Илва Јохансон – Kurir.mk

Јохансон: ЕК ќе предложи корупцијата да се перципира и казнува подеднакво во цела ЕУ

Ивана Ефремовски — Tue, 17 Jan 2023 17:14:40 +0000

Европската комисија наскоро ќе предложи два нацрт-закони поврзани со борбата против корупцијата, најави на дебатата, посветена на корупцијата помеѓу европратениците во Европскиот парламент, еврокомесарката за внатрешни работи Илва Јохансон. -Новото законодавство ќе обезбеди јасна дефиниција за корупцијата и ќе воведе униформни казни во ЕУ за ова кривично дело. Ќе бидеме максимално строги, ќе им ги дадеме на полицијата и на судовите алатките што им се потребни за да се искорени корупцијата, додаде Јохансон. Таа посочи дека вториот предлог-закон ќе биде да се расветли прикриеното странско влијание, сомнителните странски финансирања и странските организации кои суптилно влијаат на јавното мислење и ја поткопуваат демократијата. -Корупцијата е сериозно кривично дело, повеќе од половина од криминалните организации се поврзани со коруптивни активности. Корупцијата купува луѓе, политичари и моќ, наведе Јохансон. Таа истакна дека Обвинителството на ЕУ во првите седум месеци од почетокот на својата активност започна истрага за сомнежи за измама со вкупно пет милијарди евра од европскиот буџет. (МИА)

Јохансон: ЕУ мора да помогне за извоз на стоки од Украина

Катерина Бојаџиева — Wed, 04 May 2022 06:01:23 +0000

Европската унија мора да помогне во извозот на стоки од Украина, што е во застој како резултат на руската агресија, изјави синоќа еврокомесарката за внатрешни работи Илва Јохансон. – Треба да помогнеме во извозот на стоки од Украина, рече Јохансон во дискусијата со европратениците за влијанието на руско-украинската војна врз транспортниот и туристичкиот сектор на ЕУ. – Треба да побараме од транспортниот сектор повторно да и помогне на Украина, додаде таа. Украинските аеродроми не функционираат поради руската агресија, дел од брегот на Црното Море е окупиран од руската армија, а патниот транспорт е многу отежнат. Во тој контекст, Јохансон потсети дека ЕУ ќе биде посредник за склучување на молдавско-украинскиот договор за патен транспорт.

Јохансон: Треба да се подготвиме за пристигнувањето на милиони бегалци од Украина

Ивана Ефремовски — Thu, 03 Mar 2022 08:30:31 +0000

ЕУ мора да се подготви за пристигнување на милиони бегалци од Украина, предупреди денеска еврокомесарката за внатрешни работи Илва Јохансон. Таа прецизираше дека досега дошле околу еден милион луѓе. Според неа, многу малку од нив поднеле барање за азил. Еврокомесарката изрази надеж дека предлогот на Европската комисија за обезбедување привремена заштита на Украинците – право на работа, здравствена заштита и образование – ќе биде прифатен во наредните денови. Според неа, досега ниту една земја од ЕУ не побарала воведување систем за прераспределба на украинските бегалци. -Време е за силни одлуки, очекувам силно сочувство од сите земји на ЕУ за бегалците и европските земји каде главно пристигнуваат. Мораме да си помагаме, земјите не можат сами да се справат, додаде таа пред почетокот на дводневниот состанок на Советот на ЕУ за правда и внатрешни работи. (МИА)

Еврокомесарка предупредува на закани од Авганистан

Ивана Ефремовски — Fri, 08 Oct 2021 20:00:47 +0000

Еврокомесарката за внатрешни работи Илва Јохансон денеска повика посериозно да се сфатат безбедносните закани што можат да произлезат од миграцијата од Авганистан. -Според мене, во однос на терористичката закана што произлегува од Авганистан … нивото на загриженост не е доволно високо. Со сигурност мора да го подигнеме, рече Јохансон. Таа ја даде изјавата во Луксембург по состанокот на Советот за внатрешни работи на ЕУ. Јохансон, исто така, ги повика земјите-членки на ЕУ да ги проверат и регистрираат сите што пристигнуваат од Авганистан. Во исто време, изрази загриженост за „огромниот ризик Ал Каеда повторно да се појави во Авганистан“. (МИА)