интерфест – Kurir.mk

Во Битола завршува фестивалот на класична музика „Интерфест“

Ивона Петрова — Wed, 12 Oct 2022 08:59:28 +0000

Во битолскиот Офицерски дом вечерва завршува 31. издание на Интернационалниот фестивал на класична музика „Интерфест“, а на свеченото затворање ќе настапат италијанските уметници Рафаеле Д’Анџело, пијано и Марија Рита Панела, пијано. Целовечерениот концерт на гостите ќе биде придружуван од камерниот оркестар на Битола под диригентство на Владимир Димовски. Годинава на сцените во НУ Центар за култура, НУ Народен театар и Офицерски дом, освен македонски, настапија и уметници од Србија, Австрија, Итaлија, Турција и Германија. Во рамки на „Интерфест Битола 2022“ се одржа поетска вечер со актерот Петар Мирчевски, посветена на македонскиот поет, романописец и есеист Славко Јаневски, како и ликовна изложба со наслов „Пат за Дихово” од српскиот ликовен уметник Миливоје Новаковиќ Кањош.

На „Интерфест“ во Битола поетска вечер посветена на Славко Јаневски

Ивона Петрова — Mon, 10 Oct 2022 05:56:54 +0000

Интернационалниот фестивал на класична музика „Интерфест“ продолжува со поетска вечер и музички рецитал кои ќе бидат изведени во битолскиот Офицерски дом. Публиката во Битола ќе посведочи на избрани дела од големиот опус на македонскиот поет, писател, прозаист Славко Јаневски (1920-2000) кои ќе ги изведе доајенот на македонското глумиште, битолскиот актер Петар Мирчевски. Според програмата, поетската вечер ќе продолжи со музички рецитал на уметникот од Турција, Хисеин Сермет кој на пијано ќе изведе дела од Шуберт и Лист. Во последните два фестивалски денови, утре и во среда навечер, во Офицерски ќе настапат Кристијан Солдан пијанист од Германија, а годинава свеченото отворање им е доверено на членовите на битолскиот камерен оркестар и гостите од Италија, пијанистите Рафаеле Д’Анџело и Марија Рита Панела.

Во Битола почна Интернационалниот фестивал на класична музика „Интерфест“

Ивона Петрова — Tue, 04 Oct 2022 06:00:02 +0000

Со балетските претстави „Валпургиска ноќ“ и „Кармен“ во изведба на уметниците од Националната опера и балет, синоќа во Битола почна 31. издание на Интернационалниот фестивал на класична музика „Интерфест“. Фестивалот за отворен го прогласи градоначалникот на Битола Тони Коњановски, кој рече дека општината секогаш ќе го поддржува културниот настан кој обединува повеќе уметности. -Општина Битола ќе продолжи да го поддржува овој Интернационален фестивал, кој привлекува голем број љубители на класичната музика. Овој фестивал обединува повеќе уметности, балет, театарски претстави и секако концерти на сериозна музика, каде гостуваат познати домашни и светски уметници, посочи Коњановски. Најновото издание на „Интерфест“ изобилува со богата програма и врвни уметници кои доаѓаат од Италија, Германија, Србија и други европски држави, најави уметничкиот директор на фестивалот, Милица Шперовиќ Рибарски. –Конечно од оваа година повторно ќе се вратиме и во велепната концертна сала на Офицерскиот дом. Публиката е со нас и тоа посебно не охрабрува. Така ќе биде секоја вечер, рече меѓудругото Шперовиќ Рибарски. По импресивниот настап на НОБ и изведба на балетските претстави „Кармен“ и „Валпургиска ноќ“, „Интерфест“ продолжува со ликовна изложба „Пат за Дихово“ на авторот Миливоје Новаковиќ Кањош од Србија, а веднаш потоа од 20.30 часот во битолскиот Офицерски дом рецитал на харфа ќе приреди Мерсиха Шукри.

БИТОЛА: Почнува 30. јубилејно издание на Интерфест, годинава во чест на Блаже Конески

Ивона Петрова — Sat, 02 Oct 2021 07:15:51 +0000

Вечер во Битола почнува 30. јубилејно издание на Интернационалниот фестивал на класична музика Интерфест, годинава посветено и во чест на 100-годишнината од раѓањето на македонскиот поет и лингвист Блаже Конеска. Во битолскиот театар, на сцената „Благоја Стефановски-Баге“, Фестивалот ќе го отвори НУ Опера и Балет-Скопје со операта „Палјачи“ од Руџеро Леонкавало во која диригент е Бисера Чадловска, а со хорот и оркестарот на НОБ ќе настапат солистите Зоран Сотиров, Билјана Јосифов, Горан Начевски, Јане Дунимагловски и Драган Ампов. Според фестивалската програма, до 12. октомври во Битола концерти ќе одржат Маурицио Матарезе и Карла Авентаџиато од Италија, Александар Рам и Ана Одинцова од Русија, Михаил Кун и Кристоф Еверс од Германија, а ќе настапат и уметници од Унгарија, Турција, Србија и Северна Македонија. За публиката на јубилејниот Интерфест програмирани се и придружни содржини, ликовна изложба „Боја родена од музиката“ сочувани дела од ликовниот уметник Борислав Траиковски (1917-1996) како и поетска вечер посветена на Блаже Конески.

Концерт на дуото Калиопе на „Интерфест“ во Битола

Ивона Петрова — Mon, 02 Jul 2018 05:45:21 +0000

Калиопе ДУО од Германија вечер ќе одржи концерт во Завод Музеј Битола во рамки на фестивалот „Интерфест“. Дуото е формирано во 2002 година со поетското име на музата на антиката „Калиопе“. Го сочинуваат виолинистот и диригент Арташес Стамболизијан и пијанистката Зара Стамболизијан, кои студирале во Ереван, Ерменија, а потоа во Хановер, Германија каде и денес живеат и работат. На нивниот репертоар се ремек дела на музичкото творештво. Настапувале на фестивали во Германија, Австрија, Ерменија, Франција, Италија, Романија. Имаат снимено два компакт дискови со камерна музика. На концертот во Битола ќе се претстават со музика од Корели, Шуберт, Шуман, Брамс, Свендсен и Барток.