ѓорге иванов – Kurir.mk

Иванов во посета на Кинеската академија на општествени науки во Пекинг

Тале Кристо — Sat, 04 Nov 2023 08:43:54 +0000

Поранешниот претседател на Република Македонија, д-р Ѓорге Иванов од 1 до 4 Ноември учествуваше на деветтиот симпозуим на високо ниво во организација на Кинеската академија на општествени науки од Пекинг, на тема "Соработка во нови околности: Статус кво и аспирации". Во своето излагање Иванов се осврна на овогодинешниот јубилеј 30 години од воспоставување на дипломатските односи и 30 години пријателство меѓу Република Македонија и Народна Република Кина. „Од воспоставувањето на дипломатските односи Народна Република Кина има обезбедено за Македонија преку 325 милиони јуани помош за образование, медицинска нега, научни истражувања и други области. Трговскиот баланс е со константен трговски дефицит за Македонија. Во 2022 година остваривме извоз од 57 милиони долари, а увезовме стока во износ од 994 милиони долари. Кина е четврта земја по ред со која Македонија остварува најголем обем на размена со светот, а веројатно наскоро ќе биде и трета“, порача Иванов. За време на симпозиумот поренешниот претседател Иванов оствари средби со претседателот на кинеската академија за општествени науки Гао Џианг, како и со дел дел од своите поранешни колеги Борут Пахор, поранешниот претседател на Словенија, Младен Иваниќ, поранешниот претседател на претседателството на Босна и Херцеговина и Иван Мркиќ, поранешниот министер за надворешни работи на Република Србија.

Започна 14-тата Школа за млади лидери на Претседателот Иванов

Ивана Ефремовски — Thu, 12 Oct 2023 06:49:54 +0000

Во Охрид синоќа започнаа сесиите во живо од 14тата Школа за млади лидери на поранешниот претседател на Република Македонија, проф. д-р Ѓорге Иванов. Школата беше свечено отворена вчеравечер, од поранешниот претседател Иванов, кој на младите лидери им посака добредојде во Охрид. Им посочи на младите лидери никогаш да не ја губат надежта и трпението и секогаш да размислуваат позитивно, да бидат подготвени континуирано да се образуваат и да се развиваат, а тоа можат да го постигнат со самокритичност, самодоверба и саморефлексија. Исто така, им посака да се стекнат со нови пријателства, нови лидерски вештини и нови знаења кои ќе ги подготват полесно да се соочат со предизвиците на нивниот животен пат. По неговото поздравно обраќање, како гостин на Школата се обрати и поранешниот претседавач со претседателството на Босна и Херцеговина, проф. д-р Младен Иваниќ, кој на големо задоволство на учесниците зборуваше за лидерството, за одлуките кои треба да ги носат и дека истите тие одлуки не секогаш ќе бидат прифатени од останатите, но тоа е одлика на вистинските лидери. Учесниците, предавачите и гостите во текот на Школата, освен што ќе уживаат во преубавиот амбиент на долгогодишниот поддржувач и партнер на Школата – Хотелот „Инекс Олгица“ и ќе имаат можност да ги видат убавините на Охрид. Темата на овогодинешната Школа за млади лидери е „Едукација – трансформација – лидерство“ и на истата учествуваат четириесетина учесници од различни земји од светот, од Македонија, Србија, САД, Азербејџан, Турција, Јемен, Алжир, Нигерија, Германија, Филипини и Канада, кои своите знаења, вештини и амбиции за лидерство ќе ги градат и развиваат со повеќе од дваесет меѓународно признати професори, експерти од различни области, актуелни и поранешни политичари. Меѓу предавачите оваа година се Златко Лагумџија, поранешен Премиер на БиХ, актуелен Амбасадор на Босна и Херцеговина во ОН; д-р Исмаил Сарагелдин, поранешен директoр на Александриската библиотека и потпретседател на Светска банка; проф. д-р Колин Снидер, професор по историја на Латинска Америка на Универзитетот Тексас – Тајлер; проф. Томас Гудерјан, професор по антропологија на Универзитетот Тексас – Тајлер во САД; Мајк Коб, експерт за организирање на процесот на едукација во Саудиска Арабија; Марк Донфрид, директор на Институтот за културна дипломатија во Берлин; проф. д-р Роберт Стеркен, професор по политички науки во Универзитетот Тексас-Тајлер во САД; проф. д-р Анис Сефиданис, професор информатички науки и роботика на Универзитетот „Св. Апостол Павле“ во Охрид; проф. д-р Невенка Димитрова, лидер во истражување на податоци од областа на биомедицината; проф. д-р Александра Креглер, асистент професор на одделот за Социологија на Универзитетот Тексас – Тајлер во САД; проф. Никола Илиќ - основач и директор на ChangeLab Global, професор на Универзитетот Џорџтаун во Вашингтон; проф. д-р Александар Кирјаковски - асистент професот по Психологија на Меѓунатодниот Балкански Универзитет во Скопје; амб. Ивица Боцевски, поранешен вице премиер за Европска Интеграција и поранешен амбасадор во Бразил; Зоран Костовски и Ранко Безар од МОТИВА; Виктор Мизо, генерален менаџер на Костал Груп и Костал Македонија; д-р Игор Радев од МАНУ; Рашела Мизрахи, пратеничка во Сорабранието на Република Македонија; д-р Александар Митов, експет по јавно здравје и проф. д-р Гордана Силјановска – Давкова, професор на Правниот факултет „Јустинијан Први“ во Скопје, пратеничка во Собранието на Република Македонија и кандидат за претседател во 2019 година. Школата е организирана од Кабинетот на поранешниот Претседател Иванов во партнерство со Меѓународниот центар „Алијанса на цивилизациите“ и Алумни Асоцијацијата „Иванов Школа за лидери“. 14-та Школа за млади лидери на Претседателот Иванов континуирано ја потврдува својата заложба за создавање на нови генерации млади лидери во областите од кои доаѓаат, притоа овозможувајќи им преку предавањата кои ќе ги слушаат и контактите кои ќе ги создадат, понатаму да се развиваат и на личен и на професионален план. Спонзори и поддржувачи на Школата за млади лидери се Канцеларијата на ТИКА - Агенција за соработка и координација на Турција во Скопје, Хотелот Инекс Олгица Охрид, ТАВ Македонија, Туркиш Ерлајнс, Делфино, Витаминка, Алкалоид, Петрол Оил, А1 Македонија, Скопска пивара, DMS, Комфи Ејнџел, Мотива. Школата за млади лидери е иницијатива на Претседателот Ѓорге Иванов која започна на почетокот на неговиот прв мандат. Првата Меѓународна обука за млади лидери се одржа во 2010 година. Оттогаш, во текот на досегашните 13 школи, учествуваа 509 млади луѓе од земјата и од странство, со различна академска и професионална позадина. Во склоп на Школата за млади лидери, низ годините до сега предавања одржаа над 322 реномирани предавачи од Република Македонија, Европа и светот. Во 2018 година, проектот Школа за млади лидери на Претседателот Иванов, е прогласен за најдобар социјално одговорен проект во Европа за 2017 година од страна на Светскиот инвестициски форум на бизнис ангели.

Иванов домаќин на Форумот за културна дипломатија-Скопје 2023

Ивона Петрова — Mon, 04 Sep 2023 05:38:35 +0000

Бројни меѓународни претставници меѓу кои пет поранешни претседатели, двајца поранешни премиери, поранешни министри како и повеќе актуелни членови на парламенти ќе учествуваат на Форумот за културна дипломатија-Скопје 2023 што од денеска до 6 септември ќе се одржи во Скопје, чиј домаќин е поранешниот претседател Ѓорге Иванов. Како што соопштија од Кабинетот на Иванов, главниот фокус на форумот што првпат се организира во земјава е „Промовирање на демократијата, единството и мирот преку културна дипломатија во новата ера на конфликти и насилство“. Предвидени се панел дискусиии и дебати, средби, разговори и посети на државни институции при што домашните и странски претставници, дипломати, уметници, професори, личности од бизнис заедницата и од младински организации ќе имаат можност да изнесат свои ставови и да разменат идеи и мислења на повеќе теми. Официјално своето присуство на настанот го потврдија поранешните претседатели на Хрватска, Иво Јосиповиќ, на Србија, Борис Тадиќ, на Бугарија, Петар Стојанов, на Албанија, Бамир Топи, поранешниот претседавач на БиХ, Младен Иваниќ, како и поранешните премиери на Молдавија, Наталија Гаврилита и на Либан, Хасан Диаб. Меѓу истакнатите странски гости ќе бидат и Армин Лашет, кандидат за германски канцелар и премиер на покраината Северна Рајна-Вестфалија, Ана Линде, поранешна министерка за надворешни работи на Шведска, Елмар Брок претседавач со Комитетот за надворешни работи во Европскиот парламент 2012-2017, како и актуелни членови на парламентите на Шкотска, Хрватска, Романија, Ирска и на Европскиот парламент. Учесниците на форумот ќе имаат можност да се сретнат и дискутираат и со претседателот Стево Пендаровски, министерката за одбрана Славјанка Петровска, со членовите и претседателот на Националниот совет за евроинтеграции во парламентот, Александар Николовски и со градоначалничката на Скопје, Данела Арсовска. Во неофицијалниот дел, во организација на градот Скопје, ќе биде приредено културно-историско разгледување на Скопје, посета на Старата скопска чаршија и централното градско подрачје, а гостите ќе имаат можност да вкусат и традиционална македонска храна пропратена со музичко - уметничка програма. Форумот за културна дипломатија - Скопје 2023 е во ко-организација на Кабинетот на поранешниот претседател на Република Македонија Ѓорге Иванов, заедно со Институтот за културна дипломатија од Берлин, Градот Скопје и Меѓународниот центар „Алијанса на цивилазиите“. Се одржува во рамките на Светскиот форум за демократија и мир (2022-27), којшто е петгодишен проект на Институтот за културна дипломатија. Преку користење на дипломатија меѓу различните култури, овој проект има за цел да ги подобри меѓународните односи и да ги доближи страните во современиот свет. Неговата визија е преку своите мрежи и учесници да создаде креативни иницијативи и програми за продолжување на дијалогот и стабилизирање на состојбите, во рамките на меѓународната соработка. Претходниот форум се одржа во Берлин, а до крајот на годинава планирани се настани во Њујорк и во Брисел. Основан во 1999 година во САД, Институтот за културна дипломатија е меѓународна, невладина организација со седиште во САД и Германија, чијашто мисија е преку културните односи да го одржува и јакне дијалогот што води до подобро разбирање и поголема доверба меѓу народите и заедниците. Во изминатите години говорници на институтот биле поранешни шефови на држави и влади на повеќе европски земји како Франција, Велика Британија, Шпанија, Ирска, Литванија, Романија, Белгија, Словенија и др, политичари од САД како и од земји од Африка и од Азија, стои во соопштението.

Папата Франциск доби признание од Иванов и Школата за млади лидери

Дарко Андоновски — Wed, 29 Mar 2023 10:40:58 +0000

Поранешниот претседател на државата од 2009 до 2019 година, д-р Ѓорге Иванов, денеска присуствувал на генералната аудиенција на Папата Франциск, што се одржа на плоштадот Св. Петар во Ватикан. Повод за посетата на Ватикан и присуството на аудиенцијата, соопштија од Кабинетот на Иванов, е врачувањето на признанието „Морален лидер на денешнината'’ на Неговата Светост Папата Франциск од страна на Школата за млади лидери на Претседателот Иванов. Минатата година, за време на 13. Школа за млади лидери на претседателот Иванов која се одржа во периодот 16-30.09.2022 година на тема „Морално лидерство“, Школата за млади лидери одлучила да му додели признание на Неговата Светост, Папата Франциск, за морален лидер на денешнината. По завршувањето на 13. Школа за млади лидери, на иницијатива на Католичката црква во Република Македонија, било договорено присуство на генералната аудиенција на Папата Франциск на 29 март 2023 година и врачување на признанието лично од претседателот Иванов на Неговата Светост. - Папата Франциск му се заблагодари на Претседателот Иванов за признанието и истакна дека се уште му се свежи импресиите и срдечниот прием при посетата на Македонија на која домаќин беше претседателот Иванов. Воедно, Папата Франциск упати поздрави до Македонија и македонскиот народ, стои во соопштението. Во придружба на Претседателот Иванов и неговиот Кабинет, Бискупот Киро Стојанов од Католичката црква во Република Македонија, присуствувале и претставници на Алумни Асоцијацијата на Школата ИСЛАА, како и пријатели и поддржувачи на Школата за млади лидери.

Поранешниот претседател Иванов на 26. Евроазиски економски самит на Фондацијата Мармара

Тале Кристо — Thu, 16 Mar 2023 08:23:35 +0000

Поранешниот претседател Ѓорге Иванов, учествуваше на 26. Евроазиски економски самит на Фондацијата Мармара што се одржа во периодот 13-15 март во Истанбул, на кој главна тема беше да се прекине недовербата, да се гради соработката. Како што соопштија од неговиот кабинет, главни говорници на свеченото отворање на самитот на тема 100 години од Турската Република беа Иванов и реномираниот историчар академик и писател проф. д-р Илбер Ортајли. Иванов, честитајќи им го на домаќините едновековниот јубилеј на Република Турција со желби за просперитет, мир, успеси и благосостојба, зборуваше за основоположниците на Турската Република, Мустафа Кемал Ататурк и Али Фети Окјар, родум од некогашна отоманска Македонија, односно Румелија. -Врската меѓу Македонија и Ататурк и Окјар не е само географска, туку тоа е просторот каде се формирал нивниот светоглед, каде учеле колку е важен соживотот, прифаќањето и почитувањето на другите. Иванов потсети на визионерската мисла на Ататурк во која тој ја предвидува независноста на Македонија, која години подоцна станува реалност. Македонија имала секогаш силни релации со Турција, раѓајќи големи синови и ќерки, а тоа секако се и Ататурк и Окјар, се наведува во соопштението. Иванов, се додава, се обрати и на претседателската сесија посветена на анализа на поларизираниот свет по една година од почетокот на руско-украинската војна, во која учествуваа поранешни претседатели на Турција, Романија, Црна Гора, Чешка, Хрватска, Босна и Херцеговина, Молдавија, Косово и на Албанија. Во своето обраќање Иванов нагласи дека оваа војна отвори многу прашања и конфликти кои мислевме дека се затворени, и дека има четири можни сценарија. Според него, тоа се: прво, победа на првата страна; второ, победа на втората страна; трето, примирје и мировен договор; и четврто сценарио, замрзнување на конфликтот. Поради тоа, посочува, имаме потреба од точни проценки како ќе заврши војната за да се избегнат можните последици, бидејќи погрешните проценки имаат тенденција да создаваат дополнителни постконфликтни состојби. -Претседателот Иванов рече дека сме сведоци на крајот на една епоха, на еден униполарен свет, а воедно сме соочени со неизвесни алтернативи. Истакна дека ова е време на дигитална трансформација, кога вештачката интелигенција полека ја презема улогата на просветителството, човековиот ум и науката, на што и посочува Хенри Кисинџер во една од неговите последни книги. Со тоа, оние кои ќе доминираат со вештачката интелигенција, ќе доминираат и со светот. Вештачката интелигенција е како огнот – добар слуга, лош господар. Затоа е неопходно да бидеме претпазливи како човекова цивилизација за да не потпаднеме повторно во некој нов вид на ропство, порача Иванов. За време на посетата на Истанбул, Иванов оствари средби со Вселенскиот Патријарх Вартоломеј, проф. д-р Илбер Ортајли, со повеќето од своите поранешни колеги присутни на самитот, како и со други учесници на форумот, стои во соопптението.

Иванов се обрати на Светскиот форум за демократија и мир во Берлин

Тале Кристо — Sat, 18 Feb 2023 14:13:38 +0000

Општ заклучок на сите годишни извештаи и демократски индекси за 2022 година е дека светот станува сѐ помалку демократски. Демократијата секаде се соочува со опаѓање, а автократијата е во пораст, рече поранешниот претседател на државата Ѓорге Иванов во обраќањето на Светскиот форум за демократија и мир 2023 во Берлин. Иванов е еден од учесниците на форумот, покрај големиот број поранешни претседатели, премиери и политичари. Тој имаше обраќање на главната тема „Зголемени закани за демократијата насекаде низ светот“, но посебно се осврна на темата на неговото излагање „Преживување на демократијата“. -Демократијата секаде се соочува со опаѓање, додека автократијата е во пораст. На глобално ниво бројот на земјите кои се движат кон авторитаризам, во последните шест години е двојно поголем од бројот на земји кои се движат кон демократија. Се влошуваат граѓанските слободи и владеењето на правото, а авторитарните влади стануваат сѐ повеќе репресивни, истакна Иванов и нагласи дека светот се соочува со повеќе кризи истовремено, почнувајќи од порастот на трошоците за живот до ризикот од нуклеарен конфликт. Овие кризи, според него, доведуваат до опаѓање на демократските стандарди во светот и предизвикуваат ерозија на демократијата. -Високата инфлација, економските проблеми, кризите во снабдување со енергија, кризата со храна, опаѓањето на животниот стандард, двојните стандарди во однос на миграцијата и бегалците. На глобално ниво демократијата се соочува со различни закани, а сѐ поактуелен станува проблемот со легитимноста на изборните резултати, ограничувањето на слободите и правата на интернет, тврдокорната корупција, растот на екстремни политички партии, рече Иванов. Тој потенцираше дека во повеќе земји постои голема политичка поларизација, дисфункционалност на институциите и загрозување на граѓанските слободи и права, а како најсуштествени актери за јакнење на автократските системи и ерозијата на демократските норми се посочуваат политичките и економските елити кои сакаат да го заштитат својот клиентелистички и корумпиран систем. -Треба секогаш да се има предвид фактот дека демократијата не е постојана и статична состојба, туку е во постојано движење и претставува процес на промена и усовршување. Затоа, мора да го проценуваме и да го развиваме демократскиот систем во согласност со потребите и предизвиците на нашето време, за да можеме да го заштитиме и усовршиме како држави и како меѓународна заедница, истакна Иванов кој за време на посетата одржа и повеќе средби со учесниците на форумот, како и со организаторите на настанот. Форумот што се одржува од 16 до 18 февруари, го организира Академијата за културна дипломатија. Светскиот форум за демократија и мир (2022-7) е петгодишен проект кој се одвива почнувајќи од јули 2022 година и го спроведува Академијата за културна дипломатија во соработка со глобални меѓународни организации, национални влади, меѓународни корпорации и водечки академски институции. Институтот за културна дипломатија е основан во 1999 година во САД и е меѓународна, непрофитна, невладина организација со седиште во САД и Германија. Според Институтот, културната дипломатија одамна е препознаена како главен инструмент за промовирање на меѓукултурните врски меѓу земјите, заедниците и народите. Институтот за културна дипломатија е основан со цел да ја промовира културната дипломатија на глобално ниво, а со тоа да придонесува за постигнување глобален мир преку зајакнување на меѓукултурните односи.

Европскиот суд за човекови права ја отфрли жалбата за поништената аболиција на Иванов

Тале Кристо — Thu, 16 Feb 2023 09:35:22 +0000

Европскиот суд за човекови права во Стразбур ја отфрли како недопуштена, жалбата за поништената аболиција на поранешниот претседател Ѓорге Иванов од 2016 година со која беа помилувани 56 лица осомничени и осудени во повеќе предмети што ги водеше Специјално јавно обвинителство, меѓу кои и поранешниот премиер Никола Груевски, министерот за транспорт и врски во неговата влада Миле Јанакиески, министерката за внатрешни работи Гордана Јанкулоска, поранешниот директор на УЈП Сашо Мијалков и други тогашни државни функционери. ЕСЧП одлучуваше по жалбата поднесена од осумина граѓани на Република Северна Македонија од 2020 година. Одлуката на Судот е достапна на следниот линк. Станува збор за аболицијата на поранешниот претседател Ѓорге Иванов од април 2016 година. Во 2016 година Уставниот суд ги укина законските измени од 2009 година во кои се избриша член 11, што му даде можност на претседателот да дава аболиција и без спроведување на постапката за помилување. Веднаш по одлуката на Уставниот суд, Иванов одлучи да ги помилува тогашните функционери од ВМРО-ДПМНЕ, што доведе до масовни протести.По реакциите во јавноста, беа донесени измени на Законот за помилување со што се отвори простор за повлекување на аболициите.

Поранешниот претседател Иванов се обрати во Обединетите Нации во Женева

Ристе Здравков — Sat, 14 Jan 2023 08:14:31 +0000

Вчера поранешниот претседател Иванов се обрати во Обединетите Нации во Женева на Состанокот на високо ниво на Меѓународниот центар Низами Ганџави и Канцеларијата на ОН во Женева кој се одржа во периодот од 12-13 јануари 2023 во Женева, Швајцарија. Состанокот на високо ниво беше на тема ,,Собирајќи ги деловите: Предизвици за поправање на скршениот свет”, а претседателот Иванов се обрати на петтиот панел на тема ,,Мултилатерализам за спас”. Претседателот Иванов во обраќањето истакна дека глобалните закани и глобалните кризи се индикатор дека се потребни фундаментални реформи на мултилатералните институции, а дека како најсуштествени се издвојуваат многуте предлози за промени на Советот за безбедност – предлози за нови постојани членки, користењето на правото на вето, двојните стандарди со цел за поголема инклузивност и ефикасност на Советот за безбедност. Претседателот Иванов нагласи и дека не изостануваат и предлози за промени на меѓународните финансиски институции и делови од глобалниот систем. Но, дека претставниците на државите повеќе се заинтересирани постојните мултилатерални институции да продолжат да функционираат, ако треба и на основно ниво, отколку да се реформираат затоа што, иако, тие се несовршени и делумно функционални, и како такви се повеќе корисни, отколку да ги нема. Државите, покрај сè, мора да продолжат да соработуваат меѓу себе и да промовираат заеднички цели и да ги балансираат спротивставените интереси, потенцираше претседателот Иванов во обраќањето на панелот за мултилатерализмот. На Состанокот на високо ниво во Женева учествуваа голем број поранешни претседатели на повеќе држави меѓу кои на Латвија Валдис Затлерс, на Србија Борис Тадиќ, на Хрватска Колинда Грабар-Китаровиќ, на Швајцарија Мишелин Калми Реј, на Бугарија Ресен Плевнелиев, на Црна Гора Филип Вујановиќ, на Латвија Раимонис Вејонис, на БиХ Младен Иваниќ, на Грузија Ѓорѓи Маргвелашвили, на Бугарија Петар Стојанов, и др. Иста така, на Состанокот учествуваа и повеќе поранешни премиери и министри од повеќе држави, како и поранешни претседатели на повеќе меѓународни организации. На состанокот учествуваа и модерираа дел од дискусиите и највисоки претставници на Канцеларијата на ОН во Женева и ко-претседавачите на Меѓународниот центар Низами Ганџави, Исмаил Серагелдин поранешен заменик претседавач на Светска банка и основал на Александриската библиотека и Ваира Вике-Фрајберга поранешен претседател на Латвија. Учесници на Состанокот на високо ниво беа и поранешни високи функционери во рамките на институциите на ОН.

Средба на Советот на амбасадори со поранешниот претседател Ѓорге Иванов

Тале Кристо — Tue, 13 Dec 2022 16:56:37 +0000

Република Северна Македонија сите политички сили, интелектуалната елита, академската средина, младите, медиумите, невладините организации и граѓаните во целина треба да се обединат околу една и единствена заедничка платформа за да се забрза процесот на евроинтеграциите со цел земјата што побрзо да стане полноправна членка на Европската Унија. Ова е заедничка констатација на денешната средба на Советот на амбасадори во состав Мухамед Халили, Ѓорѓи Филипов, Илјас Сабриу, Ивица Боцевски и Азиз Положани со поранешниот претседател на Републиката, Ѓорге Иванов. Како што е наведено во соопштението од Советот на Амбасадори, за време на средбата беа разменети мислења за политичките и економските состојби во регионот, евроинтеграцијскиот процес и уставните измени. Денешната средба, како што велат од Советот на амбасадори, е во рамките на нивните редовни средби и консултации со политичките личности и институции на земјата.

На отпор повика и поранешниот претседател Иванов

Ивона Петрова — Sat, 02 Jul 2022 10:33:43 +0000

Поранешниот шеф на државата, Ѓорге Иванов го кажа својот став за францускиот предлог. Иванов смета дека македонскиот народ повторно е сведок на национално предавство, како и дека одбраната на Македонија е единствениот излез. -Како поранешен претседател, кој 10 години беше сведок и силен противник на сите подли игри за разнебитувањето на Република Македонија, повикувам на отфрлање на францускиот предлог. Со вакво “решение” Република Македонија ќе биде втурната во правна, политичка и историска бездна. Македонскиот народ повторно е сведок на национално предавство. Човечкото достоинство и стекнатите права се црвените линии кои не смее да се преминат. За нив не се разговара и не се преговара. Непокорот е единствениот излез. Одбраната на Македонија е обврска на секој од нас. Да живее Република Македонија, пишува Иванов на Фејсбук.