Хајко Мас – Kurir.mk

Мас и Вархеји разговарале за преговорите со Македонија и Албанија

Тале Кристо — Mon, 22 Mar 2021 14:43:18 +0000

Еврокомесарот за проширување Оливер Вархеји, на Твитер соопшти дека се сретнал со министерот за надворешни работи на Германија и дека разговарале за пристапниот процес со Скопје и Тирана. -Добра дискусија со МНР Хајко Мас денес. Разменивме мислења за западниот Балкан и потребата да се оди напред со процесот на проширување на ЕУ, вклучително преку отворање на преговорите за членство со Албанија и Македонија што е можно побргу, напиша Вархеји на Твитер. Вархеји и Мас разговарале и за поддршката на ЕУ на западен Балкан во борбата против пандемијата од Ковид-19.

Мас: Русија да помогне во истрагата за случајот на Навални

Ивона Петрова — Thu, 27 Aug 2020 08:24:54 +0000

Русија треба да помогне во истрагата за случајот со лидерот на опозицијата Алексеј Навални, кој е примен во една берлинска болница под сомнение дека е отруен, изјави денеска германскиот министер за надворешни работи Хајко Мас, во пресрет на европските консултации по повод овој случај. – Очекуваме Русија да се приклучи на напорите за целосно разјаснување што навистина се случило, но во моментот тоа не изгледа така. Денеска ќе разговараме за тоа на министерско ниво на ЕУ и ќе биде полесно Москва да се приклучи во истрагата, рече Мас. Тој додаде дека во спротивно, прашањето ќе остане отворено и дека ЕУ ќе треба да одлучи што понатаму.

Мас во ненајавена посета на Триполи

Магдалена Андонова — Mon, 17 Aug 2020 14:51:55 +0000

Германскиот министер за надворешни работи Хајко Мас денеска престојува во ненајавена посета на Триполи, каде истакна дека светот не смее да биде измамен од мирот што моментно преовладува во Либија и дека мора да се најде начин да се стави крај на конфликтот во земјата уништена од граѓанска војна. Мас рече дека ќе се состане со официјални лица од меѓународно признатата влада во Либија, за да разговараат за „излез од оваа многу опасна ситуација“, во која, како што рече, обете завојувани страни добиваат оружје од своите сојузници во странство. Во обид да посредува во мировните напори, Германија беше домаќин на самитот во Берлин во јануари, на кој претставници на обете страни се согласија да го почитуваат ембаргото на испорака оружје ветија дека ќе се ангажираат за целосен прекин на огнот, но договорот подоцна беше прекршен во неколку наврати. (MИА)

Мас: Германија го одби предлогот на Трамп за враќање на Русија во Г7

Ивона Петрова — Mon, 27 Jul 2020 05:23:10 +0000

Германија го отфрли предлогот на американскиот претседател Доналд Трамп да се покани рускиот претседател Владимир Путин на средбата на Групата седум најразвиени земји (Г7), изјави германскиот министер за надворешни работи, Хајко Мас. Русија беше исклучена од Г7 во 2014 година, по анексијата на Крим, а Трамп минатиот месец предложи Г7 повторно да се прошири, пренесуваат британските медиуми. Мас, меѓутоа, за „Рајнише Пост“ изјави дека не гледа можност да и дозволи на Русија да се врати во Г7 се додека не се оствари значителен напредок во решавањето на конфликтот во Крим и источна Украина. -Г7 и Г20 се два координирани формати. Не ни требаат повеќе Г11 или Г12, рече Мас за предлогот на Трамп, покрај Русија, и други земји да бидат поканети на средбите на Г7. Мас рече дека односите со Русија во моментов се тешки во многу области, но дека Русија е неопходна за решавање на конфликтите во Сирија, Либија и Украина.

Мас најави дека ќе ги посети Србија и Косово

Магдалена Андонова — Mon, 13 Jul 2020 17:39:18 +0000

Шефот на германската дипломатија Хајко Мас денеска оцени дека има напредок во продолжување на Дијалогот Белград – Приштина и најави дека ќе ги посети Србија и Косово. – Jасно ми е дека морам да ги посетам Србија и Косово и да испратам силен сигнал дека Дијалогот за нас е приоритет, изјави Мас, претставувајќи гi приоритетите на германското претседавање со Советот на Европска Унија пред Надворешнополитичкиот одбор на Европскиот парламент во Брисел. Tој додаде дека неодамна во Берлин се сретна со специјалниот претставник на ЕУ за Дијалогот Белград – Приштина, Мирослав Лајчак, при што истакнал дека Германија останува посветена на Дијалогот и најави ангажман на ЕУ во разговорите. – Станува збор за земји кои сакаат европска иднина и не би требало да дозволиме да побегнат од нас, а знаме дека други имаат интерес да влијаат врз тој регион, предупреди Мас. Tој додаде дека покрај „тешката и комплексна“ ситуација, регионот сега е погоден и од нов бран на пандемијата со Ковид-19. Мас истакна дека Германија ќе се труди до крајот на своето претседавање со ЕУ, до крајот на годината да ги отвори пристапните преговори со Северна Македонија, но изрази сомневање дека е истото можно и со Албанија. (МИА)

Хајко Мас: Ситуацијата во Хонг Конг влијае врз кинеско-европските односи

Тале Кристо — Wed, 01 Jul 2020 07:09:42 +0000

Ситуацијата во Хонг Конг ќе влијае врз кинеско-европските односи, изјави денеска шефот на германската дипломатија, Хајко Мас, откако Кина го изгласа и прогласи Законот за национална безбедност за Хонг Конг. – Тоа што се случува таму е крајно загрижувачко, затоа што веруваме дека автономијата на Хонг Конг постепено еродира, изјави Мес за германските медиуми. Како што кажа, заради тоа ќе бидат погодени односите меѓу Кина и ЕУ.

Мас: Лошо е за Советот за безбедност на ОН што нема единство околу пандемијата

Магдалена Андонова — Mon, 29 Jun 2020 09:09:58 +0000

Германија има намера да покрене нова иницијатива за усвојување на резолуцијата на Советот за безбедност на ООН за пандемијата на коронавирусот, најави министерот за надворешни работи, Хајко Мас. – Лошо е за Советот за безбедност на ООН што сè уште не постигна единство околу оваа важна глобална тема, рече Мас. Како што пренесуваат германските медиуми, тој смета дека не може Советот за безбедност да не се огласи кога цел свет се бори со таква пандемија. Германија ќе го преземе претседателството со Советот за безбедност на ООН на 1 јули, на еден месец. Резолуцијата за коронавирусот досега изостана поради спорот меѓу САД и Кина, кој првенствено е за улогата на Светската здравствена организација. (МИА)

Мас оптимистичен дека ќе има летен одмор во странство

Тале Кристо — Mon, 18 May 2020 08:54:23 +0000

Министерот за надворешни работи на Германија, Хајко Мас е оптимист дека летните одмори во странство ќе бидат можни оваа година. Мас денеска ќе разговара со своите колеги од Шпанија, Австрија, Италија, Грција, Хрватска, Португалија, Малта, Словенија, Кипар и Бугарија преку видео конференција за олабавување на патните ограничувања. Целта на средбата е координирана акција за отворање на границите за туристите. Германија има намера да го задржи предупредувањето за патувањето за целиот свет до 14 јуни, но потоа Мас сака постепено да се откаже предупредувањето, доколку нема бран враќање на новиот коронавирус. Прво, предупредувањето ќе биде укинето за европските земји.

Шефот на германската дипломатија Хајко Мас денеска во Скопје

Ивона Петрова — Wed, 13 Nov 2019 06:55:39 +0000

Министерот за надворешни работи на Сојузна Република Германија, Хајко Мас денеска престојува во посета на Република Северна Македонија. Мас ќе се сретне со претседателот Стево Пендаровски и со шефот на дипломатијата Никола Димитров. Димитров и Мас, како што најавуваат од МНР, ќе разменат мислења за најновиот развој на внатрешно-политичките состојби во земјата, исходот од последниот Европски Совет и можните следни чекори, за преостанатите активности во делот на реформите, вклучително и развојот на добрососедските односи. Воедно ќе бидат разгледани и клучните моменти од односите меѓу двете пријателски земји и можностите за нивно продлабочување, како и актуелната динамика на односи на регионален план. По средбата Димитров и Мас, предвидено е да одржат и заедничка прес-конференција. Хајко Мас попладен ќе биде примен од претседателот Пендаровски во „Вила Водно“. По средбата со Пендаровски, на заедничка иницијатива на германското МНР и претседателот на Република Северна Македонија, ќе се одржи дебата на тема „Тековни состојби и предизвици во реформите во сферата на правната држава“. На дебатата, како што информираат од кабинетот на претседателот, покрај Пендаровски и Мас, ќе учествуваат и претставници на државните власти, на правосудните органи, како и претставници на надлежни институции во оваа област.

Мас: За нови преговори за Брегзит потребна е согласност од сите членки на ЕУ

Ивона Петрова — Fri, 18 Jan 2019 09:06:36 +0000

Потребна е дискусија за повторно отворање на предлог договорот за Брегзит, но тоа ќе биде можно единствено ако нови преговори поддржат сите земји членки на ЕУ, изјави германскиот минстер за надворешни работи Хајко Мас. – На крајот ќе се постави прашањето дали повторно да се отвори догворот, за што е потребна согласност на сите 27 земји членки, За тоа треба да се разговара сега, истакна Мас во изјава за германскиот јавен сервис ЗДФ. Мас претходно беше на ставот дека е „тешко замисливо“ повторно разгледување на постигнатиот договорот за Брегзит, а можноста за нови преговори за условите за британското напуштање на ЕУ ја отфрлаа и други лидери на Унијата. Откако, Парламентот во Вестминстер во вторникот го одби договорот за Брегзит, што лани во ноември го постигнаа Владата во Лондон и Брисел, британската премиерка Тереза Меј има рок до понеделник да предложи „план Б“ за истапувањето на Велика Британија од ЕУ. Според најавите од Лондон, по овој „план Б“, пратениците во Долниот дом на британскиот Парламент би требало да се изјаснат на 29 јануари. Како една од опциите на Брегзит во „планот Б“ се посочува и можноста Меј да предложи одлагање на британското напуштање на ЕУ за неколку месеци, во кој период би се преговарало за промени во постојниот договор. МИА