институт за македонски јазик – Kurir.mk

Продолжуваат Отворените денови на Институтот за македонски јазик

Ивона Петрова — Tue, 27 Jun 2023 06:09:39 +0000

Институтот за македонски јазик „Крсте Мисирков“ денеска ја продолжува програмата од годинашните Отворени денови кои се одржуваат од 26 до 30 јуни. На денешниот настан, поздравно обраќање ќе имаат директорката на Институтот, проф. д-р Елена Јованова-Грујовска. Отворените денови ќе продолжат утре и задутре со осмата Меѓународна научна конференција „Крсте Мисирков и македонскиот јазик - извор на научни истражувања“.

Почнуваат отворените денови на Институтот за македонски јазик

Ивона Петрова — Mon, 18 Oct 2021 05:22:03 +0000

Манифестацијата Отворени денови на Институтот за македонски јазик јазик „Крсте Мисирков“ почнува денеска. Настанот ќе се одржи во Амфитеатарот на Институтот. Денеска е свеченото отворање, а настанот ќе трае шест дена до 22 октомври. На денешното свечено отворање поздравни обраќања ќе имаат Елена Јованова-Грујовска, директорка на Институтот за македонски јазик „Крсте Мисирков“ – Скопје и Никола Стојановски, прв претседавач на Собранието на независна Македонија во 1991 година.

Отворени денови на Институтот за македонски јазик „Крсте Мисирков“

Ивона Петрова — Mon, 11 Nov 2019 06:35:50 +0000

Институтот за македонски јазик „Крсте Мисирков“ – Скопје од денеска до петок, 15 ноември, ќе ги организира четвртите Отворени денови. Целта е да се отворат вратите на Институтот за сите вљубеници и почитувачи на македонскиот јазик. Манифестацијата ќе биде отворена денеска во 11 часот во амфитеатарот на Институтот, а потоа ќе бидат промовирани четири најнови институтски изданија. Тоа се списанијата „Македонски јазик“ за 2018 година и „Македонистика“ од минатата година, бр.17, и две книги произлезени од докторски дисертации – „Сложенките во македонските црковнословенски текстови“ од проф. д-р Весна Костовска и „Јазикот на првите преводи на Новиот завет на современ македонски јазик напишан со грчко писмо“ од доц. д-р Борче Арсов. Вториот ден е посветен на професорите македонисти: Кирил Конески, Мито Аргировски, Ѓорѓи Ѓоргиевски. Ќе има беседи и за починатите професори Олга Иванова, Лилјана Минова – Ѓуркова, Љупчо Митревски, Аритон Поповски и Убавка Гајдова. Вториот дел од денот е посветен на подмладокот, на иднината на македонистиката. Во рамки на манифестацијата ќе биде претставена наставната дејност на Институтот. Ќе биде отворена спомен-собата на Крсте Мисирков, која се наоѓа на приземјето на Институтот. Сите посетители ќе можат да се запознаат со животот на Мисирков, да погледнат факсимили, оригинални документи поврзани со животот и дејноста на овој наш културен деец. Централно место во рамки на Отворените денови е меѓународната научна конференција „Македонскиот јазик – извор на филолошки и на културолошки истражувања“, што ќе се одржува на 13 и 14 ноември во просториите на Институтот за македонски јазик. За годинашнава тема на конференцијата пројавиле интерес над 60 учесници од осум земји. Покрај учесници од нашата земја, ќе има од Босна и Херцеговина, Полска, Русија, Србија, Турција, Хрватска и САД. Во рамки на конференцијата ќе бидат промовирани повеќе зборници. Петтиот ден од манифестацијата е предвиден за посета на Кратово и разгледување на манастирите од тој крај.

Одбележани 65 години од основањето на Институтот за македонски јазик „Крсте Мисирков“

Ивона Петрова — Mon, 05 Nov 2018 12:55:24 +0000

Институтот за македонски јазик „Крсте Мисирков“ од Скопје од своето основање до денеска неуморно работи на најзначајните национални проекти што резултира со илјадници објавени страници во Речникот на македонскиот јазик, Правописот на македонскиот литературен јазик, Речникот на јазикот на народната поезија, Толковниот речник на македонскиот јазик… Ова денеска го истакна директорката на Институтот за македонски јазик „Крсте Мисирков“ Елена Јованова-Грујовска, на одбележувањето 65 години години од основањето. Потсети на почетоците, развојот и растежот на оваа институција и упати благодарност до основоположниците и до сите пензионирани кадри на Институтот. – Вработените во Институтот за македонски јазик „Крсте Мисирков“ од Скопје пред се се патриоти. Дванаесет години не ни се зголемени платите, со години не ни ги финансираат проектите, но ние упорно објавуваме резултати од проектите и пишуваме книги. Време е за нови проекти, за правење корпус, за фаќање чекор со дигитализацијата и електронското издаваштво. Време е нашите изданија да станат достапни за светот, рече Елена Јованова-Грујовска. Потсети дека последните пет години за нив биле динамични бидејќи продолжило осипувањето на кадарот, имале земјотрес и поплава, откорнати радијатори, руиниран амфитеатар. Институтот сега е реновиран, климатизиран, со нови компјутери, со нов софтвер, а очекуваат ново партнерно уредување и реновирани суви подруми. – Неполна година со нас е младиот научен работник примен по пауза од 19 години. Чекаме вработување за доктор по филолошки науки од областа ономастика и за еден или двајца доктори на науки од областа современ македонски јазик и за уште најмалку 12 асистенти, рече Јованова-Грујовска. Министерот за образование и наука и за култура Арбер Адеми им го честитаа јубилејот на вработените, им посака нови успеси и достигнувања и рече дека остануваат отворени за поддршка на научните и образовните планови на Институтот. Министерот за култура Асаф Адеми нагласи дека Институтот „Крсте Мисирков“ е афирматор и децениски промотор на македонскиот јазик. Потсети уште на два значајни јубилеи, 115 години од излегувањето на книгата „За македонците работи“ на Мисирков и 25 години од смртта на Блаже Конески. Потенцира дека како и досега и во иднина Министерството за култура ќе продолжи со поддршка на проектите на Институтот, со кого имаат успешна соработка. Ректорот на Универзитетот „Св. Кирил и Методиј“ проф. д-р Никола Јанкуловски соопшти дека од своето формирање досега Институтот израснал во реномирана научна и образовна институција што го проучува македонскиот јазик од повеќе аспекти, историски, дијалектен, ономастички и современ. – Во 65-годишното постоење Институтот ја градеше својата улога во општеството и прерасна во најзначајна научна и реномирана образовна институција од областа на македонскиот јазик, со огромен потенцијал за завршување на фундаментални научно-истражувачки проекти од областа на македонистиката, рече Јанкуловски. Претседателот на МАНУ академик Таки Фити е убеден дека најефикасен механизам за одбрана, равој и понатамошна меѓународна афирмација на македонскиот јазик е неговото научно истражување, континуирано. Според него, тоа мора да го прават најкомпетентните институции, вклучувајчи го и Институтот за македонски јазик. Во амфитеатарот на Институтот избрани цитати од Мисирков читаше актерот Васил Зафирчев. Институтот за македонски јазик „Крсте Мисирков“ од Скопје е основан во март 1953 година со задача сестрано да го проучува македонскиот јазик, да ги поттикнува творечките потфати во таа област и да се грижи за усовршување на научните и на стручните работници во него. Одбележувањето на јубилејот е почеток на „Отворените денови на Институтот за македонски јазик“ што ќе траат до 9 ноември 2018 година во чии рамки ќе се одржи меѓународната научна конференција „Јазикот и културата ‒ состојби и перспективи“ и трибината „Македонскиот јазик во медиумскиот простор“. МИА

Институтот за македонски јазик „Крсте Мисирков“ одбележува 65 години дејност

Ивона Петрова — Mon, 05 Nov 2018 07:00:48 +0000

Институтот за македонски јазик „Крсте Мисирков“ од Скопје денеска ќе отпочне со активностите по повод одбележувањето на јубилејот 65 години од основањето. Од почетоците до денеска, со научно – истражувачката, високо – образовната и издавачката дејност Институтот израсна во респектабилна институција од највисок ранг. Централното одбележување ќе започне во амфитеатарот на Институтот со избрани цитати од Мисирков во интерпретација на Васил Зафирчев. Поздравни обраќања ќе имаат ректорот на Универзитетот „Св. Кирил и Методиј“ Никола Јанкуловски, претседателот на МАНУ, академик Таки Фити и долгогодишниот директор на Институтот Трајко Стаматоски. Предвидено е и обраќање на министерот за образование и наука Арбер Адеми, како и присуство на министерот за култура Асаф Адеми. Кон јубилејот ќе се осврне директорката проф. д-р Елена Јованова-Грујовска, а потоа д-р Марија Коробар-Белчева ќе се осврне на 115 години од излегувањето на книгата „За македонцките работи“ и 25 години од смртта на Блаже Конески. За научните достигнувања на вработените во ИМЈ „Крсте Мисирков“ од неговото основање до денес излагање ќе има проф. д-р Гоце Цветановски. Одбележувањето на јубилејот е почеток на „Отворените денови на Институтот за македонски јазик“ што ќе траат до 9 ноември. Во рамки на манифестацијата утре ќе започне меѓународната научна конференција „Јазикот и културата ‒ состојби и перспективи“, а на 9 ноември ќе се одржи трибина насловена „Македонскиот јазик во медиумскиот простор“.

Маџовска: Законот за јазици создава нови поделби и тензии во општеството

Ивона Петрова — Wed, 21 Mar 2018 08:46:57 +0000

Професорката Симона Грујовска Маџовска од Институтот за македонски јазик во своето гостување на емисијата Само вистина на Канал 5 го кажа својот став за законот за јазици донесен минатата недела во Собранието на Република Македонија од пратениците на СДСМ. Според неа овој закон ќе доведе до нови поделби, нетрпение, конфликти и тензична атмосфера помеѓу Македонците и Албанците. Таа упати критики и за процедурата и начинот на кој јазикот откако е изгласан ќе се испраќа во Венецијнската комисија, објаснувајќи дека тој требало да се испрати прво во комисијата, а потоа да се гласа во Собранието. -Неколку месеци се кажуваше дека се испратени некои делови од прелог Законот за јазиците во Венецијанската комисија, но до ден денес такво нешто не е направено. Тоа не беше направено, ништо не е пратено во Венецијанската комисија, каде што се испраќаат законите, кога се уште се подготвуваат, а не откако ќе се донесат. Односно тоа што го слушаме сега откако беше изгласан законот во собранието дека допрва ќе се испраќа во Венецијанската комисија, вели таа. Грујовска Маџовска, потенцираше дека овој закон не може да стапи на сила се додека указот не го потпише претседателот на државата Иванов. -Се до тој момент, законот не смее и не може да стапи на сила беше децидна таа. Целата процедура на донесување на овој закон беше со кршење на Уставот, законите и деловникот на Собранието, додаде таа. Грујовска Маџовска, истакна дека побарала од владата на СДСМ да овозможи да има дебата во Собранието, бидејќи собранието е законодавен дом каде што треба да се дебатира за донесување на секоја законска регулатива. Сепак, не добила одговор од владата туку од министерот за култура. Иако имаше желба нешто да се прифати, видовме дека таква желба нема, бидејќи овој закон насилнички беше изгласан таков каков што е без да се измени ниту еден збор, кажа професорката Маџовска. Во однос на позицијата на македонскиот јазик професорката кажа дека во општините каде што Албанците се мнозинско население, службен јазик е албанскиот и само албанскиот, а македонскиот ако го има е на второ место под албанскиот. -Со овој закон се создава една ситуација каде што Албанците немаат потреба да го познаваат македонскиот јазик. Бидејќи со албанскиот јазик тие буквално во целиот општествен живот, во сите институции, судски постапки, со полиција, со што е таму предвидено каде се албанскиот јазик ќе се употребува. Значи буквално немаат потреба веќе да го користат македонскиот јазик, додаде таа. Грујовска Маџовска, рече дека има ситуации кои според неа се страшни и недозволен, а тоа е што млади Албанци одбиваат да го изучуваат македонскиот јазик. На крај професорката Грујовска Маџовска , објасни дека со овој закон се создава многу лоша атмосфера во општеството, односно бидејќи се создаваат две општества и две паралелни светови.