ХИМАРС – Kurir.mk

Шојгу: Украина планира да ја нападне руската територија со ракетите ХИМАРС и Сторм Шадоу

Тале Кристо — Tue, 20 Jun 2023 12:12:25 +0000

Рускиот министер за одбрана Сергеј Шојгу на денешниот состанок на одборот на министерството изјави дека командата на украинските вооружени сили планира да изврши удари врз руска територија, вклучително и на Крим, со ракетите Химарс( HIMARS) и Сторм Шадоу (Storm Shadow). -Според наши информации, раководството на украинските вооружени сили планира да изврши удари на територијата на Руската Федерација, вклучувајќи го и Крим, со ракети „ХИМАРС“ и „Сторм Шадоу, рече рускиот миниостер за одбрана. Највисокиот руски воен функционер нагласи дека употребата на западно оружје надвор од зоната на специјални воени операции ќе предизвика итни руски напади врз центрите за одлучување во Украина. Тој додаде дека таквиот потег ќе значи целосно вклучување на САД и Обединетото Кралство во конфликтот, пренесува руската агенција Тас. Шојгу, исто така, објави дека украинскиот режим ја продолжува својата контраофанзива јужно од Доњецк и во областите Запорожје и Доњецк. Тој тврди дека Украинците ги ангажирале своите елитни единици обучени од НАТО, но и дека користат големи количества оружје што го добивале од Запад. -Од 4 јуни, украинската армија изврши 263 напади врз позициите на руските војници. Благодарение на компетентните, несебични акции на нашите единици, сите беа одбиени, а непријателот не ги постигна целите, рече тој.

Во Полска стигнаа првите пет повеќецевни ракетни фрлачи ХИМАРС

Тале Кристо — Mon, 15 May 2023 15:45:48 +0000

Полскиот министер за одбрана Мариуш Блашчак денеска во Варшава ги презеде првите пет лесни повеќецевни ракетни фрлачи ХИМАРС од вкупно 20 што Полска ги купи од САД, а оваа година САД се согласија постепено да и продаваат на Полска уште 500. „Ги преземаме ХИМАРС во полската армија, оружје кое се покажа добро во борбите, во рацете на Украинците кои ја запираат руската инвазија. За кратко време ќе имаме голема сила на располагање и ќе ја зајакнеме полската артилерија“, рече Блашчак. Полскиот министер за одбрана претходно најави дека 20 повеќецевни фрлачи ХИМАРС, зделка вредна 414 милиони долари, не е крај и дека се водат преговара за купување на уште 500 фрлачи за кои американскиот Конгрес изразил согласност, а официјална Варшава има амбиции во тој нов договор да договори и производство на ХИМАРС во Полска. Покрај повеќецевните фрлачи, Полска нарача и борбена муниција, со дострел од 70 километри и 300 километри.

Украина од САД доби уште четири ракетни системи ХИМАРС

Магдалена Андонова — Mon, 01 Aug 2022 13:15:52 +0000

Украина доби серија од уште четири високомобилни артилериски ракетни системи ХИМАРС од американско производство, изјави денеска украинскиот министер за одбрана Алексеј Резников. – Благодарен сум на американскиот претседател Џозеф Бајден, на секретарот за одбрана Лојд Остин и на американските граѓани за зајакнувањето на украинската армија, напиша министерот Резников на Твитер, пренесе Ројтерс. Ракетните системи ХИМАРС имаат поголем дострел и се попрецизни од украинската артилерија од времето на Советскиот Сојуз, што им овозможува на украинските сили да се вклучат во руски цели кои претходно биле недостапни.

Украина: Уништени 50 руски складишта за муниција со помош на ХИМАРС

Тале Кристо — Mon, 25 Jul 2022 13:33:05 +0000

Украина денеска соопшти дека нејзините сили користеле ракетни системи ХИМАРС, испорачани од САД, за да уништат 50 руски складишта за муниција откако го добиле оружјето минатиот месец. Министерот за одбрана Олексеј Резников го истакна растечкото влијание што го имаат артилериските ракетни системи со висока мобилност (ХИМАРС) во напорите на Украина да ги одбие руските напади. „Ова ги прекинува нивните (руски) логистички синџири и им ја одзема способноста активно да се борат и да ги опсипуваат нашите вооружени сили со тешко гранатирање“, рече Резников. Тој додаде дека членовите на украинската артилерија извршиле „прецизни“ напади на неколку мостови. Резников не откри детали, но се вели дека станува збор за три речни премини во областа Херсон, окупирана од Русија, за кои локалните окупациски власти велат дека биле нападнати од ХИМАРС минатата недела. Тој исто така рече дека Украина добила три противвоздушни оклопни борбени возила „Гепард“, првата пратка од вкупно 15, и дека Киев очекува пратка од неколку десетици тенкови „Леопард“. Русија вели дека уништила неколку системи ХИМАРС, иако Украина тоа го негира. Во последниот таков извештај, руското Министерство за одбрана во понеделникот соопшти дека нејзините сили уништиле складиште за оружје за системите ХИМАРС во регионот Хмелницки во западна Украина.

Остин: САД ќе и испратат на Украина уште четири артилериски ракетни системи ХИМАРС

Тале Кристо — Wed, 20 Jul 2022 20:16:21 +0000

Шефот на Пентагон, Лојд Остин, денеска изјави дека САД ќе испратат на Украина уште четири артилериски ракетни системи ХИМАРС. – Продолжуваме да бараме нови начини да им се пружи долгорочна поддршка за храбрите мажи и жени на украинските вооружени сили, и ќе ја адаптираме нашата помош така што Украина би имала технологии, боева муниција и огромна огнена моќ за сомоодбрана, изјави Остин на почетокот на виртуелна средба со сојузниците посветена на Украина. Системите ХИМАРС имаат голем радиус на дејствување и повисока прецизност, отколку артилеријата од советско време со што располага Украина. Земјата неделава изјави дека со вакви ракетни фрлачи досега нанела 30 удари по руски позиции за материјално-техничка снабдување и муниција. Според Остин, новиот пакет помош вклучува и муниција и други артилериски боеви резерви. Вклучително овие четири, САД досега на Украина и доставија 16 системи ХИМАРС. Од почетокот на војната, САД имаат пружано помош за одбрана на Украина во висина од осум милијарди долари, вклучително и 2.2 милијарди во изминатиот месец.