истражна постапка – Kurir.mk

Пресечен меѓународен транспорт на марихуана – истражна постапка против четири лица

Тале Кристо — Fri, 01 Apr 2022 12:46:58 +0000

Предметниот обвинител од Основното јавно обвинителство за гонење на организиран криминал и корупција постапувајќи по кривичната пријава поднесена од страна на СВР Штип донесе Наредба за спроведување истражна постапка против четири лица, од кои тројца косовски и еден македонски државјанин. Постои основано сомнение дека осомничените сториле кривично дело Неовластено производство и пуштање во промет наркотични дроги, психотропни супстанции и прекурсори по член 215 став 3 вв ст.1 од Кривичниот законик. Осомничените во текот на месец март оваа година неовластено организирале, заради продажба набавиле, држеле и пренесувале наркотична дрога марихуана со вкупна тежина од 88.150 грама, од Р.Косово до с.Никуштак – кумановско, а потоа до Штип, со намера дрогата да биде пренесена до Р.Турција како крајна дестинација. Косовските државјани, откако неовластено ја набавиле наркотичната дрога и на засега неутврден начин неовластено ја пренеле на територијата на РС Македонија, ја сместиле на засега неутврдена локација во с.Никуштак. Потоа организирале и го ангажирале четвртоосомничениот дрогата неовластено да ја пренесе до Штип, од каде понатаму требало да се транспортира до Р.Турција. За таа цел осомничените косовски државјани, напладне на 30 март на граничниот премин „Блаце“, со возило со германски регистарски таблички, оствариле легален влез во земјава, по што се сретнале со четвртоосомничениот во близина на рафинеријата „ОКТА“ и му дале насоки со возило неовластено да ја пренесе марихуаната од с.Никуштак до Штип. Четвртоосомничениот со патничко моторно возило со кумановски регистарски таблички се упатил кон с.Никуштак од каде во близина на тамошното училиште се сретнал со повеќе НН лица од кои ја презел марихуаната. Откако ја сместил дрогата во багажниот простор и на задните седишта во возилото, се упатил кон Штип, каде се паркирал на паркинг пред угостителски објект. Во исто време пристигнале и тројцата косовски државјани, двајца од нив се упатиле кон паркингот, а третиот со патничкото моторно возило заминал кон Скопје од каде подоцна на граничниот премин „Блаце“ ја напуштил територијата на РС Македонија. Во меѓувреме полициските службеници ги забележале тројцата осомничени околу возилото на паркингот и им дале знак да застанат. Двајцата косовски државјани не ја испочитувале наредбата и се дале во бегство, но набргу биле совладани од страна на полициските службеници, па сите тројца затекнати осомничени се лишени од слобода. При прегледот на возилото биле пронајдени вкупно 92 полиетиленски пакувања со растителна материја за која со вештачење е утврдено дека е марихуана во вкупна количина од 88.150 грама. Тројцата приведени осомничени беа изведени пред судија на претходна постапка при Основниот кривичен суд Скопје. Обвинителот, ценејќи дека се исполнети условите предвидени во Законот за кривична постапка, поднесе Предлог за определување на мерка притвор против сите осомничени лица. Предлогот беше прифатен од страна на судијата на претходна постапка при Основниот кривичен суд Скопје и на осомничените со Решение им определи мерка притвор во траење од 30 дена. Мерката притвор е определена и за третоосомничениот и истата ќе се применува по неговото пронаоѓање. Акцијата е резултат на претходна меѓуинституционална меѓународна размена на информации на служби за борба против дрога и Одделот за криминалистичка полиција во координација со надлежниот јавен обвинител. Во меѓувреме, Министерството за внатрешни работи продолжува со преземање на интензивни мерки за пронаоѓање на засега непознато лице кое со ТМВ требало да ја преземе наркотичната дрога марихуана од Штип и да ја пренесе до Република Турција.

Приведено лице од Кратово за спроведување истражна постапка

Тале Кристо — Thu, 30 Dec 2021 09:58:59 +0000

На 29.12.2021 во 15.00 часот на бул.„Кузман Јосифовски Питу“ во Скопје, полициски службеници од Единицата за интервентна полиција при СВР Скопје го лишиле од слобода А.Г.(28) од Кратово. Тој бил баран по локален распис за спроведување истрага за сторено кривично дело по член 261 од Кривичниот законик. Тој бил приведен и предаден во Полициската станица Аеродром за понатамошна постапка.

Наредба за спроведување на истражна постапка против четири лица, осомничени за трговија со дрога

Тале Кристо — Thu, 16 Dec 2021 10:10:24 +0000

Надлежен јавен обвинител од Основно јавно обвинителство за гонење на организиран криминал и корупција донесе Наредба за спроведување на истражна постапка против четири лица, поради постоење на основано сомнение дека сториле кривично дело „Неовластено производство и пуштање во промет наркотични дроги, психотропни супстанции и прекурсори” по чл.215 ст.3 од Кривичниот законик. По повеќемесечна предистражна постапка, вчера во попладневните часови, под раководство на јавен обвинител од Основно јавно обвинителство за гонење на организиран криминал и корупција, од страна на Одделот за сузбивање на организиран и сериозен криминал и полициските службеници од ОВР Гостивар беше спроведена координирана полициска акција. Во акцијата е разбиена организирана криминална група и е пресечен канал за меѓународен транспорт и недозволена трговија со дрога. Воедно се запленети околу 100 кг наркотична дрога – марихуана во вкупна вредност од околу 300.000 евра. Тројцата гостиварци и едно лице од Дебар, со цел да се стекнат со противправна имотна корист, набавиле наркотична дрога – марихуана и ја сместиле во објект во гостиварско. Во текот на вчерашниот ден, по претходен договор, ја предале на еден од пријавените, кој за одреден паричен надомест требало да ја транспортира дрогата со товарно возило до Р.Бугарија. Околу 17.15 часот, на патарината „Глумово“ при преглед во товарното возило „ман“ со приколка, со дебарски регистарски ознаки, од страна на полициските службеници биле пронајдени 19 црни вреќи со 189 пакувања марихуана. Приведените лица во текот на денешниот ден ќе бидат изведени пред Судија на претходна постапка со предлог да им биде изречена мерка притвор.

ОЈО Гостивар бара притвор за Кичевскиот поради сомнеж дека предизвикал тешка сообраќајна несреќа

Магдалена Андонова — Tue, 07 Sep 2021 16:51:20 +0000

Основното јавно обвинителство Гостивар донесе Наредба за спроведување истражна постапка против едно лице осомничено за кривично дело – Тешки дела против безбедноста на луѓето и имотот во сообраќајот според член 300 став 2 во врска со член 297 став 1 од Кривичниот законик. На 4 септември, на магистралниот пат Кичево-Гостивар, осомничениот како учесник во сообраќајот на јавните патишта не се придржувал кон прописите и го загрозил јавниот сообраќај. Движејќи се со патничко моторно возило „Мерцедес“ со кичевски регистарски ознаки, тој на критичното место не ја прилагодил брзината на движење според состојбите и условите на патот и на видно обележана полна надолжна линија започнал престигнување на возилото пред него – автомобил „БМВ“ со тетовски регистарски ознаки. Во истиот момент, во обратна насока кон Кичево се движел автомобил „Санг Јонг“ со гостиварски ознаки, на кое осомничениот му го попречил патот, па директно удрил со предниот десен дел од „Мерцедесот“ во предниот десен дел од автомобилот „Санг Јонг“. Удреното возило со левиот страничен дел, пак, удрило и во автомобилот „БМВ“ кој бил претекнуван. Во несреќата, животот го загубил сопатник во автомобилот „Санг Јонг“, четири лица се здобиле со тешки телесни повреди, а тројца, меѓу кои и осомничениот, се здобиле со телесни повреди. Поради опасност од бегство, можност за влијание врз сведоците/оштетените и можност за повторување на делото, јавниот обвинител до судијата на претходна постапка од Основниот суд во Гостивар достави предлог за определување мерка притвор за осомниченото лице.

Поведена истражна постапка против 4 лица – одгледувале канабис

Магдалена Андонова — Fri, 03 Sep 2021 10:59:08 +0000

Постапувајќи по поднесената кривична пријава, Основното јавно обвинителство Гевгелија донесе Наредба за спроведување истражна постапка против четири лица, едно од с.Негорци и тројца од Гевгелија, заради постоење на основано сомневање дека сториле по едно кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик. Едновремено, обвинителството до Судијата на претходна постапка при Основниот суд Гевгелија поднесе Предлог за определување мерка притвор против осомничените, бидејќи постојат околности кои го оправдуваат стравот дека ќе се дадат во бегство. Осомничените во периодот од мај до септември 2021 година неовластено заради продажба произведувале наркотична дрога марихуана на седум локации на м.в.„Жабјак“ во близина на с.Негорци. Тие засадиле по околу 100 семки од растението канабис, ги наводнувале, ги отстранувале непотребите листови, ги врзувале со манила за да не се скршат. На 1 септември 2021 година, кога растенијата биле во фаза на цветање и со висина од 20 до 280 сантиметри, осомничените биле затекнати од страна на овластени службени лица во намерата да ги соберат цветните завршетоци за да ги сушат. При тоа, вкупно биле пронајдени 381 стебло од растението канабис односно по 95-96 стебла кај секој од осомничените. Од страна на Судијата на претходна постапка при Основниот суд Гевгелија се донесени решенија со кои на осомничените им е определен куќен притвор во траење од по 30 дена.

Еден осомничен за пренесување две торби со марихуана кај Прилеп

Магдалена Андонова — Thu, 10 Dec 2020 09:41:12 +0000

Постапувајќи по поднесена кривична пријава, Основното јавно обвинителство Прилеп донесе Наредба за спроведување истражна постапка против едно лице од струшко Калишта за кого постои основано сомневање дека сторил кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик. Осомничениот, на возраст од 46 години, на 8 декември на патниот правец Битола-Прилеп во неговото патничко моторно возило Ауди А3 неовластено заради продажба пренесувал наркотична дрога марихуана во количина од 53,066 килограми. Дрогата била спакувана во 2 патни торби, од кои во едната имало 30, а во другата 23 пакувања со наркотична дрога марихуана. Кога сообраќајната полиција му дала знак да застане, осомничениот не ја почитувал наредбата и со голема брзина се упатил кон Прилеп. Од полициски службеници бил пресретнат кај селото Тополчани и повторно му бил даден знак да застане, но тој не застанал туку продолжил да се движи со голема брзина. Кога со возилото стигнал во селото Штавица со голема брзина поминал низ центарот на селото и во местото викано Леништа го запрел возилото, излегол и во близина на патот ги исфрлил двете патни торби со наркотична дрога. Потоа влегол во возилото и повторно со голема брзина се упатил на патот кон Прилеп, па кога стигнал кај с.Старо Лагово бил сопрен и контролиран од страна на службени лица на ОВР Прилеп. Основното јавно обвинителство Прилеп до судијата на претходна постапка од Основниот суд Прилеп поднесе предлог за определување мерка притвор против осомничениот, ценејќи дека постои опасност тој да се даде во бегство, да ги прикрие трагите од кривичното дело или да го повтори делото. Судијата го прифати предлогот и на осомничениот му определи притвор во траење од 30 дена.

Истражна постапка против скопјанец кај кого е пронајдено оружје

Магдалена Андонова — Fri, 21 Aug 2020 17:30:04 +0000

Основното јавно обвинителство Скопје донесе Наредба за спроведување истражна постапка против 28-годишен скопјанец за сторено кривично дело недозволено изработување, држење и тргување со оружје или распрскувачки материи. Јавното обвинителство соопшти дека оружјето било пронајдено откако осомниченот бил лишен од слобода од полицијата поради нарушување на јавниот ред и мир. -Притоа, тој почнал вербално да се заканува дека ќе употреби огнено оружје. Оружјето, пиштол марка „zoraki M 906-B“ и 30 куршуми, што осомниченото лице ги поседувало без дозвола, при извршен претрес биле пронајдени во помошни простории во домот каде тој живеел со своите родители, соопшти Обвинителството. Заради обезбедување непречено водење на кривичната постапка, јавен обвинител од Основното јавно обвинителство Скопје до Основниот кривичен суд Скопје достави Предлог за определување мерка притвор за осомничениот. Судот со решение на осомничениот му определи мерки на претпазливост – забрана за напуштање на живеалиште односно престојувалиште, задолжително јавување пред надлежен орган и привремено одземање на патната исправа. (MИА)

Истражна постапка против скопјанец за марихуана, се бара мерка притвор

Тале Кристо — Sun, 15 Dec 2019 10:31:02 +0000

Основното јавно обвинителство Скопје донесе Наредба за спроведување истражна постапка против 27-годишен скопјанец, осомничен за сторено кривично дело „неовластено производство и пуштање во промет на наркотични дроги, психотропни супстанции и прокуроси“ од член 215 став 1 од Кривичниот законик. Како што соопшти Обвинителството, осомничениот, на 14 декември во својот дом во Влае, неовластено заради продажба држел наркотична дрога – марихуана и ја чувал заради натамошна продажба. При претрес на домот и други простории, овластени службени лица пронашле две тегли со наркотична дрога – марихуана во вкупна количина од 28,66 грама и две дигитални ваги со остатоци од психотропни супстанции кои влегуваат во состав на растението „канабис“. – Бидејќи постојат околности кои упатуваат дека осомничениот би можел да се даде во бегство или да го повтори кривичното дело, со цел негово обезбедување во текот на кривичната постапка, надлежниот јавен обвинител до судијата на претходна постапка од Основниот кривичен суд Скопје достави и Предлог за определување мерка притвор, стои во соопштението.