гумење – Kurir.mk

Реакција на генералниот секретар на Илинденскиот марш за инцидентот кај Гумење

Магдалена Андонова — Sat, 01 Aug 2020 16:56:31 +0000

Настанатата тепачка, ноќеска во Крушево на местото викано Гумење предизвика остри реакции од јавноста и општина Крушево. Во демант на информациите кои ги добија медиумите се произнесе генералниот секретар на овогодинешниот Илинденски марш Гоце Трпковски. - Најостро ги демантираме лагите и клеветите коишто беа искажани од некои портали и од градоначалникот на општина Крушево Томе Христоски дека членови на Илинденската коњаница односно Илинденскиот марш од Горно Лисиче изнудиле или предизвикале тепачка на местото Гумење во Крушево, изјави за Сител генералниот секретар на коњаницата Гоце Трпковски. - Коњаницата поминува 5 дена на коњи за да дојде до градот Крушево и да оддаде почит кон паднатите комити илинденци, почит на Крушевската Република и почит кон македонскиот народ и никогаш и никого не поддржуваме во насилие и бараме јавно извинување од градоначалникот на Крушево и сите портали кои ја обвинија Илинденската коњаница. Имено, ноќеска малолетно дете од Скопје во придружба на неговата другарка бил нападнат од 40-годишен крушевчанец кој бил во алкохолизирана состојба. Случајни минувачи и тројца од коњаницата излегле во пресрет на заштита на малолетникот од Скопје при што интервенирала и полицијата, додаде генералениот секретар на коњаницата Гоце Трпковски. Од мое лично име и од името на Илинденскиот марш им го честитаме празникот на сите граѓани на Република Македонија.

Здружение Илинденски Коњички Марш: Најостро ги осудуваме лагите и клеветите дека наши членови нападнале крушевчанец

Магдалена Андонова — Sat, 01 Aug 2020 16:53:47 +0000

Во врска со синоќешниот инцидент на Гумење во Крушево, Здружението Илинденски Коњички марш од Горно Лисиче најостро ги осудува лагите и клеветите кои беа посочени према коњаницата, дека нејзини членови нападнале крушевчанец. -Само за ваша информација, коњаницата вчера не беше удостоена од страна на општинските власти и се бараше изговор за грешката на домаќините. Коњаниците кои со денови патуваат кон Крушево за големиот празник на Република Македонија, 2 август, со гордост го пренесуваат патриотскиот дух за непокор и обединетост на народот, а не подржуваат насилство, реагираат од здружението. Според неофицијални информации до кои дојде Курир, ноќеска било нападнато малолетно дете од страна на 33 годишен крушевчанец. Тројца членови на здружението Илинденски Коњички марш кои случајно поминувале го заштитиле малолетникот од напаѓачот.

На Гумење: Коњаници се степале со крушевчанец, полицаец пукал во воздух за да ги смири

Ивона Петрова — Sat, 01 Aug 2020 11:34:48 +0000

Пет лица кои дошле во Крушево со коњаницата од скопско Лисиче, ноќеска околу 2 часот се степале со крушевчанец на Гумење, пишува Фокус. Според пријавата тепачката ја забележал полицаец кој патролирал таму. Од една страна бил крушевчанецот, а од друга страна биле петмината членови на коњаницата кои се удирале со раце и нозе. За да ги смири полицаецот од службениот пиштол испукал еден предупредувачки куршум и тепачката престанала.

Во Крушево почнуваат чествувањата за Илинден и за 117-годишнината од Илинденското востание

Ивона Петрова — Sat, 01 Aug 2020 07:58:05 +0000

Крушево денеска на Гумење ги почнува чествувањата за Големиот Илинден и за 117-годишнината од Илинденското востание. Од 19 часот на Гумење е свеченото кревање на знамето на Крушевската Република, а потоа пред Македониумот е обраќањето за почетокот на чествувањата на градоначалникот на Крушево и претседател на Научно – културните средби „10 дена Крушевска Република“, Томе Христоски. Во чест на големиот Илинден ќе им се оддаде почит и ќе се посетат спомен обележјата на Питу Гули на Гумење каде е неговото вечно почивалиште, на Партизанските гробишта на Гумење, на гробот на Тоше Проески, во криптата на комплексот Илинден и на спомен обележјето на Веле Марков. Вечер е импровизираниот напад на градот и испукувањето од крушевското топче во чест на Илинден и 117-годишнината од Илинденското востание. Утре на 2 август – Илинден, главното чествување е на Мечкин камен, а претходно почит ќе им биде оддадена на претседателот на Крушевската Република – Никола Карев пред неговиот гроб во Македониумот, на загинатите на месноста Слива во крвавата битка за одбрана на населението во Крушево и на споменикот на Илинденците на Мечкин Камен каде е централното чествување. Годинава домаќини на чествувањето се Крушево и Собранието на Република Македонија.