г20 – Kurir.mk

Путин и Си не ги координирале одлуките за Г20

Тале Кристо — Tue, 05 Sep 2023 16:36:43 +0000

Рускиот претседател Владимир Путин и неговиот кинески колега Си Џинпинг одвоено одлучија да не учествуваат на самитот на Г20 во Њу Делхи следниот викенд и не разговараа за тоа, изјави денеска портпаролот на Кремљ Дмитриј Песков. На прашањето дали Путин и Си ја координирале одлуката да не учествуваат на самитот, тој објасни дека двајцата лидери ги донеле одлуките врз основа на нивните сопствени распореди. Локалните медиуми претходно објавија дека руската делегација на самитот ќе ја предводи министерот за надворешни работи Сергеј Лавров, додека кинеската делегација ќе ја предводи премиерот Ли Кианг.

И претседателот на Кина нема да присуствува на Самитот на Г-20 во Индија

Ивона Петрова — Mon, 04 Sep 2023 11:16:49 +0000

Претседателот на Кина, Си Џинпинг нема да присуствува на претстојниот Самит на Г-20 во Индија, соопшти кинеското Министерство за надворешни работи, без да ги наведе причините за таквата одлука. Првпат кинески лидер нема да присуствува на Самитот на Г-20. Си физички не присуствуваше на Самитот н аГ-20 во Рим за време на пандемијата на коронавирус, но се јави преку видео врска. - Премиерот Ли Кечијанг ќе ја предводи кинеската делегација, изјави денеска портпаролката на кинеското МНР, Мао Нинг. Повеќето од лидерите на Г-20 ќе присуствуваат на дводневниот Самит, што почнува на 9 септември во Њу Делхи. На Самитот на Г-20 нема да присуствува и рускиот претседател Владимир Путин, а во Њу Делхи ќе отпатува шефот на руската дипломатија Сергеј Лавров.

Мерки против мајмуните пред Самитот на Г20 во Индија

Тале Кристо — Wed, 30 Aug 2023 16:02:21 +0000

Во пресрет на Самитот на лидерите на Г20 што ќе се одржи во Индија од 9 до 10 септември, во главниот град Њу Делхи се преземени одредени мерки за да се држат мајмуните подалеку од посетителите и местата што ќе се користат за време на Самитот. Според извештајот на Би-Би-Си, локалните власти направиле планови да ги спречат мајмуните да им наштетат на посетителите и локациите за време на Самитот на Г20. Една од мерките, како што наведуваат, е да се направат мајмуни од картон во природна големина со цел да се исплашат. Надлежните рекоа дека картоните ќе бидат закачени на места каде често се гледаат мајмуни, како и во хотели каде ќе престојуваат делегатите кои ќе присуствуваат на Самитот. Официјалните лица рекоа дека меѓу 30 и 40 обучени луѓе кои можат да ги имитираат звуците на ленгурите, исто така ќе бидат распоредени за да ги исплашат мајмуните.

Земјите од Г20 усвоија конечна декларација во која се критикува војната во Украина

Катерина Бојаџиева — Wed, 16 Nov 2022 08:07:47 +0000

Групата водечки светски економии Г20 денеска усвои заедничка декларација на крајот од дводневниот самит на Бали, која содржи остра реторика за руската инвазија врз Украина. Како што пренесе ДПА, и покрај големите разлики, декларацијата беше усвоена од сите земји на Г20, вклучително и Русија. – Повеќето членови силно ја осудија војната во Украина, се вели во текстот, и покрај првичниот отпор од Москва на таквата референца. Во текстот рускиот напад врз соседот се нарекува војна, а не „специјална воена операција“, како што бараше рускиот претседател Владимир Путин. Москва на самитот ја претставуваше министерот за надворешни работи Сергеј Лавров. Тој веќе си замина од Бали, неколку часа пред да биде усвоена конечната декларација. Пред самитот, преговарачите не беа сигурни дали групата на земјите во развој и развиените земји ќе успее да договори заедничка декларација, со оглед на нејзините длабоки поделби околу војната во Украина. Декларацијата упатува на резолуцијата на ОН од март во која се бара „целосно и безусловно повлекување“ на Русија од Украина. Лидерите на Г20, исто така, издадоа јасно предупредување за нуклеарна војна. – Употребата или заканата за употреба на нуклеарно оружје е недозволива, се вели во заедничката декларација. Неодамнешната руска анексија на четири украински региони предизвика загриженост дека Путин би можел да распореди нуклеарно оружје. Западните држави сепак беа помалку успешни во постигнувањето силен заеднички јазик за енергетската безбедност, која во Европа е загрозена особено поради драстичното намалување на испораките на руска нафта и гас. Лидерите на Г20 нагласија дека се „длабоко загрижени“ за глобалната безбедност на храната и го поддржуваат продолжувањето на договорот за извоз на жито, чија цел е да се обезбеди испорака од Украина. Тие ветија дека ќе ги зголемат нивните напори за климатските промени, во услови кога земјите од Г20 се одговорни за 80 проценти од глобалните емисии на јаглерод диоксид. Членки на Г20 се Аргентина, Австралија, Бразил, Канада, Кина, Франција, Германија, Велика Британија, Индија, Индонезија, Италија, Јапонија, Мексико, Русија, Саудиска Арабија, Јужна Африка, Јужна Кореја, Турција и САД, како и Европската унија.

Кина е против исклучување на Русија од Г20 и други меѓународни форуми

Тале Кристо — Tue, 15 Nov 2022 09:30:27 +0000

Кина е против исклучување на Русија од Г20 и други меѓународни форуми, изјави денеска кинескиот министер за надворешни работи Ванг Ји на индонезискиот остров Бали. Тој, на почетокот на билатералниот состанок со рускиот министер за надворешни работи Сергеј Лавров на маргините на самитот на Г20, посочи дека Пекинг ја поддржува улогата на Русија во рамки на Г20 и други меѓународни форуми и смета дека никој нема право да ѝ го одземе правото на Русија да учествува во мултилатерални формати, јавија дел од светските медиуми. Украина претходно соопшти дека бара Русија да биде исклучена од Г20, поради нејзиниот напад врз државата.

Г20 „поздравува“ повеќе напори за заштита на климата и подобро финансирање

Тале Кристо — Tue, 15 Nov 2022 07:49:15 +0000

Групата 20 водечки светски економии има за цел да ги подобри напорите за заштита на климата и нивното финансирање, се вели во нацртот на конечната заедничка декларација во која имала увид ДПА на првиот ден од годишниот самит на Г20 што се одржува на Бали оваа година. Во декларацијата, земјите-членки ја „поздравуваат“ проширената и нова национална акција за климата и ги повикуваат сите страни „итно да го зголемат“ намалувањето на емисиите, приспособувањето кон последиците од климатските промени како и „средствата за имплементација“. Г20 исто така повика на „напредок“ во преговорите за репарации за штетите предизвикани од климатските промени во сиромашните региони, спорно прашање што исто така е на врвот на агендата на климатскиот самит КОП27 што моментално се одржува во Египет. Водечките 20 економии во светот се одговорни за 80 проценти од глобалните емисии на јаглерод диоксид. Целта за ограничување на глобалното затоплување на 1,5 степени Целзиусови годишно, како што е договорено во Парискиот договор за климата, „ќе бара значајни и ефективни активности и посветеност од с ите земји, земајќи ги предвид различните пристапи“, се вели во декларацијата. – Потсетуваме и дополнително ги повикуваме развиените земји да ги исполнат своите обврски за исполнување на целта за заедничко мобилизирање на 100 милијарди американски долари годишно до 2020 година и до 2025 година во контекст на значајни мерки за ублажување и транспарентност при спроведувањето, се додава во документот. Според пресметките на Организацијата за економска соработка и развој (ОЕЦД), индустријализираните земји ставија на располагање само околу 83 милиони долари до 2020 година. Земјите од Г20, исто така, потврдија дека субвенциите за фосилни горива ќе бидат постепено укинати „на среден рок“.

Зеленски ги повика лидерите на Г20 да го вратат мирот и да стават крај на руската војна

Ивона Петрова — Tue, 15 Nov 2022 06:55:31 +0000

Украинскиот претседател Володимир Зеленски ги повика лидерите на Г20 да станат „ко-креатор на мирот“ и да стават крај на „агресивната“ војна на Русија. – Убеден сум дека сега е моментот кога руската деструктивна војна мора и може да се запре, рече Зеленски во видео обраќање на самитот на Г20 на Бали. – Секој ден одложување значи нови загинати Украинци, нови закани за светот и лудо зголемување на загубите поради продолжување на руската агресија – загуби за сите во светот, нагласи тој. Украинскиот лидер рече дека мирот е „глобална вредност“ која е важна за секој човек во светот, и ги повика лидерите да преземат акција за да обезбедат нуклеарна безбедност, безбедност на храната и енергијата, да го обноват меѓународното право и да и помогнат на Украина да ја прекине војната. – И ако Русија се спротивстави на нашата формула за мир, ќе видите дека таа сака само војна. рече Зеленски.

Земјите од Г20 „длабоко загрижени“ поради глобалната криза со храна

Ивона Петрова — Tue, 15 Nov 2022 06:41:01 +0000

Групата Г20 водечки светски економии е „длабоко загрижена“ поради глобалната криза со храна, се вели во нацрт-заедничката завршна декларација од самитот во Индонезија. Глобалната безбедност на храната е „влошена од актуелните конфликти и тензии“, пишуваат лидерите од Г20, повикувајќи на употреба на „сите достапни алатки“ за борба против кризата и „заштита на најранливите од глад“. Руската инвазија врз Украина, која почна на крајот на февруари, имаше сериозно влијание врз глобалните пазари на храна. Двете земји се сметаат за два од најважните извозници на жито во светот. Земјите-членки на Г20, вклучително и Русија, ветија дека „ќе преземат акција за промовирање на безбедноста на храната и енергијата и поддршка на стабилноста на пазарите, обезбедувајќи привремена и насочена поддршка“, се вели во заедничката декларација. „Ќе преземеме понатамошни координирани активности за справување со предизвиците за безбедноста на храната, вклучително и порастот на цените и недостигот на прехранбени производи и ѓубрива на глобално ниво“, нагласува Г20.

Лавров во Бали наместо на самитот на Г20 заврши во болница

Магдалена Андонова — Mon, 14 Nov 2022 09:25:04 +0000

Рускиот министер за надворешни работи Сергеј Лавров беше пренесен во болница по слетувањето на Бали каде што требаше да присуствува на самитот на Г20. Како што јави АП, повикувајќи се на неименувани дипломатски извори, на Лавров му била укажана медицинска помош. Еден од изворите тврди дека на Лавров му била укажана лекарска помош поради проблем со срцето.

Руска амбасада во Џакарта: Путин нема да присуствува на самитот на Г20 на Бали

Катерина Бојаџиева — Thu, 10 Nov 2022 07:39:16 +0000

Владимир Путин нема да присуствува на самитот на Г-20 следната недела на Бали, изјавија денеска од руската амбасада во Индонезија, отфрлајќи ја натамошната неизвесност околу плановите на рускиот лидер, пренесоа француските медиуми -Можам да потврдам дека руската делегација на Г20 ќе ја предводи министерот за надворешни работи Сергеј Лавров. Програмата на претседателот Путин се уште се утврдува, можеби тој ќе учествува виртуелно, изјави Јулија Томска, директорка за протокол во руската Амбасада во Индонезија. Руските медиуми јавија дека Путин би можел да им се обрати на учесниците на самитот преку видео врска. Оваа вест доаѓа по неколкумесечна неизвесност во врска со пристигнувањето на рускиот претседател на состанокот на самитот на Г20 организиран од Индонезија на 15 и 16 ноември. Сергеј Лавров претходно го напушти состанокот на министрите за надворешни работи на Г-20 во јули на Бали, по критиките од неколку колеги за руската инвазија на Украина. Индонезија беше под силен притисок од Западот да ја исклучи Русија од самитот поради војната во Украина. Но, земјите од Југоисточна Азија се одлучија за независна политика од големите блокови и нагласија дека земјата домаќин мора да биде неутрална. Индонезискиот претседател Џоко Видодо во август изјави дека Владимир Путин ја прифатил неговата покана за самитот. Украинскиот претседател Володимир Зеленски, чија земја не е членка на Г-20, исто така доби покана за состанокот и ќе може да зборува преку видео врска. Зеленски минатата недела предупреди дека нема да учествува на самитот доколку Путин биде присутен. Индонезија го потврди доаѓањето на 17 светски лидери, меѓу кои и на Си Џинпинг и Џо Бајден. Самитот се одржува во екот на повеќекратни кризи низ светот, како војната во Украина, загриженоста за светската економија поради долгорочната инфлација и последиците од климатските промени.