италија-англија – Kurir.mk

Англија – Италија вечерва на „Вембли“, финален дуел за европскиот трофеј

Ивона Петрова — Sun, 11 Jul 2021 07:26:37 +0000

Стадионот „Вембли“ во Лондон вечерва од 21 часот ќе биде домаќин на финалето на 16. Европско фудбалско првенство во кое домаќинот Англија ја пречекува репрезентацијата на Италија. Англичаните немаат европски трофеј во својата историја, а вечерва ќе го играат своето прво големо финале од 1966 година кога на истиот стадион ја освоија титулата светски првак. Репрезентацијата предводена од Герет Саутгејт ќе се обиде да го повтори успехот на Италија од 1968 година, кога Азурите ја освоија својата прва и засега единствена европска титула, совладувајќи ја во финалето на домашен терен во Рим поранешна СФР Југославија. Оттогаш, Италијанците уште два пати стигнаа до финалните натпревари на Европските првенства на кои беа поразени во 2000 и 2012 година. Финалето од трибините на култниот „Вембли“ ќе го следат 60.000 навивачи, кои во огромно мнозинство ќе бидат Англичани. Очекувани состави: Италија – Донарума, Ди Лоренцо, Бонучи, Кјелини, Емерсон Барела, Жоржињо, Верати, Киеза, Имобиле, Инсиње. Англија – Пикфорд, Вокер, Стоунс, Мегваер, Шо, Филипс, Сака, Маунт, Стерлинг, Кејн.

Кјелини: Ќе биде неверојатно тешко против Кејн

Ивона Петрова — Sat, 10 Jul 2021 07:39:37 +0000

Дефанзивецот на Италија, Џорџо Кјелини, го сподели своето мислење за играта на напаѓачот Хари Кејн пред финалето на Евро 2020 против Англија. – Ќе биде тешко, неверојатно тешко. Отсекогаш ми се допаѓала неговата игра. Се сеќавам на еден од неговите први натпревари во 2015 година за Англија – тогаш игравме во Торино. Дури и тогаш, тој ме импресионираше. Имав можност да играм против него на натпреварот против Тотенхем. Тој знае како да дејствува од длабочина, да испорачува топки, да продира. Постигнува голови со глава, со удари од далечина, неверојатен е, изјави Кјелини. Финалето на ЕВРО 2020 ќе се игра утре во Лондон на „Вембли“ со почеток во 21 часот.

Холанѓанецот Бјорн Кујперс ќе го суди финалето помеѓу Италија и Англија

Ивона Петрова — Fri, 09 Jul 2021 05:50:18 +0000

Бјорн Кујперс од Холандија ќе го суди финалето на УЕФА ЕУРО 2020 помеѓу Италија и Англија, што ќе се одигра во недела на 11 јули во 21 часот на стадионот „Вембли“ во Лондон, објави вчера Комитетот за судии на УЕФА. Кујперс е првиот Холанѓанец што ќе суди Европско финале. Има 48 годишни а меѓународен судија е од 2006 година. Финалето на УЕФА ЕУРО 2020 ќе биде негово седмо финале на УЕФА натпреварување. На годинешниот завршен турнир на ЕУРО, тој судеше два натпревари во групната фаза – пораз на Данска од Белгија со 2-1 и победа на Шпанија со 5-0 против Словачка, како и победа на Данците во четвртфиналето од 2-1 против Чешка. Тој беше назначен и за четврт судија за победата на Англија во групната фаза од 1-0 против Хрватска. На финалето во недела на Кујперс ќе му асистираат холандските асистенти Сандер ван Рокел и Ервин Зеинстра, додека, Карлос Дел Серо Гранде од Шпанија ќе биде четврти судија. Улогата за видео-помошник судија (ВАР) му е доделена на Бастијан Данкерт од Германија, кого ќе го придружуваат Пол ван Бокел од Холандија, Кристијан Гителман и Марко Фриц, двајцата од Германија. Хуан Карлос Јусте Хименес од Шпанија го комплетира составот како помошник судија на резерви. Кујперс беше член на судиската екипа на УЕФА ЕУРО 2012, Светското првенство во фудбал во 2014 година во Бразил, ЕУРО 2016 и на Светското првенство во фудбал во Русија 2018 година.