Полицијата во Мелбурн со гумени куршуми за растерување на антиваксерите

Ивана Ефремовски — Tue, 21 Sep 2021 11:59:57 +0000

Полицијата во Мелбурн употреби спреј и гумени куршуми за растерување на демонстрантите кои се противат на задолжителната вакцинација против коронавирус за градежните работници. Протестот е насочен против прописите на Владата на сојузната држава Викторија, чиј главен град е Мелбурн, инаку втор по големина во Австралија, според кои сите градежни работници треба да бидат вакцинирани. „Најмалку тројца полицајци се повредени, а повеќе од 40 лица се приведени“, изјави началникот на полицијата во Викторија. За време на протестот беа распоредени околу 500 полицајци, а неколку новинари беа нападнати. Повеќе од илјада демонстранти во работни униформи маршираа во центарот на Мелбурн, фрлајќи светлосни ракети и шишиња. Неколку часа противниците на задолжителната вакцинација се спротивставуваа на повиците на полицијата да се разотидат. Ова се втори демонстрации од ист тип за два дена, првите беа на стотици работници во понеделникот кога беа скршени излозите во центарот на Мелбурн. Мелбурн веќе седум недели се наоѓа во строг карантин во обид да се спречи брзото ширење на Делта сојот на коронавирусот. Сепак, жаришта на заразата се забележани на градилиштата каде што почитувањето на мерките не е задоволително, наведуваат властите. Тие синоќа објавија дека градежната индустрија од денеска ќе биде затворена две недели во Мелбурн и некои регионални области. Притоа, посочија дека сите работници ќе мора да ги исполнат здравствените барања пред повторно отворање и да примаат барем една доза од вакцината пред да се вратат на работа на 5 октомври. -Бевме јасни, ако не ги почитувате прописите, нема да се двоумиме да преземеме мерки, рече министерот за индустриски односи на Викторија, Тим Палас, објавувајќи ја одлуката на властите за затворање на градилиштата. Државата Викторија регистрираше 603 нови случаи на Ковид-19 во последните 24 часа. (МИА)

Полицијата во Швајцарија со гумени куршуми и солзавец растеруваше демонстранти

Ивана Ефремовски — Sat, 03 Apr 2021 08:42:43 +0000

Швајцарската полиција доцна синоќа употреби гумени куршуми и солзавец за да растера стотици демонстранти против рестриктивните мерки за борба против коронавирусот во североисточниот град Сент Гален. Полицијата прво соопшти дека врз нејзините припадници се фрлале предмети и оти биле „принудени да користат гумени куршуми во самоодбрана“, а подоцна вечерта соопшти дека кон полицијата биле фрлени молотови коктели и други запалени предмети, поради што користела солзавец. Полициските службеници ги повикаа демонстрантите да не ја напаѓаат полицијата и да не го оштетуваат имотот, а набљудувачите да се разотидат, пренесува Индекс.хр. Според весникот Тагблат, околу 1.000 луѓе излегле на улиците на Сент Гален, град со околу 75.000 жители. Зголемениот број на новозаразени со коронавирусот ја принуди швајцарската Влада да се откаже од олеснување на рестриктивните мерки. Земјата со околу 8,6 милиони жители, од почетокот на пандемијата регистрира повеќе од 600.000 случаи на Ковид-19, а повеќе од 9.600 луѓе починаа. (МИА)

гумени куршуми – Kurir.mk

Полицијата во Мелбурн со гумени куршуми за растерување на антиваксерите

Полицијата во Швајцарија со гумени куршуми и солзавец растеруваше демонстранти