игор матович – Kurir.mk

Падна владата на Словачка поради скандал со вакцините

Дарко Андоновски — Wed, 31 Mar 2021 07:14:39 +0000

Владата на премиерот на Словачка Игор Матович денеска поднесе оставка со цел да ја ублажат политичката криза предизвикана откако се откри дека тајно набавиле вакцини против ковид-19 од рускиот производител. Тоа е првата европска влада која паѓа поради пандемијата. Коалициските партнери на Матович ќе останат како дел од владата, за да се избегне организирање на нови предвремени парламентарни избори. До политичката криза во словачката влада дојде откако на почетокот на март беше обелоденето дека преку таен договор владата договорила да набави 2 милиони дози од руската вакцина „Спутник В“. За овој договор не биле известени коалиционите партнери на Матович, па под нивни притисок тој прифати да даде оставка од премиерското столче. Словачка е сериозно погодена од пандемијата на коронавирусот. Досега се регистрирани над 359 илјади случаи на ковид-19, од кои 9 624 починаа. Во моментов имаа околу 95 илјади активни случаи.

Премиерот на Словачка позитивен на Ковид-19

Магдалена Андонова — Fri, 18 Dec 2020 16:12:53 +0000

Премиерот на Словачка, Игор Матович е позитивен на новиот коронавирус, објавија словачките медиуми. Поради тоа претседателот на Парламентот, Борис Колар, кој вчера имаше средба со Матович ќе биде во петдневна самоизолација, откако ќе биде тестиран на Ковид-19. И словачкиот министер за земјоделство Јан Мицовски неодамна објави дека е позитивен на новиот коронавирус. Додека министерот за заштита на животната средина Јан Будај е во карантин откако бил во контакт со вработени во Министерството, а кои биле инфицирани со Ковид-19. (МИА)

Во Словачка повторно ќе биде воведена вонредна состојба

Ивана Ефремовски — Mon, 28 Sep 2020 20:02:42 +0000

Словачкиот премиер Игор Матович денеска најави дека повторно ќе се воведе вонредна состојба во текот на неделата поради раст на бројот на заразени луѓе со новиот коронавирус. -Ситуацијата е исклучително сериозна и мислам дека треба да донесеме темелни и смели одлуки, истакна Матович по состанкот со Кризниот штаб. Најверојатно Владата в среда ќе прогласи вонредна состојба, вторпат од почетокот на пандемијата со Ковид-19. Се предлага сите спортски, културни и верски настани да бидат забранети од 1 октомври, а венчавките и погребите ќе бидат дозволени само ако присутните докажат дека се негативни на новиот коронавирус. Угостителските објекти да работат до 22 часот, да се почитува физичката дистанца од два метра и да биде задолжително носењето маски. Во Словачка со население од 5,4 милиони луѓе има 9.343 инфидирани лица од почетокот на епидемијата и 44 смртни случаи. На 25 септември беа регистрирани рекордни 552 позитивни случаи на дневно ниво. (МИА)

Словачкиот премиер го преживеа гласањето за недоверба

Дарко Андоновски — Fri, 24 Jul 2020 07:58:04 +0000

Словачкиот премиер Игор Матович го преживеа гласањето за недоверба поради обвинувањата за плагијат на дипломскиот труд. Од 125 присутни пратеници, само 47 гласале за недоверба кон Матович. Резултатот од гласањето бил очекуван, имајќи предвид дека коалицијата која ја предводи словачкиот премиер има мнозинство во Парламентот. Опозицијата побара гласање за недоверба откако во медиумите се појавија наводи дека Матович направил плагијат на поголем дел од дипломскиот труд за влијанието на даночниот систем на претпријатијата на Универзитетот Коменски во Братислава во 1998 година. Словачкиот премиер во врска со таквите обвинувања изјави дека не е запознат оти направил нешто лошо. Тој призна дека не посветил многу внимание на своите студии на Факултетот за менаџмент во текот на последните две години, имајќи предвид дека во тој период веќе имал своја издавачка куќа.