хив – Kurir.mk

Маж излечен од ХИВ по трансплантација на матични клетки

Ивона Петрова — Tue, 21 Feb 2023 09:49:08 +0000

Еден човек е излечен од ХИВ инфекција по трансплантација на матични клетки.53-годишниот маж познат како пациент Дисдорф, е само третата личност во светот што е излечена со помош на матични клетки, објавија научниците во понеделникот. Тој не зема антиретровирусни лекови веќе четири години, што вклучува и земање лекови за сузбивање на вирусот. Како и во случајот со другите двајца пациенти (пациентот од Берлин и пациентот од Лондон), трансплантацијата била извршена за лекување на акутно нарушување на крвта, во неговиот случај леукемија, која се развила заедно со ХИВ инфекцијата. Речиси 10 години по трансплантација на матични клетки од неповрзан донор и повеќе од четири години по прекинот на терапијата за ХИВ, пациентот е во добра здравствена состојба. Трансплантацијата вклучува матични клетки од донатор со ретка мутација на генот CCR5, познат по тоа што спречува ХИВ да влезе во клетките. Мажот вели дека се уште се сеќава на зборовите на матичниот доктор дека заедно ќе доживеат ХИВ да може да се лекува. -Оваа година на Денот на вљубените, ја прославив 10-годишнината од трансплантацијата на коскена срцевина. Мојот донатор на коскена срцевина беше присутен како почесен гостин, вели мажот. Човекот рече дека одлучил да се откаже од својата приватност за да поддржи собирање средства за истражување и да се бори против стигмата за ХИВ со неговата приказна. Фактот дека вирусот не се вратил е резултат на исклучително темелна научна и терапевтска подготовка и мониторинг, велат научниците. Тие додаваат дека студијата е најдолго и најточно дијагностичко следење на пациент со ХИВ по трансплантација на матични клетки. Трансплантацијата на матични клетки вклучува уништување на сите нездрави сопствени крвни клетки и нивна замена со здрави матични клетки од крвта или коскената срцевина. Експертите сугерираат дека истражувањето мора да продолжи сега за да им се овозможи на пациентите да ги надминат инфекциите со ХИВ без потреба од таква тешка интервенција во иднина.

Бугарија: Два до трипати повеќе заразени со ХИВ од официјално регистрираните

Ивона Петрова — Thu, 01 Dec 2022 07:22:51 +0000

Од почетокот на 2022 година досега во Бугарија има 299 новорегистрирани носители на ХИВ инфекцијата, од кои 25-30 отсто се странски државјани, а голем дел се лица од Украина. Тоа го изјави за БТА Тонка Варлева, член на Комитетот за стратешко планирање на Одборот на Глобалниот фонд за борба против СИДА, туберкулоза и маларија. Според неа, сите заразени во Бугарија примаат антиретровирусна терапија. Во Бугарија се регистрирани вкупно 4.020 лица со ХИВ инфекција. Во Бугарија има два до три пати повеќе луѓе заразени со ХИВ отколку што се официјално регистрирани, вели Варлева во интервјуто. Таа додава дека е забележително дека во последните години во државата 80-90 отсто се заразени по сексуален пат , а од нив речиси половина се мажи кои имале сексуален контакт со мажи. Речиси 5 проценти од заразените биле заразени при користење инекција со наркотици, главно хероин. Секоја година Министерството за здравство на Бугарија организира тендер за централно снабдување со тестови за СИДА. Годишно се организираат четири кампањи за промовирање на истражувањето за ХИВ и околу 250 – 300 илјади луѓе се тестираат секоја година. Според неа, за време на бранот со Ковид-19, нивниот број се намалил поради отежнатиот пристап до истражување, јави БТА.

Светски ден за борба против СИДА, во земјава од ХИВ/СИДА починале 123 лица

Ивона Петрова — Thu, 01 Dec 2022 06:59:22 +0000

Според Светската здравствена организација (СЗО), ХИВ и понатаму останува глобален проблем за јавното здравје. Повеќе од два милиони луѓе во Европскиот регион на СЗО се погодени од ХИВ. Оценката на СЗО е дека во последните неколку години нема напредок кон постигнување на целите за ХИВ. Намалени се ресурсите, а како резултат на тоа, голем број животи се загрозени. Во земјава, до 2022 година од ХИВ/СИДА починале 123 лица, а 451 лице живее со ХИВ/СИДА. Во текот на октомври, согласно податоците објавени од Институтот за јавно здравје, регистрирани се пет нови случаи . Сите пријавени се со ХИВ. Регистриран е и еден смртен случај од ХИВ/СИДА. За ХИВ/СИДА не постои лек, но постојат лекови што ја успоруваат болеста. Со цел да се заштитите од ХИВ/СИДА потребно е да се практикуваат сигурни сексуални односи со користење на кондом. За да дознаете дали сте позитивни на ХИВ потребно е да се направи тест. Тестот за ХИВ се препорачува да се направи најмалку три месеци, а во некои ситуации и до шест месеци од ризичното однесување. Од СЗО ги повикуваат глобалните лидери и граѓаните да ги препознаат и да ги решат нееднаквостите што го кочат напредокот во ставањето крај на СИДА-та и да се изедначи пристапот до основните услуги за ХИВ, особено за клучните популации – мажи кои имаат секс со мажи, трансродови лица, луѓе кои користат дроги, сексуални работници, затвореници и мигранти – и нивните партнери.

Италијанец позитивен на мајмунски сипаници, Ковид-19 и ХИВ

Тале Кристо — Fri, 09 Sep 2022 19:28:27 +0000

Италијанец е првиот човек во светот кој истовремено е позитивен на мајмунски сипаници, Ковид-19 и ХИВ. Пациентот (36) дошол на лекар откако по враќањето од петдневното патување во Шпанија, каде имал незаштитен секс со мажи, добил висока температура, болки во грлото и главата, како и воспаление во пределот на препоните. Три дена по појавата на симптомите, тој бил позитивен на коронавирусот, објави стручното списание „Џурнал оф Инфекшн“. Само неколку часа по позитивниот тест за корона, на неговата лева рака се појавило црвенило. По неколку дена, сипаниците се прошириле по целото тело, па бил примен во болница во Таканија. На клиниката му биле направени низа тестови при што е утврдено дека е позитивен на мајмунски сипаници, Ковид-19 и ХИВ. Тестот за ХИВ покажал високо ниво на вирусот, а негативниот тест направен пред една година бил доказ дека тој неодамна се заразил. По една недела тој бил пуштен од болница, откако се излекувал од Ковид-19 и мајмунски сипаници. – Овој случај покажува како симптомите на мајмунски сипаници и Ковид-19 може да се преклопуваат и потврдува дека во случај на коинфекција важно е да се испитаат сексуалните навики за да се дојде до правилна дијагноза, велат научниците од Универзитетот во Катанија во својот извештај. Тие предупредија дека брисот од грлото на пациентот бил сè уште позитивен и по 20 дена, што укажува дека лицето сè уште е заразно. Бидејќи ова е прв случај на лице заразено со три вируси, докторите велат дека нема доволно докази дека оваа комбинација може да ја влоши состојбата на пациентот.

Пациент излечен од ХИВ, се заразил во 80-тите

Катерина Бојаџиева — Wed, 27 Jul 2022 20:39:55 +0000

Американски лекари ја информираа јавноста дека човек кој живее со ХИВ од 1980-тите е излекуван, што е четврти ваков познат случај. На 66-годишниот пациент му била трансплантирана коскена срцевина за лекување на леукемија од донатор кој е природно отпорен на вирусот. Мажот, кој не сакал да биде идентификуван, престанал да ги зема лековите за ХИВ. Тој рекол дека е исклучително благодарен што вирусот повеќе не е во неговото тело, пренесува Би-Би-Си. Човекот е познат како пациент „Град на надежта“, по болницата во која се лекувал во Дуарте, Калифорнија. Вирусот на хумана имунодефициенција (ХИВ) го оштетува имунолошкиот систем на телото. Toa може да доведе до СИДА (синдром на стекната имунодефициенција), а телото се бори против инфекцијата. – Кога ми беше дијагностициран ХИВ во 1988 година, како и многу други, мислев дека тоа е смртна казна. Никогаш не мислев дека ќе го доживеам денот кога повеќе нема да имам ХИВ, рекол излечениот маж. Но, тој не примал терапија поради ХИВ, туку затоа што на 63-годишна возраст се разболел од леукемија. Медицинскиот тим што го лекувал одлучил дека му е потребна трансплантација на коскена срцевина за да ги замени неговите канцерогени крвни зрнца. Случајно, донаторот бил отпорен на ХИВ. Вирусот навлегува во белите крвни зрнца на телото користејќи микроскопски врати – протеин наречен CCR5. Сепак, некои луѓе, вклучително и донаторот, имаат CCR5 мутации кои го спречуваат ХИВ. Првиот човек излекуван од ХИВ е Тимоти Реј Браун, попознат како „Берлинскиот пациент“. Тој беше излекуван во 2011 година.

САД: Излекувана првата жена со СИДА

Ивона Петрова — Wed, 16 Feb 2022 06:54:03 +0000

Американските научници соопштија дека со трансплантација на коскена срцевина на донор кој имал природен имунитет на вирусот што ја предизвикува болеста, успешно ја излекувале првата жена од СИДА во САД, вкупно трето лице. Случајот на средовечната пациентка од мешана раса беше претставен на научна конференција за ретровируси и инфекции во Денвер и таа е првата личност која се лекува со новата метода која вклучува матични клетки од крв од папочна врвца. Откако добила крв од папочна врвца за третман на акутна миелоидна леукемија, форма на рак што се формира во клетките кои формираат крв во коскената срцевина, пациентката сега е во фаза на ремисија и е излекувана од вирусот по 14 месеци. Двата досега случаи на излекувани од СИДА се однесуваа на мажи, еден бел и еден латиноамериканец, а тие се излекувани преку возрасни матични станици, кои вообичаено се користат при трансплантација на коскена срцевина. Овој случај е дел од поголемо истражување кое третира 25 лица заразени со ХИВ, а кои ќе бидат подложени на трансплантација на коскена срцевина. Сите првично ќе подлежат на хемотерапија за да им се отстранат канцерогените клетки. Потоа ќе им биде пресадена коскена срцевина од луѓе со специфична генска мутација, кои немаат рецептори кои вирусот ги користи за инфицирање на клетките. Научниците веруваат дека овие лица потоа ќе развијат имунолошки систем, отпорен на ХИВ.

Почина вирологот Лик Монтање, нобеловецот кој го откри ХИВ

Ивона Петрова — Fri, 11 Feb 2022 07:38:42 +0000

Францускиот виролог Лик Монтање, кој во 2008 година ја доби Нобеловата награда за истражување на вирусот ХИВ, почина денеска во Париз. Монтање ја доби Нобеловата награда за медицина за откривање на вирусот ХИВ со група научници, а за време на пандемијата на коронавирусот беше отворен противник на вакцините и тврдеше дека Ковид-19 е создаден во кинеска лабораторија. За време на својата кариера бил директор на Светската фондација за истражување и превенција на СИДА во Париз. Во годините пред почетокот на епидемијата на СИДА, тој направи значајни откритија за природата на вирусите и придонесе да се сфати како тие можат да ги променат генетските информации на организмите домаќини. Неговото истражување за интерферон го отвори патот за откривање на фармацевтски лекови за вирусни болести.

Во Холандија откриена „скриена“ многу позаразна варијанта на ХИВ

Тале Кристо — Fri, 04 Feb 2022 08:37:05 +0000

Научниците од Оксфорд соопштија за откритието на многу заразната варијанта на ХИВ, која со децении се крие во Холандија и која предизвикува побрзо влошување на имунолошкиот систем. Анализата на научниците од универзитетот, објавена вчера во списанието „Наука“, покажа дека пациентите заразени со „ВБ варијантата“ имале 3,5 до 5,5 пати повисоки нивоа на вирус во крвта од луѓето инфицирани со другите варијанти, како и брзо влошување на имунолошкиот систем. Научниците, меѓутоа, сметаат дека нема причина за загриженост бидејќи денеска постојат ефективни современи лекови. Студијата покажала дека, по започнувањето на лекувањето, луѓето со варијантата „ВБ“ имале слично закрепнување на имунолошкиот систем и преживување како и луѓето со други варијанти на ХИВ. Според нив, варијантата најверојатно се појавила во доцните 1980-ти и раните 1990-ти во Холандија и дека потоа, околу 2010 година, почнала да се повлекува. Тие исто така истакнуваат дека раното откривање на инфекцијата и лекувањето се клучни. -Нашите наоди ја нагласуваат важноста на препораката на Светската здравствена организација дека лицата изложени на ризик од ХИВ инфекција имаат пристап до редовно тестирање за да се овозможи рана дијагноза, проследено со итен третман, изјави коавторот на студијата Кристофер Фрејзер од Оксфорд. Истражувањето, исто така, ја потврди теоријата дека вирусите можат да еволуираат и да станат повирулентни, што е широко распространета хипотеза за која не е пронајдена многу потврда во реалниот свет. Делта сојот на коронавирусот е еден таков неодамнешен пример.

Жена од Аргентина се излекува од ХИВ

Ивона Петрова — Fri, 19 Nov 2021 12:01:33 +0000

Жена од градот Есперанца во североисточна Аргентина е излечена од ХИВ. Ова е втор документиран случај каде што некој успеал да го искорени смртоносниот вирус од своето тело, објави медицинското списание „ЈАМА“ за интерна медицина. Жената го елиминирала вирусот исклучиво благодарение на нејзиниот имунолошки систем, без земање лекови, терапија со матични клетки или други експериментални третмани. Истражувачите од Аргентина и Масачусетс (САД) собирале примероци од крвта на пациентката од 2017 до 2020 година, внимателно набљудвајќи ја ДНК-та. Испитувањата ги водел д-р Ксу Ју од Институтот „Рагон“ при Општата болница во Масачусетс. – Ова ни дава надеж дека човековиот имунолошки систем е доволно силен за да го контролира ХИВ и да ги елиминира сите функционални вируси. Времето ќе покаже, но веруваме дека (пациентката самата) достигнала стерилизирачки лек, рече Ју. Според написот, истражувачите сè уште не се сигурни како телото на пациентката успеало да се ослободи од ХИВ вирусот. – Веруваме дека тоа е комбинација од различни имунолошки механизми – веројатно се вклучени цитотоксичните Т-клетки, па вродените имунолошки механизми можеби помогнале, додаде Ју. Единствениот познат случај на пациент кој сам се излекувал од ХИВ, досега е 67-годишна жена од Калифорнија. Познати се и двајца пациенти кои биле излечени од ХИВ со третмани со матични клетки.

Австрија: Докторка вакцинирала повеќе лица со ист шприц

Ивона Петрова — Fri, 28 May 2021 08:49:05 +0000

Во една австриска компанија, докторка за време на вакцинирање користела еден шприц за повеќе лица. До 60 вработени биле дел од лекарската грешка и сега треба да бидат тестирани на ХИВ и хепатит. Компанијата по ваквата ситуација изразила длабоко жалење и најавила дека ќе инсистира за целосно расветлување на случајот, а докторката привремено е суспендирана. Со детална проверка било утврдено дека докторката, која ја спорвела вакцинацијата, материјалот да давање вакцина делумно погрешно го применувала.