Ирина Верешчук – Kurir.mk

Верешчук ги повикa Русите да не посвојуваат деца „украдени“ од Украина

Тале Кристо — Wed, 29 Mar 2023 06:59:47 +0000

Украинската вицепремиерка Ирина Верешчук ги повика Русите да не посвојуваат деца за кои рече дека биле „украдени“ во Украина за време на војната и депортирани во Русија. Верешчук на својот канал на Телеграм изјави дека сирачињата биле „украдени во Украина“ и наводно биле дадени на посвојување во Русија. Таа додаде дека „силно им препорачува на руските граѓани да не посвојуваат украински сираци кои нелегално биле однесени од привремено окупираната територија на Украина“. - „Уште еднаш ги потсетувам сите руски таканаречени „посвоители“ и „старатели“: порано или подоцна ќе мора да одговарате, напиша Верешчук, која е задолжена за социјални прашања. Според украинското Министерство за интеграција на окупираните територии, 19.514 украински деца во моментов се сметаат за незаконски депортирани. Меѓународниот кривичен суд (МКС) кон средината на месецов издаде налог за апсење на рускиот претседател Владимир Путин и на рускиот омбудсман за правата на децата Марија Лвова Белова, обвинувајќи ги за наводно незаконско депортирање на деца од Украина во Русија.

Украина најави планови за проширување на евакуацијата на цивили од Харков, Запорожје и Миколаев

Ивана Ефремовски — Fri, 26 Aug 2022 15:54:06 +0000

Украинската вицепремиерка Ирина Верешчук изјави дека ќе има задолжителна евакуација на цивили од делови на Харков, Запорожје и Миколаев. Вицепремиерката на националната телевизија ги најави плановите за проширување на задолжителната евакуација за цивилите кои живеат на првите линии на војната. – Приоритет ќе биде евакуацијата на жените со деца и старите лица. Не зборувам за цели региони, но некои делови ќе бараат задолжителна евакуација и се подготвуваме за тоа. Жителите не треба да се спротивставуваат на евакуацијата бидејќи се соочуваат со закана од руска окупација. Ако останат таму ќе настрадаат … Посебно децата. Јас многу добро знам што може да направи непријателот за да ги натера луѓето да соработуваат. Затоа ги повикувам луѓето да се евакуираат и да не се надеваат на милоста на непријателот и дека непријателот ќе го следи меѓународното хуманитарно право, изјави вицепремиерката на Украина. Украинската влада во јули започна задолжителна кампања за евакуација на луѓето во источниот регион Доњецк, која почна да ја спроведува овој месец. Окрузите и градовите на индустрискиот исток контролирани од Украина се под постојано гранатирање од руски и проруски сили. (МИА)

Верешчук: Денешните експлозии се потсетник на кого му припаѓа Крим

Тале Кристо — Tue, 09 Aug 2022 17:50:24 +0000

Заменичката на украинскиот премиер, Ирина Верешчук денеска алудираше дека експлозиите во близина на руската воена база на Крим се предизвикани од напад на украинската армија. – Денешните експлозии во Новофедеривка се уште еден потсетник на тоа на кого му припаѓа Крим. И припаѓа на Украина, напиша Верепчук на Телеграм. На социјалните мрежи претходно беше објавено дека неколку силни експлозии се слушнале од правецот на руската воена база во Новофедоривка, лоцирана во западниот дел од анектираниот украински полуостров Крим. Селото Новофедоривка е на околу 200 километри од бојното поле. Според очевидците се слушнале најмалку 12 експлозии со различен интензитет. Руското Министерство за одбрана соопшти дека на аеродромот Саки експлодирала авионска муниција, но оти сè уште не е утврдена причината.

Верешчук: Киев подготвува контранапад на Херсон, луѓето да се евакуираат

Ивона Петрова — Mon, 11 Jul 2022 05:36:09 +0000

Украинската вицепремиерка Ирина Верешчук синоќа ги повика цивилите во областа Херсон на југот на Украина, која е под контрола на Русија, итно да се евакуираат бидејќи украинските вооружени сили подготвуваат контранапад. – Јасно е дека ќе има борби и гранатирање. Затоа ги повикуваме луѓето веднаш да се евакуираат, објави Верешчук на националната телевизија и нагласи дека не може точно да каже кога ќе се случи украинската контраофанзива. Таа предупреди дека постојат сигурни сознанија дека жените и децата не треба да бидат во Херсон за да не се користат „како жив штит“. Властите во Херсон, назначени од Русија, велат дека сакаат референдум за отцепување, но допрва треба да одредат датум, додека Кремљ вели дека иднината на регионот треба да ја решаваат неговите жители. Украина изгуби контрола над поголемиот дел од црноморскиот регион Херсон, вклучувајќи го и истоимениот главен град, во првите недели по почетокот на руската офанзива на 24 февруари.

Верешчук: Евакуирани се 50 лица од Азовстал

Ивана Ефремовски — Fri, 06 May 2022 19:50:11 +0000

Украинската вицепремиерка Ирина Верешчук денеска изјави дека 50 жени, деца и постари лица се евакуирани од фабриката за челик Азовстал во Мариупол. Таа истовремено ја обвини Русија дека постојано го крши локалниот прекин на огнот и додаде дека евакуацијата е исклучително бавна поради тоа. Во размената со Русија вратени се 41 затвореник. – Русија предаде 41 затвореник, меѓу кои 28 војници во размената на затвореници со Украина, изјави денеска вицепремиерката Верешчук. Таа на Телеграм напиша дека и е „особено драго што меѓу оние кои се вратени во Украина е и високиот претставник на Украинската православна црква“. (МИА)

Украинската вицепремиерка бара итна евакуација на цивилите и ранетите војници од Азовстал

Тале Кристо — Thu, 21 Apr 2022 09:01:28 +0000

Украинската вицепремиерка Ирина Верешчук побара Русија да дозволи итен хуманитарен коридор за евакуација на цивилите кои се засолнети во фабриката за челик во Мариупол. Како што пренесе Би-Би-Си, Верешчук ова го изјави откако рускиот претседател Владимир Путин ги откажа плановите за упад во фабриката Азовстал. – Таму има околу 1.000 цивили и 500 ранети војници. Сите тие треба да бидат извлечени од Азовстал денеска, напиша Верешчук на социјалните мрежи. Командант на морнарицата во фабриката вчера испратил порака до Би-Би-Си дека повредените војници заробени таму „гнијат“, без лекови и други потребни материјали. Тој повика неговите луѓе да бидат евакуирани во трета земја.

Верешчук: Трет ден без хуманитарни коридори во Украина

Катерина Бојаџиева — Tue, 19 Apr 2022 07:16:56 +0000

Вицепремиерката на Украина, Ирина Верешчук на својот канал на Телеграм објави дека денеска, трет ден по ред, повторно нема да се воспостават хуманитарни коридори. „За жал, денеска, 19 април, нема хуманитарни коридори. Продолжува интензивното гранатирање во Донбас“, објави таа. Верешчук посочи дека според информации од Мариупол, Русите одбиваат да обезбедат коридор за цивили во правец на Бердјанск. – Продолжуваме со тешки преговори за отворање на хуманитарни коридори во регионите Херсон и Харков, прецизираше верешчук.

Верешчук: Втор ден по ред нема хуманитарни коридори за украинските цивили

Тале Кристо — Mon, 18 Apr 2022 13:04:41 +0000

Втор ден по ред нема да има евакуација на украинските цивили од областите погодени од војна, бидејќи украинските и руските власти не успеаја да се договорат за хуманитарни коридори, изјави украинската вицепремиерка Ирина Верешчук, а јави Би-би-си. „Поради безбедносни причини беше одлучено денеска да не се отвораат хуманитарни коридори“, напиша Верешчук на апликацијата Телеграм. Таа ги обвини руските сили за блокирање и гранатирање на патиштата за бегство. „Со кршење на меѓународното хуманитарно право, руските окупатори не престанаа да ги блокираат и гранатираат хуманитарните рути“, додаде таа.

Верешчук: Девет хуманитарни коридори договорени за денеска

Катерина Бојаџиева — Thu, 14 Apr 2022 08:20:51 +0000

Украинската вицепремиерка Ирина Верешчук на Телеграм објави дека за денеска се договорени девет хуманитарни коридори за евакуација на цивили од украински области што се под руски напади. Верешчук потсети дека вчера немаше активни коридори, делумно и поради тоа што, како што пишува таа, „окупаторите не можат да ги контролират своите луѓе на теренот“.

Верешчук: Постои опасност од експлозија на муниција во Чернобил

Катерина Бојаџиева — Wed, 30 Mar 2022 08:10:29 +0000

Украинските вооружени сили соопштија дека постои опасност од експлозија на муниција во нуклеарната централа во Чернобил и дека руските сили кои ја окупираа електраната мора да се повлечат од таа област, изјави денеска украинската вицепремиерка Ирина Верешчук. Таа наведе и дека Украина во вчерашните разговори побарала од Русија да дозволи воспоставување на 97 хуманитарни коридори до најтешко погодените градови и села во Украина. –Бараме Советот за безбедност на ОН веднаш да преземе мерки за демилитаризација на ексклузивната зона во Чернобил и да воведе специјална мисија на ОН за елиминирање на ризикот од повторување на нуклеарна катастрофа, истакна Верешчук.