Хајнц-Кристијан Штрахе – Kurir.mk

Поранешниот австриски вицеканцелар на суд за наводен поткуп

Тале Кристо — Tue, 06 Jul 2021 13:34:12 +0000

Судскиот процес против поранешниот вицеканцелар Хајнц Кристијан Штрахе, кој е обвинет за примање мито, започна денеска пред покраинскиот суд во Виена. На обвинителна клупа со Штрахе е и Валтер Грубмилер, сопственик на приватна клиника во Виена, кој е осомничен за подмитување. Штрахе во коалициските преговори со Народната партија на Австрија (ОВП) побарал приватната клиника „Веринг“ да биде примена во фондот „Прикраф“. Болниците кои се дел од овој фонд можат да наплатат за одредени услуги преку здравственото осигурување, што носи големи дополнителни приходи. За возврат, тврди Обвинителството, Грубмилер дал 10.000 евра на ОВП за изборната кампања. Во случај да бидат осудени, обвинетите се соочуваат со казни од половина до пет години затвор. Адвокатот на Грубмилер изјави дека приемот на приватната клиника „Веринг“ во Фондот е блокиран од Стопанската комора, обвинувајќи дека „во Австрија постои коруптивен систем“. Адвокатот на Штрахе, Јохан Пауер изјави дека неговиот штитеник никогаш не примил мито. „Имаше постојани обиди да се поткупи мојот штитеник. Сепак, тој никогаш не го прифати тоа“, нагласи Пауер.

Штрахе со нова партија оди на избори во Виена

Тале Кристо — Fri, 15 May 2020 13:26:03 +0000

Точно една година по објавувањето на корупцискиот скандал „Ибица“, поради кој поранешниот шеф на Партијата на слободата на Австрија (ФПО) и поранешниот австриски вицеканцелар Хајнц-Кристијан Штрахе мораше да поднесе оставка, тој најави дека го презема раководството на новата партија „Тим Штрахе Сојуз за Австрија“ со која ќе излезе на на изборите во Виена на крајот на октомври. Штрахе закажа прес-конференција на денешен ден, кога пред 65 години беше потпишан Државниот договор со кој Австрија се посвети на трајна неутралност и со тоа се „ослободи“ од сојузничките сили. Австриските медиуми забележуваат дека Штрахе го почнал својот говор обидувајќи се да се дистанцира од нацизмот, во неколку наврати упадливо изјавувајќи пред 75 години е уништен Третиот рајх и неговата злосторничка машинерија во која се убивани Евреи. Во минатото, Штрахе и ФПО се поврзуваа со екстремни десничарски кругови и неонацисти.

Штрахе се враќа во политиката

Ивона Петрова — Thu, 23 Jan 2020 09:27:15 +0000

Поранешниот лидер на Слободарската партија на Австрија (ФПО) и поранешен вицекандцелар Хајнц-Кристијан Штрахе денеска се враќа на политичката сцена со говор на собирот на Сојуз за Австрија (ДАО). ДАО е формирана кон крајот на минатата година од страна на поранешни функционери на ФПО, блиски соработници на Штрахе. Според информации на австрискиот дневен весник „Естерајх“ говорот на Штрахе ќе биде борбен. – Може да се падне, но потоа мора повторно да се стане. Ќе останам секогаш верен на себе и нема да ги оставан на цедило луѓето кои веруваат во мене, изјави Штрахе пред денешниот говор на Сојузот за Австрија. Штрахе во мај минатата година беше принуден да поднесе оставка од сите политички функции поради корупциската афера Ибица

Хајнц-Кристијан Штрахе исклучен од ФПО

Тале Кристо — Fri, 13 Dec 2019 15:24:33 +0000

Слободарската партија на Австрија (ФПО) денеска го исклучи од своето членство поранешниот лидер Хајнц-Кристијан Штрахе. – Одлуката за исклучување ја донесе виенскиот комитет на ФПО, рече лидерот на партијата Норберт Хофер на прес-конференција. Тој посочи дека виенскиот одбор ја следи одлуката на партискиот суд. Членството на Штрахе во ФПО беше суспендирано на почетокот на октомври, а одлуката за „исфрлање“ од партијата е донесена сега, откако тројца нивни пратеници формираа нова партија, која треба да му овозможи на Штрахе да се врати во политиката. Тој е критикуван во ФПО дека со пари на партијата плаќал приватни сметки. Инаку, кон средината на мај, Штрахе беше принуден да си поднесе оставка од сите политички функции поради корупциската афера „Ибица“, врз основа на снимка направена пред две години на која се гледа како на наводна роднина на руски милијардер нуди државни работни места за финансиска поддршка на неговата партија, заобиколувајќи ги контролните органи.

Местенка за австрискиот вицеканцелар Штрахе: Барал мито за бизнис услуги

Дарко Андоновски — Sat, 18 May 2019 07:48:51 +0000

Австрија ја потресува политички скандал откако синоќа беше објавена видео снимка на која се гледа како австрискиот вицеканцелар Хајнц-Кристијан Штрахе за бизнис услуга бара финансиски надомест од девојка која се претставува дека е внука на руски олигарх. На снимката, направена на 24 јули 2017 година на шпанскиот остров Ибица, се појавуваат Штрахе, кој е лидер на екстремно десничарската Слободарска партија на Австрија (ФПО) и неговиот партискиот потпретседател Јохан Гуденус, како разговараат со наводната внука на рускиот олигарх, која тврди дека сака да купи удел во виенскиот весник „Кронен Цајтунг“. Видеото насловено „Дали може да се купи австрискиот вицеканцелар“, го објави германскиот магазин „Шпигел“, чии новинари во соработка со колеги од „Зидојче Цајтунг“, му го наместиле целиот случај на Штрахе. Наводната внука на олигархот вели дека сака да инвестира 250 милиони евра во Австрија и тоа не преку банка и по легален пат, при што во неколку наврати напоменува дека станува збор за „илегални пари“. Штрахе и Гуденус и ветуваат дека ќе и помогнат во инвестирањето, доколку финансиски ја поддржи нивната ФПО. Снимката е направена во пресрет на ланските парламентарни избори во Австрија. Австрискиот вицеканцелар дури и објаснува на девојката дека парите не треба директно да и ги даде на партијата, туку преку едно здружение, напомнувајќи дека истото го правеле и други партиски поддржувачи, споменувајќи ги тука сопственикот на компанијата „Глок“, Гастон Глок, фирмата „Новоматик“ и олигархот Рене Бенко. Споменатите во меѓу време ги демантираа тврдењата на Штрахе. Видеото доаѓа на една недела пред изборите за Европскиот парламент, што може да и нанесе сериозна штета на ФПО, кој по ланските парламентарни избори стана помал владин партнер на конзервативната Австриска народна партија (ОВП) на канцеларот Себастијан Курц. Покрај ова, Штрахе и Гуденус може да имаат и правни последици и да се соочат со обвиненија. Но, од скандалот полза може да има канцеларот Курц, кој би можел да ја раскине коалицијата со ФПО и да распише предвремени парламентарни избори, на кои постои голема веројатност неговата Народна партија да обезбеди мнозинство во Парламентот и самостојно да формира Влада.

Штрахе: Изборите за ЕП одлука за распад или опстанок на ЕУ

Предраг Кукиќ — Mon, 24 Sep 2018 14:13:07 +0000

Австрискиот вицеканцелар Хајнц Кристијан Штрахе оцени денеска, по разговорите во Виена со претседателот на Република Српска, Милорад Додик, дека изборите за Европскиот парламент идната година, ќе бидат одлука за опстанување или распад на ЕУ. -Тие избори ќе бидат судбински. Имаме две страни, една која се залага за централистичка ЕУ, како сојузна држава, и друга зад која стојат жестоки Европејци, кои се залагаат за национален идентитет и федерализам. Тоа ќе бидат одлучувачки избори, бидејќи ако сега не го запреме негативниот развој, може да дојде до голема опасност по Унијата, уверен е тој. Штрахе истакна дека изборите ќе бидат патоказ по кој пат ЕУ ќе оди понатака. Тој вели дека ги разбира граѓаните кои бараат да заврши власта на Меркел и Макрон, бидејќи не ја сакаат Европа каква што тие ја замислуваат. (МИА)

Австрија ќе забрани носење муслимански марами во градинките и училиштата

Ивона Петрова — Wed, 04 Apr 2018 13:12:35 +0000

Владата на Австрија планира да забрани девојчињата од муслиманска вероисповест да носат марами во градинките и основните училишта, соопшти денеска австрискиот вицеканцелар и лидер на десничарската Партија на слободата, Хајнц-Кристијан Штрахе. Според него, ваквата одлука се носи со цел на „двојчињата до 10-годишна возраст да им се овоможи непречен развој“. - Забраната за носење марами во градинките и училиштата би придонела за подобра интеграција на децата, додаде Штрахе. Плановите на Владата ги потврди и австрискиот канцелар Себастијан Курц, кој нагласи дека е покрената иницијатива за изготвување на „соодветен закон“ посветен на заштита на децата. Според Курц, таквата мерка е корисна бидејќи на тој начин ќе се спречи „развој на паралени општества“ во Австрија.