Газпром – Kurir.mk

Германскиот увозник „Унипер“ го тужи „Газпром“ за неиспорачување гас

Ивона Петрова — Thu, 01 Dec 2022 07:10:39 +0000

Германската енергетска компанија „Унипер“соопшти дека го тужи „Газпром“ за отштета затоа што не ги испорачале договорени количини природен гас од јуни, кога тој руски гигант почна да ги намалува испораките и целосно да ги стопира на крајот на август. Како што соопшти Унипер, германскиот увозник на руски гас, постапката против Газпром Експорт е покрената пред меѓународниот арбитражен трибунал во Стокхолм. Според Унипер, трошоците за замена на гасот што Русија досега требаше да и го испорача на Германија изнесуваат најмалку 11,6 милијарди евра, а овие трошоци ќе продолжат да се зголемуваат до крајот на 2024 година. „Газпром“ почна да го намалува снабдувањето со гас за Германија преку подводниот гасовод „Северен поток“ во средината на јуни, наведувајќи наводно технички проблеми. Берлин го отфрли тоа објаснување, оценувајќи го како покритие за политичката одлука на Москва насочена кон зголемување на цените и создавање несигурност. На крајот на август престанаа сите испораки на руски гас за Германија, која ја поддржува Украина во војната меѓу таа земја и Русија, а војната започна на 24 февруари со руската инвазија. „Унипер“ претрпе огромни загуби поради намалувањето и на крајот откажувањето на испораките на рускиот гас затоа што, за да ги исполни своите договорни обврски кон клиентите, мораше да купува гас по далеку повисоки цени. Владата во Берлин најави национализација на Унипер на крајот на септември.

„Газпром“ се закани со прекин на транзитот на гас низ Украина

Дарко Андоновски — Tue, 22 Nov 2022 14:15:22 +0000

Рускиот енергетски гигант „Газпром“ денеска соопшти дека регистрирал „исчезнување“ руски гас во Украина, наменет за испорака до молдавските потрошувачи. Компанијата предупреди дека, доколку потрае транзитниот дисбаланс, ќе ја прекине испораката на гас в понеделник, 28 ноември, од десет часот. Според наводите на „Газпром“, количината гас што се испорачува за транзит до „Молдовагаз“ преку украинската територија, го надминува физичкиот обем што се пренесува на границата на Украина со Молдавија.

Алексиев: Бугарија не земала гас од руската компанија „Газпром”

Ивона Петрова — Mon, 10 Oct 2022 05:33:08 +0000

Бугарскиот технички вицепремиер и министер за транспорт Христо Алексиев за бТВ коментираше дека неговата земја не добила ништо од количества гас од „Газпром“, што ѝ следувале согласно договорот меѓу нив. Како што јави дописникот на МИА од Софија, Алексиев појаснил дека Бугарија нема потреба од овие количества гас од Русија. -Бугарската преодна влада за два месеци постигна целосна диверзификација, и тоа по многу добра цена, што можеше да се види по цените за ноември, што ќе бидат под 200 лева (100 евра) за мегават час, рече Алексиев. Тој изјави дека на тендерите за природен гас за Бугарија учествувале 15 компании од Европа, САД и од Арапскиот Полуостров, а следната недела ќе се склучат два договори за течен гас за ноември по многу добри цени. Следната аукција треба да се отвори во декември. -Овој месец ќе ги отвориме и понудите за среднорочниот тендер што ќе ја покрие не само грејната сезона, туку ќе стигне и до крајот на следната година, рече Алексиев. Од почетокот на август, кога почна со работа техничката влада на Бугарија, цената на бензините е намалена за 40 центи (20 евроценти). Алексиев истакна дека просечната потрошувачка на струја од едно семејство во Бугарија е околу 200 киловат часови. Неговата земја ќе постави граница од 250-300 киловат часови, за да можат нормалните семејства да имаат корист од тоа. -А кој сака и користи повеќе ќе плати повеќе, изјави бугарскиот вицепремиер.

„Газпром“: Прекинато истекувањето гас од „Северен поток“

Тале Кристо — Mon, 03 Oct 2022 11:42:23 +0000

Руската компанија „Газпром“ денеска соопшти дека притисокот во гасоводите „Северен тек“ е стабилизиран и оти престанало истекувањето гас од оштетените места на гасоводите. „Притисокот во цевководот А на ’Северен поток 2’ и во двата цевководи на ’Северен поток 1’ се стабилизирани по прекинот, истекувањето гас престана“, соопшти „Газпром“. „Газпром“ соопшти дека работи на намалување на притисокот на цевководот Б од гасоводот „Северен поток 2“. Руската компанија исто така изјави дека работи на намалување на ризикот за животната средина.

Мамер: Одлуката на Газпром е донесена под лажни изговори

Ивана Ефремовски — Fri, 02 Sep 2022 18:34:05 +0000

Портпаролот на Европска комисија, Ерик Мамер на Твитер објави дека одлуката на Газпром утре да не дистрибуира гас до ЕУ е донесена „под лажни изговори“. -Овој потег потврдува дека Газпром е несигурен снабдувач, напиша Мамер. Тој додаде дека континуираните намалувања на снабдувањето со гас се „доказ за рускиот цинизам“. -Русија попрво би го запалила гас отколку да ги почитува договорите, наведе Мамер, алудирајќи на минатонеделната анализа која откри дека Русија согорува големи количини гас во еден од нејзините капацитети наместо да го користи за договорени испораки. Руската компанија Газпром денеска најави дека утре нема да дистрибуира гас кон Европска Унија преку гасоводот Северен поток 1. Во соопштението на Газпром се наведува дека утре нема да биде пуштен гасот поради истекување на масло од турбинскиот мотор. Но, компанијата не наведе кога гасот повторно би можел да потече кон Европа преку Северен поток 1. Газпром пред неколку денови ја стопира испораката на гас преку Северен поток 1 поради ремонт и беше најавено дека утре ќе биде обновена доставата на гасот. (МИА)

Газпром утре нема да дистрибуира гас кон ЕУ

Тале Кристо — Fri, 02 Sep 2022 18:13:15 +0000

Руската компанија Газпром денеска најави дека утре нема да дистрибуира гас кон Европска Унија преку гасоводот Северен поток 1. Во соопштението на Газпром се наведува дека утре нема да биде пуштен гасот поради истекување на масло од турбинскиот мотор. Газпром пред неколку денови ја стопира испораката на гас преку Северен поток 1 поради ремонт и беше најавено дека утре ќе биде обновена доставата на гасот. Газпром не наведе кога гасот повторно би можел да потече кон Европа преку Северен поток 1.

Христов: Бугарија води интензивни преговори со „Газпром“ за испорака и начинот на плаќање на гасот

Ивона Петрова — Thu, 01 Sep 2022 05:49:53 +0000

Бугарскиот преоден министер за енергетика, Росен Христов, за БНТ изјави дека неговата земја ги почнала преговорите со „Газпром“ и се обидува да постигне позитивен исход од преговорите и продолжување на испораките под услови поволни за неа. Како што јави дописникот на МИА од Софија, Христов изјави дека клаузулите од договорот се доверливи, како и сите преговори и размена на информации. Тој информира дека се водат исклучително интензивни разговори и се надева дека наскоро ќе има позитивен резултат. – Во моментов не зборуваме само за снабдување со гас, туку и за рокови за плаќање во рамките на ограничувањата наметнати од ЕУ, рече Христов. Поранешниот премиер на Бугарија, Кирил Петков, го нарече „Газпром“ небезбеден снабдувач со гас, бидејќи на крајот на зимата нагло и без предупредување ги прекина испораките за Бугарија. Тој додаде дека Бугарија имала обезбедени слотови за испорака на американски течен гас од октомври до декември, па, за него, е неразбирливо зошто шесте бродови со течен гас од САД биле одбиени од привремената влада на Галаб Донев. Во Софија имаше протести на граѓаните кои не сакаат Бугарија да склучи нов договор со „Газпром“. Учесници во нив протестираа против бугарскиот претседател Румен Радев и рускиот претседател Владимир Путин и нивната зависност од Русија. Демонстрантите побараа смена на министерот за енергетика Росен Христов.

Германија се подготвува за можна национализација на филијалата на Газпром

Ивана Ефремовски — Sun, 28 Aug 2022 07:44:46 +0000

Германската влада основаше холдинг компанија за да ја изврши евентуалната национализација на Газпром Германија, објави денеска германскиот весник Велт ам Зонтаг, цитирајќи владин документ. Во април германскиот енергетски регулатор најави дека ќе управува со компанијата Газпром Германија (трговија, складирање и пренос) во интерес на Германија и Европа. Новиот холдинг наречен Securing Energy for Europe Holding GmbH (SEEHG) е одговорен за инвестициите на компанијата, објави весникот, наведувајќи дека директорите се двајца адвокати од адвокатската фирма CMS Hasche Sigle, која одби да го коментира извештајот, повикувајќи се на обврските за доверливост. Германското Министерство за економија соопшти дека е запознато со холдинг-компанијата и дека нејзиното основање е превентивен чекор за какви било мерки за реструктуирање. „Тоа е мерка на претпазливост која во моментов постои само како обвивка на корпоративното право“, изјави портпаролот на Министерството за Велт ам Зонтаг. (МИА)

Христов: Бугарија ќе преговара со Газпром

Ивана Ефремовски — Mon, 22 Aug 2022 17:09:12 +0000

Вршителот на должноста министер за енергетика на Бугарија, Росен Христов најави дека неговата земја очигледно ќе мора да преговара со руски Газпром, јави дописникот на МИА од Софија. По брифингот во бугарската влада за справување со гасната криза, Христов коментираше дека тоа ќе бидат многу тешки разговори. Според него, Министерството за енергетика на Бугарија подготвило различни опции за разговор, но се чека одговор од Газпром. Росен Христов вели дека интерконекторот на Бугарија со Грција бил оставен без надзор од претходната администрација, а има акумулација на голем број проблеми поврзани со неговата изградба и документација. Тој додаде дека преодната влада нашла тотален хаос и раководство кое не помогнало да се реши проблемот. -„Топлификација Софија“ му должи на „Булгаргаз“ стотици милиони лева и нема шанси тоа да заврши со сегашниот начин на раководење, напротив дури се очекува да расте за 300 милиони лева (150 милиони евра) месечно, додаде Христов. (МИА)

Русија привремено ги запира испораките гас за ЕУ преку „северен ток“

Ристе Здравков — Fri, 19 Aug 2022 18:05:11 +0000

Руски „Газпром“ ги прекинува испораките гас за Европската унија преку „Северен тек“, пренесуваат агенциите повикувајќи се на извори од компанијата. Рускиот енергетски гигант „Газпром“ денеска соопшти дека транзитот на природен гас во Европската унија преку гасоводот„ Северен тек 1“ ќе биде запрен од 31 август до 2 септември поради одржување. „ На 31 август единствената оперативна компресорска единица Трент 60 ќе биде затворена на три дена заради одржување“, соопштено е од компанијата истакнувајќи дека сите поправки ќе бидат извршени заедно со експерти од германски „Сименс“. „Газпром“ додава дека „по завршувањето на работите и отсуството на технички дефекти на блокот, транспортот на гас ќе биде вратен на ниво од 33 милиони кубни метри дневно, што претставува приближно 20 проценти од вкупниот капацитет на гасовод.