хасан рохани – Kurir.mk

Рохани: Иран нема да претрпи голема штета поради цената на нафтата

Ивона Петрова — Wed, 22 Apr 2020 09:02:57 +0000

Иран нема да претрпи голема штета како останатите земји од падот на цените на нафтата поради тоа што не зависи од другите земји кога станува збор за извоз на сурова нафта, изјави денеска иранскиот претседател Хасан Рохани. – Ќе бидеме помалку оштетени од другите земји поради падот на цените, затоа што нашата економија помалку се потпира на извозот на нафта, истакна Рохани. Цените на нафтата и денеска продолжија да се намалуваат, а берзите се борат со огромен прилив на „црното злато“ поради пад на побарувачката за сите нафтени производи поради кризата предизвикана од епидемијата со Ковид-19.

Рохани: Иран одговори и ќе одговори на убиството на генерал Сулејмани

Ивона Петрова — Wed, 18 Mar 2020 10:03:59 +0000

Претседателот на Иран, Хасан Рохани денеска изјави дека Техеран одговорил и ќе одговара на убиството на генералот Касим Сулејмани. – Американците го убија нашиот голем командант. Ние одговоривме и ќе одговориме на тој терористички чин, посочи Рохани за државната телевизија по владината седница. Командантот на Револуционерната гарда, Суллејмани загина при американски напад во Ирак во јануари годинава

Рохани: Збогатуваме повеќе ураниум отколку пред договорот

Ивона Петрова — Thu, 16 Jan 2020 09:54:01 +0000

Иран сега збогатува повеќе ураниум отколку што тоа го правеше пред потпишувањето на нуклеарниот договор со светските сили во 2015 година, изјави денеска претседателот Хасан Рохани во телевизиско обраќање до нацијата. -Засилен е притисокот врз Иран, но ние продоложуваме да напредуваме. Збогатуваме повеќе ураниум отколку пред потпишувањето на договорот, рече Рохани, пренесен од британските медиуми. Иран почна постепено да го намалува почитувањето на одредбите од нуклеарниот договор откако американскиот претседател Доналд Трам во мај 2018 година унилатерално ги повлече САД од него, и веднаш воведе нови санкции против Техеран.

Рохани најави темелна истрага и казни за соборувањето на украинскиот патнички авион

Ивона Петрова — Tue, 14 Jan 2020 08:58:57 +0000

Иран ќе ги казни сите што се одговорни за ненамерното соборување на украинскиот патнички авион, изјави денеска иранскиот претседател Хасан Рохани, додавајќи дека ќе биде спроведена темелна истрага за „трагичниот настан“. Во меѓувреме, портпаролот на иранската правда Голамхосеин Есмаил изјави дека „некои лица“ биле уапсени за нивната улога во соборувањето на авионот, без да прецизира детали. Рохани го оквалификува соборувањето на авионот како „непростлива грешка“, оценувајќи дека само едно лице не може да биде одговорно за несреќата. – Признавањето на грешката на иранските вооружени сили е добар прв чекор. Треба да ги увериме луѓето дека тоа нема да се случи повторно, рече Рохани. Тој додаде дека неговата влада има одговорност кон Иранците и другите нации, чии граѓани загинаа во падот на авионот. Авионот Боинг 737 на украинската компанија Интернешнл ерлајнс беше соборен непосредно по неговото полетување од аеродромот во Техеран, при што загинаа сите 176 патници и членови на екипажот.

Рохани му се извинил на Зеленски за урнатиот украински авион крај Техеран

Дарко Андоновски — Sat, 11 Jan 2020 18:21:15 +0000

Иранскиот претседател Хасан Рохани и се извинил на Украина за соборениот украински патнички авион во близина на Техеран, информира украинскиот претседател Володимир Зеленски. Двајцата претседатели имале телефонски разговор, соопшти прес службата на шефот на украинската држава. „Рохани се извини за трагедијата, која однесе животи на 176 лица. Претседателот на Иран целосно признава дека до трагедијата дојде поради погрешни дејствија на војската во нивната земја”, се наведува во соопштението на украинското претседателство. Зеленски на Рохани му соопштил дека инсистира Иран под итно да го заврши идентификувањето на телата на загинатите во инцидентот. „За нас е исклучително важно следната недела, до 19 јануари, телата на загинатите да бидат вратени во Украина, за да можат роднините да се збогуваат со нив“, подвлече украинскиот претседател.

Рохани: Нуклеарниот договор овозможува укинување на оруженото ембарго

Ивона Петрова — Mon, 11 Nov 2019 11:30:02 +0000

Иранскиот претседател Хасан Рохани порача дека останувањето во нуклеарниот договор со светските сили од 2015 година ќе и овозможи на земјата од следната година да купува и продава оружје во странство. – Ако го спасиме нуклеарниот договор, оруженото ембарго против Иран ќе биде отстрането и можеме да купуваме или да го продаваме своето оружје. Тоа е едно од значајните влијанија кои ќе ги добиеме, истакна Рохани. Укинувањето на ембаргото на оружје, кое го наметнаа ОН, веќе ја загрижува администрацијата на американскиот претседател Доналд Трамп. Пред една година Трамп еднострано ја повлече Америка од договорот, бидејќи, како што се наведува, Иран „ги премина границите воспоставени со договорот“.

Рохани нареди Иран да ги укине сите ограничувања за нуклеарни истражувања и развој

Ивона Петрова — Thu, 05 Sep 2019 06:40:52 +0000

Иранскиот претседател Хасан Рохани објави дека наредил прекин на сите ограничувања во нуклеарни истражувања и развој на оваа технологија во земјата. – На (иранската) Организација за атомска енергија и е наредено да ги преземе сите неопходни истражувања и чекори во развојот и да ги напушти сите преземени обврски на тоа поле, рече Рохани на државната телевизија. Оваа мерка е преземена затоа што „не е постигнат посакуваниот резултат“ во контекст на тековната дипломатска иницијатива на Франција да го зачува нуклеарниот договор постигнат во јули 2015 година во Виена, информира иранскиот претседател. Рохани ова го изјави непосредно откако американскиот пратеник за Иран Брајан Хук ја отфрли идејата за „ставање вон сила“ на санкциите на САД против Иран за да се овозможи кредитна линија од 15 милијарди долари за која е разговарано со европските потписници на нуклеарниот договор. Ирански функционери истакнаа дека се подготвени повторно во целост да го применуваат нуклеарниот договор во замена за кредитна линија од околу 15 милијарди долари за која се преговара со Европјаните, и за чие постигнување краен рок е овој викенд. Франција, Германија, Велика Британија и Иран последните неколку дена расправаат за тоа како да се спаси меѓународниот договор склучен во Виена во 2015 кој е доведен во прашање откако САД еднострано се повлекоа во мај минатата година.

Рохани: Иранките ќе можат да следат фудбал на стадионите

Ивона Петрова — Mon, 16 Jul 2018 14:08:02 +0000

Иранскиот претседател Хасан Рохани донесе одлука и жените да можат да гледаат фудбал на стадионите.

Својата одлука Рохани ја соопштил на министерот за спорт Масуд Солтанифар, кој сега треба да ја спроведе одлуката на претседателот.

Досега, конзервативните кругови не дозвоплуваа присуство на жените на стадионите под изговор дека при навивањето мажите користат „непримерен јазик“. Но, портпаролот на иранскиот Совет на чувари - тело составено од 12 мажи со голема моќ во Исламската Република, оцени дека таа „апсолутна забрана“ веќе не е разумна.

По повеќегодишни протести поради таа забрана, конечно жените во Иран повторно ќе можат да се радуваат на убавините на фудбалската игра во живо, откако тоа им беше забрането од Исламската револуција во 1979 година.

Иран се закани дека ќе ја ограничи соработката со МААЕ

Ивона Петрова — Thu, 05 Jul 2018 06:10:07 +0000

Иран може да ја ограничи соработката со Меѓународната агенција за атомска енергија (МААЕ), изјави иранскиот претседател Хасан Рохани пред директорот на Агенцијата, Јукија Амано. - Нуклеарната активност на Иран отсекогаш била за мирни цели, но Иран ќе го одреди обемот на својата соработка со МААЕ, рече Рохани по состанокот со Амано. - Одговорноста за промена на нивото на соработката на Иран со МААЕ ја сносат оние кои ја создадоа оваа нова ситуација, додаде иранскиот лидер. Тој истакна дека ако Иран нема корист од нуклеарниот договор по повлекувањето на САД, Техеран ќе донесе нови одлуки. Шефот на МААЕ го увери Рахани дека Заедничкиот сеопфатен акционен план во рамките на иранската нуклеарна програма е успешна согласност за спроведување на нуклеарни проверки и потврда дека Техеран ги исполнува своите обврски. МИА

Ердоган и Рохани за соработката со Русија за решавање на војната во Сирија

Даниел Василев — Tue, 17 Apr 2018 14:43:53 +0000

Турскиот претседател Реџеп Тајип Ердоган и неговиот ирански колега Хасан Рохани денеска се согласија да ја одржат соработката меѓу Турција, Иран и Русија за политичко решение за конфликтот во Сирија, соопшти неименуван извор од Кабинетот на шефот на турската држава. Турскиот претседател во телефонски разговор со Рохани му порачал дека треба да се избегнуваат акции кои би придонеле за зголемување на тензиите во регионот, по воздушните напади што ги изведоа САД, Велика Британија и Франција врз Сирија во саботата. Рохани и рускиот претседател Владимир Путин вчера во телефонски разговор се согласија дека нападот врз Сирија е „нелегална акција, која негативно влијае на напорите за политичко решение“ на сириската криза. Путин оценил дека со нападите е прекршена Повелбата на ОН и оти доколку продолжат може да доведат до хаос на меѓународната сцена. МИА