Игор Додон – Kurir.mk

Триесетдневен притвор за поранешниот претседател на Молдавија

Ивона Петрова — Fri, 27 May 2022 05:42:04 +0000

На поранешниот претседател на Молдавија, Игор Додон, кој е осомничен за корупција и предавство, синоќа му е одреден 30-дневен куќен притвор. Притворот на Додон му е одреден два дена откако неговиот дом беше претресен, а нему му беше одреден 72-часовен притвор. Тој тврди дека е невин и оти случајот против него претставува политички прогон инсцениран од актуелната претседателка Маја Санду. Молдавското обвинителство на 25 мај поведе обвинителен акт против Додон, товарејќи го за кршење на законот по четири точки – за пасивна корупција, финансирање политичка партија на криминална организација, предавство и незаконски стекнато богатство. Додон, проруски политичар, беше претседател на Молдавија од 2016 до 2020 година.

Додон: Обвинението против мене претставува политички прогон

Катерина Бојаџиева — Thu, 26 May 2022 09:51:32 +0000

Поранешниот претседател на Молдавија, Игор Додон, против кој е покренато обвинение по четири точки, изјави дека случајот против него претставува политички прогон исцениран од актуелната претседателка Маја Санду. – Ова судење го сметам како измислен изговор на госпоѓата Санду за политички прогон, за да се ослободи од нејзиниот главен политички противник, рече тој. Додон вели дека пред неколку месеци бил предупредуван да не ја критикува власта во Молдавија и претседателката. – Дополнително, силно ме советуваа да ја напуштам Молдавија. Јас не го сторив тоа, иако можев. Обвиненијата против мене се површни, лажни и неосновани. Немам никакви недвижности, имот, приходи освен оние што и претходно беа познати на јавноста. Обвинувањата за корупција и предавство се неосновани, бидејќи се темелат на незаконски видео-снимки што не можат да се користат како доказ во судот, нагласи поранешниот претседател на Молдавија. Тој вели и дека полицијата му запленила неколку илјади евра, собрани од неговите примања за што поседува и докази. – Освен тоа, парите што ги најдоа кај мајка ми и брат ми се стекнати од продажба на имот и тоа е целосно легално, истакна Додон. Молдавското обвинителство вчера покрена обвинителен акт против Додон, товарејќи го за кршење на законот по четири точки – за пасивна корупција, финансирање политичка партија на криминална организација, предавство и незаконски стекнато богатство.

Во Молдавија ќе има втор круг од претседателските избори

Ивона Петрова — Mon, 02 Nov 2020 06:39:04 +0000

Претседателските избори во Молдавија одат во втор круг на 15 ноември, бидејќи првичните резултати покажуваат дека актуелниот претседател Игор Додон има мала предност пред главната противкандидатка Маја Санду, но не е доволна за победа во првиот круг. Врз основа на преброените 62,3 проценти од гласовите, Додон доби 36,51отсто гласови, објави Централната изборна комисија. Маја Санду, поранешна премиерка, доби 30,63 проценти од гласовите. На изборите во 2016 година, Додон ја победи Маја Санду во вториот круг со помалку од пет проценти.

Уставниот суд на Молдавија го разреши претседателот Игор Додон

Дарко Андоновски — Sun, 09 Jun 2019 09:37:25 +0000

Молдавскиот Уставен суд го разреши денеска претседателот Игор Додон и го назначи поранешниот премиер Павел Филип за привремен претседател. Демократската партија на Молдавија, на Павел Филип вети вчера дека ќе го оспори легитимитетот на новата влада формирана од Социјалистичката партија која има руска поддршка и про-европскиот блок АЦУМ. Додон е поранешен лидер на Социјалистичката партија. Социјалистичката апртија и блокот АЦУМ се договорија вчера да формираат валда и ја именуваа Маја Санда, поранешна министерка за образование за премиерка, за да ја намалат моќта на олигарсите во една од најсиромашните држави во Европа. Со тоа е прекинат повеќемесечниот застој во Парламентот по изборите во февруари. Но, нивниот сојуз предизвика судир со Демократската партија на Молдавија и со Уставниот суд кој претходно соопшти дека Парламентот треба да биде распуштен и дека секоја одлука за формирање валда донесена од пратениците ќе биде неважечка.(МИА)

Суд го суспендираше претседателот на Молдавија

Предраг Кукиќ — Mon, 24 Sep 2018 13:33:29 +0000

Уставниот суд на Молдавија привремено го суспендира претседателот Игор Додон да ја извршува својата функција поради одбивање да именува нови министри. Таа одлука уследи откако Додон, инаку проруски настроен, одби да ги именува министрите за здравство и земјоделство, бидејќи, според него, тие ги немаат „неопходните вештини“. Судот наведува дека претседателот на Собранието или премиерот ќе бидат овластени да потпишат декрет за именување на двајцата министри. Портпаролот на Додан, Максим Лебединчи го обвини судот дека е „инструмент во политичката битка“. Додон е во судир со владејачката коалиција, која фаворизира блиски односи со САД и ЕУ. Тоа е веќе четврти пат Додон да добие суспендирање на правото за извршување функција, бидејќи одбиваше да ги одобри предложени кандидати за министри или потпише закони донесени во Парламентот. (МИА)

Иванов-Додон: Македонија и Молдавија да ја интензивираат економската соработка

Даниел Василев — Tue, 17 Jul 2018 14:25:11 +0000

Македонија и Молдавија се две пријателски земји, меѓу кои постојат потенцијали за соработка, кои за жал не се доволно искористени. Потребно е интензивирање на политичкиот дијалог и на соработката меѓу институциите од двете земји, со цел зголемување на економската соработка и трговската размена, е пораката што ја упатија претседателите на Република Македонија, Ѓорге Иванов и на Република Молдавија, Игор Додон, по нивната денешна средба во Кишињев. - Во овој контекст, особено ме радува што Молдавија ја поддржува нашата иницијатива за склучување на договор за економска соработка, за пренесување на нашите искуства од областа на привлекување на странски инвестиции и ме радува што ова наше искуство може да го споделиме затоа што очигледно е дека на Молдавија и требаат и другите искуства во оваа сфера, рече претседателот Иванов, кој престојува во дводневна официјална посета на Молдавија. Трговската размена меѓу двете земји е симболична, потенцира Иванов, но со затворањето на правната рамка и потпишувањето на договорите кои се неопходни, се надеваме дека ќе изнајдеме можност да ја подигнеме трговската размена, затоа што имаме слично производство, особено во производството на вино и на храна, и можеме заедно да настапуваме на трети пазари, односно да поттикнеме што поголема размена меѓу нашите сродни економии. Според молдавскиот претседател Додон, постои неискористен потенцијал во однос на економската соработка меѓу двете земји, и понуди чекори што, според него, треба да бидат направени во блиска иднина. - Најпрво да биде создадена меѓувладината комисија за економска соработка. Вообичаено тој механизам дава дополнителна мотивација за решавање на различни проблеми во трговската област. Второ потребно е да се потпишат дополнителни договори особено она што го споменав, околу заемната заштита на инвестиции. Молдавија може да биде интересна земја за западни инвеститори, коишто ќе ги продаваат нивните производи, меѓутоа треба да постои сигурност за инвестиции. И трето да се зајакне соработката и дијалогот помеѓу бизнис заедницата, а тоа го спомена и господинот претседател. Се на се се сведува на добра соработка меѓу коморите за трговија и индустрија. Доколку го направиме првиот и вториот чекор мислам дека третиот ќе биде многу поедноставно да се реализира, рече молдавскиот претседател Додон. За време на официјалната посета на Молдавија, претседателот Иванов ќе оствари средба со Премиерот на Република Молдавија, Павел Филип и со претседателот на Парламентот на Република Молдавија, Андриан Канду. МИА