Фросина Ташевска-Ременски – Kurir.mk

Ташевска Ременски: Заев земјата ја направи хибрид, а тоа е многу повисоко ниво од она што беше заробена држава

Магдалена Андонова — Sun, 05 Dec 2021 18:48:35 +0000

Јас ги читам и ги следам многу повеќе меѓународните извештаи и оние кои што не се во фокус на медиумите, а се длабоко специјализирани во области во кои што професионално делувам и творам. Верувајте, нашето рангирање или добивање на тој епитет хибрид, односно многу повисоко ниво од она што беше заробена држава, можеби треба не свести и како граѓани и секако како партии дека напуштањето токму на оние матрици на делување на кои што сме ги гледале не сме успеале доволно да ги анулираме,истакна Фросина Ташевска Ременски во централниот дневник на Сител телевизија. Ташевска Ременски додаде дека маскирањето на аномалиите од страна на власта во институциите доведе до поголема корупција, голем клиентелизам, широко распространет непотизам, политизација и партизација на сите процези и институции во државата. - Треба да ја извадиме земјата од тој хибрид што подразбира користење на легални методи на делување но со примеси на нешто што не е дозволено. А, тоа граѓаните го препознаваат го казнуваат, ни упатуваат пораки колку знаеме да ги читаме не сум сигурна и не сум доволно убедена дека знаеме да ги протолкуваме до крај, појасни Ташевска Ременски. Ташевска Ременски посочи дека таа многу често пишува на социјалните мрежи и ги критикува штетните политики на власта и раководството на партијата но за жал медиумите не ги пренесуваат.

Отфрлена кривичната пријава на Ременски против Гордана Јанкулоска

Ивана Ефремовски — Wed, 25 Dec 2019 17:22:12 +0000

Надлежен јавен обвинител од Основното јавно обвинителство Скопје донесе Решение за отфрлање на кривична пријава од Фросина Ташевска-Ременски поднесена против три лица за кривични дела -Злоупотреба на службената положба и овластување од чл.353 ст.2 во врска со ст. 1 и Несовесно работење во службата од чл. 353в ст. 2 во врска со ст. 1 од Кривичниот законик. Како што соопшти ОЈО, пријавата прво била поднесена против две лица, а потоа со дополнително доставен поднесок била проширена за уште едно лице. Во пријавата се наведува дека во периодот од 22.05.2014 година до 29.04.2015 година, првопријавената Гордана Јанкулоска во својство министер во Министерството за внатрешни работи, со пречекорување на границите на своето овластување и спротивно на Законот за внатрешни работи, му прибавила корист на второпријавениот кој во наведениот период бил заменик-директор на Управата за безбедност и контраразузнавање. Имено таа овозможила и по исполнување на условите за старосна пензија, второпријавениот да остане во работен однос и месечно да прима плата. За третопријавената, помошник-министер за правни работи и човечки ресурси во Министерството се наведува дека во периодот од 22.05.2014 година до крајот на месец мај 2017 година, спротивно на закон, свесно пропуштила да го извести министерот дека барањата за продолжување на работниот однос поднесени од второпријавениот се недозволени и сочинила решенија за продолжување на неговиот работен однос. Јавниот обвинител, постапувајќи по пријавата, со две последователни наредби од Министерството за внатрешни работи обезбеди податоци за работниот ангажман на второпријавениот, правните акти на кои се засновал, висината на паричниот износ кој месечно му бил исплаќан и други околности. Од материјалната документација, прилозите кон пријавата и писмените известувања обезбедени од МВР, произлезе дека првопријавената како министер за внатрешни работи на 14.04.2014 година донела решение со кое констатирала дека на 31.04.2014 година ќе настапи прекин на работниот однос на второпријавениот заменик директор на УБК поради исполнување на условите за остварување старосна пензија – 40 години пензиски стаж. По барање поднесено од второпријавениот, одобрено од директорот на Управата, да му се дозволи да ги спроведе веќе започнатите оперативни активности под негово раководство, првопријавената на 22.05.2014 година го поништила решението, а второпријавениот на 26.08.2014 година поднел изјава за продолжување на работниот однос. Постапувајќи по барањето, првопријавената донела решение, изготвено од третопријавената, со кое го продолжила работниот однос на второпријавениот за период од една година, заклучно со месец мај 2015 година. Решението било донесено врз основа на Законот за изменување и дополнување на Законот за внатрешни работи кој влегол во сила на 13.08.2019 година и бил со одложена примена од 12.03.2015 година, со кој се предвидувала можност за продолжување на работниот однос до 45 години пензиски стаж.

Собраниска делегација во работна посета на Вашингтон

Ивана Ефремовски — Mon, 15 Jul 2019 11:01:11 +0000

На покана на Демократското партнерство на Претставничкиот дом на САД (ХДП) претседателот на Собранието на Република Македонија, Талат Џафери ќе престојува во работна посета во Вашингтон – САД, каде ќе присуствува на Парламентарен форум за лидерство што ќе се одржи утре и задутре во Вашингтон. Форумот, како што соопшти собраниската прес-служба, е фокусиран на демократското обновување за борба против заедничките закани за демократијата. Заедно со Џафери во делегацијата се и потпретседателката на Собранието на Република Македонија, Фросина Ташевска-Ременски и координаторот на пратеничката група на ВМРО-ДПМНЕ, Никола Мицевски. Исто така, во рамките на форумот, претседателот на Собранието Џафери и пратениците ќе остварат и билатерални средби со колегите од Конгресот и Владата на САД. Програмата на ХДП е организирана од Националниот демократски институт (НДИ), со поддршка од Агенцијата за меѓународен развој на САД (УСАИД) и во партнерство со Меѓународниот републикански институт (ИРИ). На оваа програма од високо ниво, покрај Собранието на Република Македонија, поканети се да учествуваат и дваесет партнерски парламенти на ХДП. (МИА)