форум – Kurir.mk

Отворен меѓународниот форум Појас и пат во Пекинг

Тале Кристо — Wed, 18 Oct 2023 06:39:23 +0000

Третиот меѓународен стратешки форум Појас и пат беше отворен денеска во Пекинг, на кого присуствуваат претставници од повеќе од 130 земји и 30 меѓународни организации. Самитот со воведен говор го отвори претседателот на Народна Република Кина, Си Џинпинг, а потоа обраќања имаа и претседателот на Русија, Владимир Путин, претседателот на Казахстан, Касим Џомарт Токаев, претседателот на Индонезија, Јоко Видодо. На Форумот ќе се обратат и претседателот на Аргентина, Алберто Фернандез, премиерот на Етиопија, Аби Ахмед и генералниот секретар на Обединети нации, Антонио Гутереш.

Основачот на Форумот во Давос вели дека светот е во период на реглобализација и станува се повеќе меѓузависен

Катерина Бојаџиева — Tue, 17 Jan 2023 09:40:20 +0000

Основачот на Светскиот економски форум во Давос, Клаус Шваб, изјави дека светот е во период на реглобализација, станува се повеќе меѓусебно зависен, но и дека, од друга страна, ќе има многу повеќе односи засновани на доверба. Шваб за Вол Стрит Џурнал објасни дека тоа ќе се случи бидејќи светот не е во можност да ги создаде потребните норми, како и неопходните правила, кои може да ги сподели. – Иднината на светот би можела да биде некаков вид на пачворк коалиции кои се засноваат на доверба, рече Шваб. Тој рече дека глобалниот систем оди во повеќегодишен период на трансформација и дека кризата во која се наоѓа светот е помалку криза во вообичаена смисла, а повеќе трансформација на „нашиот глобален систем“. – Ако ја земеме економската страна, би рекол дека ќе поминеме низ многу тежок период на трансформација од три, четири, пет години. А силите зад ова? Се разбира, војната во Украина. Па дури и ако ја решиме војната, тоа ќе биде реконструкција. Имате трансофрмација или транзиција на енергија. Имате преобликување на глобалните синџири на снабдување. Ги имате пост-ковид ефектите, за кои некои велат дека се помала продуктивност и, се разбира, потребата да се инвестира повеќе во отпорноста, рече Шваб. Од друга страна, тој е оптимист за енергетската трансформација во однос на обезбедување пристап до поевтина енергија и струја. Сепак, посочува Шваб, тоа краткорочно значи инвестиции. – Ако земете војна, тоа значи трошоци. Ако земете поместување на синџирот на снабдување, тоа значи трошоци … Затоа што веќе не купувате од најефикасниот и најевтиниот извор. Купувате од најсигурниот извор. Значи, ако ги земате сите тие фактори заедно, јас немам никаква научна основа, но би рекол дека тоа е веројатно еден до три отсто од нашиот глобален БДП, рече тој. Според него, светот мора да се позанимава со таа трансформација, а не со кризен менталитет, за да се најдат едноставни решенија за многу сложени проблеми. На прашањето дали смета дека светот се повеќе се дели на повеќе регионализирани блокови кои соработуваат во некои области и се натпреваруваат во други области, Шваб вели дека политичката димензија на таа трансформација значи преминување во свет со повеќе сили. – Секако, имате две суперсили, но потоа имате суперсила во подем како Индија. Имате блокови како Европа, која мислам дека стана посилна и покрај Брегзит во последните три години. Другите азиски земји не треба да се потценуваат. Потоа имате непријателски држави како што се Северна Кореја и Иран. После го имате она што јас би го нарекол брзи риби, мали земји кои брзо се движат кои се пример за други земји, како Сингапур, и до одреден степен, Израел, рече Шваб. Тој изјави дека постојните институции нема да бидат доволни во денешниот свет и оти еден елемент што недостасува е во дискусијата да се интегрираат други важни заинтересирани страни како бизнисот, медиумите и слично. – Во Давос ќе ја видите презентацијата на она што го нарекуваме село на глобална соработка. Создадовме заедница на поддршка од над 70 компании и меѓународни организации како ММФ или Светската трговска организација за да создадеме еден вид Давос во метауниверзумот, во виртуелниот свет, да имаме можност да го продолжиме дијалогот, но да го прошириме дијалогот за да интегрираме повеќе засегнати страни, рече Шваб. Тој додава дека е потребна неформална и доверлива платформа каде што ќе може многу поотворено да се зборува и навистина да се справува со прашањата „не на политички начин, туку со волја да се најде решение“. Шваб, исто така, нагласува дека бројните несогласувања што постојат во светот се резултат на недостигот на дијалог, но и на влијанието на коронавирусот, бидејќи многу меѓународни дијалози се во застој, а видео конференциите не се идеална алатка за создавање простор на доверба. – И имавте повеќе луѓе ставени во изолација. Гледате зголемување на проблемите со менталното здравје ширум светот. Кога ќе се соочите со криза, станувате посебични затоа што, наместо да прашувате „Како да го решам проблемот?“ прво прашувате „Како можам да ја заштитам мојата ситуација“, рече Шваб. Тој додава дека она што можеше да се види во последните две години е многу поголем егоизам на личен план, кој „се прелеа“ и на национално ниво. На прашањето кога и како ќе заврши војната меѓу Русија и Украина, или каде би можела да оди, Шваб вели дека гледа позитивни знаци на хоризонтот, но оти дури и кога ќе престане, ќе има многу тежок процес застојот на непријателството да се претвори во долгорочно одржливо решение, бидејќи се направени големи грешки со процесот во Минск.

Ѓорчев во Вашингтон на форум за безбедност во Сенатот на САД

Тале Кристо — Wed, 07 Dec 2022 09:41:58 +0000

Членот на ИК на ВМРО-ДПМНЕ Влатко Ѓорчев учествува на парламентарниот форум за безбедност во Вашингтон кој се одржува во Сенатот на САД. Главни теми на форумот се војната во Украина, состојбата во Европа и светот, сајбер безбедноста, енергетската криза и други поврзани теми. На форумот ќе се обратат сенаторите Том Тилис, Бил Кесиди, Синтија Луминс и Џејмс Ланкфорд, како и 10-тина конгресмени и претставници од институции и организации од САД. На форумот учествуваат околу 200 учесници, како и пратеници од САД, Европскиот парламент, Канада, Велика Британија, Германија, Украина, Италија, Шпанија, Франција итн.

Берлин ќе биде домаќин на Форум посветен на кризата со храна

Тале Кристо — Mon, 20 Jun 2022 13:03:35 +0000

Германија ќе биде домаќин на состанок за глобалната криза со храна предизвикана од војната во Украина, на кој ќе присуствува и американскиот државен секретар Ентони Блинкен, изјави владиниот портпарол. На состанокот в петок, насловен „Сојуз за глобална прехранбена безбедност“, ќе се разговара и ќе се обиде да најде решение за недостигот на храна предизвикан од војната, изјави портпаролот на прес-конференција во Берлин. – Владата е особено посветена во своето претседавање со Г7 на изнаоѓање заеднички одговори на надвиснатата глобална криза со глад предизвикана од агресивната војна на Русија против Украина, рече тој. Германската министерка за надворешни работи Аналена Бербок напиша на Твитер дека конференцијата има за цел „да ги стабилизира резервите на храна во светот“. Западот побара од Москва да престане да ги блокира украинските пристаништа на Црното Море за да може огромните резерви на жито да се извезат на светските пазари бидејќи се зголемуваат стравувањата од глад во ранливите региони. Москва негира дека е одговорна за кризата со храна и ги обвинува западните санкции за прекини во снабдувањето што ги зголемија цените на житото и ги поттикнаа стравувањата од глад во ранливите региони. Средбата во Берлин ќе се одржи во време кога лидерите на Групата седум индустриски најразвиени земји се подготвуваат за средба од 26 до 28 јуни во германското алпско одморалиште Шлос Елмау. На средбата се очекува да се приклучи и украинскиот претседател Володимир Зеленски преку видео врска.

Стаменкоска Трајкоска на форум во Подгорица: Одржливото однесување кон природата денес, може и ќе направи промени во иднина

Ивона Петрова — Tue, 10 Nov 2020 11:30:51 +0000

Бети Стаменкоска Трајкоска како пратеник од Собранието активно учествувала во „Форумот за животна средина за Западен Балкан“, кој се одржува во Подгорица, Р. Црна Гора. -Мојата порака е: "одржливото однесување кон природата денес, може и ќе направи промени во иднина". Глобално и локално да си ја заштитуваме животната средина, напиша пратеничката на Фејсбук.

Форум за зајакнување на европската интеграција на Западен Балкан

Дарко Андоновски — Mon, 13 May 2019 05:34:49 +0000

„Зајакнување на европската интеграција на Западен Балкан – Учејќи од минатото, подготвувајќи се за иднината” е темата на форумот што ќе се почне денеска во организација на Институт за демократија „Социетас Цивилис“ – Скопје во соработка со Центарот за источни студии од Варшава и Амбасадата на Република Полска во Скопје. Настанот ќе трае два дена и ќе третира теми поврзани со Берлинскиот процес во контекст на полското претседателство, како што се регионалната соработка, безбедноста, миграцијата, европската интеграција на земјите од Западен Балкан, нивно вмрежување како и за надминување на билатералните проблеми. На Форумот ќе учествуваат претставници на граѓанското општество, академици од земјите од Западен Балкан плус Хрватска и Словенија, Вишеградските земји како и од други земји-членки на ЕУ. Исто така, учество ќе земе и висок претставник на Директорат за проширување и соседска политика на Европската комисија. Форумот, како што најавија организаторите треба да го Андреј Жерновски, заменик министер за надворешни работи на Македонија, Шимон Шинковски вел Сек, заменик министер за надворешни работи на Република Полска, Марко Трошановски, претседател на Институт за демократија „Социетас Цивилис“ – Скопје и Адам Еберхард директор на Центарот за источни студии.

Форум за стратешки развој на туризмот

Ивона Петрова — Thu, 06 Dec 2018 06:48:12 +0000

Форум на тема „Стратешки развој на туризмот и ефектите на државната политика за негова поддршка“ ќе се одржи денеска во Охрид во организација на Стопанската комора на Македонија, во рамките на Проектот на УСАИД „Партнерство за подобра бизнис регулатива“, четиригодишен проект финансиран од УСАИД Македонија, имплементиран од „ЕПИ Центар Интернационал“, а во соработка и со Стопанската комора за информатички и комуникациски технологии – МАСИТ, Стопанската комора на Северозападна Македонија и Сојузот на стопански комори на Македонија. Целта на Форумот е да се отвори дискусија за фактичката состојба на секторот за туризам и угостителство во Македонија, како и негово развивање и поддршкa од страна на државата преку креирање нови туристички производи, услуги и алатки со цел да ја направат Македонија атрактивна туристичка дестинација. На Форумот ќе присуствуваат претставници на бизнис заедницата, владини претставници, како и домашни и странски експерти кои ќе ги споделат своите искуства и ќе дадат предлози за развивање на секторот за туризам и угостителство, како и за усогласеноста на компаниите со законската регулатива во Република Македонија.

Форум „Што е потребно за добра контрола на дијабетесот и среќно семејство“

Ивона Петрова — Sat, 10 Nov 2018 08:37:01 +0000

Форум на тема „Што е потребно за добра контрола на дијабетесот и среќно семејство“ ќе се одржи денеска во СЦ „Борис Трајковски“, во организација на Асоцијацијата за детски дијабетес на Македонија Баланс МК. На форумот ќе се обрати министерот за здравство Венко Филипче кој ќе говори на тема „Стратешки планови за подобрување на состојбата со детски дијабетес во Македонија“. Најавено е и обраќање на претседателот на Асоцијацијата за детски дијабетес на Македонија Баланс МК, Наташа Деспотовска и здравствени експерти-ендокринолози. Форумот се организира во пресрет на одбележувањето на 14 номеври, Светски ден на дијабетесот. МИА

Форум за „Бизнис ангели“

Матеја Петровски — Thu, 30 Aug 2018 05:43:17 +0000

Можностите и потенцијалите во Република Македонија да се воспостави регулатива за инвеститори т.н. „Бизнис ангели“ денеска ќе бидат тема на форум што ќе се одржи во Скопје во организација на кабинетот на министерот без ресор задолжен за регулатива за подобрување инвестициска клима за домашни претпријатија, Зоран Шапуриќ. Во рамките на овој Форум особено внимание ќе се посвети врз презентирање на постојната законска регулатива и успешните практики од оваа област во Европа и светот, вклучително и моделот на регулирање на ангел инвеститори во Турција, како и илустрирање на искуства од страна на корисниците и инвеститорите според моделот „Бизнис ангели” во Македонија. (Миа)

Царовска на Форум за родова еднаквост во Стокхолм

Дарко Андоновски — Tue, 17 Apr 2018 12:28:27 +0000

Министерката за труд и социјална политика учествува на Форумот за родова еднаквост во Стокхолм, чиј домаќин е шведската министерка за надворешни работи Маргот Валстром. Тркалезната маса на која се обрати министерката Царовска е посветена на мултидимензионалната родова перспектива на социјалниот дијалог и развојот на социјалниот дијалог како инструмент за родова еднаквост. - Трипартитниот социјален дијалог е есенцијална алатка за унапредување на родовата еднаквост во светот на работата. Родовата еднаквост е во суштината на пристојната работа и истата треба да се промовира паралелно со промовирање на социјалниот дијалог. Оттука, застапувањето, односно претставеноста на жените треба да се промовира на сите нивоа низ институциите на социјалниот дијалог. Родовата еднаквост е една од фундаменталните вредности на глобалното партнерство имајќи предвид дека е составен дел од инклузивниот раст во полето на пристојната работа, рече Царовска. Министерката нагласи дека токму затоа Република Македонија во декември минатата година пристапи кон „Global Deal“ - глобално партнерство за пристојна работа и инклузивен развој, како единствен партнер од овој регион. Исто така, во програмата за работа на Владата на Република Македонија е предвидено вклучување на родовата перспектива во колективното договарање на сите нивоа, заради дополнително унапредување и заштита на жените работнички. На Форумот во Стокхолм, што се одржува од 15 до 17 април, присуствуваат министри, високи претставници на агенциите на ООН, граѓански организации и синдикати. Во насока на постигување на целта за родово еднаков свет, на форумот се става акцент на социјалниот дијалог како значајна алатка за промовирање на родовата еднаквост на работното место. Учеството на жените во институциите кои го водат социјалниот дијалог е само 15 проценти на глобално ниво (МОТ). Дури и во индустриите каде што работната сила е сочинета првенствено од жени, тие најчесто се претставувани од мажи. Ова се однесува и на земјите во развој и на развиените земји. Притоа, покрај зголемувањето на репрезентативноста на жените, особено важно е дали се отвораат и решаваат релевантни прашања како што е еднаквата плата, социјалната заштита, родителското отсуство, сексуалното вознемирување.