ѓоре јовановски – Kurir.mk

Јовановски: Во криза сме, но ќе излеземе посилни со напорна работа

Катерина Бојаџиева — Thu, 27 Sep 2018 11:23:04 +0000

Тренерот на Работнички, Ѓоре Јовановски по вчерашното гостување (3:0) против Македонија ЃП, признава дека тимот е во криза. Искусниот фудбалски стручњак смета дека серијата од три порази може да се прекине само со напорна работа. - Очигледно е дека тимот го зафати криза. Резултатите и игрите не се на посакуваното ниво, но ќе мора да излеземе посилни од сето ова. Добро е што се случува сега, кога се уште сме на почетокот на првенството, имаме време да се подобриме во сите сегменти. Ќе ја анализираме ситуацијата, и тимски, и поединечно, и не треба да паѓаме психолошки, туку да се издигнеме и да излеземе посилни со напорна работа, вели Јовановски за клупскиот сајт на „романтичарите“. Работнички во сабота на домашен терен ќе ја пречека Беласица, во рамките на осмото коло од Првата македонска фудбалска лига.

Јовановски: Одигравме најслабо сезонава

Катерина Бојаџиева — Mon, 17 Sep 2018 11:27:43 +0000

Тренерот на Работнички, Ѓоре Јовановски, изјави дека на дуелот со Шкендија во Тетово кој неговиот тим го загуби со 6:2, фудбалерите одиграле под нивото и најслабо од почетокот на сезоната. - Добивме убава лекција од Шкендија. Го одигравме најслабиот натпревар оваа сезона и очигледно е дека ќе мораме да исправиме многу грешки во нашата игра. Секој фудбалер ќе треба добро да се замисли како одиграл и во иднина да се труди да биде многу подобро, секако, сето тоа вклопено во еден тимски дух. Сепак, нема да дозволиме овој пораз да не вовлече во непосакувани води и мораме веднаш да се фокусираме на следниот меч, нагласува Јовановски во изјавата за клупската веб страница. Следен предизвик за „романтичарите“ е веќе во среда во осминафиналето во Купот на Македонија, кога му гостуваат на Тиквеш. - Ќе се насочиме максимално на тој дуел, а во наредните дваесетина дена не очекуваат дури седум натпревари, потенцира шефот на стручниот штаб на Работнички.

Јовановски: Задоволство од резултатите, но играта може да биде и многу подобра

Ристе Здравков — Thu, 06 Sep 2018 12:06:55 +0000

Екипата на Работнички оствари три победи по ред во македонскиот фудбалски шампионат, по стартниот пораз од Ренова, и репрезентативната пауза ја дочека на првата позиција на табелата со девет освоени бода. Ова секако му причинува задоволство на шефот на стручниот штаб, Ѓоре Јовановски, кој сепак потенцира дека играта на тимот треба уште многу да се подобрува. - Ако ги анализираме натпреварите од резултатски агол, тогаш треба да бидеме задоволни. По поразот на самиот почеток од првенството, потоа влеговме во победничка низа од три натпревари. Но, секогаш гледаме напред и сакаме да бидеме подобри, па затоа треба да работиме уште многу на подобрување на играта на тимот. Можеме да функционираме подобро во одредени линии од тимот, треба да исправиме некои грешки кои се појавија и затоа не очекува напорна работа, стои во изјавата на Јовановски за клупскиот сајт. Работнички в сабота, со почеток во 19 часот, ќе гостува во Србија и ќе одигра пријателски натпревар против Раднички Ниш, на стадионот „Чаир“.

Ѓоре Јовановски: Грешки се повторуваат, не смееме тоа да го дозволиме

Матеја Петровски — Mon, 13 Aug 2018 12:36:12 +0000

ренерот на Работнички, Ѓоре Јовановски не е задоволен од стартот на новата сезона во Првата фудбалска лига. „Романтичарите“ вчера загубија на домашен терен од Ренова со 3:4, а самиот резултат отсликува дека одбраната била послабиот дел на тимот. - Одигравме лош натпревар, тоа е повеќе од јасно. Честитки за екипата на Ренова, тие заслужено ги освоија бодовите, но јас мислам дека ние им подаривме три од четирите гола поради наши грешки. И што е уште полошо, ова ни се случи и на гостувањето против Хонвед, во реваншот од Лигата на Европа. Ќе ги анализираме сите ситуации и такви грешки не смеат да ни се повторуваат. Ако има нешто добро во овој лош старт, тоа е дека е само прв меч и почеток на првенството, а ова наше издание треба да биде урнек како да не играме во иднина, изјави Јовановски за клупскиот сајт на Работнички. (Миа)

Јовановски: Мисијата е комплетирана

Ивона Петрова — Tue, 22 May 2018 12:58:41 +0000

Тренерот на Работнички, Ѓоре Јовановски е задоволен од остварување на целта на неговите избраници, а тоа е обезбеден пласман во Лигата на Европа. - Работевме напорно, честитки за фудбалерите кои издржаа огромен притисок и вложија големи напори, но сега со задоволство можеме да кажеме дека мисијата е комплетирана. Целта на клубот беше да обезбеди повторно учество во европските купови и среќни сме што успеавме да го реализираме тој план. Морам да кажам дека тимот одигра феноменално оваа пролет, надоместивме двоцифрена бодовна разлика и на крајот завршивме на посакуваната трета позиција, изјави Јовановски за клупскиот сајт. Фудбалерите на Работнички веќе добија заслужен одмор, а стручниот штаб од утре ќе продолжи со работа со фудбалерите од младинскиот погон. - Фудбалерите се на одмор до 10 јуни. И тоа со јасна порака, да не размислуваат воопшто за фудбал, туку убаво да се одморат, затоа што вложија натчовечки напори во изминатиот период. Во меѓувреме, стручниот штаб ќе работи со младинците, сакаме да видиме со каков потенцијал располагаме, а секако ќе има и нови засилувања во овој летен преоден рок, соопшти тренерот Јовановски.

Јовановски: Да продолжиме во ист ритам и против Ренова

Матеја Петровски — Tue, 17 Apr 2018 12:30:06 +0000

Тренерот на Работнички, Ѓоре Јовановски е задоволен од изданието што екипата го имаше на претходниот меч и посакува ритамот да се задржи и за следниот натпревар, против Ренова во Тетово. - Остваривме важна победа на едно тешко гостување. Скопје на негов терен оваа пролет не успеаја да го победат ниту Шкендија, ниту Вардар, а ете ние освоивме три значајни бода. Честитки за фудбалерите за прикажаната игра, за борбеното издание, и се надевам дека ќе продолжиме во ист ритам и против Ренова. Ќе биде тоа ново искушение, теренот е одличен на Градскиот стадион во Тетово и ќе ги имаме сите услови за вистинско надигрување. Ренова е квалитетен тим, ги респектираме, но и веруваме во своите квалитети, вели Ѓоре Јовановски за клупскиот веб сајт. Натпреварот меѓу Ренова и Работнички ќе се одигра утре, со почеток во 16 часот на Градскиот стадион во Тетово.