Фуксе Берлин – Kurir.mk

Дејан Милосављев го предводеше Фуксе Берлин до трофејот во Европската лига

Бошко Тасиќ — Mon, 29 May 2023 05:04:01 +0000

Германскиот Фуксе Берлин стана нов шампион во Европската лига, откако во финалето славеше против Гранолјерс со 36-31, додека третото место му припадна на Гепинген кој го совлада Монпелје со 33-29. Германскиот тим ја најави победата уште во првото полувреме, кое го доби со 16-12, а Гранолјерс во вторите 30 минути се обидуваше да најде начин за пресврт, меѓутоа не успеа во намерата. Најдобар во редовите на Фуксе Берлин беше Андерсон со осум голови, додека екс-голманот на Вардар, Дејан Милосављев запиша 13 одбрани. За бундеслигашот ова е трета титула на европската сезона, откако во 2015 и 2018 година го освои ЕХФ-купот.

Французи ќе судат на Еурофарм Пелистер и Фуксе Берлин

Бошко Тасиќ — Sun, 19 Feb 2023 13:41:01 +0000

Европската ракометна федерација ги одреди официјалните лица за натпреварите од 9 коло во Лигата на Европа. Македонскиот претставник гостува во Берлин кај досега непоразениот Фуксе кој веќе го обезбеди првото место во групата. Овој дуел ќе го суди француска двојка, а станува збор за Јан Кармо и Жулиен Мурш, додека делегат е Тихомир Касуниќ од Хрватска. Натпреварот меѓу Фуксе Берлин и Еурофарм Пелистер ќе се игра во вторник во „Макс Шмелинг Арена“ од 20:45 часот.

Матијас Гидсел во Фуксе Берлин до 2028 година

Бошко Тасиќ — Mon, 12 Dec 2022 06:11:55 +0000

Талентираниот дански ракометар Матијас Гидсел ја продолжи соработката со екипата на Фуксе Берлин. 23-годишникот се врати од тешката повреда и соопшти доби вести за „лисиците“. Тој ќе игра во бундеслигашот до летото 2028 година. Младиот Данец, кој важи за еден од најдобрите играчи на денешницата, пристигна во Берлин од редовите на ГОГ Гудме. Инаку, првите ракометни чекори ги направи во Скјенр.

Пораз на РК Еурофарм Пелистер од германски Фуксе Берлин

Тале Кристо — Tue, 22 Nov 2022 19:46:33 +0000

Германскиот претставник во европската ЕХФ ракометна лига Фуксе Берлин вечерва во Битола убедливо го совлада македонскиот репрезент во европскиот ракомет Еурофарм Пелистер со 34:43. Поразот на битолчани беше јасно видлив и неизбежен уште во првото полувреме кое заврши со 14:22, односно со осум голови предност, а на почетокот од второто полувреме, лидерот во германското првенство предноста ја зголеми на 11 голови разлика, односно 18:29 во корист на гостите. Ако конечниот резултат од вечерашниот натпревар во Битола, за публиката не беше големо изненадување, тогаш пријатно изненадување беше бројот на вкупно постигнати голови – 77, и тоа одамна не се случило на еден меѓународен ракометен натпревар во спортската сала „Боро Чурлевски“. Најзаслужни за успехот на Фуксе Берлин беа црногорскиот интернационалец Вујовиќ кој постигна 9 и данскиот интернационалец Холм кој постигна 7 голови, додека во тимот на Еурофарм Пелистер се истакна македонскиот репрезентативец Жарко Пешевски кој постигна 8 голови. Објективната битолска публика со аплауз го поздрави успехот на германскиот вицешампион Фуксе Берлин.

Игор Вори потпиша за Фуксе Берлин

Бошко Тасиќ — Thu, 24 Mar 2022 06:18:07 +0000

Хрватскиот ракометар Игор Вори (41) му се враќа на ракометот откако претходните три години беше пензија. Откако до крајот на сезоната поради повреда отпадна првиот пивот на Фуксе Берлин, Јохан Кох, спортскиот директор и легендарен поранешен играч Стефан Кречмар го убеди Вори да му се врати на ракометот. -Доколку успее да слета денес, веднаш ќе му се приклучи на тимот, изјави Кречмар. Вори е еден од најтрофејните ракометари во светот, а со хрватската репрезентација освои се освен европско злато. Кариерата ја започна во Загреб, потоа играше во Италија кај Лино Червар за Конверсано, пред да се врати во Загреб во 2003 година, а од 2005 година беше член на Барселона, потоа се врати во Загреб, па играше во ХСВ, за ПСЖ три години, од каде се врати дома каде што се пензионираше се до повикот од Фуксе Берлин. Во моментов е директор на хрватската ракометна репрезентација, а од јуни до октомври 2020 година беше тренер на ППД Загреб.

Магдебург е прв шампион во првото издание на Европската лига на ЕХФ

Бошко Тасиќ — Mon, 24 May 2021 06:51:43 +0000

Германскиот ракометен гигант Магдебург е прв шампион во првото издание на Европската лига на ЕХФ, инаку поранешен ЕХФ Куп. Тие во финалето го совладаа познатиот ривал од бундеслигата, екипата на Фуксе Берлин со 28-25. Тимот на Бенет Вигерт доминираше во првиот дел, а потоа ја одбрани предноста во продолжението. Одличната одбрана на Магдебург беше клучна за конечната победа. Фуксе на момент се врати во игра, но немаше сили за пресврт. Најблиску што стигна тимот од Берлин беше 25-23, но потоа заигра на посакуваното ниво за да ја обезбеди титулата. Хорнке и Магнусон со по седум гола беа најефикасни кај победникот. Ветеранот Линдберг со осум погодоци беше прво име кај поразената екипа.