исмаил Јахоски – Kurir.mk

Пуцко Петрол земал тендери од над 3 милиони евра

Катерина Бојаџиева — Wed, 03 Feb 2021 15:38:27 +0000

Вкупно 19 нови тендери добила нафтената компанија „Пуцко Петрол“ на Асмир Јахоски син на пратеникот од ДУИ, Исмаил Јахоски за набавка на нафта за греење, масло за горење екстра лесно, гориво за моторни возила, набавка на еуродизел за службени возила, масло за греење, како и дизел гориво за нафтени деривати. Последниот тендер кој што го добива Пуцко Петрол е за набавка на дизел гориво и нафтени деривати од Македонски железници Транспорт АД Скопје и изнесува 169.880.000 денари, односно 200.458.400 денари или 3.259.486 евра. Вкупната вредност на овие 19 тендери изнесува 3.933.475 евра без пресметан ДДВ според податоците од Бирото за јавни набавки. Според документацијата „Пуцко Петрол“ се јавува како единствен понудувач, што отвора сериозен сомнеж да договор направен во четири очи. Но, ниту овој договор ниту пак претходните договори не беа предмет на интерес за отворање на истрага од страна на Државната комисија за спречување на корупција дали постои судир на интерес за државните тендери кои ги добива фирмата на Јахоски. Фирмата Пуцко Петрол ги снабдила со нафта и нафтени деривати и ЈЗУ Психијатриска Болница Скопје, ЈУ Специјален завод Демир Капија, Фонд за здравствено осигурување, ЈЗУ Институт за белодробни заболувања кај децата Козле Скопје, Биро за јавни набавки, неколку средни и основни училишта, како и градинки. За потсетување, во 2020 година Пуцко Петрол добила 300 тендери во вредност од 29.595.604 евра, додека 2019 година компанијата склучила 300 тендери, додека пак во 2017 и 2018 година склучил договор за 395 тендери вредни над 34 милиони евра.

Се огласи пратеникот на ДУИ за кој се пишуваше дека ја напуштил пратеничката група

Ивана Ефремовски — Tue, 08 Sep 2020 15:41:04 +0000

Пратеникот од ДУИ, Исмаил Јахоски, попладнево преку писмено соопштение негира дека ја напуштил пратеничката група на ДУИ и додава дека на интернет страницата на Собранието е направена техничка грешка. „Дозволете да ве информирам дека јас, Исмаил Јахоски, избран како пратеник во Собранието на Република Македонија од листата на ДУИ, во ниту еден момент не сум напуштил парламентарната група, ниту, пак суштински се оддалечил од изборната политичка агенда на ДУИ. Фактот што на веб-страницата на Собранието сум ставен како независен пратеник претставува техничка грешка, која соодветно ќе биде исправена во најскора прилика“, порача тој.

Пратеничката група на ДУИ остана без еден пратеник во Собранието

Магдалена Андонова — Mon, 07 Sep 2020 19:15:19 +0000

Пратеничката група на ДУИ е послаба за еден пратеник во Собранието на Република Македонија. Пратеникот Исмаил Јахоски кој беше кандидиран на листата на ДУИ во изборната единица 5 веќе не е пратеник на партијата на Али Ахмети туку стана независен пратеник. Јахоски не фигурира на листата на пратеници од редовите на ДУИ туку под графата независни пратеници. Исмаил Јахоски е познат на јавноста како еден од најбогатите македонски политичари. Тој во повеќе наврати беше градоначалник на општина Пласница а е сопственик на компанијата Пуцко петрол која се споменуваше во низа милионски тендери за набавка на нафта од државни и локални институции. Јахоски пред повеќе од еден месец се споменуваше како еден од двајцата пратеници кои што биле таргетирани од Зоран Заев како можни конвертити од ДУИ во СДСМ. Тогаш Заев според партиски извори на Јахоски му ветувал бенефиции доколку премине во СДСМ која тогаш се обидуваше да прави влада со Алијанса за Албанците и Алтернатива. На Јахоски тогаш му било речено дека има повеќе пратеници од ДУИ и ВМРО-ДПМНЕ кои би ја поддржале владата предводена од СДСМ, АА и Алтернатива. Зошто Јахоски сега во Собранието е под графата “Независни” не објаснува ниту тој ни ДУИ но партиски извори велат дека откако тој бил “таргетиран” од Заев структури во ДУИ барале Јахоски кој е значаен финансиер на кампањите на ДУИ да се повлече од Собраниската функција и да го препушти местото на друг “сигурен” пратеник на ДУИ. Тој е еден од 62 пратеници кои кренаа рака за избор на новата влада и засега нема најава дека би ја повлекол поддршката за актуелната власт но не е јасно дали поддршката ја дава како човек на Ахмети или на Заев. Јахоски е Турчин по националност и за него е карактеристично што на објавените фотографии во јавноста најчесто покрај македонското го поставува турското знаме без користење на албанското знаме.