хуманитарни пакети – Kurir.mk

Хуманитарна акција на општина Бутел: „Помагаме кога е најпотребно“

Ивана Ефремовски — Tue, 17 Jan 2023 16:37:12 +0000

Изминува еден од најтешките месеци за граѓаните. По завршување на празниците и истрошените домашни буџети овој и наредниот месец се исклучително тешки за домаќинствата. Дополнително граѓаните се погодени од енергетската криза и зголемувањето на цените на основните домашни намирници, истакна градоначалникот на општина Бутел, Дарко Костовски. „Денес во соработка со општествено одговорни компании поделивме над 200 хуманитарни пакети со основни прехрамбени продукти на најзагрозените социјални семејства на територија на општина Бутел. Хуманоста значи да се помага секогаш и во секој момент кому било и на кој било начин, без оглед на верска, етничка и национална припадност“ - посочи тој.

Стефковски: Поделени 300 хуманитарни пакети во голема хуманитарна акција по повод Курбан Бајрам

Тале Кристо — Fri, 08 Jul 2022 14:15:19 +0000

Поделени 300 хуманитарни пакети во голема хуманитарна акција по повод Курбан Бајрам. По повод муслиманскиот празник Курбан Бајрам, општина Гази Баба во соработка со општествено одговорни луѓе и компании вчера и денес реализира голема хуманитарна акција во рамки на која ќе се поделат 300 хуманитарни пакети со храна на семејства од муслиманска вероисповед. Гази Баба е мултиетничка општина во која сложно живеат македонци, албанци, турци, роми, власи, бошњаци и сите останати. Заедно живееме и се почитуваме. Изминатиот период за време на велигденските празници поделивме 200 хуманитарни оброци, а за време на новогодишните празници поделивме над 500 хуманитарни пакети. Хуманоста е наша одлика и така ќе продолжиме и во иднина, објави на својата Фејсбук страница градоначалникот на општина Гази Баба Бобан Стевковски.

Дистрибуција на хуманитарни пакети во Пунктот за бездомници

Ивона Петрова — Wed, 07 Oct 2020 05:15:43 +0000

Во рамки на одбележувањето на „Светскиот ден на бездомништво“ денеска во Пунктот за бездомници при Црвениот крст во Момин Поток ќе бидат поделени дел од 80 хуманитарни пакети со храна и средства за заштита и дезинфекција од Ковид- 19. Инаку, в петок во Пунктот за бездомници при Црвениот крст во Момин Поток, традиционално ќе се одбележи „Светскиот ден на бездомништвото” според сите препорачани мерки за заштита од Ковид- 19. Од Црвениот крст на град Скопје соопштија дека заради големиот број на корисници кои треба да бидат опслужени, дистрибуцијата ќе се одвива во два дена, денеска и в петок. – За време на пандемијата, покрај редовните мобилни тимови кои даваа поддршка на нашите граѓани, беше формиран и посебен мобилен тим за поддршка на бездомниците. Од 15 март до 01 август, пунктот беше посетен 2.789 пати од страна на бездомните лица, беа реализирани 603 посети на лекар, реализирани беа 42 стручни-советодавни разговори од страна на психолог, поделени се 2.128 парчиња лекови и 7.999 парчиња облека. Во истиот период беа поделени 2.017 заштитни маски за бездомниците и 1.816 пакетчиња влажни марамици, се наведува во соопштението од Црвениот крст. Пунктот за бездомници е поддржан од страна на Град Скопје веќе 12 години и функционира на истата локација во Момин Поток. Секоја среда и петок бездомните лица добиваат хигиенски услуги (бањање, шишање, бричење), чиста облека, можност да се испере старата облека, храна, прегледи од лекар и бесплатни лекови според потребите, психосоцијална поддршка, услуги од социјален работник (вадење на документи и поддршка на обезбедување на услуги од системот на социјална заштита). Преку пунктот, појаснуваат во соопштението од Црвениот крст, корисниците секоја зима добиваат топла облека, обувки, ќебиња, вреќи за спиење, а според потребите се отвара и привременото преноќувалиште.

Дали Љатифа Шиковска од СДСМ подели хуманитарни пакети со поминат рок за Ромите во Маџари?

Тале Кристо — Sat, 25 Apr 2020 16:30:59 +0000

Дали членката на Извршниот одбор на СДСМ, Љатифа Шиковска, односно нејзината невладина организација им поделила хуманитарни пакети на Ромите во Маџари, во близина на Кванташки пазар, со поминат рок? Како што објавува Алфа телевизија се почнало кога граѓаните ги отвориле пакетите и виделе дека внатре има ресани со рок веќе изминат. Синоќа објавиле видеа на социјалните мрежи, на кои се гледа дека ресаните се со стара, помината дата. Информацијата прв ја објави порталот „Ромањус“. Кога граѓаните виделе дека производите биле стари, а не знаеле кој точно ги поделил го обвиниле првиот човек на партијата Роми обединети за Македонија, Ерџан Селими, оти тој често пати претходно донирал. Селими ги демантираше овие информации. Во изјава за Алфа рече дека сепак човекот кој го објавил видеото, рекол дека пакетите со ресана ги поделила Љатифа Шикоска, член на извршниот одборд на СДСМ. Селими кој и самиот живее во населбата Маџари, рече дека често делат помош онаму каде што треба, но сите пакети биле со квалитетни продукти. Алфа лично ја побара и Љатифа Шикоска, но таа не одговараше на нашите телефонски повици. Потоа Шикоска на Фејсбук ги демантираше овие информации. Дали ресаните со поминат рок ќе им донесат гласови на оние кои ги поделиле? Останува отворено. Но, сигурно е дека некој се надева на брзи избори и се обидува да купи гласови.