Хуан Гуаидо – Kurir.mk

Обвинителството на Венецуела издаде налог за апсење на опозицискиот лидер Гуаидо

Тале Кристо — Fri, 06 Oct 2023 06:28:24 +0000

Обвинителството на Венецуела соопшти дека издало налог за апсење на опозицискиот лидер Хуан Гуаидо и дека ќе побара помош од Интерпол во неговото приведување. -Обвинителите беа назначени „да издадат налог за апсење против него и да побараат помош од Интерпол за тој да плати за своите злосторства, рече обвинителот Тарек Вилијам Сааб. Гуаидо кој живее во егзил во САД, беше обвинет за предавство, узурпација на функции, перење пари и здружување со цел да се изврши кривично дело, рече официјалниот претставник. Венецуелскиот обвинител посочи дека „Гуаидо ги користел ресурсите на ПДВСА (јавниот нафтен гигант) за да предизвика загуби близу или поголеми од 19 милијарди долари“. Владата вели дека имала 27 различни истраги за Гуаидо во тек, но ова е првпат да бара негово апсење. Поранешниот претседател на Националното собрание, Гуаидо се самопрогласи за „привремен претседател“ на Венецуела во јануари 2019 година, откако го оспори реизборот на претседателот Николас Мадуро во 2018 година. Тврдењето на Гуаидо доби поддршка од десетици земји, вклучително и САД кои усвоија серија санкции против Каракас, вклучително и ембарго на венецуелската нафта. Кон крајот на минатата година венецуелската опозиција формално ја прекина неговата функција како вршител на должноста претседател.

Венецуела: Се очекуваат разговори меѓу Мадуро и Гуаидо

Тале Кристо — Thu, 05 Aug 2021 12:21:22 +0000

Се очекува разговорите меѓу владата на Венецуела и опозицијата за политичката криза во земјата да започнат на 13 август во Мексико. Дијалогот ќе биде поддржан од меѓународни соработници, вклучувајќи ја и Норвешка, која беше неуспешен посредник во претходната постапка на дијалогот во 2019 година. Како што пренесуваат странските агенции, датумите може да се поместат, а 15 август исто така е во оптек. Имињата на членовите на делегацијата и местото на одржување на настанот се уште не се утврдени. Венецуелскиот претседател Николас Мадуро претходно изјави дека е подготвен да преговара со опозицискиот лидер Хуан Гуаидо. Мадуро рече дека агендата ќе треба да се фокусира на укинување на американските санкции, од кои повеќето беа создадени од поранешниот американски претседател Доналд Трамп во 2019 година во обид да го смени него. Администрацијата на Џо Бајден соопшти дека ги преиспитува санкциите што ги наследиле од Трамп, но се уште не ги ублажила. Вашингтон и натаму го поддржува Гуаидо, кого го признава како легитимен водач на јужноамериканската земја по контроверзните избори на Мадуро во 2018 година.

Приврзаници на Гуаидо ја окупираа Амбасадата на Венецуела во Бразил

Ивана Ефремовски — Wed, 13 Nov 2019 19:36:02 +0000

Група поддржувачи на лидерот на опозицијата во Венецуела, Хуан Гуаидо денеска ја окупираа зградата на Амбасадата на Венецуела во Бразилија, главниот град на Бразил. Неименуван функционер од администрацијата на венецуелскиот претседател Николас Мадуро изјави дека група од околу 20 лица насилно ја нападнале упаднале во Амбасадата. Од друга страна, претставник на Венецуела во Бразил, назначен од Гуаидо изјави дека вработените во амбасадата ја отвориле портата и ги пуштиле приврзаниците на опозициските водачи да влезат. Бразил и повеќе од 50 други земји го признаваат Гуаидо за легитимен претседател на Венецуела.

Гуаидо назначи кабинет во сенка

Ивона Петрова — Thu, 29 Aug 2019 06:53:09 +0000

Лидерот на опозицијата во Венецуела и привремен претседател Хуан Гуаидо изјави дека назначил влада во сенка, што претставува нова фаза во борбата за соборување на претседателот Николас Мадуро. Тој објасни дека пет нови помошници ја подготвуваат транзицијата на владата и новите избори. Гуаидо, кој е претседател на Парламентот, се прогласи за привремен претседател во јануари затоа што, според него, изборите што ги спроведе Николас Мадуро претходната година биле лажирани.На новата функција Гуаидо го поддржаа околу педесет земји, вклучително и САД. Гуаидо го повика популарниот опозициски политичар Леополд Лопез, кој е во домот на шпанскиот амбасадор во Каракас под негова заштита, да ја прифати позицијата генерален координатор на кабинетот во сенка. Опозицискиот политичар и правник Хулио Боргез, кој живее во егзил во Колумбија, се смета за шеф на дипломатијата на Гуаидо. Другите членови на тимот на Гуаидо ќе се занимаваат со економскиот развој, инвестициите и човековите права. МИА

Гуаидо повикува на протести, преговорите во Осло без договор

Ивана Ефремовски — Thu, 30 May 2019 05:54:57 +0000

Венецуелскиот лидер на опозицијата, Хуан Гуаидо, нагласи дека ќе продолжи со протести откако разговорите со официјалните претставници на венецуелската влада во Норвешка завршија синоќа без напредок во решавањето на кризата во Венецуела. На состанокот во Осло, делегатите на опозицијата ги повторија нивните апели до претседателот Николас Мадуро да поднесе оставка и да дозволат преодна влада да одржи претседателски избори. -Во моментов нема договор, така што нашата единствена шанса сега е да продолжиме со улични протести, изјави Гуаидо за Фокс Биизнис Нетворк. -Сакаме да го решиме конфликтот, додаде тој. „Страните во преговорите покажаа подготвеност да напредуваат во потрагата по уставно решение преку преговори вклучувајќи ги политичките, економските и изборните прашања“, соопшти вчера норвешкото Министерство за надворешни работи. „Со цел да се зачува процесот што може да даде резултати, страните се повикуваат да бидат исклучително внимателни со своите коментари и изјави за овој процес“. (МИА)

Одземен имунитетот на Хуан Гуаидо, па сега може и да го апсат

Предраг Кукиќ — Wed, 03 Apr 2019 07:38:56 +0000

Парламентот на Венецуела усвои одлука за укинување на имунитетот на опозицискиот лидер Хуан Гуаидо, со што се овозможува негово апсење. На барање на претседателот на Врховниот суд на Венецуела, Маикело Морено, Парламентот одржа вонредна седница и едногласно му го одзеде имунитетот на Гуаидо, кој е претседател на таа институција. Гуаидо кон крајот на јануари се прогласи за привремен претседател на Венецуела, а Врховниот суд му изрече забрана за напуштање на земјата. Тој ја прекрши таа одлука и во февруари замина во Колумбија. Потоа ги посети Бразил, Парагвај, Аргентина и Еквадор и на 4 март се врати во Венецуела.

Гуаидо: Ако режимот нѐ киднапира, тоа ќе им биде последно

Предраг Кукиќ — Mon, 04 Mar 2019 08:53:43 +0000

Венецуелскиот опозициски лидер Хуан Гуаидо изјави дека денеска ќе се врати во Венецуела и ќе го предводи протестот против претседателот Николас Мадуро, поради што ризикува да биде уапсен од властите во Каракас, бидејќи минатата недела ја прекршил забраната за напуштање на земјата. – Ако режимот се обиде да не киднапира, тоа ќе им биде последна грешка која ја направиле – порача Гуаидо, не откривајќи ја локацијата од која се обраќа. Тој претходно преку Твитер ги повика граѓаните на Венецуела денеска во 11 часот по локално време да излезат на протестите, а неговото враќање во земјата го нарече „историски предизвик“. Гуаидо, исто така, напиша дека граѓаните треба да ги следат неговите официјални соопштенија во кои ќе објави детали за состаноците со поддржувачите. Тој во саботата престојуваше во Еквадор, како дел од турнејата низ Јужна Америка, настојувајќи да го зголеми притисокот врз претседателот на Венецуела, Николас Мадуро да поднесе оставка. Според Гуаидо, Мадуро мора да замине од власт за да може Венецуела да се опорави од политичката и хуманитарната криза, но од друга страна, Мадуро вели дека Гуаидо е дел од заговорот против неговата Влада.

Гуаидо: Свртете му грб на Мадуро – Мадуро: Одиме на вонредни избори

Дарко Андоновски — Sun, 03 Feb 2019 09:45:26 +0000

Венецуелскиот опозициски лидер Хуан Гуаидо ја повика синоќа повторно армијата да му се спротивстави на претседателот Николас Мадуро. Од своја страна, Мадуро предложи одржување вонредни парламентарни избори за Националното собрание чиј исход може Гуаидо да го симне од функцијата претседател на Парламентот. Гуаидо и Мадуро овие пораки ги упатија кон своите приврзаници на истовремени протести на два караја од главниот град на Венецуела, Каракас. Гуаидо порача дека своето опозициско движење нема да го тргне од улица се додека Мадуро не престане да ја „узурпира претседателска функција и не се согласи со организирање нови претседателски избори под надзор на меѓународни набљудувачи“. Гуаидо (35) повика армиски делови да му свртат грб на Мадуро и да „застанат на страната на народот на Венецуела“. – Не само што сакаме да престанете да пукате во демонстрантите туку сакаме да бидете дел од обновата на Венецуела, истакна Гуаидо. Мадуро им се обрати на своите приврзаници нагласувајќи дека тој е единствен претседател на Венецуела и предложи одржување нови избори за Националното собрание каде мнозинство сега има опозицијата. Собирите на приврзаниците на Мадуро и на Гуаидо се одржуваат во момент на растечки несогласувања во редовите на моќната армија на Венецуела, јавија американски медиуми. Претходно венецуелски генерал во воздухопловните сили откажа послушност на Мадуро кого го нарече „диктатор“ и ги повика сонародниците на протести против него.

Европскиот парламент го призна Гуаидо за претседател на Венецуела

Предраг Кукиќ — Thu, 31 Jan 2019 12:44:02 +0000

Европскиот парламент усвои резолуција со која го признава Хуан Гуаидо како легитимен привремен претседател на Венецуела, јави дописничката на МИА од Брисел. Резолуцијата е поднесена од страна на Европската народна партија (ЕПП) и со неа се повикуваат земјите членки на ЕУ и другите институции на Унијата да го сторат истото, сѐ додека не се одржат фер и транспарентни избори во Венецуела. – Од Европа можеме да помогнеме да се смени режимот во Венецуела, оние кои протестираат во Венецуела не се Европејци, но се борат за истите вредности за кои и ние се бориме, рече потпретседателот на ЕПП, Естебан Гонзалес Понс. Европскиот парламент со ова станува првата ЕУ институција која го признава Гуаидо како легитимен претседател. – ЕП сега очекува од другите институции во ЕУ да заземат „едногласна и силна“ позиција по ова прашање, порача претседателот на Европскиот Парламент, Антонио Тајани, по гласањето. Резолуцијата е усвоена со 439 гласа „за“, 104 „против“ и 88 „воздржани“.