Иван Пешевски – Kurir.mk

Пешевски: Со новите измени на законот се предвидува 72 работни часа неделно, а последици од тоа ќе бидат жртви на градилиштата

Тале Кристо — Tue, 23 May 2023 09:02:30 +0000

Во гостувањето на 24 телевизија претставникот на Синдикатот за градежници Иван Пешевски се осврна на последните измени на законот за работни односи кои се во процес на усвојување во Собранието на Република Македонија. Тој посочи дека измените на законот се против уставни и за тоа има одлука на Уставниот суд, а посебниот закон кој сега се носи ќе ги опфати сите работници, бидејќи секој може да се повика дека неговиот проект е од национален интерес. -Со сигурност ги уверувам сите гледачи дека ова повторно ќе падне на уставен суд, бидејќи нема горна граница на прекувремените часови, поинаку се изигрува законот за работни односи и дека ќе биде бетер законско решение од она што го оспорувавме на Уставен суд. Со ова законско решение ќе треба по 72 работни часа неделно да се работи, тоа ќе биде паѓање во несвест по градилиштата, жртви и затоа ќе имаме потреба да ги оспоруваме ваквите членови пред Уставен суд- рече Пешевски. Тој истакна дека и досегашното законско решение воопшто не е лошо и со 40 часа работна недела, ако зголемиме двојно вработени истиот проект ќе се заврши во истиот рок за истата цена. Согласност за толку прекувремени часови не смее да потпише никој. Самата согласност е противуставна. Правото на дневен, неделен и годишен одмор е уставно загарантирано од кое што не смее да се откаже вработениот. Со ваква согласност ќе направите нов систем на “банка саати“. Државниот инспекторат за труд нема доволен капацитет само секторот градежништво да го следи, а камоли сите останати.- дополни Пешевски и посочи дека голем дел од парите кои ќе се исплаќаат за прекувремена работа нема да влезат воопшто во домашниот пензиски фонд заради тоа што нема ангажман на домашни работници и капацитети. Ниедна домашна компанија не е повикана од Бехтел и Енка да потпише договор како подизведувач, да земе ваква работа и тој работник да биде платен колку што кажува министерката за Труд и социјална политика. Ниеден! Рокот веќе тече, дали ќе се плаќаат пенали или не , не знаеме, и јас ве убедувам дека нема да ги возиме тие коридори за 5 години, само заради лоши владини политики, а не поради лоши работници. Владата го крие договорот и не ја дава работата на нашите, затоа што никој инспектор нема да влезе на тоа градилиште кога ќе ја земе работата Бехтел и Енка- заклучи Пешевски.

Пешевски: Како синдикат на градежништво бевме приморани да го оспориме пред Уставниот суд специјалниот закон кој беше донесе за „Бехтел и Енка“

Дарко Андоновски — Mon, 22 May 2023 20:29:19 +0000

„Секторот градежништво е една важна дејност во државата која брои 7% од вкупниот број вработени. Специјалниот закон кој беше донесен за „Бехтел и Енка“ имаше предвидување 60 часовна работна недела за кој како синдикат за градежништво и сојуз на синдикати на Македонија бевме приморани да го оспориме пред Уставниот Суд“, изјави Иван Пешевски од синдикат на градежништво во вечерашното гостување во емисијата „24 Анализа“ на Телевизија 24. Тој и посочи дека станува збор за неуставна измената со законот да се работи 60 часовно неделно. „Тој договор требаше да предвиди 51% домашни компании и домашни работници, а до ден денес тоа го немаме. Како Влада не се пофаливте дека давате работа на домашна компанија и дека домашните работници сте ги обезбедиле со работа“, кажа Пешевски. Пешевски посочи дека како Влада требаше да се покажете во изминатиот период да ги довршите сите отпочнати автопатишта. „Се троши домашен буџет пари од граѓаните кој се даночни обврзници за парите да бидат изнесени надвор од конзорциумот „Бехтел и Енка“ без при тоа никој да не даде денар во пензискиот и здравствениот фонд“, кажа Пешевски. Пешевски е дециден дека овој проект со „Бехтел и Енка“ е бетер проект и уште го немаме видено, а парите се потрошени.

Пешевски: Собранието и Владата да внимаваат на работничката класа, да го вреднуваат трудот на работникот

Ивона Петрова — Tue, 01 May 2018 09:44:34 +0000

Претставниците во Собранието и во Владата треба да внимаваат на работничката класа, бидејќи преку нас работниците се остваруваат сите благодати во оваа земја. Ние сме тука да покажеме колку бројни и колку сме сложни. Во име на солидарноста да им порачаме да го вреднуваат трудот на работникот и да има достоинствена работа за сите, истакна на протестниот марш пред македонскиот Парламент Иван Пешевски од Синдикатот за градежништво при ССМ. Рече дека работниците треба да имаат пристојни и повисоки плати, регрес за годишен одмор на сите, подобар општ колективен договор и во јавниот и во приватниот сектор, безбедни работни места. Бараме, додаде, да се стави крај на дискредитацијата и да се стави крај на мобингот и покачување на границата на старосната пензија. - Сите наши барања ќе продолжиме да ги доставиме до Владата бидејќи патиштата се различни, но целта ни е една – Да живее работничката класа на Република Македонија и да ние е среќен Први Мај, рече Пешевски. Пред Парламентот протестниот марш на Сојузот на синдикатите се приклучија ССНМ кои заедно продолжија кон Владата на Република Македонија.