иван гешев – Kurir.mk

ЕК најостро го осудува обидот за атентат врз бугарскиот државен обвинител

Катерина Бојаџиева — Tue, 02 May 2023 12:13:02 +0000

Европската комисија денеска соопшти дека најостро го осудува обидот за бомбашки атентат на главниот обвинител на Бугарија. Дознавме за ова недозволиво дејствие, рече портпаролот на комисијата во одговор на прашање на прес-конференција, јави БТА. „Ова е бесмислен и кукавички чин на насилство за кој нема место во нашето општество. Очекуваме националните власти одлучно и брзо да ги изведат сторителите на овој грозоморен чин пред лицето на правдата. Засега не можевме да претпоставиме кои се причините за таквиот напад“, додаде портпаролот. Вчера попладне одекна експлозија на патот, во момент кога автомобилот на главниот обвинител на Бугарија, Иван Гешев и неговата колона се движела на патот од Самоков кон Софија. - Главниот обвинител бил цел на убиство, изјави заменик-главниот обвинител и директор на Националната истражна служба Борислав Сарафов. Тој нагласи дека не станува збор за заплашување, туку за обид за атентат. Сарафов извести дека дошло до екстремно силна експлозија и дека од експлозијата е формиран кратер со длабочина од 30-40 см и дијаметар од близу три метри. -Експлозивната направа очигледно била наменета да убие. Не била со намера да заплаши, рече заменик-јавниот обвинител.

Главниот обвинител на Бугарија бил цел за убиство, се огласи обвинителството

Ивана Ефремовски — Mon, 01 May 2023 13:32:05 +0000

Главниот обвинител на Бугарија бил цел на убиство, изјави заменик-главниот обвинител и директор на Националната истражна служба Борислав Сарафов на брифинг во врска со инцидентот со колоната на главниот обвинител Иван Гешев, што се случи рано денеска на патот меѓу градот Самоков и селото Ковачевци. Сарафов даде детали во близина на местото каде што се случила експлозијата, јави БТА. Тој нагласи дека не станува збор за заплашување, туку за атентат и нагласи дека нема жртви. (МИА)

Инцидент со автомобил од обезбедувањето на главниот бугарски обвинител

Ивана Ефремовски — Mon, 01 May 2023 11:45:30 +0000

Експлозивна направа оштетила автомобил од обезбедувањето на бугарскиот главен обвинител во момент додека се движел на патот Софија - Самоков. Според првични информации на бугарски медиуми пред еден од автомобилите од обезбедувањето била активирана експлозивна направа. Засега не е јасно дали главниот обвинител Иван Гешев бил во некој од автомобилите. Повредено е лице од обебзедувањето. Патот е затворен и се врши истрага, јавија бугарските медиуми. (МИА)

Главниот обвинител на Бугарија ги награди оние кои помогнаа да се спаси паднатиот српски автобус

Тале Кристо — Fri, 02 Sep 2022 16:07:53 +0000

Главниот обвинител на Бугарија, Иван Гешев ги награди седумтемина бугарски државјани кои им пружија прва помош на настраданите во тешката несреќа со српскиот автобус на 14 август на автопатот Тракија. Како што јави дописникот на МИА од Софија, церемонијата се одржа во Судската палата во Софија, а присуствуваше и српскиот амбасадор во Бугарија, Жељко Јовиќ. Јавниот обвинител им врачи плакети и заслуги на д-р Христо Стефанов, д-р Антон Елкин, Петар Канев, Живко Стамболиев, Ивилина Шкембиева, Илијан Шмилев и Теодор Бочев за нивната граѓанска храброст во брзата помош на повредените српски државјани. Гешев во име на Обвинителството на Република Бугарија им се заблагодари на наградените и изјави дека за жал живееме во време кога добрата вест е лоша вест, а по неколку дена се сè заборава. И српскиот амбасадор во Бугарија им честиташе на спасувачите на неговите сонародници.

Гешев: Уште еден руски дипломат шпионирал во Софија, соработувал со бугарски генерал од резервата

Катерина Бојаџиева — Wed, 02 Mar 2022 10:50:12 +0000

Бугарското Специјално обвинителство и Државната агенција за национална безбедност (ДАНС) собрале податоци за истрага за шпионажа во корист на Руската Федерација, се дознава од објава на Твитер на државниот обвинител Иван Гешев. Тој ги испратил податоците до министерката за надворешни работи на Бугарија, Теодора Генчовска. Како што јави дописникот на МИА од Софија, според Гешев, рускиот дипломат соработувал со бугарски генерал од резервата, кој имал пристап до доверливи информации. Ова е седми случај на руски дипломати кои се занимаваат со шпионажа на територијата на Бугарија.

Главниот бугарски обвинител доаѓа во Скопје да ги преземе ДНК примероците за идентификација на жртвите

Ивона Петрова — Thu, 25 Nov 2021 08:04:36 +0000

Главниот бугарски обвинител Иван Гешев во придружба на истражители денеска ќе дојде во Скопје за лично да поднесе барање за правна помош до Обвинителството во Северна Македонија. Бугарските обвинители треба да добијат ДНК профили од роднини на загинатите во автобуската несреќа заради идентификација на жртвите. Како што јавува дописникот на МИА од Софија, денеска Бугарското обвинителство треба да објави нови информации за трагедијата. Во меѓувреме, продолжува истрагата за тешката автобуска несреќа во која загинаа 45 лица на автопатот „Струма“ во Бугарија. Бугарската телевизија „Нова“ јави дека шест истражители од Националната истражна служба и тројца обвинители од Подрачното обвинителство во Перник работат на предистражната постапка. Портпаролката на главниот обвинител Сијка Милева уверува дека во најкус можен рок, бугарските истражители ќе ги добијат потребните документи од нивните македонски колеги, јавува дописникот на МИА од Софија. Во меѓувреме, седумтемина преживеани остануваат на лекување кај Пирогов. Нивната состојба е стабилна. Двајца од преживеаните вчера се оперирани. Еден од нив има длабока изгореница на двете раце. Здравствените власти размислуваат оние кои се стабилни да си одат дома кај своите најблиски.

Бугарскиот главен обвинител Иван Гешев не поднесува оставка

Тале Кристо — Thu, 16 Jul 2020 08:44:53 +0000

„Категорично кажувам дека нема да поднесам оставка“, изјави денеска бугарскиот главен обвинител Иван Гешев од градот Сливен, каде пристигна за да ја предводи големата акција на специјалните сили предводена од обвинителството против домашниот криминал, јави дописникот на БГНЕС. -Јас продолжувам да се борам против мафијата и домашниот криминал и да работам за народот, рече главниот обвинител. Според него, државата отстапила од малцинските групи, кои и натаму остануваат необразовани и извршуваат кривични дела. (МИА)