ирански нуклеарен договор – Kurir.mk

Завршија преговорите за иранскиот нуклеарен договор, се чека одобрување

Катерина Бојаџиева — Mon, 08 Aug 2022 15:44:51 +0000

Завршија преговорите во Виена за обновување на иранскиот нуклеарен договор. Дипломатите од вклучените земји си заминаа со привремен текст за нов договор со што постои надеж дека ќе се спречи Техеран да развива нуклеарно оружје, јави ДПА. – Треба да се каже да или не, изјави неименуван висок претставник на Европската Унија во Виена, додавајќи дека не останало ништо за преговарање и опишувајќи го текстот како „многу добар компромис за сите страни“. Според дипломатот, земјите што се вклучени – Велика Британија, Кина, Франција, Германија, Русија, САД – се очекува да одговорат за неколку недели. Земјите бараа решение за да се надминат разликите околу укинување на санкциите против Иран, а за возврат повторно да се постават рестрикции на нуклеарната програма на земјата. Во 2015 година САД, Франција, Германија, Велика Британија, Русија и Кина постигнаа договор со Иран, со кој Техеран се согласи да го ограничи збогатувањето ураниум под надзор на инспекторите на ОН во замена за укинување на економските санкции, Но, три години подоцна, поранешниот американски претседател Доналд Трамп еднострано ги повлече САД од Договорот, а Иран почна да користи напредни центрифуги и брзо ги зголеми резервите на збогатен ураниум, со што го крши Договорот. Официјален Техеран тврди дека нуклеарната енергија е за мировни цели.

Шефот на МААЕ загрижен за иранскиот нуклеарен договор

Дарко Андоновски — Mon, 10 Jun 2019 10:16:46 +0000

Генералниот директор на Меѓународната агенција за атомска енергија (МААЕ), Јукија Амано изјави дека се загрижувачки зголемените тензии околу иранскиот нуклеарен договор. Тој посебно е загрижен за најавата од Техеран дека е можно Иран веќе да не почитува одредени одредби од договорот. – Договорот од 2015 година им даде на меѓународните инспектори многу подобар пристап за испитување на нуклеарните активности на Исламската Република, изјави генералниот директор на Јукија Амано на состанокот на бордот на МААЕ. – Затоа, се надевам дека може да се најдат начини за намалување на сегашните тензии преку дијалог, рече тој. Тој додаде дека „од суштинско значење е Иран целосно да ги спроведе своите обврски поврзани со нуклеарното оружје”, согласно договорот. Иранскиот министер за надворешни работи Мухамед Џавад Зариф вчера изјави дека Европа не е во позиција да го критикува Техеран за воените капацитети и ги повика европските лидери да ги нормализираат трговските врски со Исламската Република, и покрај американските санкции или ќе се соочат со последиците. Претседателот Доналд Трамп ги повлече САД од нуклеарниот договор со Иран, којшто светските сили потпишаа во 2015 година, и повторно воведе сеопфатни санкции. Франција, Велика Британија и Германија ја споделуваат американската загриженост за развојот на балистичките проектили и активностите во регионот, но застанаа во одбрана на Договорот, како најдобар начин за ограничување на иранската програма за збогатување ураниум, што претставува потенцијален пат кон развој на нуклеарно оружје. – Европејците и другите потписници на нуклеарниот договор би требало да ги нормализираат економските врски со Иран…Ќе престанеме да ги исполнуваме обврските или ќе преземеме акции соодветни на нивните мерки, потенцираше Зариф.

САД побараа земјите да го прекинат увозот на иранска нафта до 4 ноември

Даниел Василев — Wed, 27 Jun 2018 10:21:21 +0000

САД побараа од сите земји да го прекинат увозот на иранска нафта до 4 ноември, доколку сакаат да ги избегнат американските санкции воведени по повлекувањето на САД од меѓународниот договор со Иран за нуклеарната програма, изјави висок официјален претставник на САД.

- Тоа е еден од нашите главни принципи за национална безбедност. Нема да одам до таму да кажам дека дефинитивно ќе има нулта исклучоци, но нашиот став е не одобруваме исклучоци, вели претставникот на Стејт департментот, кој побарал анонимност, јавија западни медиуми.

Запрашан дали сите земји треба целосно да престанат да увезуваат нафта од Иран до 4 ноември, тој одговори потврдно. Американскиот претседател Доналд Трамп на 8 мај објави дека САД се повлекуваат од меѓународниот нуклеарен договор со Иран од 2015 година. МИА

Ле Дријан: Париз не се согласува со Вашингтон за Иран

Даниел Василев — Wed, 23 May 2018 08:26:25 +0000

Францускиот министер за надворешни работи Жан-Ив ле Дријан изјави денеска дека не се согласува со одлуката на САД да излезат од нуклеарниот договор со Иран и предупреди дека нивниот метод за воведување дополнителни санкции ќе ја зајакне конзеративната струја во таа земја. - Не се согласуваме со методот, затоа што оваа група санкции кои ќе се воведат на Иран, нема да овозможат дијалог, туку напротив ќе ги зајакне конзервативците и ќе го ослабнат претседателот Хасан Рохани, рече Ле Дријан. Тој оцени дека со таквиот став се ризикува да се загрози регионот уште повеќе. Ле Дријан рече дека Париз ќе продолжи со применување на договорот со Иран иако се согласува со Вашингтон дека треба да се сузбијат иранските балистички активности и неговите регионални хегемонијални амбиции. МИА