Хуманитарен настан – Kurir.mk

Хуманитарен настан „МКЦ е Солидарност!”

Тале Кристо — Sat, 18 Feb 2023 08:52:28 +0000

Младинскиот културен центар (МКЦ) денеска организира хуманитарен настан „МКЦ е Солидарност!” како придонес за настраданите во катастрофалниот земјотрес што ги погоди централниот дел на Турција и северна Сирија. „МКЦ е Солидарност!” ќе почне во 19 часот, а предвидува настап на музичките групи Дориан и Добрила дуо, Џенгиз Ибрахим, Зарина Првасевда, Cruel, Занаду, Vaigna Corporaiton и Калата, аукција на ликовни дела од локални уметници, како и изведба на театарската претстава „Шопинг енд факинг” во продукција на НУ Турски театар Скопје. Влезниците за театарската претстава и музичкката програма се наплаќаат засебно, по симболична цена од 150 денари, со можност публиката да откупи повеќе билети. Собраните средства од аукцијата на ликовните дела ќе бидат исто дел од сумата за донација. Хуманитарната помош ќе се исплати во целост и ќе се донира на сметките отворени за оваа намена преку Црвениот крст на РС Македонија, додека средствата од делата продадени на аукцијата ќе бидат донирани во поставените кутии од Црвениот крст на Град Скопје. Во Џебното кино е закажана бесплатна проекција на серијалот „Турски чај” во режија на Петра Селишкар.

„Ноќ на големите срца“ – Хуманитарен настан на Дац и Александар за помош на семејството Трајковски од Бутел

Ивона Петрова — Fri, 15 Jul 2022 11:42:22 +0000

Александар Митевски и Драган Спасов Дац се приклучуваат кон хуманитарните акции за помош на семејството Трајковски кое ја загуби куќата при пожар. „Ноќ на големите срца“ е хуманитарен настан кој ќе се одржи денеска со почеток од 21 часот на игралиштето на ФК Локомотива – до А1 арената „Борис Трајковски“, на кој ќе настапат Александар Митевски и Дац. -Ќе се дружиме и ќе собираме средства за опожарената куќа на семејството Трајковски од Бутел. Со влезницата од 300 денари ќе направите добро дело, хумана работа. Нека биде тоа "Ноќ на големите срца", дојдете, ќе пееме за сите вас, порачаа Дац и Александар. Влезниците може да се набават на самиот влез или онлајн, на „Купи карти за се“. Собраните средства од хуманитарниот настан ќе се уплатат за изградба на семејната куќа на семејството Трајковски од Општина Бутел, која го изгуби својот дом во пожар.

Забавен и хуманитарен настан за најмладите – „Среќно лето, весел распуст“ во Општина Аеродром

Тале Кристо — Fri, 17 Jun 2022 09:46:48 +0000

Во пресрет на долгоочекуваното лето и на самиот почеток од летниот распуст, Општина Аеродром и „Capitol Mall“ организираат хуманитарен настан, на кој најмладите ќе можат низ забава да го одбележат успешниот крај на учебната година. Настанот ќе се одржи во понеделник (20.06.2022г.), со почеток во 18:45 часот, на плоштадот позади Трговскиот центар „Capitol Mall“, а предвидена е богата музичка и забавна програма во која ќе можат да уживаат дечињата, но и повозрасните. Забавниот настан ќе биде отворен со детско магионичарско шоу на Кристиан Шопов, по што најмладите посетители ќе можат да уживаат во настапот и изведбите на познатите „Поточиња“. Потоа, свој настап ќе има популарниот Таско, како и Некст Тајм, кои ќе го затворат настанот со големо изненадување за сите посетители. За присутните, предвидени се и голем број награди и изненадувања од Фудбалската федерација на Македонија, како и други партнери. Настанот е од хуманитарен карактер, а сите посетители кои се во можност ќе имаат шанса да донираат средства кои потоа ќе бидат наменети за помош на оние на кои им е најпотребно.

Хуманитарен настан за децата со посебни потреби

Ивана Ефремовски — Sat, 19 Jan 2019 09:33:29 +0000

Хуманитарен настан насловен „Хуманоста на дело“ ќе се одржи денеска во ресторанот „Амбрела“ организиран од Специјалните олимпијци на Македонија и Филозофскиот факултет во Скопје. Настанот е дел од серијата настани што ќе се организираат во текот на годинава со цел да се подигне општествената одговорност на институциите и приватниот сектор за децата со посебни потреби. Собраните средства ќе бидат наменети за купување дидактички материјали за работа со децата со посебни потреби во градинките во општина Бутел. За таа цел, на влезот во ресторанот ќе биде поставена кутија за донации, а 20 проценти од целокупниот промет за време на настанот, ќе бидат наменети за купување на дидактичките материјали.

Да растеме заедно” – хуманитарен настан

Ивона Петрова — Mon, 11 Jun 2018 06:05:25 +0000

Хуманитарен настан „Да растеме заедно” ќе се одржи денеска во Скопје во организација на невладината организација „Аутизам ААМК” . Целта, како што велат организаторите, е да се помогне во едукацијата, инклузивноста и различноста на лицата со аутизам во рамките на поширокото општество. Хуманитарниот настан „Да растеме заедно” има за цел да сузбие секаков вид дискриминација во општеството, вклучително и на лицата со аутизам. Основна цивилизациска придобивка на секое општество е секој поединец да биде почитуван и рамноправно вклучен во општествените, социјалните и едукативни процеси. - Настанот се состои од аукција и лотарија. Во аукцијата со свои дела ќе учествуваат 15-тина уметници од Македонија, Велика Британија и Холандија. Лотаријата изобилува со разновидни награди за што се погрижија околу 30-тина индивидуалци и организаци, велат организаторите. Собраните средства од настанот ќе бидат наменети за помош на семејствата со лица со аутизам.