гутереш – Kurir.mk

Гутереш: Важно е односите меѓу светските сили да функционираат добро

Тале Кристо — Thu, 28 Jan 2021 07:56:55 +0000

Состанокот на лидерите на петте постојани членки на Советот за безбедност на ОН (Русија, САД, Франција, Велика Британија и Кина) може да помогне во регулирањето на односите меѓу водечките сили, кои од неодамна се прекинати, вели генералниот секретар на ОН, Антонио Гутереш, во ексклузивното интервју за Тасс. -Мислам дека односите меѓу водечките светски сили беа несоодветни. Многу е важно овие односи да функционирата добро, бидејќи сите ќе имаат корист од тоа, рече Гутереш. Генералниот секретар, истовремено, истакна дека „поделбата меѓу суперсилите ги врти центрифугалните сили, што доведува до поткопување на мирот во различни региони“. Претходно, постојаниот претставник на Русија во ОН, Василиј Небезнја,во интервју за Тасс, кажа дека Москва го потврдила предлогот на рускиот претседател Владимир Путин за одржување состанок на лидерите на петте постојани членки на Советот за безбедност на ОН и дека се очекува новата администрација на САД да одговори на предлогот.

Гутереш бара да се стави крај на пандемијата на родово-базирано насилство

Тале Кристо — Wed, 25 Nov 2020 10:45:23 +0000

Генералниот секретар на ООН Антонио Гутереш посочи дека насилството врз жени и девојчиња ширум светот стои на патот на остварувањата на човековите права и дека пандемијата на коронавирусот го направи овој проблем уште појасен, како и потребата од итно преземање мерки за борба против него. Во писмената изјава доставена до медиумите по повод Меѓународниот ден за борба против насилството врз жените, Гутереш истакна дека социјалните и економските последици од пандемијата во поголема мерка се рефлектираат кај жени и девојчиња кои ги туркаат во сиромаштија, а ризикот од насилство врз нив станува поголем. Тој потсети дека во април годинава, апелираше до меѓународната заедница да ја запре оваа тивка пандемија на родово насилство. „Денеска, повторно, уште погласно го упатувам тој апел“, вели Гутереш, додавајќи дека светската заедница треба да ги слуша гласовите и искуствата на жените и девојчињата и да ги земе предвид нивните потреби, особено кога станува збор за оние кои преживеале насилство или се изложени на повеќекратна или вкрстена дискриминација. Според него, неопходно е да се стават жените како лидери во потрагата по решенија и да се вклучат мажите во борбата. Гутереш наведува дека преземените мерки мора да вклучуваат обезбедување предвидливи и флексибилни извори на финансирање за организациите за правата на жените, кои во кризи често реагираат први. „Од суштинско значење е услугите за жени кои преживеале насилство да останат достапни, со соодветни ресурси и мерки за одговор во областите на здравството, социјалната заштита и правдата“, додаде тој. Генералниот секретар вели дека овие мерки не треба да бидат ориентирани само кон интервенции откако веќе се случило насилството, туку, исто така, и кон спречување на насилство, што вклучува работа за надминување на социјалните норми и нерамнотежа на моќта, а полицијата и судството треба да обезбедат одговорност за сторителите и да ја запрат практиката на неказнивост. „На овој ден ги повикувам сите да се справиме со насилството засновано врз родовите со уште поголема решителност со цел да го искорениме засекогаш“, заклучи Гутереш.

Гутереш: Милијарда ученици погодени од затворањето на училиштата поради коронавирусот

Тале Кристо — Tue, 04 Aug 2020 06:12:36 +0000

Генералниот секретар на Обединетите нации Антонио Гутереш рече дека пандемијата на коронавирус довела до најголемо нарушување на образованието во историјата со затворените училишта во повеќе од 160 земји во средината на јули, со што се погодени повеќе од милијарда ученици. Покрај тоа, Гутереш рече дека најмалку 40 милиони деца во светот ја пропуштиле „својата критична предучилишна година“. Како последица на тоа, тој предупреди дека светот се соочува со „генерациска катастрофа што може да доведе до губење на незамислив човечки потенцијал, да поткопа децениски напредок и да ги влоши вкоренетите нееднаквости“. – Се наоѓаме во одлучувачки момент за децата и младите од овој свет, рече Гутереш во видео пораката по повод почнувањето на кампањата на ОН наречена „Да ја спасиме нашата иднина“. Тој рече дека одлуките што владите и партнерите сега ќе ги донесат ќе имаат трајно влијание врз стотици милиони млади и врз изгледите за развој на земјите во наредните децении. Гутереш истакна дека враќањето на учениците во училниците треба да биде „главен приоритет“. – Кога локалниот пренос на Ковид-19 ќе се стави под контрола, враќањето на учениците во училиштата и образовните институции што е можно посигурно мора да биде главен приоритет, рече шефот на ООН, додавајќи дека консултациите со родителите, старателите, наставниците и младите се од основно значење.

Лавров и Гутереш разговараа за Сирија, Либија и коронавирусот

Тале Кристо — Mon, 01 Jun 2020 17:21:33 +0000

Решавањето на конфликтите во Сирија и Либија и борбата против коронавирусот беа во фокусот на телефонскиот разговор меѓу рускиот министер за надворешни работи Сергеј Лавров и генералниот секретар на ОН Антонио Гутереш, соопшти денеска руското Министерство за надворешни работи. Клучно внимание било посветено на проблемите во Сирија и Либија со фокус на одредени аспекти на активностите на Обединетите нации за овие прашања, се наведува во документот. Двајцата функционери разговараа и за работата на Светската здравствена организација во одговорот на последиците од пандемијата на коронавирусот.

Гутереш повика за глобална помош за Африка

Тале Кристо — Wed, 20 May 2020 07:09:09 +0000

Генералниот секретар на ОН повика на глобална солидарност со Африка, предупредувајќи дека пандемијата од коронавирусот се заканува на континентот и напредокот. „Постоечките нееднаквости ќе се влошат и ќе се зголеми гладот, неухранетоста и изложеноста на зарази“, рече Антонио Гутереш во видео-пораката. „Побарувачката за африкански производи, туризам и дознаки веќе се намалува. Отворањето на трговската зона е одложено – а, милиони луѓе би можеле да бидат втурнати во екстремна сиромаштија“, нагласи тој. Шефот на ОН повика на меѓународна акција за зајакнување на африканските здравствени системи, продолжување на одржувањето на снабдувањето со храна и запирање на финансиската криза. Тој рече дека африканските земји треба да имаат еднаков пристап до каква било вакцина и третман, и дека тие самите мора да престанат со конфликтите и да повикуваат на насилен екстремизам. Гутереш рече дека Африка треба да добие 200 милијарди американски долари од меѓународната заедница, како дел од неговиот повик за глобален пакет најмалку 10 проценти од светскиот БДП.

Гутереш: Во пандемијата не треба да добијат помош застарени индустрии што загадуваат

Тале Кристо — Tue, 28 Apr 2020 17:56:28 +0000

Генералниот секретар на ОН, Антонио Гутереш, денеска рече дека економската помош дадена на земјите во пандемијата Ковид-19 треба да биде поврзана со спроведувањето на климатските активности и заштитата на животната средина. – Додека трошиме билиони за опоравување од Ковид-19, треба да создадеме работни места преку чиста, зелена транзиција, рече Гутереш на „Климатскиот дијалог Петерсберг“ за помошта дадена на економиите во светот во кризата предизвикана од ширењето на новиот коронавирус. – Таму каде што парите на даночните обврзници се користат за заштеда на бизниси, мора да се создадат зелени работни места и одржлив и инклузивен раст, додаде тој. – Овие пари не треба да се користат за да им се помогне на застарените индустрии што загадуваат и создаваат големи количини на јаглерод диоксид. Пандемијата е можност да се придвижи светот кон „борба против климатските промени, заштита на животната средина, стопирање на загубата на биолошката разновидност и долгорочно обезбедување здравје и безбедност на човештвото“, рече челникот на ОН. Овогодинешниот двогодишен „Климатски дијалог Петерсберг, именуван по Петерсберг брдото во близина на Бон, каде што се одржа првата конференција, преку видео собра учесници од 30 земји. Таа конференција беше под покровителство на германската канцеларка Ангела Меркел во 2010 година за да даде нов импулс на разговорите за климата по неуспехот на самитот на ОН во Копенхаген.

Гутереш нареди штедење во ОН, државите должат 1,39 милијарди долари за членарина

Тале Кристо — Sat, 12 Oct 2019 09:48:15 +0000

Генералниот секретар на Обединетите нации Антонио Гутереш нареди сет мерки да стапат во сила в понеделник во сите објекти и мисии на ОН ширум светот, со цел да се ублажи најголемата финансиска криза на организацијата во последните десет години. Меѓу мерките што ќе се спроведат се откажување на состаноците, ограничување на деловните патувања, но и запирање на ескалаторите и намалување на климатизација и греењето. Во писмото до шефовите на сите субјекти на ОН, Гутереш вели дека вонредната состојба ќе „влијае на условите за работа и операциите до понатамошно известување“. Претставничката на администрацијата на ОН, Кетрин Полард, изјави пред Комисијата за буџет дека 128 земји платиле 1,99 милијарди американски долари во членарина за 2019 година до 4 октомври, и дека 65 земји должат вкупно 1,39 милијарди американски долари, од кои американскиот долг изнесува повеќе од една милијарда американски долари.

Телефонски разговор на Ердоган со Гутереш за акциите на Израел во Газа

Дарко Андоновски — Sat, 19 May 2018 10:48:30 +0000

Турскиот претседател Реџеп Тајип Ердоган синоќа телефонски разговараше со генералниот секретар на Обединетите нации, Антонио Гутереш. Во разговорот, двајцата ја истакнаа потребата од построги мерки од страна на меѓународната заедница во врска со акциите на Израел во Газа. Израелските сили во понеделникот убија 60 Палестинци и повредија околу 2.500 лица при протестите на границата помеѓу Израел и Појасот Газа. Истиот ден беше отворена американска амбасада во Ерусалим.(МИА)