интервенции – Kurir.mk

Телефоните во Брзата помош постојано ѕвонат: Од изутрина 30 интервенции, граѓаните да ги почитуваат препораките за заштита од топлото време

Ивона Петрова — Fri, 30 Jul 2021 11:02:53 +0000

Зголемен е бројот на повици во Службата за Итна медицинска помош во Скопје, а екипите од изутрината, досега, интервенираа кај 30 случаи. Граѓаните кои бараат помош не се чувствуваат добро поради топлото време и имаат главоболки, болка во градите, зголемен крвен притисок… Ова за МИА го изјави раководителката на Службата за Итна медицинска помош при Здравствен дом Скопје, Милица Бубало. – Има мозочи удари, сообраќајни несреќи и хроничните состојби се активираат. Хронично болните треба редовно да ја пијат терапијата и да одат на контрола на доктор. Телефоните во Службата за Итна медицинска помош постојано звонат. Здравствени совети граѓаните можат да побараат на линијата 02 15123 на „Ало докторе“ или на матичен доктор и да не ја оптоваруваат линијата 194 со работи кои не се итни, додаде Бубало. Поради високите температури во портокалова фаза од Министерството за здравство потсетија и на општите мерки за заштита на здравјето, односно во текот на овие екстремно топли денови, граѓаните треба да останат повеќе време во затворени простории (пред сé климатизирани), а при неопходен престој на отворен простор во овој период, да се најде можност за почести одмори под сенка. – Да се носи светла и лесна облека, при директна изложеност на Сонце носете заштитни очила и капа, а при сончање да се користи крема со висок заштитен фактор. Да се внесува помало количество храна, претежно овошје и зеленчук, а помалку масна храна. Да се внесуваат големи количества течности, најдобро обична вода за пиење, а да се избегнуваат алкохолните пијалаци. При влегување во возило, потребно е истото тоа одреден период да се проветри. Хронично болните лица редовно да ја земаат препишаната терапија, во консултација со матичните лекари, стои во препораките.

Намален бројот на интервенции на Брза помош кај лица во алкохолизирана состојба и од сообраќајни несреќи

Ивона Петрова — Sun, 23 Aug 2020 08:22:34 +0000

Според статистичките податоци на Службата за итна медицинска помош, во периодот од јануари до јули годинава, значително е намален бројот на интервенции на лица во алкохолизирана состојба и лица повредени во сообраќајни несреќи во споредба со истиот период минатата година. Ова се должи на намалената фреквенција на движење и воведените мерките за спречување на ширење на коронавирусот. Од 1 јануари до 31 јули оваа година се регистрирани интервенции кај 5 деца до 18 години во алкохолизирана состојба, додека во 2019 година биле регистрирани интервенции кај 20 деца. Намален е и бројот на интервенции кај лицата на возраст од 20 до 40 години од 84 на 58 и кај лицата од 40 до 60 години, од 159 на 133. Инаку, само во март, регистрирани се вкупно 43 интервенции кај лица во алкохолизирана состојба. За споредба, во овој месец минатата година имало 75 интервенции или 32 повеќе. Забележано е намалување и на бројот на лица повредени во сообраќајни несреќи. Во март годинава, имало вкупно 87 лица повредени во сообраќајни незгоди, што е за 23 лица помалку споредено со истиот месец лани додека во април, во сообраќајни незгоди биле повредени 60 лица, или за 45 помалку во споредба месец април минатата година.

За три месеци 29 интервенции на гевгелиските пожарникари

Магдалена Андонова — Thu, 13 Aug 2020 12:00:24 +0000

Во вториот квартал од годинава,ТППЕ Гевгелија интервенирала 29 пати во гаснење на пожари на териториите што ги покрива,односно во општините Гевгелија, Богданци и Дојран. Извештајниот период е карактеристичен по тоа што најмногу пожари, поточно дури 21,се случиле на подрачјето на општина Гевгелија додека останатите осум пожари биле локализирани на територијата на општина Богданци. -Од гевгелиските пожари 15 биле на отворен простор, а шест на објекти но со брза интервенција биле локализирани и спречени да направат поголема материјална штета од причинетата која навистина е минимална. Продолжуваме со засилена превентивна контрола во летните месеци на потенцијалните жаришта како што се дивите депонии и стрништата, велат од ТППЕ Гевгелија. Во контролата на теренот, во делот на шумите, вклучени се шумските полицајци и вработените во подружницата на Шумското стопанство во Гевгелија. Последните врнежи од дожд, посочија пожарникарите,придонесоа времено да се намали опасноста од пожари, но останува апелот до граѓаните за внимателно однесување и превентивно делување за заштита од пожари. (МИА)