графити – Kurir.mk

Оштетен прозорец и испишани графити на верски објект

Ивана Ефремовски — Fri, 28 Apr 2023 16:39:44 +0000

На 27.04.2023 во 10:49 часот во Полициската станица Драчево било пријавено дека на 27.04. во периодот од 00:30 до 08:00 часот бил оштетен прозорец и биле испишани графити на надворешниот дел на верски објект на ул.„Гутенбергова“. Се преземаат мерки за расчистување на случајот.

„Анти графити“ акција на општина Атина

Катерина Бојаџиева — Tue, 27 Dec 2022 13:43:54 +0000

Десетици објекти и површина од над 15 илјади метри квадратни биле исчистени во историскиот центар на Атина, во „анти графити“ акцијата на општината за бришење на испишани слогани, дамки и слично на ѕидови и ролетни од продавници, јави дописничката на МИА од Атина. Од општина Атина велат дека е најголемата „анти графити акција спроведена досега“, која е во тек веќе неколку седмици, а меѓу исчистените објекти голем дел се со значајна историска и архитектонска вредност за градот. -Атина многу децении беше оставена на милост и немилост на дамките. Живописните делови на градот, фасадите на продавниците, површините на историските градби беа „полеани“ со боја и покриени со десетици неестетски графити. Моравме да ја истакнеме светлината на Атина, ставајќи крај на мизеријата и „црнилото“ што ја „покри“, истакна градоначалникот на Атина, Костас Бакојанис и додаде дека нивната работа не е завршена и ќе продолжат со „големите анти графити акции“.

Полицијата расчистува случај за испишани графити на клупи и бандери

Ивана Ефремовски — Tue, 12 Jul 2022 20:47:00 +0000

На 11.07.2022 во 09:02 часот во СВР Скопје било пријавено дека биле испишани графити на клупи и бандери во Градски парк. Полициски службеници од СВР Скопје излегле на местото на настанот и се работи на расчистување на случајот.

Со графити нагрдена спомен-плочата пред паметникот посветен на жртвите во бродската несреќа на Охридското Езеро

Катерина Бојаџиева — Thu, 12 Aug 2021 15:28:50 +0000

Непознати сторители со испишани графити ја нагрдиле спомен плочата поставена пред паметникот на бугарските туристи кои трагично настрадаа во бродската несреќа на Охридското Езеро. На таблата пред споменикот се забележуваат испишани графити, но самиот споменик или таблата не е оштетена. Споменикот што се наоѓа во неспоредна близина на Студенчишкиот канал беше откриен минатата година, на 11-годишнината од бродската несреќа во која загинаа 15 туристи од Бугарија. Несреќата се случи на 5 септември 2009 година во 10:30 часот, кога потона бродот „Илинден“ што со 57 патници сообраќаше на релација од Охрид за Свети Наум. „Илинден“ се преврте и потона на околу 250 метри оддалеченост од брегот на езерото, кај автокампот „Елешец“. Осум од жртвите беа жители на општина Антон, четворица од општина Пирдоп и по еден од општините Златица, Мирково и Рибарица.

Битола денеска преплавена од графити: „Пипците се отсечени, главата стоо“, „250 илјади евра барајте ги кај Васко“ (ФОТО)

Тале Кристо — Fri, 19 Jun 2020 18:18:55 +0000

Откако денеска министерот за внатрешни работи, Наќе Чулев изјави дека дека сегашниот директор на ЕСМ истовремено и висок функционер на СДСМ ќе заработи кривична пријава поради рекетирање на фирма за ископ во РЕК Битола, Васко Ковачевски, Битола денеска е преплавена од графити. Како што може да се види на самите фотографии, дел од графитите гласат: „Пипците се отсечени, главата стоо“, „250 илјади евра барајте ги кај Васко“, „Парите од рекет барајте ги кај Заеви!“, „Ќе си лежите“...

„Заев правдоубиец“- графити со зборовите на Заев од аудио бомбата го преплавија Скопје

Дарко Андоновски — Tue, 25 Feb 2020 13:37:40 +0000

По скандалозната аудио бомба која ја слушна целата нација разочарани граѓани започнаа герила акција низ целата земја. Имено вчеравечер осамнаа графити низ многу населби во земјава, меѓу нив и во главниот град Скопје. Преку графитите граѓаните го искажуваат својот револт од односот на Заев со претседателот на Врховниот суд Јово Вангеловски и притвореничката Катица Јанева. „Катица=Заев“, „Заев превара“, „Заев: Близок сум со Јово“, „Заев правдоубиец“, „Заев: Или закон за ОЈО или трас-трас- Врховен“, се само дел од натписите кои осамнаа овие денови.

Осамнаа нови плакати: „Заев: Стојам позади Катица; Јанева за мито од 8 милиони евра: Се ќе биде во ред“ (ФОТО)

Катерина Бојаџиева — Thu, 29 Aug 2019 07:42:50 +0000

Плакатите во центарот на Скопје станаа секојдневие. „Зоран Заев: Стојам позади Катица Јанева; Катица Јанева за мито од 8 милиони евра: Се ќе биде во ред“- ова е напишано на последните кои осамнаа. Претходно граѓаните го прашуваа Заев: „дали вака крајот мириса?“. Пред некој ден во Скопје исто така имаше плакати. Граѓаните велат дека премиерот Зоран Заев е главата на криминалниот октопод, а специјалната јавна обвинителска Катица Јанева главен чирак. Исто така осамнаа и графити во центарот на градот. Граѓаните го прашуваа Заев каде се парите од ташната на Бојан Јовановски познат како Боки 13, кои како рекет ги зема од Орце Камчев.

Повторно осамнаа графити: Заев е главата на криминалниот октопод, а Катица Јанева главен чирак (ФОТО)

Катерина Бојаџиева — Mon, 26 Aug 2019 07:17:50 +0000

Осамнаа графити во центарот на Скопје. Граѓаните велат дека премиерот Зоран Заев е главата на криминалниот октопод, а специјалната јавна обвинителска Катица Јанева главен чирак. Пред само два дена исто така осамнаа графити во центарот на градот. Граѓаните го прашуваа Заев каде се парите од ташната на Бојан Јовановски познат како Боки 13, кои како рекет ги зема од Орце Камчев.

Скопјанка заработи прекршочна пријава бидејќи преиначила графит со говор на омраза во „Смрт за омразата, љубов за сите“ (ФОТО)

Катерина Бојаџиева — Wed, 07 Aug 2019 17:59:51 +0000

Скопјанката Гордана Пирковска Змијанац со изненадување го добила известувањето од МВР дека против неа е поведена прекршочна постапка затоа што бришела пораки со говор на омраза, а на нивно место пишувала зборови за љубов и мир.

„Не можам да ја опишам мојата вчудоневиденост кога утрово бев известена дека против мене е поведена прекршочна постапка поради,… оневозможување за користење или оштетување на јавни згради, јавни чешми, извори, плажи, паркови или други јавни објекти и инсталации“, пишува Змијанац на својот Фејсбук профил. Понатака се вели дека „на наведената дата, време и место, со спреј, на ѕидот од зградата сум испишувала графити со содржина „смрт за омразата, љубов за сите“, што не е во потполност точно туку на претходно напишаната порака со говор на омраза: „смрт на шиптарите“, го избришав зборот „шиптарите“ а допишав: „омразата“ и „љубов за сите“. Зошто во известувањето не е наведено дека јас сум избришала говор на омраза и на местото со навредувачка содржина сум допишала мирољубива порака?, пишува на својот Фејсбук профил Пирковска Змијанац. Таа додава дека никаде во образложението од МВР/СВР/Одделение за прекршоци не е напишано дека на тој ден, 01.08.2018 била во Полициската станица во Ѓорче Петров да побара институционална поддршка да се најдат и казнат лицата кои шират говор на омраза преку графит на улица „Борис Сарафов“ зграда број 42/3. „Прјавив дека веќе подолго време на тоа место стоеше напишано: „Смрт за шиптарите“. На своја иницијатива, го бришев неколкупати со спреј и местото каде пишуваше „шиптарите“ го прекривав со црн спреј, а допишував мирољубива порака, но секогаш кога ќе го направев тоа, набрзо осамнуваше нов графит со истата содржина/порака. Тој ден, повторно, по четврти пат го избришав „шиптарите“ и по „Смрт за“ додадов: „Омразата“ и „Љубов за сите“ така што текстот беше преиначен во: „Смрт за омразата, љубов за сите“. Бидејќи се повторуваше истото, односно секогаш кога ќе го покриев говорот на омраза, повторно осамнуваше насилната порака, тој ден, 01.08.2018 решив да побарам институционална поддршка, но наместо тоа, добив лекции од страна на службените лица кои ме примија и од инспекторите кои си дозволија да ме третираат како жена криминалец, а за нивната дрскост во поглед на моите ставови дека јас како Македонка треба да реагирам прво во својот двор, Албанците во својот, да не зборам што се не се изнаслушав. Се чувствував нападната, како да сум направила зло, тежок прекршок… Ми дадоа веднаш да ја потпишам прекршочната, но јас одбив и не верував дека е можно да поведат прекршочна постапка наместо да помогнат во она што го барав, да направат почести патроли на тоа место и да ги пронајдат тие кои шират говор на омраза“, вели Пирковска Змијанац. Таа додава дека говорот на омраза е кривично дело и дека во овој случај очигледна е намерата за ширење на омраза кон определена етничка група, односно кон албанската заедница. „Но самиот графит, кој за жал не е единствен, ги има многу на национално ниво, со говор на омраза не само кон Албанците туку и кон Македонците, доведува до уште поголемо нарушување на и онака кревките меѓуетнички односи во Македонија. По се ова што ми се случува јасно ми е зошто во Македонија нема пракса за санкционирање на говорот на омраза во правосудството. Се чини дека поголем дел од вработените не го препознаваат, не се сензибилизирани, полни се со омраза кон различните, по етничка или која било друга основа. Верувам дека правдата ќе победи и МВР ќе ја повлече прекршочната постапка“, напиша Пирковска Змијанац.

Расистички графити ги шокираа Австралијанците – „Смрт за сите вас“ пред македонскиот фудбалски клуб Слога во Мелбурн

Ивона Петрова — Mon, 05 Mar 2018 12:43:16 +0000

Австралиската државна телевизија Еј-Би-Си известува за згрозеноста на македонската заедница од Мелбурн од графитите со расистичка содржина што ги затекнале утрово на нејзините објекти во градот, меѓу кои и „Смрт за сите вас“ пред македонскиот фудбалски клуб Слога, покрај натписот „Грција“ напишан на грчки јазик. -Бев шокиран. Не можам да разберам дека нешто такво може да се случи на место каде што се собираат до 350 деца, изјави членот на клупското раководство Сашо Николовски. „Политиката не треба воопшто да биде дел од спортот. Тука сме за да уживаме во прекрасната игра каква што е фудбалот, сите сакаме да ги видиме нашите деца како трчаат наоколу. Не сакаме да видиме таков вид терминологија и вандализам насекаде по ѕидовите на клупската зграда. Жално“. Графити осамнаа и на македонската православна црква „Свети Никола“ во Престон, еден од нив со пораката „Fuck Skopje“. -Имаме парохијани кои доаѓаат тука, имаме деца – повеќето од нивните пријатели се Грци – што треба да им објасниме на оние мали деца, прашува отец Миле Талески. „Бев вџашен, не знаејќи како да им го објасниме ова на помладата генерација… овој вандализам покажува само варварство и срам. Тој што го сторил тоа нема ништо духовно во него… веројатно сакале да создадат тензии… или да ја зголемат напнатоста“. Македонската заедница за ова ја известила полицијата, а работници од локалниот совет почнале да ги бришат графитите. Вандализмот строго го осуди и Питер Јасонидес, национален координатор на Панмакедонска федерација на Австралија, која ги претставува Грците од регионот Македонија во Северна Грција. -Ние го почитуваме имотот на другите луѓе и, во овој случај, верските објекти на другите, рече тој. Тој додаде дека нема место за вакви работи во едно демократско, мултикултурно општество. -Мора да постои почит, меѓусебно почитување, вели Јасонидес. Тој рече дека сквернавењето знамиња и верски објекти е во спротивност со духот на мултикултурализмот и би побарал интервенција од државната Комисија за мултикултура. -Да ја прашам дали може да посредува, да организира средба меѓу двете страни, за да можеме да разговараме за тоа, рече Јасонидес. „Барем сме на иста страна кога станува збор за такво насилство, за палење знамиња и такви работи“.