Хјуман Рајтс Воч – Kurir.mk

Хјуман рајтс воч го обвини Западот за лицемерие

Катерина Бојаџиева — Fri, 20 Oct 2023 08:06:35 +0000

Хјуман рајтс воч (ХРВ) ги обвини САД и нивните сојузници за недостаток на критики за акциите на Израел во Појасот Газа, прашувајќи каде се повиците Израел да ги почитува меѓународните норми при нападот врз Газа, како и повиците за одговорност. -Реакцијата од Вашингтон и, со неколку исклучоци, европските престолнини на акциите на Израел во Газа од 7 октомври е пригушена. Каде е јасната осуда на суровото заострување на 16-годишното затворање на Газа што претставува колективна казна, воено злосторство?, рече вчера заменик-директорот на програмата на ХРВ, Том Портеус. Портеус, исто така, изрази бес поради изјавите на израелските лидери „кои се обидуваат да ја заматат многу важната разлика меѓу цивилите и борците во Газа, иако наредуваат постојано зголемување на бомбардирањето на оваа густо населена територија, претворајќи ги градските блокови и населби во урнатини“. -Каде се јасните и недвосмислени повици Израел да ги почитува меѓународните норми во нападот врз Газа?, праша Портеус. Тој рече дека барањата на меѓународното хуманитарно право за заштита на цивилите треба да важат за сите. Портеус се осврна на руската инвазија на Украина, каде што западните земји ја истакнаа важноста од почитување на правилата на вооружениот конфликт во нивните напори да добијат меѓународна поддршка за Украина и да ја изолираат Русија. -Лицемерието и двојните стандарди на западните земји се флагрантни и очигледни, критикуваше Портеус. Тој нагласи дека ова ризикува да ја поткопа долгогодишната макотрпна работа на хуманитарните групи и групите за човекови права, заедно со некои држави, „за зајакнување и стандардизирање на нормите наменети за заштита на цивилите заглавени во конфликти ширум светот“.

Хјуман Рајтс Воч: Украина и Русија мора да престанат да користат касетна муниција

Ивона Петрова — Thu, 06 Jul 2023 07:14:44 +0000

И руските и украинските вооружени сили користеле касетна муниција со која се убиени украински цивили, соопшти денеска Хјуман рајтс воч. Тоа се случува во време кога САД размислуваат дали да одговорат на барањето на Украина да добие такво оружје. Меѓународната невладина организација за заштита на човековите права Хјуман рајтс воч ги повика и Русија и Украина да престанат да го користат ова оружје и ги повика САД да не ја снабдуваат Украина. Повеќе од 20 земји потпишаа меѓународен договор за забрана на касетна муниција. Станува збор за повеќекратни мали експлозиви спакувани во бомба, ракета или артилериска граната кои се распрснуваат од нивниот носач при лет на голема површина. И Русија и Украина и САД одбија да го потпишат овој договор. Висок функционер на Пентагон минатиот месец изјави дека касетната муниција би била корисна за Украина во одбивањето на руските сили, но нивното доставување до Киев сè уште не е одобрено поради ограничувањата наметнати од американскиот Конгрес и загриженоста од американските сојузници. Украина истрела ракети со касетна муниција во областите под контрола на Русија во и околу источниот украински град Изум, Харковска област, по руската инвазија минатата година, соопшти Хјуман рајтс воч.

Хјуман рајтс воч изрази загриженост поради последиците од војната во Украина за децата без родители

Тале Кристо — Mon, 13 Mar 2023 10:52:57 +0000

Невладината организација „Хјуман рајтс воч“ (ХРВ) соопшти дека е загрижена поради последиците од војната во Украина за украинските сирачиња и нивните врсници сместени во згрижувачки семејства. Организацијата ја повика Украина итно да го реформира својот систем за згрижување. „Војната покажа дека многу деца сместени во центри беа принудени во услови на гранатирање да бараат засолниште во подрумите, без струја и вода, со недели по ред“, пишува оваа невладина организација во извештајот објавен денеска. Според неа, за време на војната десетици украински сиропиталишта се оштетени или уништени, а многу деца се масовно евакуирани или внатре во земјата или во странство, главно во соседна Полска. Организацијата го повикува Киев да вложи напори за подобро „следење и проценка“ на таквите деца со оглед на психолошката траума што многумина од нив ја имаат, и воедно изрази жалење поради недостигот на персонал и ресурси за тоа да биде спроведено. ХРВ ги повика западните сојузници на Киев, главни донатори на системот за социјална грижа во Украина, да ја „поддржат имплементацијата“ на овие цели и да развијат „кохерентна стратегија која обезбедува благосостојба на децата“. Од почетокот на руската инвазија во февруари оваа година, повеќе од 4.500 деца од Украина од локални згрижувачки семејства се префрлени во странство за да добијат згрижување таму. Според официјалните податоци цитирани од ХРВ, пред почетокот на војната во домовите за деца без родители во Украина имало повеќе од 105.000 деца, вклучително и сираци, што е „најголем број во Европа по Русија“.

Хјуман рајтс воч: Човековите права се кршат низ целиот свет

Тале Кристо — Thu, 12 Jan 2023 15:02:34 +0000

Меѓународната невладина организација Хјуман рајтс воч (ХРВ), со седиште во Њујорк, денеска го објави својот Светски извештај за 2023 година, во кој укажа на кршењето на човековите права ширум светот, со посебен акцент на Русија, Украина, Кина, Авганистан, Иран и Етиопија. – Во изминатата година имаше низа кризни ситуации поврзани со човековите права ширум светот, од Украина до Кина до Авганистан, вели в.д. директорката на ХРВ во извештајот, Тирана Хасан. Таа истакна дека по руската инвазија врз Украина, глобалната заедница е задолжена за „ослободување на, како што таа го нарекува „целосниот арсенал“ на системот за човекови права“, а тоа вклучува и истрага на Меѓународниот кривичен суд. – Видовме непосредни одговори од меѓународната заедница да се мобилизира околу клучната поддршка за човековите права, вклучително и воспоставување механизми за меѓународна правда, собирање докази за воени злосторства, рече Хасан. Хасан додаде дека во градовите како Буча и Изјум, има докази дека окупаторските руски војници мачеле, силувале и егзекутирале цивили и нагласува дека Советот за човекови права на Обединетите нации документирал неколку стотици убиства на цивили за кои се верува дека се само дел од вкупниот број. Во извештајот, исто така, се укажува на кршењето на човековите права во Кина, вклучително, како што се тврди, масовното затворање, тортура и принудна работа на околу еден милион муслимани во регионот Синџијанг, кои се подложени на тортура, политичка индоктринација и принудна работа. Според ХРВ, ОН откриле дека прекршувањата во Синџијанг може да претставуваат злосторства против човештвото, повторувајќи ги наодите на повеќе групи за заштита на човекови права. Пекинг ги отфрли обвинувањата на ХРВ. ХРВ укажува и на ситуацијата во Иран, каде протестите предизвикани од смртта на девојката со курдско потекло Махса Амини, откако беше уапсена од полицијата за морал, се претворија во општи антивладини демонстрации и додава дека беа егзекутирани најмалку четворица демонстранти, што, како што велат, требало да предизвика „глобален одговор“. – Новата генерација на демонстранти ширум земјата ги одразува фрустрациите на минатите генерации: луѓе уморни од живеење без основни права и со нив владеат оние кои безобразно ја игнорираат благосостојбата на својот народ, се вели во извештајот. Се истакнува дека иранските власти безмилосно ги задушија протестите со употреба на прекумерна сила, проследени со лажни судења и смртни казни против оние кои се осмелија да ја оспорат власта на владата. Вооружениот конфликт во северна Етиопија доби само мал дел од глобалното внимание, кое е насочено кон Украина, и покрај бројните злосторства извршени од завојуваните страни, се наведува во извештајот на ХРВ. Тие додаваат дека уште во 2020 година, тензиите меѓу федералната влада на Етиопија и регионалната влада на Тиграј, Народноослободителниот фронт на Тиграј (TPLF), ескалираа во отворена војна во регионот Тиграј, при што регионалните сили Амхара и еритрејската армија ги поддржуваа Вооружените сили на Етиопија. Оттогаш, владата го ограничи пристапот до областите погодени од конфликтот за независните истражители и новинари, што ја отежнува истрагата за злоупотребите таму, иако конфликтот се прошири во соседните региони Амхара и Афар. Меѓународната заедница и ОН ги осудија убиствата во Етиопија, широко распространетото сексуално насилство и грабежите, но не направија ништо друго, се вели во извештајот. Кампањата за етничко чистење насочена против населението на Тиграј доведе до масовни смртни случаи и принудно раселување на илјадници луѓе, проценува ХРВ. Ефективната опсада на владата на регионот Тиграј продолжи до 2022 година, не дозволувајќи му на цивилното население пристап до храна, лекови и хуманитарна помош, како и до електрична енергија и средства за комуникација, со што се кршат нивните основни човекови права, се вели во извештајот на ХРВ.

ХРВ со остри критики до ЕК за недоволна заштита на владеењето на правото

Тале Кристо — Wed, 20 Jul 2022 15:07:32 +0000

Една од највлијателните организации за заштита на човековите права „Хјуман Рајтс Воч“ (ХРВ) изнесе сериозни критики кон Европската Комисија за недоволната заштита на владеењето на правото во земјите-членки на Европска Унија, јави дописничката на МИА од Брисел. ЕК неделава ги објави извештаите за владеењето на правото во земјите-членки на ЕУ. Овие релативно нови извештаи, последица на нарушувањето на владеењето на правото во земји како Унгарија и Полска, се нова пракса на Комисијата, и содржат препораки до секоја земја. Препораките се однесуваат на судскиот систем, корупцијата, слободата на медиумите и институционални прашања. Но, ХРВ оценува дека овие извештаи не се доволни за да се заштити владеењето на правото во ЕУ. – И покрај сѐ поголеми докази, вклучително и од Агенцијата за темелни права на ЕУ, за заплашувања и мешање во работата на граѓанското општество, овој извештај не го идентификува граѓанското општество како клучна тема, оценува организација за заштита на човековите права. Најфрапантни, според ХРВ, се случаите на Унгарија и Полска, кои и двете под истрага на ЕК за нарушување на владеењето на правото и човековите права. – Унгарија и Полска ги добија најбројните препораки, но за жал повеќето препораки се општи и не ја содржат потребната специфичност за да се обезбеди ефикасна имплементација, истакнува ХРВ, која потсетува на нападите врз невладините и граѓанските организации во Унгарија, и за која препораката гласи само „да се отстранат пречките, што ги засегаат организациите од граѓанското општество“. Што се однесува до препораките на Европската Комисија до Унгарија за враќање на независноста на судството, Хјуман Рајтс Воч истакнува дека тие се послаби од самиот Хелсиншки Комитет на Унгарија. Притоа, ХРВ изразува загриженост што препораките не содржат временски рокови, нема систем на мониторинг, ниту последици доколку не се применат препораките. ХРВ предупредува дека без одлучност во делот на владеењето на правото во ЕУ, последиците можат да бидат сериозен во однос на репресијата и Европската Комисија треба навремено да ги увиди предупредувањата кога се појавува било каков вид репресија во земјите-членки на ЕУ пред да биде доцна.

Шефот на „Хјуман рајтс воч“ поднесува оставка по речиси три децении

Тале Кристо — Tue, 26 Apr 2022 10:27:37 +0000

Долгогодишниот шеф на невладината организација „Хјуман рајтс воч“, Кенет Рот летово ќе поднесе оставка од функцијата извршен директор. Тој е речиси три децении на чело на организацијата. Од август, функцијата ќе ја извршува неговата сегашна заменичка Тирана Хасан. – Имав огромна привилегија да поминам речиси 30 години градејќи ја организацијата, што стана водечка сила за одбрана на правата на луѓето низ светот, изјави Рот. Тој ја предводеше организацијата кога доби Нобелова награда за мир во 1997 година, за напорите да се забранат противпешадиски нагазни мини. Организацијата се залагаше и за основањето на Меѓународниот кривичен суд за гонење на воени злосторства, злосторства против човештвото и геноцид. Кога Рот стана извршен директор во 1993 година, организацијата имаше околу 60 вработени и седум милиони долари годишен буџет. Сега има над 550 вработени во повеќе од 100 земји и околу сто милиони долари буџет за кампањи против кршење на човекови права. Евреин е, а често е напаѓан поради критикување за кршење права од страна на израелската Влада. Кинеската Влада воведе санкции против Рот и го протера од Хонг Конг. Изминатите години, тој особено се занимаваше со злосторствата за време на војната во Сирија, како и за кинеската репресија на Ујгурите во Ксинџијанг. По терористичките напади во САД на 11 септември 2001 година, организацијата откри употреба на „црни точки“ на кои американски официјални лица испрашуваа и мачеа осомничени за тероризам. Групата вршеше притисок на американската Влада да истражи и кривично да ги гони тие, кои се одговорни.

ХРВ: Насилството врз поддржувачите на Навални „одново не беше исклучок од правилото“

Тале Кристо — Mon, 25 Jan 2021 11:14:03 +0000

Организацијата за човекови права „Хјуман Рајтс Воч“ денеска излезе со критика за насилството што безбедносните сили „одново и одново“ го покажаа против мирните демонстранти, кои бараа ослободување на рускиот опозициски лидер Алексеј Навални, јави ДПА. „23 јануари не беше исклучок“, изјави Дамелија Аитхожина, истражувач на оваа група за човекови права во Русија, два дена откако повеќе од 3.500 лица беа приведени за време на масовните демонстрации низ целата земја, барајќи ослободување на истакнатиот критичар на Кремљ. Само во Москва, наведе ДПА, уапсени беа повеќе од 1.400 лица, на најголемиот досега протест забележан во главниот град. Униформирани безбедносни сили ги тепаа демонстрантите во Москва и Санкт Петербург. „Властите ги знаат своите обврски за почитување на основните човекови права и избираат не само да ги игнорираат, туку и да ги погазат сите нив“, се наведува во соопштението на „Хјуман рајтс воч“. Министрите за надворешни работи на ЕУ денеска ќе го разгледаат одговорот на дејствијата во Русија, при што балтичките држави повикуваат на поостри санкции. Навални беше уапсен веднаш по враќањето во Русија на почетокот на овој месец, откако помина неколку месеци закрепнувајќи во Германија по обидот за атентат со нервниот агенс „Новичок“, додава ДПА.