харисон форд – Kurir.mk

Новооткриен вид змии во Перу го доби името по Харисон Форд

Ивона Петрова — Wed, 16 Aug 2023 11:47:57 +0000

Новооткриен вид змии пронајдени во Перу го доби името по холивудскиот глумец Харисон Форд, кој е и познат еко-активист. Бледожолтеникаво-кафеавата змија со црни дамки, откриена од истражувачи од Перу и САД на планините Анди, е наречена „Тачименоидес харисонфорди“ (Tachimenoides harrisonfordi). Форд, кој е потпретседател на непрофитната група „Меѓународна конзервација“ (Conservation International), смета дека откритието е потсетник дека има уште многу да се научи за дивиот свет. Новиот вид е била откриен во Националниот парк „Отиши“ во Перу, пренесува „Туко". - Луѓето се само мал дел од неверојатно огромната биосфера. На оваа планета, сите судбини се испреплетени, а во мигов милион видови се на работ на заборавот. Имаме егзистенцијална задача да го поправиме нашиот нарушен однос со природата и да ги заштитиме местата што го одржуваат животот, изјави Форд. И вид мравки, како и пајаци веќе се именувани по американската акциона ѕвезда. Во 1993 година е откриен „Калпонија харисонфорди“ (Calponia harrisonfordi) - т.н. калифорниски пајак, а неколку години подоцна и мравката „Фејдоле Харисонфорди“ (Pheidole Harrisonfordi) влезе во списокот познати видови. За разлика од филмскиот лик по кого е можеби и најпознат - Индијана Џонс, Форд повеќепати истакнал дека сака змии. А пак, за новиот вид, вели дека „брзо нашол блискост“ со нив. - Змијата има очи во коишто „може да се удавите“ и повеќето денови ги минува сончајќи се покрај базен со нечиста вода - веројатно јас и тие би биле пријатели во раните 60-ти“, се пошегува тој. Истражувањето за „Тачименоидес харисонфорди“ покажува дека влекачите се особено изложени на опасност од истребување и оти над петтина од сите влекачи денес се загрозен вид.

Новинарка го пофалила Харисон Форд дека сè уште е згоден, неговата реакција ги насмеа присутните (ВИДЕО)

Ристе Здравков — Mon, 22 May 2023 10:21:06 +0000

Славниот актер Харисон Форд ги насмеа присутните со својата реакција и одговор на коментарот и прашањето на новинарката во текот на медиумското појавување по премиерата на филмот „Indiana Jones and the Dial of Destiny“. Имено, во четвртокот во Кан се одржа премиерата на новиот филм на Форд, а по тој повод беше одржана и конференција на која присуствувале режисерот Џејмс Манголд, но и актерите од наведениот филм. Меѓутоа, вниманието го привлече една новинарка која му дала комплимент на Харисон Форд дека сè уште е згоден, а потоа поставила прашање кое дополнително го збунило. „Многу сте згодни и сите бевме воодушевени кога во една сцена во филмот ја соблекувате маицата. Уште го имате „тоа“ во себе. Како ја одржувате формата? Можете ли да јавате коњ?“, го прашала новинарката.

A reporter at #Cannes told Harrison Ford: "I think you're still very hot."

Ford replied: "Look, I’ve been blessed with this body. Thanks for noticing!"https://t.co/c6p4UXtM4X #Cannes #IndianaJones pic.twitter.com/yuUfSQblOq
— Variety (@Variety) May 19, 2023

Харисон во тој момент чудно ја погледнал, па се замислил. Неговата реакција ги насмеала присутните, по што тој збунето ја прашал какво прашање поставила. „Дозволете ми да ви одговорам. Да, јас можам да јавам коњ, ако тоа ми го дозволат. Ви благодарам, не мислев да бидам суров“, ѝ одговорил Харисон, а потоа се пошегувал на сметка на коментарот за неговиот изглед, велејќи дека е благословен со своето тело. „Ви благодарам што забележавте“, ѝ одговорил Форд на новинарката. За потсетување, Харисон во четвртокот ја прими и наградата Златна палма, што ги воодушеви присутните на филмскиот фестивал во Кан. Најавено е дека петтото продолжение на франшизата за Индијана Џонс ќе започне со прикажување кон крајот на јуни во кината ширум светот.

Почесна „Златна палма“ за Харисон Форд

Ивона Петрова — Fri, 19 May 2023 07:19:16 +0000

Американската филмска легенда Харисон Форд, кој дојде на Филмскиот фестивал во Кан да го претстави петтиот дел од серијалот „Индијана Џонс““ и последен филм каде што го глуми прочуениот археолог, вчера доби почесна „Златна палма“, како своевидно изненадување на Фестивалот, пред прикажувањето на ова негово последно остварување. - Длабоко сум трогнат од ова признание, рече видно возбуден, 80-годишниот американски актер примајќи ја наградата. Кога објавија дека петтиот дел од оваа филмска авантура ќе биде премиерно прикажан во Кан, организаторите посочија дека ќе му оддадат почит на Харисон Форд, неоткривајќи за што се работи. „Индијана Џонс 5“ оди на киноплатното пред пошироката публика на крајот на јуни. Во 2022 година, Том Круз ја доби и почесната „Златна палма“ пред прикажувањето на филмот „Топ ган: Маверик“. Почесната „Златна палма“ завчера му припадна и на уште едно големо име на американската кинематографија - Мајкл Даглас (78), кому наградата му беше доделена на свеченото отворање на 76. издание на овој светски признат фестивал.

Ал Пачино ја одбил легендарната улога: Му дадов кариера на Харисон Форд

Ивона Петрова — Sat, 22 Apr 2023 17:36:47 +0000

Ал Пачино се смета за еден од најдобрите актери на неговата генерација, со улоги во многу популарни филмови. Но, легендарниот актер за малку ќе се приклучел на франшизата Star Wars во 70-тите. Тој се пошегува дека Харисон Форд станал познат затоа што не го глумел Хан Соло. -Ми дадоа сценарио наречено "Војна на ѕвездите". Ми понудија толку многу пари, но јас не го разбрав. Му дадов кариера на Харисон Форд, рекол легендарниот актер. Форд пред тоа имаше неколку помали филмски и телевизиски улоги, како што се Американски графити, Разговор и Кунг Фу, но „Војна на ѕвездите“ го претворија во култна ѕвезда.

Харисон Форд откри, еве кога новото продолжение на „Индијана Џонс“ ќе се најде во кино салите

Ивона Петрова — Fri, 27 May 2022 08:15:29 +0000

Холивудскиот актер Харисон Форд откри дека петтото продолжение од „Индијана Џонс“ ќе се најде во кино салите во јуни следната година. Актерот го откри и точниот датум по изведбата на светски познатата тема од филмот од композиторот Џон Вилијамс на прослава во Калифорнија. Форд му се придружил на Вилијамс на сцената, му го честитал неодамна прославениот 90 роденден истакнувајќи дека музиката го следела насекаде. -Знаете, среќен сум поради тоа. Таа музика свиреше во операционата сала кога ја имав последната колоноскорија, ги насмеа актерот присутните. За филмот истакнал дека е горд на него, и дека излегува пред публиката на 30 јуни 2023 година.

Харисон Форд се повреди на снимањето на „Индијана Џонс 5“

Ивона Петрова — Thu, 24 Jun 2021 06:17:41 +0000

Планетарно популарниот актер Харисон Форд, кој наскоро ќе наполни 79 години, се повредил снимајќи акциони сцени во новиот филм за авантурите на Индијана Џонс. Актерот го повредил рамото и ќе мора привремено да го прекине снимањето, објави продукциската куќа „Дизни“. -Повторувајќи сцени на борба, Харисон Форд го повреди рамото. Ќе биде потребно распоредот на снимање да се измени во неделите кои доаѓаат, се наведува во соопштението. Засега не се објавени никакви поединости за околностите под кои се случила несреќата, ниту за сериозноста на неговата повреда. Снимањето на петтиот, последен дел од авантурите на Индијана Џонс, започна минатиот месец во Велика Британија. Се очекува филмот да излезе на лето 2022 година.

Годините го пристигнале и еден од најшармантните актери во Холивуд (ФОТО)

Тале Кристо — Wed, 03 Mar 2021 07:29:37 +0000

Популарниот американски актер, Харисон Форд (78) фотографиран е во Калифорнија во опуштено спортско издание, и во ваквата прилика за првпат во осмата деценија од животот му се забележуваат знаци на стареење. Имено, актерот бил фотографиран додека одел на кафе, а за прв пат на актерот му се забележуваат трагите на стареење. Познато е дека актерот се занимава со рано разни спортови, а најчесто игра тенис, кој што не го запоставил ниту за време на пандемијата со коронавирусот. Во една прилика истакнал дека не се плаши од смртта, а бил многу тажен кога неодамна почина неговиот драг колега. Како за потсетување, Форд неодамна му одаде почит на неговиот починат колега Шон Конери, кого го нарече „драг пријател“ и додал дека се надева ако „Конери е во рајот, сега игра голф “. -Ми беше татко, не во реалниот живот, но во третиот дел од филмот „Индијана Џонс“. Господе колку ни било забавно. Ако сега Шон е во рајот, се надевам дека таму имаат голф терени. Почивај во мир, драг пријателе, рекол Форд неодамна во изјава за медиумите.

Харисон Форд се враќа како Индијана Џонс

Ивона Петрова — Fri, 11 Dec 2020 10:11:28 +0000

Холивудскиот актер Харисон Форд (78) уште еднаш ќе се појави во улогата на Индијана Џонс, во петтиот и најверојатно последен дел. Филмот ќе го режира Џејмс Мандолд, а како што пренесува Би-Би-Си, ова ќе биде последно појавување на Форд во серијалот филмови за Индијана Џонс. Компанијата Дизни најави виртуелна презентација за инвеститорите, каде исто така се откриени планови за спиоф серијата „Војна на ѕвездите“ и серија Марвел. Петтото продолжение за Индијана Џонс премиерно ќе биде прикажано во јули 2022 година.

Харисон Форд: По мене, никој не може да биде Индијана Џонс

Ивана Ефремовски — Mon, 23 Nov 2020 12:26:31 +0000

На популарниот актер Харисон Форд не му се допаѓа идејата дека некој друг ќе ја игра улогата на Индијана Џонс по него, пишува „Screen Rant“. Во интервју за „УСА Тудеј“, Форд беше запрашан кога би сакал да ја види Индијана Џонс откако ќе ја заврши улогата. „Никој нема да биде Индијана Џонс, разбираш? Јас сум Индијана Џонс. Кога мене ќе ме нема, истото ќе важи и за него“, одговори со насмевка. Да потсетиме, неодамна беше објавен „Индијана Џонс 5“, филм за кој се претпоставува дека е последен во оваа франшиза.

Харисон Форд под истрага: Овој пат ароганцијата може скапо да го чини!

Ивана Ефремовски — Sun, 03 May 2020 15:44:57 +0000

Познатиот актер Харисон Форд (77) уште еднаш се нашол во неволја заради страста кон летањето. Тој во една прилика при управување со својот приватен авион направил сериозен прекршок кога слетувал на аеродромот во Калифорнија. Не ги разбрал упатствата кои ги добил од контролата на летање која го предупредила да не се задржува на пистата, бидејќи во тој момент друг авион вежбал слетување и полетување. Форд ја игнорирал таа информација и предизвикал голема паника во контролната кула која вклучила висок степен на подготвеност. Тој на крај се извинил кажувајќи дека мислел дека му кажале “се е чисто” и дека може да помине на пистата. За среќа, немало никаква опасност од удар, бидејќи другиот авион бил далеку од авионот на Форд. Сепак, Сојузната управа за воздухопловство решила да се позанимава со овој случај. Ова било уште една од бројните ризични ситуации кои актерот ги имал, а се поврзани со неговата страст за летање.