хакирање – Kurir.mk

Анонимуси хакирале надзорни камери на семејни куќи во Русија

Ристе Здравков — Fri, 18 Mar 2022 09:56:30 +0000

Анонимуси упаднаа и во надзорните камери на семејните куќи, па цел свет можеше да погледне во домовите на руските цивили, но подоцна се предомислија и решија да го отстранат пристапот до овие камери за да ја заштитат приватноста на луѓето. На страницата што ја формираа за таа цел, нарекувајќи ја „Зад непријателските линии – во живо“, тие ја опишаа нивната цел да ја запознаат руската нација за тоа што се случува во Украина и да им кажат дека државната пропаганда им го пере мозокот. Речиси 150 милиони Руси не ја знаат вистината за причините и текот на војната во Украина. Нив ги храни пропагандата од Кремљ. Во Русија нема слободни медиуми, а интернетот е цензуриран. – Имаме можност да се обидеме да пренесеме директна порака до луѓето во поробената земја – ги објаснуваат Анонимус причините за лансирањето на страницата. Им порачуваат на Русите дека цел свет ќе им помогне доколку решат да се борат со диктаторот.

ФОТО: Анонимуси тврдат дека ја хакирале страницата на руската разузнавачка служба

Ристе Здравков — Wed, 16 Mar 2022 06:48:21 +0000

Анонимуси денеска објавија дека хакирале неколку руски сајтови во борбата против инвазијата на Путин на Украина, а меѓу нив се и страниците на руската разузнавачка служба ФСБ (наследник на КГБ) како и страниците на руската влада. Тие го објавија ова на Твитер користејќи го воениот термин „Танго надолу“, додавајќи дека хакирале уште две страници, аналитички центар на руската влада и Министерството за спорт. Тие објавија и наводна приватна кореспонденција меѓу Путин и неговиот министер за одбрана Сергеј Шојгуи за плановите за сечење на украинските шуми. Да потсетиме, Анонимуси ја отфрлија војната на Путин на самиот почеток на неговата инвазија на Украина, а пред неколку дена објавија порака специјално дизајнирана да допре до руските граѓани, наводно, повикувајќи ги да застанат против Путин и да го тргнат од власт. „Анонимусите официјално се во сајбер војна против руската влада“, објавија тие на Твитер на 25 февруари.

Russian sites under attack [Tango Down]
Moscow
FSB
Analytical Center for the Government of the Russian Federation
Ministry of Sport of the Russian Federation#Anonymous #OpRussia pic.twitter.com/OLOMSNBvWr
— Anonymous (@YourAnonNews) March 15, 2022

Шпионски софтвер на израелска компанија бил користен за хакирање на телефони на американски функционери

Магдалена Андонова — Sat, 04 Dec 2021 08:43:44 +0000

Шпионски софтвер на израелската компанија НСО Група (NSO Group) бил користен од наводно непознато лице за хакирање на телефоните на најмалку девет вработени во американскиот Стејт департмент, јавија израелските медиуми. Доколку тоа се потврди, ова ќе биде првпат технологијата на таа компанија, која беше жестоко критикувана, да се користи против американски официјални лица. Цел на хакирањето биле вработени во Стејт департментот кои работеле во Уганда или експерти за таа источноафриканска земја и сите користеле Ајфон (iPhone). Израелските медиуми потсетуваат дека Епл (Apple) минатата недела соопшти дека ја тужи НСО Групата затоа што нејзини цели биле корисниците на неговите производи и побара компанијата да одговара поради скандалот со софтверот Пегаз. Тужбата на Епл претставува нов проблем за израелската компанија по извештаите дека десетици илјади активисти, новинари и политичари се на листата на потенцијални цели на софтверот Пегаз. (MИА)

Проверете: Доколку ви е вклучена оваа опција, постои можност од хакирање на вашиот телефон

Магдалена Андонова — Thu, 10 Sep 2020 12:40:38 +0000

Во текот на притиснувањето на копчето „Click to chat“, вашиот број ќе биде проследен во URL стрингот. Компанијата „Google“ повеќе пати беше критикувана поради издавање на приватни податоци од корисниците, а сега почна и индексирање на броевите од телефонот преку кои сте ги направиле профилите на „WhatsApp“. Тоа значи дека доколку една опција е активирана на вашиот профил, сите броеви од вашиот телефон можат ненадејно да се пријават на „Google“. Имено, опцијата „Click to chat“ која апликацијата „WhatsApp“ ја воведе за полесно да ги пронајдете контактите, всушност открива дека нашиот број од телефонот е достапен во пребарувањата на „Google“. Оваа опција со помош на линк може да воспостави „WhatsApp“ размена на пораки со било кој, а доколку вие комуницирате со некоја таква личност тогаш сте во еднаква опасност и вашиот број од телефонот ќе им стане достапен на сите на „Google“. Бидејќи моментално не постои закон или пак одредба со која што „Google“ не смее да ги купува информациите од метаподатоците, вашиот телефонски број исто така дополнително може да се најде на „Google“ пребарувачот.

ФОТО: Македонски „анонимуси“ ги хакнаа Дуа Липа и Рита Ора

Дарко Андоновски — Fri, 24 Jul 2020 11:08:49 +0000

Хакерската група, македонските „Анонимуси“ објави на Твитер дека ѝ го урнала официјалниот сајт на Дуа Липа во знак на револт кон објавите со карта од Голема Албанија. Потоа го хакираа и сајтот на Рита Ора - двете се познати светски пејачки со албанско потекло.

ФБИ води истрага за хакирање Твитер налози

Дарко Андоновски — Thu, 16 Jul 2020 18:18:47 +0000

Американското ФБИ води федерална истрага за хакирање Твитер налози на неколку познати личности, тврдат двајца добро упатени извора. – Свесни сме за денешниот безбедносен инцидент, кој се однесува на неколку Твитер налози кои им припаѓаат на познати личности. Налозите се веројатно хакирани со цел измама со криптовалути, велат изворите. Хакирани се официјалните Твитер налози на милијардерите Бил Гејтс, Илон Маск и Џеф Безос, демократскиот претседателски кандидат Џо Бајден, како и на компаниите Епл и Убер. Инцидентот придонесе за пад на акциите на Твитер.

И твитер профилите на Илон Маск, Бил Гејтс и Обама под хакерски напад

Тале Кристо — Thu, 16 Jul 2020 14:13:53 +0000

На мета на ај-ти виртуозите покрај најбогатите луѓе на планетата Бил Гејтс, Џеф Безос и Илон Маск, се најдоа и поранешниот претседател на САД Барак Обама, како и кандидатите за шеф на државата, Џо Бајден и раперот и независен кандидат Канје Вест. Целта на нападите сепак, не била кон нив, туку хакерите барале биткоини, а на секој од профилите се појави речиси иста порака која гласеше: -Му помагам на општеството поради ситуацијата со ковид 19! Секој испратен биткоин на мојата адреса подолу, ќе биде возвратен дуплирано. Доколку испратите илјада долари, ќе ви бидат возвратени 2000 долари. Понудата е отворена во наредните триесет минути. Уживајте! -Барак Обама . Сепак сопствениците на профилите и Твитер брзо реагираа, па пораките беа повлечени, а на темата се огласи и првиот човек на компанијата Џек Дорси. Тој вели дека ова тежок ден за социјалниот медиум и дека не им е баш најпријатно поради случката. -Ова не се вести кои сакате да ги видите во толку загреана изборна сезона, ако тие можат да го хакираат Илон Маск и Бил Гејтс, кои се едни од најбрилијатните умови на технологија на планетата,Ден Нејтан експерт. Ваквите напади на твитер профилите на американски политичари и бизнисмени не се новина. Слични такви имаше и во текот на предизборието во САД во 2016 година кога државата беше мета на повеќе хакерски напади, што влијаеа и на изборите во САД таа година. ИЗВОР

Кривична против Скопјанец за хакирање на Централниот регистар

Дарко Андоновски — Sat, 21 Sep 2019 09:53:44 +0000

Секторот за компјутерски криминал и дигитална форензика поднесе кривична пријава против Љ.Ј.(46) од Скопје поради постоење основи на сомнение за сторено кривично дело „оштетување и неовластено навлегување во компјутерски систем“. Во периодот од јануари до септември 2019 пријавениот, како управител на деловен субјект од Скопје, кое со Централниот регистар на Р.С.Македонија ималосклучено договор за користење на дистрибутивниот систем, недозволено автоматизирано извршувал системски команди кои му овозможувале за исти производи и исти податоци од претходно направените нарачки да прави нови нарачки во позадински систем и од него да добива нови податоци. Притоа, тој целосно ги заобиколувал контролите за наплата, односно податоците од нарачките ги добивал без надомест, со што го оштетил Централниот регистар на Р.С.Македонија за 33.402.238 денари.

Хакиран сајтот на француското МНР

Ристе Здравков — Thu, 13 Dec 2018 12:24:36 +0000

Хакери украле податоци од сајтот на Министерството за надворешни работи на Франција, што биле наменети за граѓаните кои патуваат во странство, соопшти денеска француското МНР. – Украдени се лични податоци внесени при регистрација на платформатѕа „Ариане“. Тие податоци би можеле да бидат злоупотребени, но со ограничен ефект, бидејќи тие информации не содржат чувствителен финансиски материјал ниту податоци, кои можат да ги откријат дестинациите, се наведува во соопштението на француското Министерство за надворешни работи. Сајтот „Ариане“, кој на француските патници им советува да „останат поврзани поради својата безбедност“ воспоставен е во 2010 година и им овозможува на француските државјани да добијат информации поврзани за безбедноста додека се во странство.