горан герасимовски – Kurir.mk

Герасимовски: Политиката нема да го исчисти Скопје, фокус да ни бидат граѓаните

Катерина Бојаџиева — Mon, 10 Jul 2023 10:32:14 +0000

Да ја тргнеме политиката на страна затоа што таа нема да ги исчисти Скопје, наш фокус ни се граѓаните, рече градоначалникот на Општина Центар, Горан Герасимовски пред колегите градоначалници на состанокот на седницата на советот за развој на Скопскиот плански регион. Тој посочи дека граѓаните, кои сакаат чиста општина, прстот за проблемот со сметот, го вперуваат во градоначалниците. - Овој проблем е заеднички и не треба да се политизира. Станува збор за граѓаните и нивното здравје и треба што поскоро да се најде решение, а тоа е што подобро да се изменаџира ситуацијата во градот и комуналното претпријатие. Нашиот предлог е додека тие преговори траат депонијата „Дрисла“ да ги крене рампите за да ние можеме да функционираме како општини, истакна Герасимовски. Тој информира дека Општина Центар од рано утрото започна со собирање смет низ нејзината територија, но полните камиони чекаат пред вратите на скопската депонија. Со ист проблем се соочиле и другите градоначалници кои се ангажирани и самостојно го собираат сметот од своите општини. Герасимовски рече дека утрово разговарал и со директорот на депонијата „Дрисла“ по што добил ветување дека во текот на денот рампите ќе бидат кренати. - Во моментов чистењето е стопирано затоа што полни камиони чекаат пред „Дрисла“ да бидат пуштени и да се растоварат. Утрово разговарав телефонски и со директорот на Дрисла и добив ветување дека ќе се направи договор кој во текот на денот ќе го имаме. Нашите луѓе отидоа уште утрово да за го потпишат за да може нашите камиони да влезат во депонијата, но уште чекаат, изјави градоначалникот на Центар. Инаку, ЈП „Дрисла“ – Скопје е регионална депонија за скопскиот плански регион и со одлука има обврска да го собира сметот од локалните самоуправи кои го носат на нејзина адреса.

Герасимовски: Инвеститорите задолжително мора да планираат паркинг места

Ристе Здравков — Tue, 18 Apr 2023 12:23:37 +0000

Градоначалникот на Општина Центар, Горан Герасимовски на гостувањето на „Утрински брифинг“ кажа дека работат на подобрување на капацитетите за паркирање во општината. Герасимовски посочи дека инвеститорите мора да планираат паркинг место за секое домаќинство во станбените објекти кои ги градат, а не да прикажуваат фиктивни паркинг места. -Ова е неопходно за да го намалиме проблемот со паркирање за резидентните станари на Центар. Затоа потсетувам дека недозволиво е инвеститорите да прикажуваат фиктивни паркинг места преку т.н клацкалки туку треба да планираат паркинг место за секое домаќинство во станбените објекти кои ги градат. Дополнително за намалување на притисокот за паркирање кај резидентните станари секоја улица по реконструирањето станува резидентна односно со паркинг места за станарите на истата, вели Герасимовски.

Герасимовски ќе ги конфискува дивоградбите во Центар

Ристе Здравков — Tue, 04 Apr 2023 10:54:39 +0000

Градоначалникот на општина Центар, Горан Герасимовски, денеска до ЗЕЛС ја достави иницијативата за конфискација на дивоградби. „Наместо да трошиме пари од буџетот за рушење, предлог законските измени што ги иницирам овозможуваат општините да иницираат постапка за конфискација на ненелегално изградените објекти пред надлежните органи. По конфискација, Општината ќе може да ги употреби објектите за потребите на граѓаните. Оваа измена би била огромен чекор напред во однос на превенција од идни дивоградби. Општина Центар има неколку големи дивоградби на своја територија, чие рушење чини стотици илјади евра“, објави тој на Facebook. Според него, време е да се направат крупни промени за заштита од урбанистичкото насилство.

Градоначалникот на Центар со “луксуз на две тркала“ им нуди неколку илјадарки на сограѓаните

Ивана Ефремовски — Fri, 24 Mar 2023 17:42:05 +0000

Градоначалникот на општина Центар, Горан Герасимовски возејќи велосипед си направи кампања за субвенционирање на граѓани. Додека се фали со проект преку кој центарци ќе добијат некоја ниска сума од неколку илјади денари за купен велисипед, Герасимовски вози “луксуз“ на две тркала. Имено, тој позира на велосипед чија цена, зависно од дополнителната опрема, достигнува над 5.000 франци.

Герасимовски: Градежен инспектор на Општина Центар затвори градилиште на булевар „Никола Карев“

Ристе Здравков — Wed, 07 Dec 2022 15:26:22 +0000

Градежен инспектор на Општина Центар денес изврши вонреден инспекциски надзор и затвори градилиште на бул. „Никола Карев“, каде се гради објект за кој нема издадено одобрение за градење, информира градоначалникот на Центар, Горан Герасимовски. -Станува збор за нелегален објект на непознат инвеститор, за кој е издадено и решение за отстранување. Апелираме до сите инвеститори, при почеток на изградба да ја поседуваат целосната документација. Во спротивно, објектите нема да бидат легални, ќе добијат решенија за отстранување, а доколку сами не ги отстранат, општината ќе го стори тоа, со што трошокот ќе падне на товар на инвеститорите, односно сопствениците - соопшти Герасимовски.

Започнаа училишните спортски игри во Општина Центар

Ивана Ефремовски — Fri, 25 Nov 2022 12:58:24 +0000

Градоначалникот на Општина Центар, Горан Герасимовски, официјално ја прогласи спортската манифестација „Училишни спортски игри“ за отворени и во оваа пригода ги поздрави присутните гости и сите учесници во натпреварите. Спортските игри денеска започнуваат со натпревар по кошарка во ООУ „11 Октомври“. „Се надевам дека со овие училишни лиги ќе го подигнеме спортскиот дух кај основците и ќе го поттикнеме пријателскиот однос меѓу нив. Очекувам некој од вас да стане професионален спортист кој во блиска иднина ќе ги брани боите на нашата државна репрезентација, како што тоа го прават некои наши поранешни ученици и стипендисти“, изјави Герасимовски. Училишните спортски игри во 8-те основни училишта во општината, се спроведуваат во натпревари во 4 спортови: кошарка, ракомет, фудбал, одбојка за девојчиња и шах. На крај на натпреварите ќе бидат прогласени најдобрите стрелци и играчи од секоја спортска дисциплина, а најдобрите екипи во своите училишта ќе однесат и медали и пехари. Во рамки на денешното отворање на училишните спортски игри градоначалникот Герасимовски ги додели и стипендиите за спорт на учениците добитници. Општина Центар ќе продолжи да го поддржува спортот и здравиот развој на сите деца, а градоначалникот Герасимовски на учесниците на спортските игри им посака успех и на крајот на училишната година заедно да ги слават победите и заедно да им се радуваат на успесите.

Герасимовски: Ќе најдеме решение за бучавата во Капиштец

Ивана Ефремовски — Thu, 17 Nov 2022 09:20:41 +0000

На вчерашната трибина „Заедно одлучуваме“ која се одржа во ООУ „Киро Глигоров“ во Капиштец, градоначалникот на Општина Центар, Горан Герасимовски ги слушна предлозите, барањата но и поплаките од граѓаните во оваа населба. Речиси сите се однесуваа на проблемот со бучавата од околните кафе барови кој се провлекува години наназад. Градоначалникот Герасимовски по поплаките рече дека искрено и посветено ќе се заложи за изнаоѓање решение за овој проблем и притоа ги повика граѓаните да му се придружат. „Се согласувам дека не е решението да пишуваме само една две или пет казни туку решението е во заедничкото делување. Во наредниот период заедно со вас ќе организираме и посебен состанок само на оваа тема и со претседатели на куќни совети за да најдеме трајно решение. Знаеме дека е огромен проблем со години. Ние според ингеренциите праќаме инспектори и пишуваме казни но очигледно не е доволно“, изјави Герасимовски. За проблемот со бучавата Герасимовски истакна дека се провлекува со децении не станува збор само за бучавата туку е и проблем со недостаток места за паркирање на станарите. На трибината „Заедно одлучуваме“ Герасимовски се осврна и на досега реализираните проекти во општината како инфраструктурните зафати со уличната мрежа, реконструираното детско игралиште, новиот пензионерски клуб во т.ц. Беверли Хилс и катната гаража со капацитет од 260 возила која треба за почне со изградба. Трибините „Заедно одлучуваме“ на која граѓаните даваат свои предлози кои се разгледуваат и според потребите ќе бидат вградени во Буџетот за следната година, утре продолжуваат во ООУ „Ј.Х. Песталоци“.

Диви депонии, необезбедени градилишта – хаос во Општина Центар

Ивона Петрова — Tue, 15 Nov 2022 09:51:04 +0000

Горан Герасимовски го продолжува континуитетот на неговите претходници. Општина Центар е општина синоним за урбанистички хаос и највалканата општина во Градот Скопје. Сликите во прилог говорат за незаградени градилишта само на чекори од каде секој ден играат дечиња на што реагираат голем број граѓани. Герасимовски кој е рекордер по бројот на ново издадени градежни дозволи очигледно е заложник на мала група поединци кои имаат само еден интерес - лична заработка. Истовремено, сликите говорат и за Центар како највалканата општина во нашиот главен град. Пример за тоа е дивната депонија која се има појавено само на стотина метри од Олимпискиот базен. Герасимовски ќе остане запамтен во првата година по својот најголем капитален проект - фарбање на спортско игралиште.

„Шанса за Центар“ го демантира Герасимовски: Скоро половина од земјиштето кај фабриката „Треска“ е во државна сопственост

Ивана Ефремовски — Thu, 24 Feb 2022 13:08:07 +0000

Градоначалникот на општина Центар, Горан Герасимовски во вчерашниот медиумски настап тврдеше дека општината нема право да го уредува земјиштето кај „Треска“ бидејќи е приватно. „Шанса за Центар“ го потсетува градоначалникот дека Законот за урбанистичко планирање јасно дефинира дека јавниот интерес е над приватниот. Во продолжение следува реакцијата на „Шанса за Центар“: Урбанистичкото планирање се врши за да се уреди просторот кој е и приватен и јавен, балансирано помеѓу интересите, но секогаш со приориетизирање на јавниот интерес. Просторот на секој урбанистички план опфаќа и приватно и јавно земјиште. Конкретно за опфатот кај ф-ка Треска државата поседува вкупно 47,16%, односно скоро половина од вкупната површина со што го побива градоначалникот и вистинитоста на неговите тврдења. Градоначалникот или не ја видел оваа информација, или во меѓувреме општината раководена од СДСМ ја промениле оваа реалност, неинформирајќи ја јавноста. Го повикуваме Градоначалникот Герасимовски да даде одговор за ова! Герасимовски невистинито тврди дека досега не е решено уредувањето на локацијата. Да го потсетиме: 1. Советот во фебруари 2020 донесе одлука со која локалитетот беше издвоен од планот и за негово уредување, а според последниот Закон за Урбанистичко планирање се одлучи да се решава со конкурс До сега оваа одлука на Советот не е поништена, ниту оспорена и Герасимовски нема право да не ја спроведува или игнорира. Така демонстрира незаконито и недемократско владеење, слабост во капацитетите за спроведување Одлуки на Совет, крајно непознавање на својата функција, но најмногу од сѐ, укажува дека интересот на инвеститорите му е поважен отколку јавниот! 2. На спроведениот конкурс се добиени три идејни решенија од тимови на стручни лица, архитекти, кои служат токму за да дадат насока и идеја како да се уреди локацијата запазувајќи ги условите за обезбедени, комунални, образовни, социјални услуги, и за безбеден и квалитетен живот на идните станари. Решенијата умешно го комбинираат просторот кој е делумно во приватна сопственост, но запазувајќи ги интересите на сите. Со нив се предвидува и изградба на згради, но и зелени површини и јавен простор, доволно паркинг, градинка и деловен објект. 3. Изборот на решенијата беше оценуван од стручна 9 члена комисија во која беа претставници на 8 различни институции и организации. Градоначалникот иако ги има во рака конкурсните решенија, платени од парите на граѓаните на Центар, веќе четврти месец не организира јавна презентација пред стручната и засегнатата јавност. Со тоа ја скратува можноста за дијалог, за дебата и за да креативната идеја надвладее над инвеститорската, за да архитектите можат да ги образложат своите идеи за поквалитетно уредување на просторот и нов урбанистички план. За да иронијата биде поголема, додека градоначалникот на Центар од СДСМ не ги покажува отворено конкурсните решенија, Општина Кисела Вода под водство на ВМРО ДПМНЕ го користи токму конкурсот за ф-ка Треска за да го реши планирањето на локалитетот Расадник. Со ова Герасимовски докажува дека политичка воља за нови убанистички политики во Центар не постои и дека нема храброст за да ги смени штетните последици од лукративните планови од 2012.

„Ќе му дојде ли крај на силеџиството?“: Центарци бесни што градоначалникот дал дозвола за зграда во паркчето кај „Јадран“

Магдалена Андонова — Sat, 25 Dec 2021 11:01:27 +0000

Градоначалнику на општина Центар, срам да ви е! Сте дале дозвола за градење зграда во зелено паркче со димензии 30 х 35 метри, ќе сечете млади дрва и ќе направите карам каша од животите на граѓаните во околните згради, вели Ирена Кацарски Кимова, жителка на Центар, за новата зграда од пет спрата која ќе се гради во паркчето кај хотел „Јадран“, на само неколку метри од плоштад Македонија. Ни безбедносни правила, ни зеленило и животна средина, ни соседски права, ништо не ве интересира! САМО СИЛЕЏИСТВО, ГРАБАЊЕ И ДА СЕ ЗАРАБОТИ НЕШТО, А НАЈСЛАТКО Е КОГА Е НА ГРБОТ НА НЕКОЈ ШТО НЕ НИ ЗНАЕ ШТО ЌЕ ГО СНАЈДЕ. Милион работи не се во ред во ситуацијава, толку се многу што нема ни да почнам да ги редам. Имаме неколку дена да собереме потписи и да се жалиме, што ќе излезе не знам. Ги прикачувам известувањето што беше доставено до најзагрозената зграда, петиција за собирање потписи за жалба и слика од паркчето. ЌЕ МУ ДОЈДЕ ЛИ НЕКОГАШ КРАЈ НА СИЛЕЏИСТВОВО? САМО ТОА ЛИ ЗНАЕМЕ?, прашува таа. Жителите од околните згради од улиците „Орце Николов“, „Скопска“ и „Никола Кљусев“ веќе потпишаат петиција со која бараат стопирање на градежните работи и со која планираат да се жалат во Општината за изградбата на зградата која ќе се гради во единствената зелена површина што ја имаат. Општина Центар на 2 ноември неколку дена пред да замине од функција ексградоначалникот Саша Богдановиќ преку информатичкиот систем е-одобрение за градба издава дозвола за градба на фирмата „Сколимекс“. Во решението испратено до жителите на соседните згради стои доколку во рок од 15 дена не се поднесе жалба дозволата за градба станува правосилна. Од кабинетот на градоначалникот Горан Герасимовски велат дека дозволата е издадена од неговиот претходник Саша Богдановиќ, а градоначалникот од понеделник на прес-конференција ќе ја извести јавноста за сите почнати постапки за добивање градежни дозволи.