гранични контроли – Kurir.mk

Словенија воведе гранични контроли со Хрватска и Унгарија

Тале Кристо — Sat, 21 Oct 2023 12:16:10 +0000

Словенија на полноќ воведе полициски контроли на границата со Хрватска и Унгарија, а оваа мерка ќе важи најмалку 10 дена. Словенија воведе контроли откако Италија ја објави истата мерка на границата со Словенија, а како причина ги наведе зголемените безбедносни ризици поради организираниот криминал, ескалацијата на тензиите на Блискиот исток и зголемениот прилив на мигранти, пренесува СТА. Министерот за внатрешни работи на Словенија, Боштјан Поклукар, изјави дека граѓаните кои живеат во близина на границата и покрај воведените контроли ќе можат да продолжат да живеат нормално, истакнувајќи дека и дал инструкции на полицијата да го овозможи тоа. За патниците ќе бидат отворени 14 контролни пунктови - 12 на границата со Хрватска и две на границата со Унгарија.

Австрија ги укинува граничните контроли кон сите соседи, освен кон Италија

Ивона Петрова — Thu, 04 Jun 2020 05:37:11 +0000

Австрија денеска ги укинува граничните контроли кон сите соседи, освен кон Италија, најави министерот за надворешни работи Александар Шаленберг. На вчерашната прес-конференција тој соопшти дека од денеска ќе бидат укинати граничните и здравствените контроли кон Германија, Лихтенштајн, Швајцарија, Словачка, Словенија, Чешка и Унгарија. Лицата кои доаѓаат или се враќаат од овие седум земји веќе не подлежат на двонеделен карантин или негативен ПЦР тест. За Италија, Шаленберг изјави дека остануваат ограничувањата и ситуацијата ќе биде повторно анализирана следната недела. Тој, исто така, кажа дека е очигледно дека ситуацијата во Италија се подобрува и дека некои региони, како Јужен Тирол, повторно имаат добри Ковид-19 резултати. Најави и дека ќе го разгледа предлогот од Болцано, според кој Австрија може да се отвори за одредени италијански региони. Тој рече дека целта е да се отворат границите кон Италија, штом бројките тоа го дозволат. Што се однесува до таканаречените трети земји, Шаленберг рече дека се залага за заедничко европско решение.

Меркел сака целосно укинување на граничните контроли во Шенген од 15 јуни

Тале Кристо — Wed, 13 May 2020 12:49:47 +0000

Германската канцеларка Ангела Меркел денеска изјави дека сака од 15 јуни да биде укината вонредната гранична контрола воведена во Шенген зоната поради коронавирусот. – Ако состојбата на заразата го дозволи тоа, сакам да повторам дека од 15 јуни граничните контроли во Шенген зоната можат целосно да бидат укинати, рече Меркел во Бундестагот.

Данска повторно воведува гранични контроли со Шведска

Ивона Петрова — Tue, 12 Nov 2019 06:16:35 +0000

Данска од денеска воведува гранична контрола со Шведска и ќе ги зајакне полициските сили долж границата по низата насилни криминални дела и експлозии во Копенхаген. Данските власти тврдат дека за криминалните дела одговорни се сторители од Шведска. Контролите на мостот Оресунд помеѓу Копенхаген и Малме, како и во пристаништата почнуваат денеска и ќе траат шест месеци. Од февруари во Копенхаген регистрирани се 13 експлозии. Според данските власти за експлозијата пред Даночната управа во Копенхаген во август одговорни се „криминалци од Шведска ја минале границата“. Поради инцидентот двајца Швеѓани се во притвор. Данскиот министер за правда Ник Хекеруп по повод двојното убиство што се случи на 25 јуни, кога во предградие на Копенхаген беа убиени двајца државјани на Шведска, изјави дека станува збор за „судир помеѓу ривалски криминални групи“. Шведската полиција вчера соопшти дека ќе формира специјална работна група за справување со бранот пукања и бомбашки напади поврзани со криминални банди по фаталната пукотница, кога за време на викендот загина 15-годишник, а уште едно момче е повредено во градот Малме. Шведска, иако ужива репутација на една од најбезбедните земји во светот со оглед на ниската стапка на криминал и убиства, во последните години се соочува со војни на банди во поголемите градови. Полицијата минатата недела соопшти дека досега имало 187 бомбашки напади, за разлика од 152 колку што имало во цела 2018 година.

Јункер: Во Ирска ќе има гранични контроли во случај на Брегзит без договор

Дарко Андоновски — Sun, 22 Sep 2019 12:32:07 +0000

Претседателот на Европската комисија Жан-Клод Јункер денеска изјави дека на ирската граница ќе бидат воспоставени гранични контроли доколку Британија излезе од ЕУ без договор. Јункер за Скај њуз изјави дека ЕУ мора да „обезбеди зачувување на интересите на Европската унија и внатрешниот пазар“. Тој напомена дека без граница после Брегзит, животните кои влегуваат во Северна Ирска потоа можат да влезат во ЕУ преку Ирска без никаква контрола. Јункер рече дека тоа нема да се случи. – Мораме да ги чуваме здравјето и безбедноста на нашите граѓани, рече тој. Британија треба да излезе од ЕУ на 31 октомври.