илегални мигранти – Kurir.mk

Во Германија годинава се очекува бројот на илегални мигранти да биде најголем од 2016 година

Тале Кристо — Sun, 22 Oct 2023 18:37:04 +0000

Бројот на илегални мигранти во Германија годинава се очекува да биде најголем од мигрантската криза во 2016 година, јави ДПА, повикувајќи се на официјални податоци. Минатиот месец федералната полиција регистрираше 21.366 лица кои илегално влегле во земјата - двојно повеќе од јули, кога бројката беше 10.714. Месечните бројки се највисоки од февруари 2016 година, кога 25.650 лица илегално ја преминале границата. Во екот на бегалската криза предизвикана од сириската граѓанска војна, речиси 112.000 луѓе илегално влегле во Германија. Годинава се очекува да пристигнат уште повеќе мигранти без документи, со оглед на фактот дека од јануари до септември бројката веќе достигна 92.119.

ЕУ повикува на депортација на илегалните мигранти

Ивана Ефремовски — Wed, 15 Mar 2023 07:06:39 +0000

Европската Унија ги повика земјите-членки да депортираат повеќе мигранти кои илегално ги преминуваат нејзините граници и кои немаат право да останат. -Минатата година стапката на враќање на лицата кои немаа право на престој беше само 21 процент. Неуспехот да се вратат луѓето го успорува нашиот систем и ја поткопува довербата во него, рече комесарката за внатрешни работи на ЕУ Илва Јохансон.

Таа додаде дека минатата година во земјите на ЕУ биле донесени 340.000 решенија за депортација, но дека во само 60 отсто од случаите европските власти се обиделе да стапат во контакт со матичните земји на мигрантите за да ги вратат. -За да го заштитиме правото на барање азил, мораме да покажеме дека на соодветен начин постапуваме со оние кои не ги исполнуваат условите да уживаат меѓународна заштита. Ни треба миграција, но таа мора да се одвива легално и уредно, рече таа. Пристигнувањето на повеќе од милион мигранти во 2015 година, главно оние кои бегаа од војната во Сирија или Ирак, предизвика една од најголемите политички кризи во ЕУ. Јохансон рече дека агенцијата за гранична и крајбрежна стража на ЕУ е „опремена“ да организира летови за депортација и ги повика државите на ЕУ да го искористат тоа. (МИА)

Вучиќ: Приливот на илегални мигранти од Македонија е зголемен за четирипати, а од Бугарија 3,6 пати

Ивана Ефремовски — Thu, 15 Dec 2022 12:53:12 +0000

Српскиот претседател Александар Вучиќ денеска изјави дека од почетокот на годинава приливот на илегални мигранти од територијата на Македонија е зголемен за четири пати, а од територијата на Бугарија за 3,6 пати. Вучиќ рече дека од почетокот на годината властите на Србија спречиле речиси 46.000 илегални влезови од Северна Македонија и дека презеле два вида мерки за спречување на илегалната миграција. „Почнавме да ги укинуваме бесплатните визи за одредени земји од кои дојдоа значителен број мигранти. Досега го завршивме со четири земји и тоа Тунис, Бурунди, Гвинеја-Бисао и Индија. Toa е во согласност со она што од нас го бара ЕУ, за тоа зборуваа Урсула фон дер Лајен и Шарл Мишел“, рече Вучиќ на заедничката прес-конференција со унгарската претседателка Каталин Новак по посетата на српско-унгарската граница кај Сегед. (МИА)

Бројот на илегални мигранти во Словенија повеќе од двојно зголемен од почетокот на годината

Тале Кристо — Wed, 12 Oct 2022 13:53:47 +0000

Словенечката полиција уапсила вкупно 15.590 илегални мигранти во периодот од јануари до септември, што е за 115 отсто повеќе во однос на истиот период минатата година, јавија дел од словенечките медиуми. Полициската статистика покажува дека Авганистанци биле најголемата група илегални мигранти со 2.691 од вкупниот број. По нив следат мигрантите од Индија – 1983, Бурунди – 1821, Бангладеш – 1641 и Пакистан со 1568 лица. Групите мигранти од Ирак, Турција, Иран, Непал и Куба се движат од над 760 до 540 лица. Речиси половина од сите илегални мигранти, или 7.812, се приведени во регионот на Копер. Сепак, бројот на илегални мигранти продолжува нагло да расте во регионите Ново Место и Марибор. Тројно повеќе илегални мигранти изразиле намера да поднесат барање за меѓународна заштита во Словенија. Властите примиле над 6.940 барања за привремена заштита, речиси сите од украински граѓани. Бројот на илегални мигранти вратени во земјата на влез од страна на словенечките власти, падна од 3.211 на 2.106 лица. Најмногу се испратени во Хрватска – 1968, а потоа во Италија – 47 лица.

Мигранти од Пакистан, Иран и Сирија фатени на ГП „Богородица“

Ивана Ефремовски — Fri, 06 May 2022 16:25:59 +0000

На 05.05.2022 во 12:30 часот на Граничен премин Богородица, при контрола во товарно моторно возило со ирански национални ознаки, управувано од С.С. од Иран, царински службеници пронашле шест лица. Станува збор за илегални мигранти (четири од Пакистан, 1 од Иран и 1 од Сирија). Се работи на расчистување на случајот.

Пронајдени 22 илегални мигранти во српско комбе на автопатот Демир Капија – Неготино

Ивана Ефремовски — Wed, 12 Feb 2020 09:53:29 +0000

Полициски службеници синоќа, при контрола пронашле 22 лица-мигранти во товарно моторно возило „рено мастер“, со српски национални ознаки, на автопатот Демир Капија – Неготино. Како што соопшти МВР, настанот се случил во 23.45 часот, а полицијата од слобода го лишила С.З.(43) од Србија, кој управувал со возилото. Мигрантите, од кои двајца од Бангладеш и двајца од Индија и 18 од Пакистан, се предадени на полициски службеници од Полициска станица Неготино за понатамошна постапка. (МИА)

Турските власти приведоа 122 илегални мигранти во реонот на Едрене

Ивона Петрова — Sun, 21 Oct 2018 08:24:50 +0000

Турските власти во реонот на градот Едрене приведоа 122 мигранти, кои планирале илегално да преминат од Турција во Грција или Бугарија. Мигрантите, по потекло од Сирија, Авганистан и Алжир, биле откриени во неколку преноќишта и хостели во Едрене и блискиот град Калеичи. Полициската акција била спроведена по добиените информации дека поголем број илегални мигранти се сместиле во преноќишта и хотели во реонот на Едрене, кој се наоѓа во близина на тромеѓето на границите на Турција, Грција и Бугарија. Во акцијата учествувале и припадници на полициските единици за борба против тероризмот и за спрелување на иелгалната трговија. МИА