интернет експлорер – Kurir.mk

ПО 27 ГОДИНИ: Мајкрософт од денеска го „згаснува“ Интернет Експлорер

Ивона Петрова — Wed, 15 Jun 2022 06:11:41 +0000

„Мајкрософт“ по 27 години ќе престане да обезбедува техничка поддршка за најновата верзија на пребарувачот „Интернет експлорер 11“, од денеска – 15 јуни. „Експлорер“ првпат се појави 1995 година како дел од „Виндоус 95“. Тоа некогаш беше најкористениот интернет-прелистувач, а врвот го достигна во 2003 година со 95 отсто удел на пазарот. Но, неговата употреба е значително намалена со лансирањето на „Фајрфокс“ (2004), „Гугл хром“ (2008) и зголемената популарност на мобилните оперативни системи како Андроид и иОС кои не поддржуваат „Интернет експлорер“. Во 2016., Мајкрософт престана да го развива „Експлорер“ на сметка на својот нов прелистувач, „Еџ“. Компанијата објави пред повеќе од една година дека прелистувачот ќе биде отстранет од повеќето верзии на „Виндоус 10“ и „11“, објавени од минатата година.

КРАЈ НА ЕДНА ЕРА! Интернет Експлорер заминува во историјата: Мајкрософт утре конечно ќе го повлече својот веб-прелистувач по цели 27 години

Магдалена Андонова — Tue, 14 Jun 2022 16:18:48 +0000

Мајкрософт конечно утре ќе го повлече Интернет Експлорер засекогаш. Технолошкиот гигант постепено се оддалечи од софтверот кој старее 27 години на сцената, почнувајќи одново со новиот прелистувач Edge во 2015 година за да се совпадне со лансирањето на Windows 10. Поддршката за финалната верзија, Интернет Експлорер 11, се одржува, иако повеќето луѓе веќе се префрлиле на друго место. Со прекинување на поддршката, ова значи дека повеќе нема да се воведуваат важни безбедносни ажурирања и поправени грешки. Според Statcounter, само 0,45 отсто од корисниците на интернет сè уште го користат прелистувачот Интернет експлорер. Во блог пост во кој ја објаснува одлуката минатата година, Шон Линдерсеј, програмски менаџер на партнерска група за Microsoft Edge, напиша: „Во текот на минатата година, можеби сте го забележале нашето оддалечување од поддршката за Internet Explorer (IE), како што е најавата за крај на поддршката за IE од онлајн услугите на Microsoft 365. „Денес сме на следната фаза од тоа патување: објавуваме дека иднината на Internet Explorer на Windows 10 е во Microsoft Edge. Не само што Microsoft Edge е побрзо, посигурно и помодерно искуство за прелистување од Internet Explorer, туку е способен да одговори и на една клучна грижа: компатибилност за постари, наследни веб-локации и апликации“. Фирмата веќе го отвори патот за „смртта“ на Интернет Експлорер, завршувајќи ја поддршката за него во веб-апликацијата Microsoft Teams во 2020 година. Линдерсеј додаде: „Microsoft Edge има вграден режим на Интернет Експлорер така што можете да пристапите до тие наследени веб-страници и апликации базирани на Интернет Експлорер директно од Microsoft Edge. - Со оглед на тоа што Microsoft Edge може да ја преземе оваа одговорност а и повеќе, десктоп апликацијата Интернет Експлорер 11 ќе биде повлечена и ќе излезе од поддршка на 15 јуни 2022 година, за одредени верзии на Windows 10.“ Веста дојде како разочарување за многу милениумци кои пораснаа користејќи го веб-прелистувачот Интернет Експлорер. На Твитер, еден корисник напиша: „Не користам IE со децении, но тоа беше прелистувачот што го имав во поголемиот дел од моето детство. Без разлика дали сте го сакале или мразеле Интернет Експлорер, тоа ќе биде крај на една ера.“ Друг додаде: „За повеќето милениумци како мене, Интернет Експлорер беше нашата прва порта и вовед во интернетот“. А еден се пошегува: „Зошто сум емотивен поради исклучувањето на Интернет Експлорер?“ Интернет Експлорер, кој најпрво беше наречен Виндоус интернет Експлорер, првпат беше објавен како дел од додатниот пакет Plus! за Windows 95 во 1995 година. Internet Explorer беше еден од најкористените веб-прелистувачи, достигнувајќи врв од околу 95 проценти во текот на 2002 и 2003 година. Сепак, се бореше пред конкуренцијата, а во мај 2012 година беше објавено дека Chrome на Google го престигна Интернет Експлорер како најкористен прелистувач во светот.

„Интернет експлорер“ заминува во историјата

Ивана Ефремовски — Fri, 21 May 2021 07:05:15 +0000

Американскиот софтверски гигант „Мајкрософт“ денеска соопшти дека на 15 јуни 2021 година ќе го затвори „Интернет експлорер“ (Internet explorer) и ќе се фокусира на „Еџ“ (Edge) за да се обиде да парира на водечката позиција на „Гугл хром“ (Google Chrome). „Интернет експлорер“ е лансиран во 1995 година и доминира на пазарот на пребарувачи повеќе од 10 години, спакуван во „Виндоус“, што клиентите често го инсталираат на новите компјутери. Пред две децении, „Мајкрософт“ беше обвинета поради тој пакет, а американски судија пресуди дека компанијата ги прекршила правилата за конкуренција. „Мајкрософт“ ја обжали пресудата, но повисокиот суд ја потврди, а компанијата продолжи да го инсталира „Интернет експлорерот“ во „Виндоус“. Кон крајот на 2000-те, позицијата на „Интернет експлорер“ беше загрозена од „Гугл хром“, а пребарувачот на „Mајкрософт“ стана предмет на безброј мемови кои ја исмеваа неговата бавност во споредба со конкуренцијата. За да одговори на конкуренцијата, „Мајкрософт“ го претстави пребарувачот „Еџ“ во 2015 година, што ја користи истата технологија како „Гугл хром“.

„Мајкрософт“ предупредува: Не користете го „Интернет експлорер“, опасно е

Ивана Ефремовски — Tue, 12 Feb 2019 06:30:34 +0000

Верувале или не, сѐ уште постојат луѓе што го користат „Интернет експлорер“. Но, „Мајкрософт“ вели дека тоа не баш добра идеја. Всушност, ги советува да престанат да го користат затоа што стана опасен. Како што објаснува Крис Џексон од „Мајкрософт“, низ годините „Интернет експлорер“ од интернет-пребарувач се претворил во обично компатибилно решение кое не ги поддржува новите интернет-стандарди. Токму затоа ги повикува корисниците да „заборават“ на „Интернет експлорер“ и да почнат да користат модерни веб-пребарувачи. Според Џексон, во ред е да се користи „Интернет експлорер“ кога е неопходно, на пример, за одредени решенија на претпријатијата, но дури и тие компании не треба да го користат како стандарден веб-пребарувач. „Мајкрософт“ помогнал да се влоши проблемот со спојување на неговиот сегашен веб-пребарувач „Еџ“ со „Виндоус 10“, ограничувајќи ја неговата способност да се користи на постари верзии на „Виндоус“. Се проценува дека околу 10 отсто од сите корисници на интернет сѐ уште го користат „Интернет експлорер“ како основен интернет-пребарувач. Освен тоа, голем број страници на интернет инсистираат на користење на „Интернет експлорер“ како основен интернет-пребарувач.