини за поткуп на судии

Бошко Тасиќ — Wed, 04 Oct 2023 03:57:44 +0000

Шпанскиот фудбалски тим Реал Мадрид излезе со соопштение во врска со наводите за поткуп на судии За потсетување, поранешниот комесар на шпанската национална полиција, Хозе Мануел Виљарехо, изјави дека мадридскиот клуб поткупувал судии уште пред Барселона да почне да го прави тоа: „Тие беа забележани во ова и пред случајот Негреира. Секој што ќе се осмели да го осуди Перез би извршил самоубиство“.

- По ваквата изјава на Виљарехо, претседателот на Реал, Флорентино Перез, нареди итно да се почне соодветна правна постапка против поранешниот комесар за лажните обвинувања искажани на каталонското радио RAC1, се вели во соопштението на „Кралскиот клуб“

Претходно се дозна дека и претседателот на Барселона, Жоан Лапорта подготвува тужба против Виљарехо.

Флорентино Перез и Анчелоти се договорија: Реал заврши со засилувањата, нема да има понуда за Мбапе

Ристе Здравков — Wed, 30 Aug 2023 12:24:49 +0000

Реал Мадрид нема намера да прави „бура“ во самата завршница од преодниот рок и воопшто нема да преговара со ПСЖ за трансферот на Килијан Мбапе. Мадридскиот весник „Ас“ пишува дека ова е одлуката на последниот состанок меѓу претседателот Флорентино Перез и тренерот Карло Анчелоти, при што било решено дека „кралевите“ не треба да влезат во пазарење со францускиот првак, кога следното лето би можеле без никаква отштета да го доведат Мбапе на „Сантијаго Бернабеу“. Планот на Реал отсекогаш бил потпис со Мбапе од 2024 година, но ова беше нарушено со неочекуваното заминување на Карим Бензема во Саудиска Арабија. „Кралевите“ останаа без класична „деветка“ со исклучок на Хоселу, Перез ги разгледал опциите на пазарот, но веќе станува јасно дека првиот човек на Реал нема намера да троши богатство летово, чекајќи догодина да го донесе својот „џек-пот“ во Мадрид. Тој ги разгледувал опциите за едногодишна позајмица на неколку врвни голгетери, сите обиди биле експресно одбивани од нивните клубови, па Перез решил да не брза. Впрочем, тој во тимот ги има Винисиус и Родриго како напаѓачи, а за следната година е договорен и трансферот на бразилскиот суперталент Ендрик, кој ќе дојде во Мадрид веднаш штом стане полнолетен. Јасно е дека ќе недостига искуство во нападот, но Флорентино нема намера да троши богатство на играч што следното лето не би бил загарантиран првотимец (кога во тимот би дошол и Мбапе), па Перез е решен дури и да се коцка со пласманот сезонава, за следното лето да формира вистински дрим-тим во Мадрид. Со друг тренер на клупата, бидејќи Карло Анчелоти останува во Реал уште сезонава, а потоа заминува на функцијата селектор на репрезентацијата на Бразил.

ПСЖ верува дека Мбапе веќе се има договорено со Реал за беспари да се пресели во Мадрид

Ристе Здравков — Fri, 07 Jul 2023 19:18:41 +0000

Како што пренесува Радио Монте Карло, раководството на ПСЖ верува дека Килијан Мбапе веќе има договор со Реал за беспари да се пресели во Мадрид летото во 2024 година. Килијан Мбапе не сака да ја активира клаузулата за продолжување на соработката со ПСЖ до 2025 година, па доби ултиматум од „светците“, или ќе стави потпис на нов договор, или ќе биде продаден до крајот на летото. Но се чини дека напаѓачот има други планови, како што пренесува Радио Монте Карло, раководството на ПСЖ верува дека фудбалерот веќе има договор со Реал за беспари да се пресели во Мадрид во 2024 година. Наводно веќе е направен „дил“ лично со претседателот Флорентино Перез. ПСЖ сепак нема да се предаде и ќе се обиде да го предомисли Килијан Мбапе.

Мбапе доби „шлаканица“ од Перез

Ристе Здравков — Tue, 13 Jun 2023 08:34:42 +0000

ПСЖ нема многу избор. Доколку сака да заработи пари, ќе мора уште ова лето да го продаде Килијан Мбапе. Францускиот фудбалер им даде на знаење на челниците на клубот дека нема намера да ја продолжи опцијата да го продолжи договорот на уште една година, поточно до 2025 година. Многумина веруваат дека Мбапе ќе оди во Реал Мадрид, но оттаму доаѓаат поинакви информации. „Марка“ пишува дека ситуацијата на Мбапе во Реал воопшто не ја гледаат како свој проблем и дека немаат интерес да го направат првиот чекор. Весникот близок до Реал пишува дека Флорентино Перез нема да биде тој што прв ќе направи нешто, првиот чекор ќе мора да го направат Мбапе и ПСЖ. Односите меѓу двата клуба се доста ужасни особено по се што се случи минатата година кога Перез понуди 180 милиони за да го доведе Мбапе, но француската суперѕвезда на крајот остана во Париз. Реал Мадрид веќе ја изгради својата стратегија за летниот преоден рок и веќе го започна трансфер процесот со доаѓањето или враќањето на Фран Гарсија, Брахим Дијаз и Џуд Белингем. Во најтрофејниот европски клуб му го доделија славниот број 7 на Винисиус, што е јасен знак дека Бразилецот се очекува да биде лидер на теренот, па доведувањето на Мбапе и не е толку потребно.

Перез до Бензема: Ќе влезеш во историјата на Реал како една од најголемите легенди

Ивана Ефремовски — Tue, 06 Jun 2023 13:05:25 +0000

Претседателот на Реал Мадрид, Флорентино Перез се обрати до Карим Бензема по заминувањето на напаѓачот од „кралскиот клуб“. -Денес е многу тежок ден за мене, кога ми доаѓаат на ум спомените и емоциите доживеани во изминатите 14 години. Од објавувањето на збогувањето со Карим, видов голема тага во Мадрид и љубителите на фудбалот кои беа трогнати од магијата на фудбалер како Карим. „Драг Карим, ти стана еден од најдобрите играчи на сите времиња. Видовме како настапуваше неверојатно со нашиот амблем низ светот. И ниту еден Мадридист нема да го заборави тоа. Сите сме многу горди на тебе. Дојде овде многу млад и стана симбол и една од нашите големи легенди. Со твоето разбирање за фудбалот, постигнатите голови. Успеа да не раздвижиш. Беше и се уште си извонреден играч. На некои им требаше време да го разберат ова. Ги бранеше вредностите на Мадрид. Ти беше пример во се. Влегуваш во историјата на Реал како една од најголемите легенди. Никој не освоил повеќе од тебе. Времето во Реал Мадрид го завршуваш со Златната топка. Како претседател, морам да ти кажам дека во сите овие години не знаев да кажам „но“ за твоето однесување. Бензема, ти си пример за сите деца, без разлика дали играат фудбал или не. Ти благодарам Карим за оваа приказна за фудбалска љубов која веќе ја живеевме заедно и која ќе остане со векови, стои во обраќањето на Перез до Бензема. Францускиот фудбалер кариерата ќе ја продолжи во Саудиска Арабија. (МИА)

Перез одлучи – Анчелоти, Модриќ Бензема и Крос остануваат во Реал М

Бошко Тасиќ — Fri, 19 May 2023 04:39:54 +0000

Претседателот на Реал Флорентино Перез му даде поддршка на тренерот Карло Анчелоти по елиминацијата на Кралевите од Манчестер Сити во полуфиналето на Лигата на шампионите, пренесуваат шпанските медиуми. Реал Мадрид во полуфиналниот реванш од Лигата на шампионите беше декласиран од Манчестер Сити со 4:0. Шпанските медиуми наведуваат дека Перез по непроспиената ноќ одлучил Анчелоти да го заврши договорот со Реал, односно да го води мадридскиот клуб до 30 јуни 2024 година. Претседателот на кралевите од Мадрид воедно се договорил со спортскиот сектор на крајот на сезоната да им ги продолжи договорите на трите големи ѕвезди , искусните Карим Бензема, Тони Крос и Лука Модриќ. Овие тројца играчи имаат договори со Реал до крајот на сезоната, а првиот човек на „кралскиот клуб“ одлучи Бензема, Крос и Модриќ да бидат столбот на тимот од стадионот „Сантијаго Бернабеу“ и во следната сезона. - Прашање на денот е кога ќе биде продолжена соработката со тројцата фудбалери. Во Реал веруваат дека евентуалното заминување на сите тројца играчи во ист преоден рок би било голем проблем за Реал - пренесуваат шпанските медиуми. Перез во наредните денови ќе одржи состанок со Анчелоти и спортскиот директор Хозе Анхел Санчез на кој ќе се анализира моменталната ситуација во клубот и можните засилувања во летниот преоден рок.

Зинедин Зидан повторно седнува на клупата на Реал Мадрид?

Бошко Тасиќ — Fri, 28 Apr 2023 05:01:50 +0000

Претседателот на Реал Мадрид Флорентино Перез наводно повтно му се јавил на Зинедин Зидан и посакува францускиот стратег повторно да биде тренер на тимот. Иднината на Карло Анчелоти е неизвесна и веројатно ќе зависи од тоа дали Реал Мадрид ќе ја освои Лигата на шампионите. Реални се шансите Анчелоти по крајот на оваа сезона да стане селектор на Бразил, а Реал Мадрид да добие нов тренер.

Флорентино Перез не остава ништо на случајот, а информациите од Франција велат дека тој стапил во контакт со Зинедин Зидан и му го понудил тренерското место во случај на заминување на Анчелоти. Зинедин Зидан во два наврати веќе беше тренер на Реал Мадрид, од 2016 до 2018 и од 2019 до 2021. Тој со кралскиот клуб трипати по ред ја освојуваше Лигата на шампионите и двапати беше шампион во Ла Лига.

Перез во 2025 година ќе се повлече од функцијата претседател на Реал

Ивана Ефремовски — Tue, 17 Jan 2023 15:41:09 +0000

Претседателот на Реал Мадрид, Флорентино Перез, ќе се повлече од функцијата во 2025 година. Според шпанскиот новинар Чиро Лопез првиот човек на „кралскиот клуб“ смета дека завршувањето на реконструкцијата на стадионот „Сантијаго Бернабеу“ е негова последна голема должност кон клубот. Перез првпат го презеде Реал Мадрид во јули 2000 година. Во февруари 2006 година, тој поднесе оставка. Флорентино по втор пат стана претседател на „кралевите“ во 2009 година и оттогаш е на функцијата. Реал Мадрид се наоѓа на второто место во Ла Лига со 38 бодови од 16 кола. Мадридскиот клуб заостанува три бода зад лидерот во првенството – Барселона. (МИА)

Мбапе не е единствен кој го изневерил Реал ова лето

Ристе Здравков — Sat, 15 Oct 2022 08:55:26 +0000

Еден од најдобрите фудбалери во светот, Килијан Мбапе летово требаше да се пресели во Реал Мадрид, но во последен момент се предомисли и потпиша нов договор со ПСЖ. Претседателот на Реал Мадрид, Флорентино Перез смета дека е измамен поради потегот на Мбапе, па сега не сака да тргне по потписот на Французинот кој кажа дека не е среќен во ПСЖ. Шпанските медиуми пишуваат дека Мбапе не е единствен кој го изневерил Реал Мадрид, туку тоа го направил и Луис Кампос. Познатиот спортски работник имал договор со шпанскиот шампион за преземање на позицијата на спортски директор, но потоа се појавил ПСЖ. Парижаните испратиле понуда каква што не се одбива и му ветиле огромна моќ, па затоа Кампос се преселил во ПСЖ.

Перез за Суперлигата: Надал и Ѓоковиќ играа 59 пати, досадно ли е тоа? Реал Мадрид и Ливерпул се сретнале само девет пати во 67 години

Дарко Андоновски — Mon, 03 Oct 2022 11:54:18 +0000

Претседателот на Реал Мадрид, Флорентино Перез не верува дека врвните натпревари во Супер лигата брзо ќе им станат здодевни на навивачите. – Надал и Ѓоковиќ играа 59 пати… дали е тоа досадно? Сепак, Реал Мадрид и Ливерпул се сретнале само девет пати во 67 години. Која е поентата да се лишат навивачите од овие натпревари? Ако правилата на фудбалот се пресликаат и во други спортови, тешко дека би виделе барем три натпревари меѓу Надал и Федерер во сите овие години. УЕФА го зголемува бројот на натпревари меѓу средни тимови. Ова само ќе го забрза падот на европскиот фудбал. Според Форбс, Реал Мадрид е тринаесетти најкорисен клуб во светот… а претходно бевме петти. На ова рангирање има само три фудбалски клуба. Во САД сигурно прават нешто многу добро, додека во старата Европа многу лошо, изјави претседателот на Реал на клупското собрание. Реал Мадрид е еден од заговорниците за основање на елитната фудбалска Суперлига со најдобрите европски тимови.