харадинај – Kurir.mk

Ранет внукот на Рамуш Харадинај, повреден и еден случаен минувач

Тале Кристо — Sun, 11 Oct 2020 12:27:01 +0000

Во Пеја во Косово со огнено оружје повредени се две лица, а сторителот на делото се дал во бегство. Како што пренесуваат косовските медиуми еден од повредените е роднина на лидерот на ААК, Рамуш Харадинај, односно станува збор за Ахмет Џекај внук на Харадинај. Од обвинителството, веднаш после вооржената престрелка излегле на терен и се преземаат сите мерки за расчистување на настанот. Како што пишуваат косовските медиуми двете лица се надвор од животна опасност, а како што наведуваат истите второто лице кое што настрадало било случаен минувач. Полицијата работи на цечосно расчистување на случајот.

Харадинај: Косово е на пат да ја совлада пандемијата, треба да се укинат ограничувањата

Тале Кристо — Sun, 16 Aug 2020 13:08:57 +0000

Лидерот на Алијансата за иднината на Косово (ААК), Рамуш Харадинај смета дека Косово е на добар пат да ја совлада пандемијата на Ковид-19 и дека треба да се укинат ограничувањата на слободата на движење и оние кои се однесуваат на бизнисите, јави дописникот на МИА од Приштина. Харадинај, чија партија е дел од владејачката коалиција, на својата страница на Фејсбук напиша дека „подигнувањето на свеста кај граѓаните во последните недели дава извонредни резултати“. – Косово е на добар пат да ја совлада пандемијата. Последните недели, подигнувањето на свеста кај граѓаните дава извонредни резултати. И натаму сметам дека ограничувањата на слободата на движење и оние за бизнисите се непотребни. Болеста ќе се совлада со нашата култура на живеење со неа, со водење сметка и грижа за сопственото и за здравјето на другите, напиша Харадинај. Лидерот на ААК и поранешен премиер бара од Собранието на Косово да усвои пакет за економско закрепнување, со намалување на даноците за бизнисите и други потребни мерки. – Јас верувам дека нашата земја ќе закрепне, со исправни политики, со мобилизација – наша, на бизнисите и на дијаспората и со поддршка од сојузниците, порача Харадинај.

Харадинај очекува косовското Собрание утре да ја изгласа новата влада

Тале Кристо — Mon, 01 Jun 2020 14:08:34 +0000

Лидерот на Алијансата за иднината на Косово (ААК) и поранешен премиер, Рамуш Харадинај смета дека денеска може да се очекува објавувањето на конечната одлука на Уставниот суд на Косово, со која на претседателот на државата, Хашим Тачи, му се даде право да го додели мандатот на Авдулах Хоти од Демократскиот сојуз на Косово (ЛДК), јави дописникот на МИА од Приштина. Доколку тоа се случи, смета Харадинај, уште утре може да се одржи седница на Собранието, на која ќе се гласа за предлогот на Хоти за новата влада, во која, според претходно постигнатиот договор, освен ЛДК и ААК, ќе партиципираат и Социјалдемократската иницијатива (Нисма) на Фатмир Лимај, како и најголемата партија на косовките Срби, Српска листа (СЛ) и парламентарните партии на малцинските етнички заедници. Според екс-премиерот, реални се можностите утре да се свика седница на Собранието, на која ќе се избере нова влада, откако на актуелната, предводена од лидерот на Движењето самоопределување (ВВ), Албин Курти, ѝ беше изгласана недоверба на 25 март, по што на 30 април Тачи го додели мандатот на ЛДК, како второрангирана партија на изборите од октомври минатата година. – Сметам дека сега е време кога Судот може да ја објави одлуката, со што би се отворил патот на процедурата, бидејќи остана само прашање на процедура. (…) Утрешниот ден е реален рок, освен ако не се случи некое доцнење во официјалното објавување на одлуката, изјави Харадинај пред медиумите при неговата денешна посета на општина Сува Река. Харадинај ги објави и имињата на министрите од неговата партија кои во кабинетот на Хоти ќе ги водат ресорите економски развој, животна средина и просторно планирање(Блерим Кучи), надворешни работи (Мелиза Харадинај), образование (Рам Лика) и правда (Селим Селими), додека вицепремиер од ААК ќе биде Бесник Тахири.

Харадинај: Ние, политичките лидери, сме измамници

Тале Кристо — Sat, 23 Nov 2019 09:05:24 +0000

Косовскиот премиер во оставка и лидер на Алијансата за иднината на Косово (ААК), Рамуш Харадинај ги обвини политичките челници, вклучително и себе, за неизвршување реформи во изборното законодавство, што резултира со големо доцнење во објавувањето на резултатите од вонредните парламентарни избори одржани на 6 октомври, јави дописникот на МИА од Приштина. Храдинај во синоќешното интервју за приштинската РТВ21 рече дека за доцнењето не треба да се обвинуваат Централната изборна комисија (ЦИК) и Изборниот панел за претставки и поплаки, туку самите политички партии. – Ние сме измамници зашто не извршивме изборни реформи. Вклучително и мене, кој сум дел од тие преговарачки форуми, изјави Харадинај. Не е првпат Харадинај да изрекува критики на сметка на државните челници. Пред извесно време, во интервју за албански медиум, тој ги обвини лидерите во Косово и Албанија дека „ги крадат сопствените држави“. Повеќе од еден и пол месец по изборите од 6 октомври во Косово, се уште нема конечни резултати, поради што не може да се формира новото Собрание и новата Влада. Во Центарот за броење и резултати при ЦИК во тек е пребројувањето на 1.407 од вкупно 2.547 гласачки места на кои се гласаше за вонредните парламентарни избори. Овој процес, започнат на 13 овој месец, истиот ден кога ПЗАП ги прифати поплаките на некои од учесниците на изборите, според најавите од ЦИК, се очекува да заврши утре, 24 ноември, по што би требало да се објават конечните резултати и да се пристапи кон формирање на институциите.

ЛДК очекува пратеници од мнозинството да ја поддржат интерпелацијата за Харадинај

Ивана Ефремовски — Sun, 14 Oct 2018 14:35:45 +0000

Опозицискиот Демократски сојуз на Косово (ЛДК) смета дека актуелната Влада на Рамуш Харадинај веќе нема никаков легитимитет и затоа предвремените избори се неопходни, и тоа до крајот на годинава, јави дописникот на МИА од Приштина. Пратеникот на ЛДК Исмет Беќири вели дека опозицијата очекува и од пратеници од владејачката коалиција, кои се незадоволни од оваа Влада, да ја поддржат интерпелацијата, која ја ќе ја поднесе неговата партија. - ЛДК веќе ги има обезбедено потписите, оваа готовност е изразена и од (опозициските) Самоопределување (ВВ) и од Социјалдемократската партија (ПСД). Сега се подготвува и текстот на интерпелацијата и ние одржуваме контакти со сите оние кои се во владејачката коалиција, а кои се незадоволни, за да не поддржат во уривањето на оваа влада, изјави Беќири за Радио Косово. Тој нагласува дека владејачката коалиција веќе нема ни мнозинство во косовското Собрание, а со тоа ниту политичка моќ да донесе каква и да е одлука. Најголемата опозициска партија во Косово претходно објави дека нема да учествува на ниедна собраниска седница, се додека на дневен ред не се стави резолуцијата на опозицијата за дијалогот меѓу Косово и Србија.

Харадинај бара поддршка од сите земји во светот за зачленување на Косово во Интерпол

Ристе Здравков — Thu, 06 Sep 2018 11:21:47 +0000

Косовскиот премиер Рамуш Харадинај, изјави дека е време Полицијата на Косово да стане дел од најголемите полициски организации, Интерпол и Европол и за таа цел ја побара поддршката од сите земји во светот, јави дописникот на МИА од Приштина. - Доколку Косово се зачлени во Интерпол годинава, никој нема да изгуби ништо, освен меѓународниот криминал. Погрешно е од сите земји во светот ако не го помогнат Косово да стане дел од Интерпол, изјави Хардинај на одбележувањето на Денот на Полицијата на Косово. Како што е најавено, за барањето на Косово за зачленување во Интерпол ќе се гласа на наредното Генерално собрание на организацијата, што ќе се одржи од 16-21 ноември во Дубаи во Обединетите Арапски Емирати. На претходното Генерално собрание, одржано во Пекинг во септември минатата година, Косово го повлече барањето за зачленување пред самото гласање, бидејќи ги немаше обезбедено потребните гласови.

Партиите на Харадинј и Лимај се приклучија на опозицијата против „корекцијата на границата“

Ристе Здравков — Wed, 29 Aug 2018 08:27:00 +0000

Два политички субјекти од владејачаката коалиција ќе ја помогнат коалицијата за да обезбеди кворум за вонредната седница на косовското Собрание, на која се настојува да се изгласа резолуција, со која ќе му се забрани на претседателот на државата Хашим Тачи да преговара со Србија за територијалната целовистост на Косово, јави дописникот на МИА од Приштина. Учеството на седницата свикана за 4 септември, три дена пред продолжувањето во Брисел на разговорите на Тачи со претседателот на Србија Александар Вучиќ, го потврдија Алијансата за иднината на Косово (ААК) на актуелниот премиер Рамуш Харадинај и Иницијативата за Косово (Нисма) на вицепремиерот Фатмир Лимај. Претседателот на Собранието Кадри Весели, кој е и лидер на главниот политички субјект на власт, Демократската партија на Косово (ПДК), иницијативата на опозицијата ја оквалификува како „апсурдно и сосема непотребно дејствие“, нагласувајќи дека институциите „нема да бидат дел од темните сценарија, лажни каузи и сеанси кои поттикнуваат тензии и паника“, пишува денеска „Коха Диторе“. Меѓутоа, напоменува весникот, зборовите на Весели „не допреа до партнерите од власта“. Пратенкот на ААК Мухарем Нитај го потврди учеството на пратениицте на неговата партија на седницата на која се настојува да се запре иницијативата на Тачи за корекција на границата со Србија, а истото го најави и извор од Нисма.