иванка василевска – Kurir.mk

Василевска до Меџити: Дали владата и министерството за здравство немаат капацитет за справување со проблемите во здравството или тоа сепак на некому лично му одговара во фармацевтски сектор?

Ивана Ефремовски — Tue, 17 Oct 2023 15:30:53 +0000

Денес на Анкетната комисија за онкологија во Собранието прашање до актуелниот министер Меџити постави пратеничката од редовите на ВМРО-ДПМНЕ, Иванка Василевска кој што праша дали постои во други држави и како го оправдува министерот постоењето на сегментиран систем за обезбедување и плаќање лекови за пациентите во јавни здравствени установи, дали се почитува ЕУ директивата за транспарентност 89/105, и дали владата и министерството немаат капацитет за справување со проблемите во здравството или тоа сепак на некому лично му одговара.

„Од политички аспект ќе сублимирам две три прашања, ако можете да ми ги одговорите, дали постои во други држави и како го оправдувате постоењето на сегментиран систем за обезбедување и плаќање лекови за пациентите во јавни здравствени установи како што е тоа во нашата држава и ден денес со паралелни системи за обезбедување на лекови? Дали сте размислувале за соединување на сите тие процеси во еден процес? Позитивна листа како што е во другите земји и како што препорачува ЕУ директивата за транспарентност 89/105“ праша Василевска.

„Имаме сознанија дека исти лица и се вклучени како членови во повеќе работни тела, комисии за лекови во министерството за здравство, Малмед, во владата, значи се однесува на зголемувањето на цените, позитивна листа тендери, регистрација на лекови итн., дали тоа точно? Дали сметате дека таквата ситуација е конфликтна самата по себе?- тоа е второто прашање на пратеничката Василевска.

Василевска праша и дали владина гарнитура, министерството за здравство и институциите од здравствениот систем немаат доволен капацитет за справување со сите предизвици и проблеми или сепак тоа на некој лично му одговара во фармацевскиот сектор.

„Дали на тој начин ќе потврдите дека оваа владина гарнитура министерството за здравство и институциите од здравствениот систем немаат доволен капацитет за справување со сите предизвици и проблеми поврзани со системски прашања или некому лично му одговара таквата поставеност и нефункционалност во фармацевтски сектор и здравствениот систем. Сметам дека најдобро е да се следи текот на парите. На тој начин ќе ги видите и другите проблематики кои се поврзани со овие прашања и ќе го отворите вртлогот“ нагласи Василевска.

Василевска: Ковачевски и Османи можеби не се засегнати, но засегнат е македонскиот народ кој може да изгуби се, а да не добие ништо, ваков предлог и ултиматум не е европска вредност

Катерина Бојаџиева — Fri, 18 Aug 2023 08:53:40 +0000

Ова е велепредавство кое не смее да се дозволи, ова можеби не ги засега Ковачевски и Османи, ова го засега македонскиот народ. Губиме се, не добиваме ништо. Процесот за ЕУ треба да започне со Копенхашките критериуми, а не со условувања за јазик, историја и идентитет, изјави пратеничката од ВМРО-ДПМНЕ, Иванка Василевска за „Клик плус“ на ТВ 21. Василевска потенцираше дека барањата на Бугарија не се само Бугарите во Устав и тоа може да се види во Декларацијата која се изгласа во бугарскиот Парламент, како и Протоколот кој го потпиша Бујар Османи. - Тоа изгледа навидум техничко прашање, но таму има прашања кои ја ревидираат историјата. Прашањето со ваков предлог и ултиматум не е европска вредност. Може да се добијат подобри позиции но со државотворна партија која ќе се грижи за македонските интереси, нагласи Василевска. Таа додаде дека јасно е барањето на Бугарија да прифатиме дека сите во Македонија пред 1944 биле Бугари. Не може да се преговараат вакви прашања кои директно задираат во идентитетот на македонскиот народ. Сега Бугарите сакаат и декларација за бугаризација на илинденското востание. Погледнете ги протоколите, декларациите во Бугарија, рече Василевска. Василевска истакна дека сите се добредојдени во блокот за одбрана на македонските интереси за процес во ЕУ во кој нема да се задира во македонските државни и национални интереси, туку ќе се бара како и за сите други да важат исклучиво Копенхашките критериуми.

Василевска: Уставните измени се бугарски диктат бидејќи се потпрени на неколку аспекти кои што се антимакедонски и антидржавни

Катерина Бојаџиева — Fri, 18 Aug 2023 08:36:29 +0000

Малкумина периодот ја консултираа катедрата по државно правна историја, а тоа е правно историски науки на Правниот факултет „Јустинијан први“ во Скопје. И тоа е најстарата катедра на Правниот факултет и генерално на Универзитетот. И токму тие прашања и ние научно ги работиме, а јас еве судбински имам можност да учествувам и да бидам дел и да бидам сведок на еден процес кој што се случува денеска. И морам да ви кажам тоа е бугарски диктат, де факто диктат бидејќи е потпрено на неколку аспекти кои што се антимакедонски, антидржавни, истакна Иванка Василевска, пратеник од редовите на ВМРО-ДПМНЕ во гостување во утринската емисија на ТВ21 говорејќи за уставните измени. Василевска додаде дека уставните измени ја проблематизираат македонската историографија која што е градена па веќе повеќе од 80 години официјално како државен конструкт ако се земе од АСНОМ. Пратеничката потсети и на 14-те пресуди од Стразбур кои што Бугарија воопшто не ги почитува. „Значи 14 пресуди официјални кои што не ги донеле македонски судии, гледаме каков тип на судство има Македонија. Тие 14 пресуди се темелат на аспектите кои што се релевантни на тие тужби кои што ги покренале Македонците од Бугарија пред Судот во Стразбур и резултатот е тој. И тоа се поништува се за сметка на онаа Декларација која што ќе ве потсетам Каракачанов и Борисов ја донесоа значи ја предложија и ја усвоија, а е изградена во овој Протокол кој што Бујар Османи вонинституционално и вон согласност на Собранието ја прифати“, рече таа. Таа посочи дека по ова прашање не само Македонците туку сите граѓани треба да имаат цврст и недвосмислен став. Ова прашање со уставните измени не е евроинтегративно прашање, ова е наметнато прашање кое што беше подметнато од бугарска страна. Во текот на емисијата Василевска нагласи дека уставни измени нема да има, нема да има под овие околности и под бугарски диктат.

Василевска: Фокусот на оваа владејачка гарнитура е да изграбат што повеќе пари и да си ги наполнат своите сметки

Ивона Петрова — Mon, 31 Jul 2023 17:00:56 +0000

Сите сте свесни колку многу афери и колку многу криминали излегоа последниве неколку години. Во последната година мислам дека на дневно ниво барем по 2-3 скандали и тоа челни лица на владејачката коалиција и кога ќе видете за колку пари станува збор, за какви објекти станува збор и за какви дејствија станува збор, 24 годишно момче води милионерски бизнис,се водат фамилијарни бизнис, тоа е нереално, истакна пратеничка Иванка Василевска, пратеник од ВМРО-ДПМНЕ во своето гостување во емисијата „За или против“. Василевска во текот на своето гостување посочи дека оваа владејачка гарнитура врши рекет врз голем број на фирми се со цел да си ги наполнат своите сметки. Имено таа укажа и на незадоволството на стопанските комори и заклучи дека токму поради сето ова кое го прави владејачката гарнитура е толку ниска и довербата во судството. -Секој ако има можност нека си заработи пари, ама чесно. Со политичка моќ, со рекет, знаете дека не постои фирма во државата каде што треба да платат на владејачката партија, на одредени центри на моќ. Зошто стопанските комори се толку разиграни, зошто се толку револтирани? Зошто граѓаните губат доверба, зошто ни е 3% доверба во судство, сето тоа е еден систем поврзан кој што ја покажува вистинската слика на ова владејачка гарнитура и во такви услови кога нивниот фокус е да изграбаат што повеќе пари и средства и да стават на своите приватни сметки да имаат што повеќе моќ на тој начин бидејќи веројатно, знаете празни луѓе кои што немаат друго ништо освен пари, тоа е како шагринска кожа ја продале својата душа за одредени материјални бенефити и тоа ќе ги одразува и тие губат чувство и за одговорност и за својата функција. Дури и своите функции не ги доживууваат како што би требало да ги доживуваат. Тоа би требало да им биде чест, да водат одреден историски моментум, на една нација која што е удрена со многу прашања и дилеми кои треба да се разрешат, рече таа. Ивановска порача дека за секој криминал, корупција кои се прават во државата треба обвинителството и органите да поведат сметка затоа што во државата има сериозни индиции за сериозни криминали. -Како тој криминал, како таа корупција која ја извршиле или во кој учествувале да го покријат затоа што тоа се одговара, тоа се дела кои што неминовно треба да поминат низ филтер, низ проверка. Треба обвинителството и органите во државата сериозно да си поведат сметка затоа што имаме сериозни индиции за сериозни криминали, вели Ивановска.

Василевска: Да верувате дека уставните измени ќе бидат последно барање на Бугарија е како да прифатиме дека ќе се напиеме отров и ќе умреме

Ристе Здравков — Wed, 12 Jul 2023 10:26:04 +0000

Немам информација дека Бојан Маричиќ или Бујар Османи разговарале со некои од пратениците на ВМРО-ДПМНЕ. Тоа е само еден спин и обид за манипулирање на јавноста за да се создаде впечаток дека опозицијата е несинхрозирана и да се создаде раздор, вели пратеничката на ВМРО-ДПМНЕ Иванка Василевска во интервјуто за „Република“.

Таа знае и што ќе му каже ако Маричиќ и се јави.

-Мислам дека кај мене нема да се јави, ниту едниот ниту другиот. Маричиќ добро ми го познава карактерот и знае дека некои телефонски линии се секогаш зафатени. Исто така не гледам на каков начин Бујар Османи би се обидел да допре бидејќи моите ставови беа јасно искажани, рече Василевска.

Професорката е убедена дека парламентарната демократија во Македонија не постои а тоа се докажува и со тоа што министри се обидуваат да влијаат на пратеници иако Собранието треба да контролен механизам на Владата, а не обратно.

-Собранието е една проформа институција која само проформа ги изведува своите активности. Во суштина е само една арена во која не се слушаме едните со другите, не се води политички дијалог. Извршната и судската власт се целосно потчинети, владеат диктаторски и имаат потценувачки однос кон институцијата пратеник. Оваа владејачка номенклатура која сега ја има заробено Македонија има таков однос кон институциите на системот бидејќи ништо од тоа не го почувствувале, ниту се бореле ниту пак ја разбираат тежината и значењето на системот, истакнува пратеничката Василевска.

Професорката со неиспраќањето на уставните амандмани власта купува време.

-Можеби се обидуваат и да најдат некаков канал и да извршат притисок. Со овие луѓе се можно и затоа сме будни. Нашиот став е јасен, претседателот Мицкоски кажа дека повеќе нема што да се дискутира и единствено што останува е одржување на изборите и на изборите да излеземе пред граѓаните со програми и да им понудиме опции за Македонија. Како ќе одлучат македонските граѓани така ќе тераме понатаму, потенцираше Василевска.

Василевска вели дека на Османи кого го нарекува доктор по професија и „сваштолог“ во политика му е дозволено да прави анкети на необјавени амандмани за уставните измени и да одлучува за мнозинскиот македонски народ и неговиот идентитет.

-Ова не е антиалбански став, ова е македонски став. Во тој став се содржани етичките нормативи кои го ставаат Османи пред две опции- да се повлече од функцијата додека се реши прашањето или пак да биде максимално кооперативен со мнозинската македонска заедница бидејќи таа македонска заедница која пред 2001-ва година беше конститутивен македонски народ овозможи Османи да ги ужива сите привилегии дури и да има повеќе привилегии како етнички Албанец. Навредлив е начинот на кој што тој се однесува и ги навредува чувствата на Македонците и на сите кои навистина ја сакаат Македонија и македонската држава. Го кажувам ова отворено иако знам дека ова може да се испинува. Веќе имав закани по живот од нив уште минатата година и многу ми е јасен демократскиот капацитет и на Османи и на ДУИ. Во концептот што Османи го пропагира во кој влегува и овој билатарален договор кој сега е дел од таа преговарачка рамка што е надвор од Копенхашките критериуми .Османи веројатно не е добро информиран бидејќи не е ни образуван да ги разбере позадинските аспекти на таквиот тип на договори кои во никаква смисла не не доближуваат до ЕУ, децидна е Василевска.

Професорката ја оценува и работата на историската комисија.

-Кога се дискутирало за средниот век немало ниту еден експерт за средниот век од Институтот за национална историја или од факултетот. Во исто време кога тие така лесно се раздадоа професорот Митко Панов објави во странство книга наречена „Ослепената држава“ која е преведена на македонски јазик дури по некоја година. Секој што сака да дознае што бил Самоил, што се нации и национализам, што е припадност нека ја прочита книгата и ќе му биде јасно. Дека за ова прашање не може да се бави комисија потврда дава и Бугарија која ова прашање го извади од академските кругови и го внесе во политичката реторика a во неа учествуваат и најнеписмениот и најобразованиот. И тука критериумот кој е? Прашува професорката.

Василевска потсетува дека бугарската стратегија на нивната академија почна уште кога Македонија излезе од Југославија.

-Точно е дека тие нѐ признаа како суверена држава но не го признаа македонскиот народ и јазик. Тој процес не е застанат. Крајната цел е да го дерогира постоењето на било каков континиум и етногенезата како и комплетно претопување. Целта е да докажат дека Охрид е втората, но и најважна столица на бугарштината и дека вековната заложба на Бугарите за обедивање на сите „бугарски“ територии ќе заврши со овој процес и нивната амбиција да го искористат овој историски моментум кога ЕУ се наоѓа во една пресвртница. Во еден таков систем да верувате дека тоа е последното барање на Бугарија и после ќе се вратиме на правосудството треба да прифатиме дека сега ќе се напиеме отров и ќе умреме, истакнува пратеничката од ВМРО-ДПМНЕ.

Професорката е убедена дека последните анкети на кои ВМРО-ДПМНЕ има убедлива предност не се случајни бидејќи партијата е браник на македонските национални интереси.

-ВМРО-ДПМНЕ е единствената опција за сите разбудени и освестени македонски граѓани. Друг избор и шанса да си ја вратиме државата немаме-смета професорката.

Василевска за ставот на Маричиќ дека ќе разговара поединечно со секој пратеник: Претседателот Мицкоски е многу јасен, Маричиќ ќе го добие истиот одговор, Уставни измени под бугарски диктат нема

Катерина Бојаџиева — Tue, 13 Jun 2023 07:49:46 +0000

Иванка Василевска, пратеничка во Собранието во своето гостување на радио Лидер зборуваше за темата поврзана со Уставни измени и му одговори на вицепремиерот Бојан Маричиќ дека ниту еден пратеник од ВМРО-ДПМНЕ нема да учествува во тие разговори. Имено Маричиќ во свое гостување рече дека ако не продолжи дијалогот со ВМРО-ДПМНЕ, тие од СДСМ ќе тргнат да разговараат со секој еден пратеник од опозицијата. -Не верувам дека кај мене ќе се јави вицепремиерот. Но, и да се јави кај било кој од колегите мислам дека ќе го добие истиот договор. Мислам дека и претседателот Мицкоски кажа многу јасно ако е Димитар Ковачевски е толку сигурен нека го стави тоа на дневен ред во Собрание, нека се покаже, ќе се преброиме и ќе видиме колку сме и што сме, рече пратеничката Василевска во своето гостување. Имено пратеничката Василевска потенцираше дека веќе една година во Собранието неколку пратеници од владејачкото мнозинство се изјасниле дека нема да подржат Уставни измени и дека тоа е против нивните принципи и убедувања. -Тенка им е работата. Ќе ви кажам нешто други што провејува во Собранието изминатите неколку месеци можеби и година. Неколку пратеници од владејачкото мнозинство децидно се изјаснија дека нема да го подржат тоа, дека тоа е против нивните принципи и убедувања. Значи тие во нивното јато, во нивниот двор немаат единствен став, а не па сега ќе доаѓаат кај нас, кажа таа.

Василевска од Охрид: Св. Климент тука ја создал Охридската книжевна школа, низ која поминале 3500 ученици, ова е светско наследство

Катерина Бојаџиева — Fri, 09 Jun 2023 17:29:18 +0000

Македонија е мајка и крстосница низ која што поминувале различни народи, различни освојувачи, добронамерници, многу од нив оставиле своја трага, многу од нив земале од тука и однеле на друго место. Но сепак, Македонија останува вечна, непроменета, исконска, силна, позитивна и непресушен извор на една голема, би рекла универзална севселенска енергија која што е задржана и целосно преточена во генетскиот код на најубавиот писар на Македонија, тоа е Охрид, вели пратеничката на ВМРО-ДПМНЕ, Иванка Василевска од денешната трибина во Охрид во рамките на акцијата „Ова е Македонија за сите“, на тема „Политики за силна култура и развиен туризам“. Таа посочи дека со огромен пиетет, со нескриена радост и лјубов денеска ја имам честа да говорам за некој кој што многу повеќе од секој еден од нас, некој кој што ги надминува границите на времето и на просторот и некој кој што ќе остане уште многу милениуми по нас да биде симбол на духовната сила, на верата во Христа и на духовната нитка на македонското потекло, на македонското тло кој извира од ликот на Свети Климент Охридски. „И ако го отворите неговото свето житие, ќе видите дека Свети Климент, не знаеме ни кој му биле родители, ни тоа од каде потекнува, но затоа знаеме дека најголем духовен учител и духовен татко му бил Свети Методиј заедно со неговиот брат Свети Кирил. Да бидете роден во време и да бидете посинет од овие рамноапостоли е чест на ниво на раѓањето на Господ Исус Христос. И за секој еден православен христијанин, но и за секој еден љубител на историјата на религијата, морам да ви кажам, дека овој чин не може да го гледаме еднострано или било како да го оставиме настрана, бидејќи делото на Свети Кирил и Методиј и она што тие ќе го остават во наследство на своите верни ученици, Свети Климент Охридски и Свети Наум Охридски се безвременски, неограничени, универзални и ќе важат и ќе траат во сите времиња“, рече Василевска. Таа потсети дека Свети Климент Охридски е сведок на моментот на светото вдахновение на Свети Кирил, кога тој ја создава глаголицата која што се формира на трите свети симболи на христијанската православна црква, кои се крстот, тријаголникот и кругот. „На тој начин настанува глаголицата и во времето кога најмногу хеленските свештеници и хеленското влијание во Византиската империја имаат силен одраз и практично ги бришат јазичните и културните идентитети, впивајќи ги сите во својот голем империјалистички композит. Браќата Свети Кирил и Методиј заедно со своите ученици ќе направат една светска цивилизациска мисија, која е пред се македонска, а потоа и сесловенска. И не случајно Свети Климент е патронот на Македонската православна црква и не е случајно тоа што во 886 година од новата ера, токму тука во Охрид е создадена Охридската книжевна школа низ која поминаа 3500 или 3600 ученици“, истакна Василевска.

Василевска: Договорот е потпишан позади затворени врати, без законска издржаност и со многу сериозни импликации за нарушување на Уставот и законите

Ристе Здравков — Thu, 25 May 2023 12:47:07 +0000

„Јас сметам и верувам во правото на говор и верувам во правото секој еден претставник на граѓаните на македонското Собрание да има право да ги искаже аргументите, тие треба да бидат навистина на добра насока за граѓаните да создадат впечаток и на крајот секако тоа сите добро го знаеме одговорот ќе го добиеме на изборите. И сите тогаш ќе видиме како навистина тие нас нѐ гледаат“, истакна Иванка Василевска, пратеник од редовите на ВМРО-ДПМНЕ на денешната собраниска седница. „А, што гледаме ние тука? Гледаме низа на неколку еве да речам една шепа на закони кои се менуваат како потреба на еден договор кој што е потпишан на еден нетранспарентен начин“, укажа Василевска. Таа посочи дека договорот е потпишан позади затворени врати, без законска издржаност и со многу сериозни импликации за нарушување на Уставот и законите на Република Македонија. „Постојат индиции дека има многу криминал и многу прекршувања на Уставот и законите со носењето на ваквите одлуки. Дали сте свесни дека вашите потписи кои што ги ставивте дека ќе имаат импликации и утре ќе бидете вие тие кои што ќе треба да го докажувате своето учество во истите или вашата невиност“, ги запраша Василевска пратениците од владејачкото мнозинство. Таа додаде дека начинот на кој што власта направи да се избегне целата процедура укажува дека има многу сериозни криминални индикации.

Василевска: Наместо да зборуваме разрешување на министерот за земјоделие Николовски поради матните криминални зделки, ние дискутираме за неговиот заменик

Ристе Здравков — Tue, 28 Feb 2023 17:34:23 +0000

Наместо денес да говориме за неспособноста и матните зделки на министер за земјоделие Љупчо Николовски, ние расправаме за неговиот заменик, невидлив за јавноста, рече Иванка Василевска пратеничка од ВМРО-ДПМНЕ на денешната собраниска седница. Василевска ги спомена сите сомнителни доделувања на земјоделско земјиште. Најголемиот дел од земјоделското земјиште кое што е распределило, го има добиено лице кое што е блиско до власта, лице кое нема механизација, а ниту пак заслужува да работи земјиште во Свети Николе, а со адреса на живеење е во Скопје. Преку една фирма добил преку 70 хектари земјиште во атарите на село Сопот и Преод и лицето практично го узурпира земјиштето, кое наместо да има биде доделено на локалното население кое насушно егзистира од земјата, му се доделува магично на овој човек. Затоа е дискутабилно и симптоматично што никој од власта не се зафати да го провери ова и наместо да се земе на одговорност Николовски, ние денеска го дискутираме разрешувањето на неговиот заменик, сметаа Василевска. Василевска посочи дека со промена на власта ќе следува одговорност за сите. Престанете да ја продлабочувате оваа дупна без дно на партизираност. Ова што денеска ни се случува, верувајте ќе не чини скапо, рече таа.

Василевска за реконструкција на владата: Ова менување е од шупливо во празно

Дарко Андоновски — Mon, 27 Feb 2023 15:58:15 +0000

Влада за национална пропаст, вака Иванка Василевска започна со денешниот говор од собраниската говорница на која се дискутира за именување на новите министри во владата на СДС, ДУИ и Алијанса на Албанците. Василевска истакна дека оваа владино прекројување е само инженеринг и обид за да се отвори и промени македонскиот устав. Ова владино прекројување и ова ново некакво владино мнозинство не е ништо друго, туку инженеринг кое што треба да донесе до можноста или обид да се промени уставот или да се отвори уставот, рече таа. Според Василевска ова е реконструкција од шупливо во празно, посочувајќи дека и покрај тоа што во ресорите земјоделство и култура има неуспех, денеска се разговара за именување на министри во здравство, правда, информатичко општество и животна средина, додавајќи дека не верува дека нешто ќе се смени во следните 10 месеци колку што им преостанува. Навидум ова е некаков обид за владина реконструкција, но во суштина менување од шупливо во празно. Тактика која што треба да купи време и да направи обид за да се направи уште еден многу несмасен удар врз унитарноста и она што е национално и државно достоинство, потенцираше Василевска. Не можам да поверувам дека последните 10тина месеци колку што ви преостануваат од вашето владеење ќе направите било што. Единствено што ќе направите со новиот коалиционен партнер е да наполните нечии џебови, да се обидете да подмирите стари долгови, децидна е таа.