Хозе Луис Лозано Гарсија – Kurir.mk

Амбасадорот Лозано Гарсија во Собранието ќе ги презентира приоритетите на шпанското претседателство

Тале Кристо — Tue, 11 Jul 2023 05:51:38 +0000

Амбасадорот на Шпанија Хозе Луис Лозано Гарсија денеска пред членовите на Комисијата за европски прашања и на Националниот совет за европски прашања ќе ја презентира Програмата и Приоритетите за работата на шпанското претседателство со Советот на Европската унија за периодот јули-декември 2023 година. Приоритетите на шпанското претседателство со ЕУ меѓу останатото опфаќаат „реиндустријализација на ЕУ“ и обезбедување на нејзината стратешка автономија, напредок во спроведувањето на зелената транзиција и заштитата на животната средина, промоција на поголема социјална и економска правда и зајакнување на европското единство. Еден од приоритетите на шпанското претседавање, кој завршува на 31 декември, ќе биде зајакнување на заложбата за стабилизација, закрепнување и реконструкција во Украина.

Муцунски и шпанскиот амбасадор Гарсија пречекаа студенти од Шпанија и Франција

Магдалена Андонова — Mon, 21 Nov 2022 11:44:35 +0000

Денеска во просториите на Општина Аеродром ги пречекавме студентите од Шпанија и Франција кои се дел од програмата за размена на Универзитетот Американ Колеџ – Скопје. На настанот свое обраќање имаа градоначалникот Тимчо Муцунски и шпанскиот амбасадор Н.Е. Хозе Луис Лозано Гарсија, информираат од општина Аеродром. Градоначалникот Муцунски во рамките на своето обраќање ја престави работата на Општината и ја истакна посетата како одлична можност за промоција на Аеродром. - Многу сум среќен што денеска сте наши гости и што на овој начин можеме одблиску да ви ја претставиме Општина Аеродром и начинот на кој работи нашата администрација. Локалната политика претставува еден од најголемите предизвици затоа што се соочувате со различни прашања и теми кои директно се однесуваат на жителите. Во вакви предизвикувачки времиња за целиот свет, успеваме да дадеме сè од себе, а она за што ми е најмногу драго е што заедно со мојот тим ги реализиравме сите проекти за создавање на подобри услови за младите, спортот и образованието, изјави градоначалникот Муцунски пред студентите Шпанскиот амбасадор, Н.Е. Хозе Луис Лозано Гарсија нагласи дека општините во нашите земји имаат заеднички интереси како што се создавање и одржување здрава и чиста животна средина, дигитализација и други теми со кои се соочуваат општините во сите европски држави. - Ваквите проекти се од огромно значење, особено кога во нив се вклучени млади луѓе, затоа што на тој начин успеваме да ги презентираме нашите култури, традиции и начин на живот. Оваа посета може да се искористи и за создавање нови врски меѓу вашата земја со Шпанија и Франција и поттикнување нови соработки, а вашите тимови можат да работат на проекти со кои ќе аплицираат до фондовите на Европската унија. Сакаме да помогнеме и да соработуваме на повеќе нивоa, порача амбасадорот. Градоначалникот Муцунски и амбасадорот Гарсија на крајот од посетата, заедно со студентите засадија неколку дрвја пред зградата на Општина Аеродром во знак на пријателство, создавање трајни врски и пријателства меѓу Македонија, Шпанија и Франција.

Арсовска се сретна со амбасадорот на Кралството Шпанија – Хозе Луис Лозано Гарсија

Магдалена Андонова — Thu, 10 Feb 2022 14:32:59 +0000

Градоначалничката Арсовска денеска оствари средба со амбасадорот на Кралството Шпанија во Македонија, господин Хозе Луис Лозано Гарсија. Арсовска и Гарсија споделија мислења во однос на тековните и идните активности на Градот Скопје, но и можноста за заедничка соработка. На задоволство на Градот Скопје, заедно со претставниците на амбасадата на Кралството Шпанија во Македонија ќе се отпочне иницијатива за збратимување на Скопје со градови во Шпанија со кои Град Скопје има заеднички интерес и може да остварува заедничка интензивна соработка. Амбасадорот Гарсија го истакна туристичкиот потенцијал кој го има градот Скопје и можноста за нови проекти со помош на Кралството Шпанија, со цел подигнување на туризмот во Скопје.