генерал – Kurir.mk

Шефот на пучот во Габон в понеделник ќе положи заклетва како „преоден претседател“

Тале Кристо — Thu, 31 Aug 2023 17:12:51 +0000

Новиот лидер на Габон, генерал Брис Олигуи Нгуема ќе положи заклетва како „преоден претседател“ в понеделник пред Уставниот суд, соопштија водачите на државниот удар. Според нив, тие „постапно ќе влезат во преодните институции“. Габонската хунта објави дека го назначила генералот Брис Олигуи Нгуема за привремен лидер, а успехот на овој удар ќе претставува крај на 56-годишното владеење на семејството Бонго во таа поранешна француска колонија, земја која сега е една од најголемите африкански производители на нафта. Воената хунта вчера објави дека ја презела власта и го ставила претседателот Али Бонго во домашен притвор. Пучистите ги поништија изборните резултати со кои Бонго доби трет мандат, а ова е осми пуч во Западна и Централна Африка од 2020 година. -Предизвиците со кои се соочува Габон мора да се решат во согласност со принципите на владеење на правото, уставниот поредок и демократијата, изјави Борел, висок претставник на Унијата за надворешна политика и безбедност. Од тоа зависат мирот и благосостојбата на земјата, како и регионалната стабилност, додаде тој. Борел нагласи дека ЕУ е крајно загрижена за начинот на кој беа спроведени претседателските избори, кои му претходеа на државниот удар.

Генералот Ѓурчиновски учествуваше на конференција на началници на генералштабови на земјите членки на САД-Јадранската повелба

Тале Кристо — Thu, 22 Sep 2022 15:36:16 +0000

Началникот на Генералштабот на Армијата, генерал-потполковник Васко Ѓурчиновски, денеска учествуваше на 25-тата конференција на началници на генералштабови (НГШ) на армиите од земјите членки на САД-Јадранската повелба (А-5) која се одржа во Будва, Црна Гора. -На годинешната конференција, чиј домаќин е началникот на Генералштабот на Војската на Црна Гора, бригаден генерал Зоран Лазаревиќ, заедно со врховниот командант на Сојузничките сили за Европа, генерал Кристофер Каволи и претседавачот на Воениот комитет на НАТО, адмирал Роб Бауер, учесниците дискутираа за безбедносните предизвици во регионот на Западен Балкан и развивање заеднички капацитети на армиите од А5, со цел справување со нив, соопшти Министерството за одбрана. Генералот Ѓурчиновски во своето обраќање ја истакнал посветеноста на Армијата на Република Северна Македонија во процесот за целосно имплементирање на поставените цели на достигнување на потребните способности и капацитети, согласно одбранбениот план. Притоа се осврнал на значењето на унапредување на меѓусебните воени соработки во сите области, пред се преку споделување и здружување на капацитетите, заедничка обука и вежбовни активности со цел справување со зголемените безбедносни предизвици и подобрување на стабилноста и безбедноста во регионот и пошироко. По завршување на конференцијата, од страна на учесниците е потпишана заедничка изјава во која, покрај изразената загриженост за ситуацијата предизвикана од руската инвазија врз Украина, со која се крши меѓународното право и демократските принципи и вредности, е потврдена силната посветеност за понатамошно зајакнување на односите и воената соработка меѓу армиите од земјите членки на САД-Јадранската повелба. Притоа е нагласено дека продлабочувањето на меѓусебната соработка, заедничките активности, меѓусебната интероперабилност и капацитетите за кибер одбрана ќе овозможат ефикасно соочување со современите безбедносни предизвици и подобрување на регионалната безбедност. Генералот Ѓурчиновски како дел од програмата оствари неколку билатерални средби со своите колеги меѓу кои и со генералот Кристофер Каволи. – На Конференцијата учествуваа началниците на Генералштабови на армиите на земјите членки на САД-Јадранската повелба (Северна Македонија, Хрватска, Албанија, Босна и Херцеговина и Црна Гора), командантот на Европската команда на ВС на САД за Европа, воедно и врховен командант на сојузничките сили, претставници на националните гарди (НГ) од сојузните држави на САД кои сепартнери на земјите од А5, како и претставници од ВС на Словенија, Србија и Косовските безбедносни сили во својство на набљудувачи, се наведува во соопштението. Во текот на вчерашниот ден во склоп на конференцијата се одржа состанок на ниво на главни подофицери на армиите на земјите членки на А5. САД-Јадранската повелба е започната во 2003 година, со потпишување договор во која покрај САД како покровител, Република Северна Македонија, Албанија и Хрватска се обврзаа низ институционална рамка да ја развиваат регионалната соработка во областа на одбраната. Подоцна, во текот на 2008 година, на иницијативата се приклучени и Босна и Херцеговина и Црна Гора, додека Словенија, Србија и Косово имаат статус на земји набљудувачи. Конференциите на началниците на Генералштабови (НГШ) на армиите од земјите членки на САД-Јадранската повелба се одржуваат еднаш годишно според ротирачки принцип. Армијата на Република Северна Македонија ќе биде домаќин на следната, 26-та конференција, која ќе се одржи во 2023 година.

Турција првпат назначи жена генерал

Ивона Петрова — Sat, 13 Aug 2022 19:46:35 +0000

Турската армија назначи прва жена генерал, објавено е денеска во Службениот весник на оваа земја. Како што пренесува „Anadolu Agency“, Озлем Јилмаз е унапредена во бригаден генерал од позицијата виш полковник. Сега таа ќе биде потпретседателка на Академијата за жандармерија и крајбрежната стража. Другите унапредувања вклучуваат двајца генерал-полковници, 16 генерал-мајори и 13 бригадни генерали.

Генерал Каволи е новиот командант на американските сили во Европа

Ивона Петрова — Sat, 02 Jul 2022 08:51:31 +0000

Генералот Кристофер Г. Каволи е новиот командант на американските сили во Европа, јави ДПА. Тој ќе ја преземе Европската команда на американското Министерство за одбрана (EUCOM) од генералот Тод Волтерс, кој заминува во пензија. Каволи беше претставен на церемонија во Штутгарт, Германија, на која присуствуваше и американскиот секретар за одбрана Лојд Остин. Остин го пофали генералот, нарекувајќи го „вистинскиот човек во вистинско време“. „Зборувајќи одлично руски, италијански и француски, Каволи е исклучително добро подготвен за оваа задача по неговата долга воена обука за дополнително зајакнување на позицијата на НАТО на источноевропското крило“, рече министерот за одбрана. Со околу 64.000 војници, Европската команда е одговорна за операциите на САД во Европа, делови од Азија и Африка, Блискиот Исток и Атлантскиот Океан. Каволи е 19-тиот командант кој ја презема командата на американските сили во Европа. Волтерс ја извршува функцијата од мај 2019 година.

Украинската армија го потврди загинувањето на прорускиот генерал Роман Кутузов во борбите во Луганск

Ивона Петрова — Mon, 06 Jun 2022 06:07:18 +0000

Украинската армија ја потврди смртта на проруски сепаратистички генерал, откако претходно руската државна телевизија објави за загинувањето на генерал-мајорот Роман Кутузов на фронтот во источниот дел на Украина. На интернет-страницата „Украинска правда“ доцна синоќа беше објавено дека „официјално е денацификуван и демилитаризиран“ командантот на 1-от армиски корпус на сепаратистичката Народна Република Доњецк, генерал-мајор Кутузов, притоа повикувајќи се на информации од Управата за стратешки комуникации на украинските вооружени сили. Кутузов, наводно, бил убиен во напад на проруските сили врз населено место блиску до градот Попасна, во областа Луганск во источна Украина. Украинската војска претходно објави дека офанзивата на проруските сили била неуспешна и дека непријателот бил принуден да се повлече со „значителни загуби“. Од почетокот на инвазијата врз Украина се убиени неколку руски генерали, а Москва досега го потврди загинувањето само на четворица. Украинската страна во еден момент тврдеше за загинување на седум руски генерали, за потоа двајца од нив да се појават живи. Министерството за одбрана во Киев вчера предупреди на можни нови ракетни напади врз Киев, иако врз главниот град на земјата немаше напади уште од крајот на април. „Отсекогаш отворено сме предупредувале дека Киев е постојано под воена закана“, изјави вчера заменичката-министер за одбрана на Украина Хана Маљар. Таа посочи дека независно што многу од раселените граѓаните на почетокот на конфликтот веќе се вратиле во Киев, треба да се знае дека престолнината на Украина останува главна цел на руските сили.

НА 60 ГОДИНИ ЈА ЗАГУБИ БИТКАТА СО КОРОНАВИРУС – почина пензионираниот генерал Бранко Дракалски

Магдалена Андонова — Tue, 15 Dec 2020 15:07:06 +0000

Генералштабот на Армијата на Република Македонија со жалење и сочувство кон фамилијата, ја известува јавноста дека бригадниот генерал во пензија Бранко Дракалски по кратко боледување, на 59 годишна возраст ја загуби битката со корона вирусот. Во текот на неговата воена кариера до неговото пензионирање во 2015 година, бригадниот генерал Бранко Дракалски, има извршувано повеќе високи воени должности, а во период од 2009 – 2014 година беше и највисок воен претставник во седиштето на НАТО во Брисел. Претходно има извршувано голем број на командантски должности меѓу кои и командант на втората механизирана пешадиска бригада. Военото образование го започнува во воената воена гимназија во Белград, а покасно завршува Воена академија на Копнената војска во 1983 година. Командно-штабна академија завршил на Воената академија во Скопје во 1996 година, а завршил и школа за национална одбрана во Алабама (САД), на тамошниот Универзитет за национална одбрана во 2005 година. Во чин бригаден генерал е унапреден во 2009 година. Во текот на својата кариера, како потврда за неговата професионалност во службата, добивал повеќе признанија, пофалби и други стимулативни мерки. Меѓу другото одликуван е со Медал за воени заслуги. Автор е на неколку стручно-специјалистички трудови, меѓу кои и трудови кои се објавени на англиски јазик. Во пензионерските години генералот Бранко Дракалски остана активен допринесувач во полето на одбраната. Бригадниот генерал Бранко Дракалски е погребан денес, согласно процедурите за спречување на ширење на вирусот од „Ковид 19“ во неговото живеалиште во Битола.

Трамп ја повлече номинацијата на генералот Ентони Тати

Тале Кристо — Tue, 04 Aug 2020 06:02:17 +0000

Американскиот претседател Доналд Трамп ја повлече номинацијата на бригадниот генерал во пензија Ентони Тати, кој поранешниот американски претседател Барак Обама го нарече „терористички лидер“, за помошник министер за одбрана задолжен за политика, соопшти Белата куќа. Соопштението на Белата куќа е објавено еден ден откако портпаролката на Пентагон рече дека Тати, кој не успеа да обезбеди сослушување на американскиот Сенат за да ја потврди номинацијата, зазеде втора, пониска позиција во Министерството за одбрана.

Генералот Пол Накасоне номиниран за директор на НСА

Ивона Петрова — Wed, 14 Feb 2018 08:53:30 +0000

Претседателот на САД, Доналд Трамп го номинираше генералот Пол Накасоне за директор на Агенцијата за национална безбедност (НСА), соопшти на Твитер специјалниот помошник на претседателот Роб Џојс. По номинацијата, втор филер е Сенатот, каде се очекува неговиот избор да биде одобрен. Истовремено, генералот Накасоне ќе ја предводи и воената Киберкоманда на САД. Џојс за Накасоне рече дека е „исклучителен лидер“, со големо искуство во гарантирањето на кибер безбедноста. Актуелниот директор на Агенцијата за национална безбедност и шеф на воената киберкоманда, адмирал Мајк Роџерс во јануари соопшти дека на пролет планира да поднесе оставка по четири години минати на таа функција.

Почина поранешен началник на генералштабот на АРМ

Александар Михаилов — Sat, 30 Dec 2017 11:44:01 +0000

На 79-годишна возраст денеска почина генерал Трајче Крстевски, поранешен началник на генералштабот на АРМ. Како што соопшти АРМ, генералот Крстевски утре ќе биде погребан со воени почести на градските гробишта во „Бутел“ во 13 часот, а посмртните останки ќе бидат изложени во капелата во „Бутел“ од 12 часот. Генералот Крстевски беше трет началник на ГШ на Армијата на Република Македонија во период од 22 јанури 1996 до 11 февруари 2000 година. Во времето на распадот на Југославија,тој бил на служба во Република Хрватска. Поради познатите настани што се случија во 1991 година, тој ја напушта ЈНА и се враќа во Република Македонија, каде се приклучува во процесот на фомирањето на воените формации на единиците на АРМ.