фонд за здравствено осигурување – Kurir.mk

Хакерите барале милионски откуп во биткоини, а Фондот за здравство не открива дали било платено откуп на или не!

Дарко Андоновски — Wed, 22 Feb 2023 13:58:54 +0000

Директорката на Фондот за здравство Магдалена Филиповска Грашковска на денешниот брифинг со новинарите, ниту потврди, ниту пак изрично демантираше дека откупот кој хакерите го побарале, не е платен од страна на Фондот или од страна на трето лице. Иако македонската јавност очекуваше детали за тоа што точно се случи со системот на ФЗО поради кој две недели не беа достапни здравствените податоци за над 1,8 милиони осигуреницим, без плата останаа здравствените работници, а не се исплаќаа ниту боледувањата и рефундациите, директорката Филиповска Грашковска не објасни речиси ништо за природата на хакерскиот напад, бараниот откуп и евентуалната исплата на хакерите, туку се извлекуваше дека случајот е под истрага. Сите овие информации ги смести во графата „класифицирано“ па така не се откри ни начинот на кој што системите магично се вратија во функција. Според информации на „Слободен печат“ хакерите барале 20 биткоини за да го дадат клучот од енкрипцијата, а дали им било платено и како системот профункционира останува податок затворен за јавноста. Филиповска Грашковска на прес конференцијата немаше ИТ експерт покрај себе, иако рече дека во Фондот има шест ИТ експерти кои се вработени. Дополнително, не сакаше да открие колку пари се одлеале од Фондот за реставрацијата на системот, со оглед на тоа што потпишувани биле договори со странски експерти и фирми кои работеле на опоравувањето на хакираната здравствена база. Директорот на ИТ секторот се разболел во текот на реставрацијата поради големиот притисок и стрес и се уште е на боледување. Отсутен од работа во Фондот е и директорот Фатон Ахмети кој цел хакерски напад го поминал на одмор во Америка. Одговорност Грашковска не чувствува и повикува на трпение за да заврши истрагата.

Ако денеска побарате лек на рецепт ќе го подигнете од аптека во понеделник

Дарко Андоновски — Fri, 17 Feb 2023 16:09:56 +0000

Ако сте болни и имате потреба од антибиотик или друга терапија за сериозна состојба ќе мора да чекате до понеделник за да ги подигнете лековите од аптека на товар на Фондот. Во меѓувреме фармацевтот треба да ви земе податоци и телефонски број и да прати маил до ФЗО од каде ќе чека потврда дали имате здравствено осигурување. Доколку е работен ден ова треба да се направи во текот на работното време за да може осигуреникот да се повика повторно да дојде во аптеката. За терапија за хронично болни истото треба да се направи во рок од 3 дена, објавува Сител. Вака функционира издавањето на лекови на рецепт веќе неколку дена откако не функционира системот на Фондот за здравство. Ова предизвикика голем револт и кај граѓаните и кај аптекарите. Реагираат и од Фармацевтската комора и од Здружението на приватни аптеки дека известувањето од ФЗО е тешко спроведливо во пракса и има многу нејаснотии и недоречености од Фондот им рекле да продолжат исто да работат. Дел од пациентите иако имале уредно здравствено осигурување одлучувале приватно да си ја платат терапијата, за да не чекаат. -Ние во секојдневното работење во аптеките имаме многу голема фреквенција на луѓе. Имаме пациенти од едно градско подрачје во друго, од село во град и имајќи предвид дека голем дел од лековите кои се издаваат на рецепт се итни и неопходни и тие пациенти не може да чекаат спроведување на административни процедури за да се провери дали имаат осигурување или не, изјави Џоана Андоноска, претседател на Здружение на приватни аптеки. Дополнителен проблем за нив е што со оние пациенти на кои после 5-ти во месецот им престанало осигурувањето. Тогаш подигањето на лекови на товар на ФЗО ќе им носи финансиска загуба. Затоа од Фармацевстката комора предлагаат за февруари да не се одбиваат рецептите по основ на осигурување и итно да се најде решение за од 1 март доколку не се реши проблемот со системот. Во меѓувреме се повеќе се зголемува револтот и кај здравствените работници поради неисплатените плати. Денеска дел од нив вработени на Клинички се собраа за време на паузата во кругот на комплексот. -Воопшто немаме информација ниту како ќе се пресметува, ниту како ќе биде исплатена платата, и ние мимаме издатоци кои треба да ги сервисираме, изјави д-р Лазо Јовчевски, детски хирург. За од понеделник протест најавија и повеќе синдикални организации во здравството, а од Фондот преку соопштение информираат дека се очекува исплата на платата во текот на идната недела откако ќе ги добијат податоците од сите ЈЗУ, исто како пред 20 години.

ФЗОРСМ: Не е загрозено правото на здравствена заштита на граѓаните

Катерина Бојаџиева — Fri, 10 Feb 2023 13:45:18 +0000

Фондот за здравствено осигурување соопшти дека правото на здравствена заштита на граѓаните не е загрозено, лекувањата, упатите за прегледите и боледувањата, издавањето на рецепти од страна на матичните лекари, како и издавањето на лекови на граѓаните, се одвива непречено и граѓаните без застој можат да ги користат овие здравствени услуги. Усогласени се и решенија за остварување на правото на итни ортопедски помагала заедно со ортопедските куќи. -Подрачните служби на Фондот во континуитет ги примаат барањата. Покрај ова, подрачните служби се достапни и телефонски преку јавно објавени линии за информации за осигурениците, на кои истите можат да се обратат и да добијат информации во врска со сите решенија кои се усогласени со матичните лекари, а преку кои осигурениците можат да ја остварат здравствената заштита. Техничките тимови работат на најбрзо можно враќање во функција на системот за исплата на плати на здравствените работници, како би се запазиле законските рокови за исплата, како и за другите форми на исплата, односно боледувањата, породилното и рефундациите, се наведува во соопштението. Фондот нагласува дека навремено и постојано ќе ја информира јавноста за сите нови утврдени информации што се од интерес на граѓаните.

Петрушевска:Со кредитот од Светската банка се планира да се поддржи финансиската одржливост на Фондот за здравствено осигурување, дали имаме проблем со Фондот во моментот?

Тале Кристо — Tue, 13 Oct 2020 17:01:16 +0000

Според пратеничката од ВМРО-ДПМНЕ Марија Петрушевска новото задолжување од 90 милиони евра е само купување на ден и дека на долг рок Македонија нема да добие закрепнување на економијата и подобрување на состојбата. -Од овој кредит, дури помалку од 50 отсто од средствата ќе бидат насочени во здравството. Кога овој кредит е за одговор на Ковид-19, тогаш би требало средствата да бидат во најголем дел насочени кон секторот - здравство. Во материјалите кои што ги имаме добиено се планира да се поддржи финансиската одржливост на Фондот за здравствено осигурување. Тогаш да прашам сега дали имаме ние проблем со Фондот во моментот? Дали е тоа поврзано со работењето во оваа институција?, праша од говорницата во Собранието Петрушевска. Исто така, посочи таа ММФ предвиде дека Македонија ќе ја заврши годината со пад од нешто малку повеќе од 5 отсто и се плашам дека овој кредит е само купување на ден и дека на долг рок ние нема да добиеме закрепнување на економијата и подобрување на состојбата во Македонија. -Се плашам дека ние за неколку месеци ќе треба повторно да ги задолжиме граѓаните, рече Петрушевска.