Хорхе Сампаоли – Kurir.mk

Фламенго по само пет месеци го отпушти Сампаоли

Дарко Андоновски — Fri, 29 Sep 2023 10:08:52 +0000

Бразилскиот прволигаш Фламенго објави синоќа дека ја раскина соработката со аргентинскиот фудбалски стратег Хорхе Сампаоли по неуспехот во финалето на бразилскиот куп против Сао Паоло (0-1, 1-1). -Тренерот Хорхе Сампаоли и неговиот стручен тим веќе нема да го водат црвено – црниот тим, објави Фламенго на социјалните мрежи, посакувајќи му на аргентинскиот стратег „среќа“ во продолжението на кариерата. Сампаоли е отпуштен по само пет месеци откако дојде во Фламенго од редовите на шпанска Севиља, каде, исто така, претходниот ангажман му траеше пет месеци. Сампаоли со Фламенго потпиша договор до крајот на 2024 година, и според локалните медиуми, клубот поради предвремениот раскин на соработката ќе треба да плати обесштетување од 1,8 милиони евра. Медиумите наведуваат дека главен кандидат за наследник на Сампаоли на клупата на клубот од Рио де Жанеиро е поранешниот бразилски селектор Тите.

Хорхе Сампаоли седна на клупата на Фламенго

Бошко Тасиќ — Sat, 15 Apr 2023 17:17:23 +0000

Хорхе Сампаоли кој пред извесно време беше отпуштен од Севиља е новиот тренер на бразилски Фламенго. Аргентинскиот стручњак доаѓа на местото на Португалецот Витор Переира, кој доби отказ по сензационалниот пораз од Маринга со 2-0 во Купот на Бразил. Договорот на Сампаоли со Фламенго е до крајот на 2024 година. Аргентинецот има искуство во бразилската Серија А каде ги водеше Сантос и Атлетико МГ. Викендов започнува новата сезона во Бразил, а првиот натпревар на Фламенго е на домашен терен со Коритиба.

Севиља го отпушти тренерот Сампаоли

Ивана Ефремовски — Mon, 20 Mar 2023 16:18:11 +0000

Раководството на шпанскиот фудбалски прволигаш Севиља донесе одлука да му врачи отказ на тренерот Хорхе Сампаоли, јавија денеска шпанските медиуми.

Весникот „Марка“ наведува дека челниците на Севиља до крајот на денот официјално ќе објават раскин на соработката со аргентинскиот стратег.

Сампаоли седна на клупата на Севиља во октомври лани, а имаше договор до 30 јуни идната година.

Севиља по вчерашниот пораз од Хетафе во рамки на 26 коло во Ла Лига падна на 14 место на табелата со 28 бодови и ќе мора до крајот на сезоната да се бори за опстанок.

Севиља во четвртфиналерто во Лига Европа ќе игра против Манчестер јунајтед. (МИА)

Сампаоли на клупата на Севиља

Ивана Ефремовски — Thu, 06 Oct 2022 16:38:09 +0000

Аргентинецот Хорхе Сампаоли е назначен денеска за нов тренер на шпанскиот фудбалски прволигаш Севиља, ден откако клубот му врачи отказ на Жулен Лопетеги. -Сампаоли потпиша договор до 30 јуни 2024 година и уште вечерва ќе го одржи првиот тренинг со екипата, соопшти Севиља. Сампаоли се враќа на клупата на Севиља на која седеше во текот на сезоната 2016/17, пред да биде назначен за аргентински селектор. Овој 62-годишен аргентински стратег беше без ангажман од минатиот јули кога замина од Олимпик Марсеј. (МИА)

Познато е кој е новиот тренер на Олимпик Марсеј

Магдалена Андонова — Tue, 23 Feb 2021 15:40:30 +0000

Аргентинскиот фудбалски стратег Хорхе Сампаоли е назначен за нов тренер на прволигашот Олимпик Марсеј, јавија денеска француските медиуми. Сампаоли на „Велодром“ доаѓа од редовите на Атлетико Минеиро, предводејќи го бразилскиот прволигаш од март минатата година. Својот последен натпревар на клупата на Атлетико Минеиро, 60-годишниот Сампаоли ќе го има в четврток, во последното првенствено коло против Палмеирас, по што Аргентинецот ќе се пресели во Марсеј како наследник на Андре Вилас-Боаш. Францускиот прволигаш на почетокот на овој месец му врачи отказ на Вилас-Боаш, откако португалскиот тренер на конференција за новинари ги критикуваше спортскиот директор и клупското раководсво незадоволен од нивното ангажирање во текот на јануарскиот трансфер пазар на фудбалери. (МИА)

Аргентинските навивачи сакаат Сампаоли да го напушти селекторското место

Дарко Андоновски — Tue, 10 Jul 2018 06:13:37 +0000

Во анкета на порталот „Оле“ во која учествуваа 100 илјади посетители, 82 проценти се изјаснија дека селекторот на аргентинската фудбалска репрезентација Хорхе Сампаоли, треба да ја напушти функцијата. 58-годишниот стручњак има договор со Аргентинската фудбалска асоцијација (АФА) до летото 2022 година и во случај на отказ федерацијата ќе треба да му исплати обештетување од околу 20 милиони евра. Претходно, во печатот Јужна Америка беше објавена листа на потенцијални наследници на Сампаоли на клупата на „гаучосите“. На таа листа се наоѓаат: Јосеп Гвардиола (Манчестер Сити), Маурицио Покетино (Тотенхем), Диего Симеоне (Атлетико Мадрид), Матијас Алмеида (Гвадалахара), Марсело Гаљардо (Ривер) и Рикардо Гарека (Перу). За потсетување, аргентинскиот национален тим беше елиминиран на СП уште во осминафиналната фаза по поразот од Франција со 4:3.

Осминафиналната фаза се отвора со дерби- еве што кажаа селекторите на Франција и Аргентина пред денешниот меч

Матеја Петровски — Sat, 30 Jun 2018 07:10:31 +0000

Од 16 часот денеска осминафиналната фаза од Светското првенство ја отвораат Франција и Аргентина. Селекторите на двете репрезентации се огласија пред почетокот на овој меч и ги кажаа нивните очекувања. Францускиот селектор, Дидие Дешамп кажа дека потребно е да „неутрализираат“ Лионел Меси. -Тој знае со многу малку потези да направи голема разлика. Поради тоа ќе мора да го запреме, да го неутрализираме. На 127 натпревари за националниот тим има дадено 65 гола. Тешко ќе биде да се чува еден од најдобрите играчи на светот, меѓутоа ние ќе се обидеме. Се надевам дека по натпреварот ќе може да се пофалиме дека сме одиграле добро во одбраната, а секако треба да функционираат беспрекорно и другите линии. Покрај Меси, Аргентина има и други големи ѕвезди и врвни фудбалери и затоа очекувам исклучително тежок натпревар, истакна Дешамп. Селекторот на Аргентина, Хорхе Сампаоли, пак пред натпреварот вели дека неговиот тим ќе биде под огромен психолошки притисок. - Аргентина ќе игра со нож меѓу забите. Знаете какви се очекувањата во земјата и што значи фудбалот за Аргентинците. Сите ја видовте реакцијата по пласманот во осминафинаето кој „висеше“ до последен момент. Не очекува тежок меч, но се зависи од нас самите. Мораме да ја контролираме играта. Ако не го сториме тоа ќе има многу физичка борба, а нам тоа не ни одговара. Франција е тим кој брзо ја движи топката, игра цврст фудбал и затоа не треба да им дозволиме да се „растрчаат“, рече Сампаоли. Овие две репрезентации меѓу себе имаат играно само два пати во историјата на Мундијалите, а во двата наврати во 1930 и 1978 победник била Аргентина. Натпреварот со кој ќе биде отворена елиминациската рунда на СП во Русија почнува во 16 часот, а во вториот меч вечерва од 20 часот играат Уругвај и Португалија.

Во случај на отказ, Сампаоли може да добие 20 милиони евра

Дарко Андоновски — Fri, 22 Jun 2018 08:38:11 +0000

Селекторот на Аргентина, Хорхе Сампаоли ќе добие оштета од 20 милиони евра, во случај да му биде предвреме раскинат договорот. Во текот на денот беше објавено дека играчите на националниот тим по пораз од Хрватска (0:3) на Светското првенство, апелираа до раководството на Федерацијата за смена на селекторот пред последниот натпревар во групата. Договорот на Сампаоли со Аргентинската федерација е потпишан на пет години, со можност да биде прекинат по Американскиот куп-2019 година. Сампаоли на селекторското место во Аргентина дојде во текот на летото на 2017 година, заменувајќи го тогаш Едгардо Бауза кој немаше добри резултати во квалификациите. Под негово водство Аргентинците успеаја да се пласираат на Мундијалот завршувајќи ги на третото место квалификациите во Јужна Америка. Аргентина со Нигерија ќе игра на 26 јуни и се уште е со шанси да обезбеди пласман во следната фаза. Останува да се види дали до тогаш ќе има промена на селекторската позиција.

Аргентинските навивачи фрлија шише и го навредуваа Сампаоли

Дарко Андоновски — Fri, 22 Jun 2018 07:22:37 +0000

Кон селекторот на Аргентина, Хорхе Сампаоли за време и по завршувањето на синоќешниот натпревар со Хрватска, од трибините каде што беа сместени аргентинските навивачи беа искажувани навредливи зборови, а полета и едно шише со вода. Незадоволни од дебаклот на својата репрезентација, навивачите на Аргентина пееја навредливи песни и плукаа во насока на селекторот. Сампаоли подоцна ја презема одговорноста за поразот. По два натпревари Аргентина има само еден бод и е на прагот на елиминација уште по групната фаза на Мундијалот во Русија.сп

Сампаоли: Разочарани сме од резултатот, но Мундијалот сега почнува

Ивона Петрова — Sat, 16 Jun 2018 17:52:18 +0000

Селекторот на Аргентина, Хорхе Сампаоли логично не беше задоволен по нерешениот резултат 1:1 против Исланд на стартот на Светското првенство во Русија. „Гаучосите“ дојдоа со големи надежи во Русија, но по настапот против дебитантот на светските првенства, ги разочараа фановите и специјалистите. - Разочарани сме од резултатот, бидејќи Аргентина излегува во секој натпревар за победа. Противникот беше многу организиран во одбраната, а ние не успеавме да го материјализираме поседот на топката во гол. Но првенството дури сега почнува, треба да си извлечеме лекција и да останеме силни, изјави Чилеанецот по мечот. Тој потоа го прокоментира промашениот пенал на Меси при резултат 1:1. - Пеналите се шанса да дадеш гол, која денес не ја искористивме. Не можам да ја оценам веднаш играта на Меси во овој меч. За него можам да кажам дека секогаш сака да победи, прокоментира Сампаоли.