инвестиција – Kurir.mk

Хјундаи ќе инвестира повеќе од 12 милијарди долари во САД

Катерина Бојаџиева — Thu, 21 Sep 2023 14:00:59 +0000

Јужнокорејскиот производител на автомобили Хјундаи Мотор Груп објави дека ќе инвестира 12,6 милијарди долари во изградба на погони за електрични возила и батерии во САД. Хјундаи ќе потроши 7,6 милијарди долари на фабрика во округот Брајан, Џорџија, која ќе вработи повеќе од 8.500 работници. Компанијата ќе инвестира и пет милијарди долари во фабрика за батерии во округот Бартоу, која ќе вработи околу 3.500 работници. Техничкиот државен универзитет Џорџија и неговиот Технолошки институт потпишаа меморандум за разбирање со Хјундаи, во кој се наведени соработката за истражување и примена на нови технологии, вклучувајќи ја економијата на водород и развојот на работната сила. Хјундаи наведува дека во наредните години ќе создаде економска вредност во Џорџија која ќе се мери во десетици милијарди долари и ќе помогне да се отворат околу 40.000 работни места.

„Alibaba“ ќе инвестира 2 милијарди долари во Турција

Ристе Здравков — Wed, 20 Sep 2023 07:32:33 +0000

Кинескиот интернет гигант „Alibaba Group Holding“ објави дека планира да инвестира 2 милијарди долари во Турција. Веста е откриена по средбата со претседателот Реџеп Таип Ердоган, пишува „Bloomberg“. Шефот на кинеската компанија Мајкл Еванс ја соопшти веста по состанокот во Истанбул, соопшти турската филијала „Trendyol“. Тој истакнува дека компанијата има „доверба во здравите економски основи на Турција“ и веќе има инвестирано 1,4 милијарди долари во земјата преку „Trendyol“, најголемата онлајн продавница во Турција. Еванс изрази поддршка за меѓународните планови за проширување на „Trendyol“ и нагласи дека Турција има потенцијал да стане една од водечките земји за онлајн извоз, се вели во соопштението. Не беа дадени детални информации за инвестицискиот календар и се наведува дека планот е за „идниот период“. „Trendyol“ достигна проценка од 16,5 милијарди долари во 2021-ва година, собирајќи средства од инвеститори, вклучително и „SoftBank Group“, „General Atlantic“, „Qatar Investment Authority“ и суверениот фонд „Abu Dabi ADQ“. Од „Trendyol“ велат дека „Alibaba“ има 76,1% удел во компанијата за е-трговија. Турција започна антимонополска истрага против „Trendyol“ во 2021-ва година. Во јули, највисокиот суд во земјата даде зелено светло на законот за заострување на регулативата на компаниите за е-трговија, нанесувајќи ѝ удар на фирмата. Уставниот суд рече дека законот, кој ги ограничува трошоците за рекламирање на компаниите и користењето на податоците за клиентите доколку нивната продажба ги надмине дадените прагови, е во согласност со уставот. Така, судот го отфрли приговорот на главната опозициска партија. Одлуката има за цел да им помогне на помалите бизниси за е-трговија да се натпреваруваат по брзиот раст на пазарот по пандемијата. Подоцна во јули, турскиот антимонополски одбор го казни „Trendyol“ со 61,3 милиони лири (2,3 милиони долари), велејќи дека користел податоци од трети лица за да му даде неправедна предност на сопствениот малопродажен бизнис. Вкупниот обем на е-трговија во Турција порасна за 109 отсто минатата година на повеќе од 800 милијарди лири, со речиси една петтина од сите пазари извршени преку Интернет, покажаа податоците на Министерството за трговија.

Тик Ток најави инвестиција од милијарда долари во е-трговија

Ристе Здравков — Fri, 16 Jun 2023 09:05:10 +0000

Социјалната мрежа TikTok, во соственост на кинески ByteDance, денес објави дека ќе инвестира милијарда долари во Југоисточна Азија во текот на наредните неколку години во рамките на планираното ширење на бизнисот на полето на интернет трговија. Југоисточна Азија е регион со популација од 630 милиони луѓе, од кои половина се помлади од 30 години. Регионот е еден од најголемите пазари на TikTok по бројот на корисници, со над 325 милиони посетители месечно. Но, платформата допрва треба да ја претвори таа огромна корисничка база во главен извор на приходи од интернет трговија со оглед на жестоката конкуренција како платформата Shopee на сингапурската компанија Sea Limited, Lazadа на кинески Alibabа и Tokopediа во сопственост на индонезиски GoTo. Ќе инвестираме милијарда долари во Индонезија и во Југоисточна Азија во наредните неколку гходини, откри извршниот директор на TikTok, Сноу Зи Чу. Компанијата не објави детали за планираната потрошувачка и наведоа дека ќе инвестираат во стручна обука, огласување и поддршка за малите доставувачи кои покажуваат интерес за нивната платформа за интернет трговија TikTok Shop. TikTok во Југоистчна Азија има 8.000 вработени и 2 милиони мали трговци кои продаваат стока на нивната платформа во Индонезија, која е најголема економија во регионот. Трансакциите во интернет трговијата во Југоисточна Азија минатата година биле под нивото од 100 милијарди долари, а Индинезија е одговорна за над половина од таа сума, покажуваат податоците на консултантската компанија Momentum Works. Вредноста на трансакциите на платформата TikTok лани во тој регион скокна на 4,4 милијарди долари од само 600 милиони долари во 2021 година. На платформата на Shopee изнесувале дури 49 милијарди долари, соопшти консултантската компанија.

ABEE – белгиска компанија инвестира 40 милиони евра во ТИРЗ Кичево

Ристе Здравков — Mon, 22 May 2023 08:17:59 +0000

Со инвестиција од околу 40 милиони евра на „Avesta Battery and Energy Engineering“ ќе се отвори можност за 600 нови вработувања. која одлучи да инвестира околу 40 милиони евра во Северна Македонија. Во Технолошко-индустриската развојна зона во Кичево, белгиската компанија ABEE ќе гради фабрика за производство на електрични батерии за автомобили. ABEE е релативно нова компанија. Формирана е во 2019 година, кога – како што пишува на нивната веб страница, Ношин Омар, поранешен универзитетски професор во Брисел, одлучил да ја напушти академската заедница и целосно да се фокусира на индустријата. На почетокот ABEE била консултантска инженерска фирма со петмина вработени, но уште од создавањето се истражуваат сите аспекти на траењето на батеријата, од производството на ќелии до системите на батериски пакети до последната фаза, рециклирање. Во моментот, претставници од компанијата која што е во подем, се активни учесници во десет научни проекти финансирани од Европската унија. Како локации на АБЕЕ покрај Белгија во околината на Брисел, наведено е дека наскоро ќе бидат и во Македонија. Засега имаат повеќе од 25 проекти во развој, а работат со капацитет од 10 илјади производни единици годишно. Во фокусот се истражувањата и развој во областа на BMS и системи за енергетска електроника, како и нивно масовно производство. Целта е производниот капацитет на компанијата да достигне 70.000 единици годишно. Договорот за инвестицијата ќе се потпише денес во Брисел, а македонската страна на претставува директорот на Дирекцијата на ТИРЗ, Јован Деспотовски. Тој и министерот за економија, Крешник Бектеши, се дел од делегацијата предводена од претседателот Стево Пендаровски. Исто така, денес ќе присуствуваат на бизнис форум во Антверпен, каде што пред белгиските компании ќе бидат претставени можностите за инвестирање во Македонија.

Се очекува Данска да инвестира 5,5 милијарди долари во нови воени бродови

Тале Кристо — Fri, 19 Aug 2022 08:04:46 +0000

Данска се очекува да инвестира 40 милијарди дански круни (5,47 милијарди долари) во нови воени бродови, бидејќи членката на НАТО се обидува да ја зајакне својата поморска безбедност по руската инвазија на Украина, соопшти денеска данското Министерство за одбрана. -Како дел од инвестициите што треба да се направат во следните 20-25 години, започна партнерство со индустријата за поморска безбедност во земјата за развој и изградба на нови воени бродови во Данска, рече данскиот министер за одбрана Мортен Бодсков. -Со рускиот напад во Украина и новата безбедносна ситуација во Европа, поважно е од кога било Данска да може да се одбрани, додаде тој. Данска вети дека постепено ќе ги зголемува трошоците за одбрана на 2 процентни поени од нејзиниот БДП до 2033 година.

„АЛКАЛОИД“ пушти во употреба нова инвестиција вредна 1,3 милиони евра

Ивана Ефремовски — Wed, 29 Jun 2022 11:00:20 +0000

Новиот магацин за фармацевтски суровини и за примарна амбалажа, на чија изведба се работеше околу 15 месеци, е дел од дваесетгодишниот инвестициски план за развој на ПЦ Фармација, кој се реализира со интензивно темпо и во услови на криза. Најновата инвестиција на „Алкалоид АД“ Скопје во магацински простор за фармацевтски суровини и за примарна амбалажа претставува современо и безбедно складишно решение, изведено согласност препораките за добра производствена пракса за магацинско работење, со законските прописи за чување фармацевтски производи и со фармацевтскиот систем за квалитет. Новиот објект се простира на површина од вкупно 1,620 м2 и опфаќа: магацински простор за фармацевтски суровини; подрумски простории опремени со специјални ладилни соби наменети за суровини за кои се неопходни посебни услови за чување, температура и влага; административни простории и технички кат. За потребите на овој објект, изградена е нова пристапна рампа за камиони, а проектирани и изградени се нови внатрешни сообраќајници, целосно приспособени за непречена и за безбедна комуникација на новиот магацин со производствените објекти. Со реализацијата на оваа инвестиција во ПЦ Фармација, целосно е осигурено најсовремено управување со суровините и производите и безбедна логистика на процесите – од прием на фармацевтските суровини до испорака на лековите до веледрогериите и до крајните корисници. Магацинот располага со вкупно 800 палетни места за суровини, опремен е со најсовремен систем за климатизација, ладилни комори, системи за гасење пожар, како и со машини за хоризонтален и за вертикален транспорт. Официјалното примопредавање на оваа инвестиција вредна 1,3 милиони евра беше извршено од страна на Генералниот директор и Претседател на Управниот одбор на „Алкалоид“, Живко Мукаетов и директорот за логистика и магацини, Зоран Костовски во присуство на вработени и членови на управните тела на компанијата. Во складишните капацитети на „Алкалоид АД“ Скопје вработени се вкупно 120 извршители.

Домашна инвестиција на „Еликсир Дистрибуција” во општина Кисела Вода

Ивана Ефремовски — Mon, 14 Mar 2022 10:00:19 +0000

Инвестиција вредна преку 400.000 евра започна со реализација во индустриската зона во општина Кисела Вода. Градоначалникот Орце Ѓорѓиевски денес изврши увид во градежните активности кои започнаа во ноември, преку кои компанијата „Еликсир Дистрибуција” отвора капацитет на околу 1500 квадратни метри. Се работи за добро позната компанија со триесетгодишно искуство, која во моментов има 50-тина вработени. Новите простории во кои ќе биде сместена административна зграда и магацини, ќе овозможат дополнителни 30 вработувања. И покрај тоа што го поседувале имотот во Пинтија, сопствениците, досега изнајмувале простор на други локации и не се одлучиле да инвестираат во сопствен објект. Велат дека и самите се изненадени од брзината со која ја обезбедиле целокупната потребна документација за градење и дека очекуваат изградбата да ја завршат во октомври, што ќе се совпадне со нивниот триесетгодишен јубилеј. -Со големо задоволство денес можам да констатирам дека добро напредува изградбата на оваа домашна инвестиција во општина Кисела Вода која ќе донесе нови вработувања и претставува чекор во напред во локалниот економски равој на овој дел од Скопје. Ваквите инвестиции, за кои сакам да најавам дека ќе ги има во периодот што доаѓа пред нас, значат целосна промена на имиџот на Општина Кисела Вода. Од моја страна, како градоначалник, и говорејќи во име на локалната самоуправа, ги охрабрувам сите компании, домашни и странски, да немаат страв да инвестираат и дека секој оној кој сака да гради и притоа да ги почитува законски предвидените процедури, ќе има целосна поддршка. Воедно, предвидените инвестиции на Општина Кисела Вода во подобрување на инфраструктурата, ќе им овозможат на компаниите подобри услови за работа. На овој начин, заеднички, ќе дадеме значаен влог во унапредувањето на општината, во подобрување на деловната клима, во нејзиниот економски раст и намалување на невработеноста, како една од најголемите болки на нашата држава, изјави градоначалниот Ѓорѓиевски. Инаку, објектот што го гради компанијата „Еликсир Дистрибуција”, ќе биде целосно енергетски ефикасен. На покривот се планира да бидат поставени фотоволтаични ќелии, фасадата ќе биде термоизолациона, а за греење и ладење ќе се користат еколошки воздушни пумпи.

Мицкоски: Нема ништо лошо, ќе се борам до крај да донесеме 150 електрични автобуси, со услов да отворат фабрика со над 500 вработени

Ивана Ефремовски — Thu, 10 Mar 2022 23:10:14 +0000

Град Скопје и градоначалничката Данела Арсовска во својата програма имаат план да се обезбедат 250 еко автобуси. 100 до 150 електрични, стотина на природен компримиран гас, итн. Што е тука лошо ако ние обезбедиме преку транспарентна јавна постапка, 150 електрични автобуси и ако секој од нив заштедува 80 000 тони CO2 и притоа има услов да се отвори фабрика во Македонија со 500 вработени, изјави претседателот на ВМРО-ДПМНЕ, Христијан Мицкоски за „Заспиј ако можеш“ на Алфа Телевизија. Мицкоски истакна дека тука нема ништо лошо бидејќи и државата и граѓаните од ова ќе имаат корист, но власта наместо да го поддржи ова, тие се фрлија со напади. -Во вакви моменти ако некој навистина сака да помогне, навистина тоа би било добро и за државата, навистина треба да седнеме заеднички и да поразговараме и да видиме како може да си помогнеме, затоа што сепак една таква фабрика за производство на електрични автобуси, Македонија е на мапата на производители на такви хајтек-компоненти, би значело стратешки многу за државата и за граѓаните. Наместо да подадат рака и да помогнат, тие излегоа почнаа да ме напаѓаат, потенцира Мицкоски. Тој повикува да се седне и да се сработи ова наместо да се напаѓа. -Јас сум навикнат на тој фолклор, но дајте да седнеме и да сработиме, да ги донесеме луѓето тука да отворат фабрика и од таа фабрика после тоа да може да извезуваме надвор од Македонија. Тие тоа не го направија туку ме нападнаа, истакна Мицкоски

„Глобалниот деловен гигант – групацијата ТРАФИГУРА, мега инвеститор и во Македонија???“

Super Admin — Thu, 13 Jan 2022 09:38:42 +0000

Групацијата Трафигура е една од водечките светски, независни трговски, логистички и производни компании во секторот на „commodities“ или природни суровини и производи. Како мултинационален конгломерат, групацијата има развиена мрежа од свои компании во 48 земји на сите континенти од Земјината топка. Трафигура е и клучен инвеститор во проектната компанија Еуромакс Ресоурцес (регистрирана во Канада и јавно листирана на Берзата во Торонто „TSX") која повеќе години го развива Проектот за современ рударски комплекс на бакар „Иловица-Штука" во југоисточниот регион на нашата држава. Неодамна, Групацијата Трафигура го објави годишниот извештај за финансиската година 2021, кој покажува рекордно високи резултати и одлична подготвеност за уште позасилен иден развој. Вкупниот промет, тргуваниот волумен, приходите и чистиот профит во 2021, се највисоки во нивната историја со што се демонстрира структурна и квалитативна конзистентност на деловните и финансиските показатели. Вкупните приходи се зголемени за 57 проценти во однос на 2020, и изнесуваат 231,3 милијарди долари (што е за цели 16 пати поголем износ од нашиот БДП!), а нето профитот е скоро дуплиран од минатогодишниот, со 3,1 милијарди долари. Како резултат на ваквата впечатлива профитабилност, нивната капитална вредност порасна за 36 проценти или на 10,6 милијарди долари, што ја потврдува стабилноста и снагата на нивниот деловен и финансиски модел подржан со транспарентна финансиска комуникација и извонредно активна програма за заштита на екологијата , социјалните аспекти и успешното управување. Г-дин Џереми Веир, извршен претседател и главен извршен директор на Трафигура, забележува: „Нашите резултати во 2021 повторно поставија нови рекордни нивоа во смисла на трговскиот волумен како и во севкупната профитабилност. Горд сум дека постигнавме и одличен напредок во понатамошното диверзифицирање на нашиот бизнис со што добивме уште поважна улога во глобално подржаниот процес на транзиција кон чиста или ‘зелена’ енергија... Ова беше уште една година на сериозни мерки за закрепнување на глобалната економија од последиците на пандемијата со КОВИД19, каде се соочивме со сета фрагилност на глобалните синџири за снабдување во услови кога побарувачката нагло порасна додека логистиката и снабдувањето мака мачеа да обезбедат барем минимум од потребниот сервис за светската економија . Во вакви комплицирани услови на глобално ниво, Трафигура успеа да задржи континуиран квалитет и сигурност во функционирањето и набавувањето на неопходните суровини, производи и специјализираните услуги за постојано растечкиот број на наши деловни партнери , на сите континенти...“ Групацијата имаше впечатливо успешен старт на новиот сектор за „Обновлива Енергија" со нови инвестиции во обновливи извори и минерални суровини кои ќе бидат апсолутно неопходни во процесот на транзиција кон чиста енергија и продолжува со засилени инвестиции во пристапот кон управувањето со екологијата и социјалните аспекти диверзифицирано во сите нивни дејности. За таа цел воспоставија специјално посветен „ESG Commitee“ (Enviromental, Social, Governance) во рамките на нивниот Одбор на Директори , со кој лично претседава извршниот претседател и главен извршен директор , г-дин Џереми Веир. Овие години, секторот за чиста и обновлива енергија , конечно призна дека револуционерната транзиција мора да се ослони на современото и одржливо рударство , односно обезбедување на доволни количини минерали и метали за да се изградат и функционираат соларните панели, турбините на ветер и моќните батерии за електричните возила и „складирање" на енергијата . Справувањето со овој предизвик, ќе биде клучен елемент за да се избегне еколошката катастрофа за човештвото доколку и понатаму главно се ослонуваме на енергијата од фосилните извори. Напредниот свет сẻ појасно го согледува круцијалното значење на развојот на современото, одржливо рударство со научно-технолошко минимизирање на можните негативни влијанија врз животната средина и еко системот на планетата. Драги пријатели, во изминативе денови сите си испочеститавме Нова Година, Божиќни празници, домашни слави и имендени, со безбројни повторувања на истите фрази, зборови и пораки си посакавме добро здравје, среќа и успеси во животот. Од друга страна пак, бруталната реалност на животот безпоштедно нẻ бомбардира со десператни информации, анализи и статистики за здравствените проблеми со долготрајната пандемија, за економската и енергетска криза, ладните радијатори, загадениот воздух, води и почва, за секојдневното покачување на цените на сẻ и сешто, евидентната сиромаштија, за незапирливото иселување од земјава кон економски развиениот свет... Се научивме ли да живееме така? Се помиривме ли со тоа? Нели ви врие во желудникот безизлезноста. По природа сум непомирлив и верувам дека во секој од нас демне желбата, како предатор да нападне и загрми – за подобро, СЕГА и ВЕДНАШ. Сите сме свесни за потребата од неодложни промени, но тие одат бавно и кога се големи чинат многу. Се повторуваме дека за тоа неопходни се итни инвестиции во нашата држава. Но и со ова сознание дозволуваме инвеститорите, оние големи конгломерати кои се веќе присутни и имаат изработено проекти за да инвестираат кај нас, некој неодговорно се обидува да ги избрка. Во нашиот случај се неколкумина локални "политичари-активисти" што упорно шират омраза, го сатанизираат во јавност инвеститорот и го третираат како опасна "терористичка" организација. Со безкрајните игри и одолговлекувања , неразумно ги тераме да дигнат раце од инвестицијата во овој мега Проект како и од другите потенцијални стратешки проекти во нашата држава кои сосема извесно, за многу краток период би можеле да направат вистински позитивен економски и социјален прогрес! Кој ќе ја понесе одговорноста доколку „успееме" да ја присилиме Групацијата Трафигура да покрене легитимна постапка за заштита на своите права како странски инвеститор , односно да ја активира веќе одамна подготвената меѓународна арбитражна процедура пред „Интернационалниот Центар за Заштита на Инвестициони Спорови " (ICSID) или „ad hoc“ Судот воспоставен во согласност со арбитражните правила на - Комисијата за Меѓународно Трговско Право на Обединетите Нации (UNCITRAL)? Најеминентни меѓународни правни експерти за вакви арбитражни спорови, апсолутно се сигурни дека во овој случај постапката финално ќе резултира позитивно за инвеститорот . Со оглед на планираната долгорочна функционалност на овој Проект, искуствено би се очекувало огромно отштетно финансиско побарување кон нашата држава (веројатно над една милијарда долари!), кое ќе треба сите ние но и нашите поколенија да го отплаќаме. Треба да бидеме рационално свесни дека и самиот чин на евентуално покренување на ваков високо профилен арбитражен спор, гласно ќе одекне во деловните и финансиски кругови во светот и дефинитивно ќе ја „патосира“ репутацијата на нашата земја и ќе ја маркира на светската мапа како непосакувана и тотално несигурна дестинација за големите странски инвестиции! Искрено се надевам дека никогаш нема да дојде до остварување на ова црно сценарио. Сите ние, граѓаните на Македонија, имаме насушна потреба и од позитивни и оптимистички вести за реално посветла и прогресивна иднина... сẻ уште се надеваме конечно да видиме и чуеме за РЕШЕНИЈА, за акција и дела кои сега и веднаш ќе нẻ извлечат од досегашната депресивна фаза на живуркање и преживување. Д-р Живко Груевски

Меѓународната технолошка компанија Softelligence ќе инвестира милион евра во Македонија

Super Admin — Thu, 11 Nov 2021 10:43:18 +0000

Softelligence, технолошка компанија специјализирана за дизајнирање и испорака на комплексни решенија и интегрирани платформи водени од податоци и вештачка интелигенција, денес го најавува отворањето на својата канцеларија во Северна Македонија. Идната генерација пионери на технологијата со глобално седиште во Обединетото Кралство и 2 центри за испорака во Романија, одлучи да инвестира милион евра во Северна Македонија во следните две години преку изградба на Центар за испорака во Скопје. „Фокусот на нашето присуство во Северна Македонија ќе биде да изградиме тим од професионалци кои дизајнираат и имплементираат комплексни софтверски решенија за големи глобални клиенти. Планираме да прераснеме во Хаб за Одличност во Источна Европа за консултантски услуги и дигитална трансформација, конкретно опслужувајќи големи меѓународни компании за финансиски услуги – банки, заемодавачи, лизинг, осигурителни компании и брокери“, вели основачот и извршен директор на Softelligence, Адријан Блидарус. Во неговата срж, Softelligence има цел да го револуционизира начинот на кој компаниите комуницираат со нивните клиенти и да ја подобри нивната оперативна ефикасност. „Создаваме култура водена од податоци преку имплементирање на модерни решенија за архитектура на податоци надополнети со вештачка интелигенција, да им помогне на клиентите да донесат подобри одлуки, да добијат подобро ниво на деловна контрола и успешно да планираат да бидат пред нивната конкуренција“, вели Блидарус. Со инвестицијата ќе се отвора вкупно 100 работни места за ИТ професионалци во наредните две години: развој на софтвер и инженери, аналитичари на податоци, водачи на тимови, архитекти за решение, научници за податоци и други позиции. Компанијата ветува конкурентни плати и одлични услови за работа, но и можност за професионален развој, учење од меѓународни експерти, обука и развој на нивните кариери и проширување на нивните хоризонти. Локалниот тим во Северна Македонија ќе има поддршка од 250 интернационални ИТ експерти и ќе биде вклучен во постоечки и нови глобални проекти, помагање на клиентите да распоредат најсовремени решенија како што се интегрирани платформи, напредна и предвидлива анализа на податоци и вештачка интелигенција. Softelligence има седиште во Лондон, Обединетото Кралство и има два центри за испорака во Букурешт и Крајова, Романија. Компанијата е основана во 2006 и е рангирана меѓу првите 150 најбрзо растечки технолошки компании во Европа од страна на Financial Times. Softelligence има долготрајни партнерства со Microsoft, Instanda, FintechOS, Databricks и други воспоставени провајдери на технологија и платформи. Сегашни клиенти вклучуваат компании-членки на Erste Group, Vienna Insurance Group, TBI Bank, како осигурителните гиганти Beazley и Howden Group.