Фон дер Лајен – Kurir.mk

Фон дер Лајен кандидатка за генерален секретар на НАТО

Тале Кристо — Sat, 01 Apr 2023 09:26:12 +0000

Британскиот таблоид „Сан“ доцна синоќа соопшти дека претседателката на Европската комисија, Урсула фон дер Лајен е кандидатка за нов генерален секретар на Алијансата, пренесува Хина. Британските медиуми, повикувајќи се на дипломатски извори, пишуваат дека дел од членките на НАТО предложиле Германија да го преземе раководството на Алијансата од октомври годинава, по завршувањето на мандатот на актуелниот генерален секретар, Норвежанецот Јенс Столтенберг. Се очекува Столтенберг да ја напушти оваа функцијата по девет години, додека мандатот на претседателката на Европската комисија истекува следната година. Таблоидот пишува дека Фон дер Лајен ја очекува тешка борба бидејќи Велика Британија ќе се спротивстави на нејзината кандидатура, затоа што смета дека таа лошо управуваше со вооружените сили додека беше министерка за одбрана на Германија. Германскиот весник „Велт ам Зонтаг“ напиша дека меѓу кандидатите за нов генерален секретар на НАТО се и актуелниот британски министер за одбрана Бен Валас и шпанскиот премиер Педро Санчез. „Сан“ го споменува актуелниот британски премиер Риши Сунак, а како кандидати се споменуваат и естонската премиерка Каја Калас и канадската министерка за финансии Кристија Фриланд.

Ковачевски ќе ја пречека претседателката на Фон дер Лaјен

Ивона Петрова — Tue, 25 Oct 2022 10:23:09 +0000

Претседателот на Владата Димитар Ковачевски заедно со владина делегација ќе ја пречека делегацијата предводена од претседателката на Европската комисија Урсула Фон дер Лaјен. Како што најавија од владиниот Сектор за односи со јавноста, посетата на Фон дер Лејен е планирана утре (среда) со почеток во 17:50 часот.

Премиерот Ковачевски ќе ја пречека претседателката на ЕК Фон дер Лејен на работна средба, на платото пред Владата. Владината делегација предводена од премиерот Ковачевски е во состав од заменик-претседателот на Владата задолжен за европски прашања Бојан Маричиќ, министерот за внатрешни работи Оливер Спасовски, министерот за надворешни работи Бујар Османи и министерот за економија Крешник Бектеши. Од МВР најавија посебен сообраќаен режим за утре и задутре по сообраќајниците на поширокото централно подрачје на Град Скопје.

Фон дер Лајен: Не треба да се бојкотира Г20 на Бали заради учеството на Путин

Магдалена Андонова — Mon, 27 Jun 2022 14:03:35 +0000

Шефицата на Европската комисија Урсула фон дер Лајен денеска изјави дека не ја поддржува идејата за бојкот на самитот на Г-20 во Индонезија доколку на него учествува и рускиот лидер Владимир Путин. Таа посочи дека форматот на Г-20 е од големо значење не само за развиените, туку и за земјите во развој и според неа, неопходно е да се водат широки разговори за актуелните состојби во светот. Самитот на лидерите на Г20, на кој се поканети лидерите на сите земји членки, меѓу кои и претседателот на Руската Федерација Владимир Путин, се очекува да се одржи на 15 и 16 ноември на Бали. САД и другите сојузнички земји се обидоа да извршат притисок врз Индонезија, која претседава со Г-20 оваа година, да ја откаже поканата на Русија за учество на самитот. Меѓутоа, официјална Џакарта одговори дека е испратена покана до Русија, дека на самитот ќе се разговара за економски прашања и дека политиката не може да влијае на агендата на тој собир. На предлог на САД и нивните сојузници, индонезиската Влада ја покани и Украина на самитот. (МИА)

ЕК бара подолг рок за приватните пораки меѓу фон дер Лајен и шефот на Фајзер

Тале Кристо — Tue, 26 Apr 2022 11:16:13 +0000

Денеска истекува рокот кога претседателката на Европската Комисија треба да ги предаде приватните СМС пораки разменети со директорот на Фајзер до омбудсманот на ЕУ, јави дописничката на МИА од Брисел. Од Европската Комисија денеска соопштија дека побарале од омбудсманот Емили О’Рајли да биде пролонгиран рокот, затоа што „одговорот сè уште се финализира“. -Потребно ни е уште време, изјави портпаролот Ерик Мамер. Пред три месеци, омбудсманот на ЕУ ја обвини Европската Комисија за лошо администрирање откако одби да даде пристап до приватните пораки помеѓу претседателката Урсула фон дер Лајен и газдата на една од најмоќните фармацевтски компании, Фајзер, поврзани за набавката на вакцини против Ковид-19. Новинарски барања до Европската Комисија преку слободниот пристап до информации беше поднесено, но Комисијата го одби барањето. Омбудсманот заклучи дека Европската Комисија не се придржила до очекуваните барања за транспарентност и административни стандарди. За европската медијаторка, О’Рајли, овие пораки, иако се приватни, се однесуваат на политиките на ЕУ и треба да се третираат како сите други документи на ЕУ во рамките на слободниот пристап до информации. Комисијата имаше до денес да ги испрати пораките и информациите побарани од О’Рајли, но рокот е пробиен. Што се однесува до објавувањето на содржината, Европската Комисија денеска изјави дека тоа е обврска на омбудсманот, таа ќе треба да одлучи дали ќе ги обелодени откако ќе ги добие.

Фон дер Лајен: Русија не може да ја уценува Европа

Тале Кристо — Thu, 24 Mar 2022 19:31:44 +0000

Русија не може да ја уценува Европа со своите енергетски ресурси и нема да ѝ биде дозволено да ги заобиколува и избегнува санкциите барајќи плаќање во рубљи за нејзините испораки на нафта и гас, изјави денеска претседателката на Европската комисија, Урсула фон дер Лајен. Таа оцени дека „тоа би било еднострана одлука и јасно прекршување на договорот“, коментирајќи го барањето на Русија нејзините енергенти да се плаќаат во рубљи. – Тоа би било обид да се заобиколат санкциите. Нема да дозволиме да се избегнат нашите санкции. Заврши времето кога енергијата можеше да се искористи за да не уценуваат, нагласи Фон дер Лајен.

Фон дер Лајен ги повика земјите од Г7 да се најде решение за бегалците

Тале Кристо — Fri, 20 Aug 2021 17:16:08 +0000

Претседателката на Европската комисија, Урсула фон дер Лајен повика на меѓународно решение за бегалците пред самитот на Г7 за Авганистан. – Важно е сите држави вклучени во мисијата во Авганистан да обезбедат доволни квоти за бегалците и нивно безбедно минување, за да можеме да им помогнеме на оние на кои им е потребна заштита, изјави денеска Фон дер Лејен за агенцијата ДПА. Говорејќи за медиумите првпат откако талибанците ја презедоа власта по повлекувањето на силите на САД и НАТО од Авганистан, германската политичарка истакна дека е неопходно да се спречи луѓето да паднат во рацете на криумчарите. – Тоа ги става Авганистанците кои сакаат да побегнат од конфликтот во еднаква опасност, нагласи претседателката на ЕК. Лидерите на земјите од Г7 – Велика Британија, Канада, Франција, Германија, Италија, Јапонија и САД – планираат следната недела да одржат видео конференција за ситуацијата во Авганистан. По правило, на овие состаноци учествуваат и претставници на раководството на ЕУ. Унијата очекува зголемување на бројот на оние кои сакаат да го напуштат Авганистан. Многумина се плашат од враќање на теророт од 90-те години на минатиот век, кога талибанците ја имаа власта последен пат. – Целата работа е трагедија за авганистанскиот народ и неуспех за меѓународната заедница, заклучи Фон дер Лајен.

Фон дер Лајен: Вакцинацијата во ЕУ почнува на 27 декември

Тале Кристо — Thu, 17 Dec 2020 13:08:32 +0000

Претседателката на Европската комисија, Урсула фон дер Лајен денеска потврди дека вакцинацијата против коронавирусот во Европската унија ќе почне на 27 декември. – Вакцинацијата низ Европската унија ќе почне на 27, 28 и 29 декември. Ова е моментот на Европа. Заедно ги штитиме нашите граѓани. Заедно сме посилни, напиша Фон дер Лајен на Твитер. Повеќе европски земји, вклучително и Германија, Франција и Италија, претходно соопштија дека ќе го координираат почетокот на нивните кампањи за вакцинација против коронавирусот. Германскиот министер за здравство Јенс Шпан денеска изјави дека сите земји-членки на ЕУ планираат да почнат вакцинација против коронавирусот на 27 декември.

Лајен: ЕУ ќе ги координира донациите на вакцини против Ковид-19 за Западен Балкан

Тале Кристо — Fri, 11 Dec 2020 14:31:16 +0000

Претседателката на Европската комисија, Урсула фон дер Лајен, оцени денеска дека вакцинацијата против Ковид-19 ќе спаси животи и ги повика земјите-членки да се подготват за почетокот на вакцинацијата на своите граѓани. како и во соседството на Европската унија, „Ние исто така се грижиме за нашето соседство. ЕУ ќе ги координира донациите за вакцини од земјите-членки, кои првенствено ќе имаат за цел да ги заштитат здравствените работници во Западен Балкан и во нашето соседство“, нагласи фон дер Лајен. Таа вели дека ЕУ треба да работи „со полна брзина“ за да ја процени безбедноста на вакцините и да ги направи достапни за граѓаните. Лајен додаде дека очекува вакцината на „Фајзер“ да биде одобрена, по проценката на Европската агенција за лекови, до крајот на годината, а вакцината на фармацевтската компанија „Модерна“ до средината на јануари. Евалуациите на вакцините на „Астра Зенека“ и „Џонсон и Џонсон“ исто така се во тек во Европската агенција за лекови. ЕУ досега има потпишано договори со шест фармацевтски компании, што произведуваат вакцини во Европа, за набавка на околу 1.360 милиони дози на потенцијални вакцини против Ковид-19.

Џонсон и Фон дер Лајен на средба во Брисел

Тале Кристо — Tue, 08 Dec 2020 19:36:17 +0000

Британскиот премиер Борис Џонсон и претседателката на Европската комисија Урсула фон дер Лајен ќе се сретнат утре во Брисел, со цел да се обидат да ги решат прашањата кои ги кочат трговските преговори за Брегзит, соопшти британската Влада. Џонсон утре ќе допатува во Брисел на вечера со Фон дер Лајен, каде ќе продолжат разговорите за идниот однос меѓу Велика Британија и ЕУ. – Со нетрпение очекувам да го пречекам британскиот премиер Борис Џонсон утревечер, напиша претседателката на Европската комисија на Твитер. Европската комисија соопшти денеска дека преговорите за идните односи меѓу Лондон и Брисел би можеле да продолжат и по крајот на годинава, кога завршува преодниот период за Брегзит. – Ако не биде постигнат договор до 1 јануари, значи ќе се најдеме во ситуација без договор. Тоа не ја исклучува можноста за преговори, од наша страна, и не исклучува можност да го проодлжиме дијалогот врз основа на мандатот кој ни е даден, истакна портпарол на ЕК. Од друга страна, Џонсон денеска нагласи дека можеби се приближува моментот кога Британија треба да ги прекине преговорите за трговија со ЕУ по Брегзит.

Фон дер Лајен: Постигнат напредок во преговорите за Брегзит

Тале Кристо — Thu, 26 Nov 2020 08:10:19 +0000

Претседателката на Европската комисија, Урсула фон дер Лајен, изјави дека ЕУ ќе биде подготвена доколку Велика Британија одлучи да ја напушти Унијата без трговски договор и покрај „реалниот напредок“ во неизвесниот процес на преговори за Брегзит. Британските медиуми пренесуваат дека трите главни пречки за постигнување договор се правото на риболов во британските води, механизмите за решавање на споровите и воведувањето правила што ќе гарантираат фер конкуренција. -Иако имаме многу малку време на располагање, ќе сториме се што можеме за да постигнеме договор. Подготвени сме да бидеме креативни, но не сме подготвени да го доведуваме во прашање интегритетот на единствениот пазар, рече вчера Фон дер Лајан пред европските парламентарци. Таа истакна дека на ЕУ мора да и биде овозможено да возврати со трговски мерки доколку Велика Британија ги поткопува работните и еколошките стандарди и дека европската рибарска индустрија сака долгорочна предвидливост во рамките на своите деловни активности.